ಗುಬ್ಬಿಗೂಡಾದ ಜೇನುಗೂಡು

ಹೇಳಿ ಕೇಳಿ ನಮ್ಮ ಮನೆಯ ಹೆಸರು ಜೇನುಗೂಡು. ಜೇನು ಹುಳುಗಳು ಆಗೊಮ್ಮೆ ಈಗೊಮ್ಮೆ ಬರುತ್ತೆ ಅನ್ನಿ. ಅದಕ್ಕಿಂತ ಹೆಚ್ಚಿನ ಸಂತೋಷವೆಂದರೆ, ಕಳೆದ ಒಂದು ವಾರದಿಂದ ನಮ್ಮ ಮನೆಯಲ್ಲಿ ಒಂದು ಗುಬ್ಬಿ ಜೋಡಿ ಮನೆ ಮಾಡಿಕೊಂಡು ಇದೆ. ಅಷ್ಟೇ ಅಲ್ಲ. ಮೊಟ್ಟೆಯನ್ನೂ ಇಟ್ಟಿದೆ.

ನಾರುಗಳನ್ನು ಹೆಣೆದು ಹೆಣೆದು, ಗೋಲಾಕಾರದಲ್ಲಿ ಗೂಡು ಕಟ್ಟಿ, ಸರಿಯಾಗಿ ಮಧ್ಯದಲ್ಲಿ ಮೊಟ್ಟೆ ಇಟ್ಟಿವೆ. ನನಗಂತು ತುಂಬಾ ಅಂದ್ರೆ ತುಂಬಾ ಸಂತೋಷವಾಗ್ತಾ ಇದೆ.

ನೆನ್ನೆ, ಮೊನ್ನೆ ಮಳೆ ಬರುತ್ತಿದ್ದರಿಂದ, ಗುಬ್ಬಿ ಗೂಡನ್ನು ಬಿಟ್ಟು ಆಚೆ ಹೋಗಿರಲೇ ಇಲ್ಲ. ಈ ದಿನ ಸ್ವಲ್ಪ ಹೊತ್ತು ಮೊಟ್ಟೆಗಳನ್ನು ಬಿಟ್ಟು ಹೋಗಿತ್ತು. ಆಗ ಕಂಡ ದೃಶ್ಯವೇನೆಂದರೆ, ಆ ಮೊಟ್ಟೆಗಳನ್ನು ತಿನ್ನುವುದಕ್ಕೋಸ್ಕ್ರರ ಒಂದು ಕಾಗೆ ಹೊಂಚು ಹಾಕ್ತಾ ಇದೆ. ಈ ಗುಬ್ಬಿಗಳು ಕಿಲಾಡಿ, ಆ ಕಾಗೆ ಹೋಗಲು ಸಾಧ್ಯವಿಲ್ಲದ ಜಾಗದಲ್ಲಿ ಗೂಡು ಕಟ್ಟಿವೆ. 

ಗೂಡಿರುವ ಜಾಗದ ಹತ್ತಿರ ಒಂದು ಹಿಡಿ ಅಕ್ಕಿ ಕಾಳು ಮತ್ತು ನೀರನ್ನು ಇಟ್ಟಿದ್ದೀನಿ. ಗುಬ್ಬಿಗಳಿಗೆ ಇನ್ನೂ ಏನಾದರು ಮಾಡಬೇಕೇ ತಿಳಿಸಿ.