ಗಾದೆಗೊಂದು ಗುದ್ದು

(೫೧) ಕಾಯುವುದೆಂದರೆ ಅದೊಂದು ಹಿಂಸೆ. ಏಕೆಂದರೆ ಅದು ಬಂದಾಗ ’ಕಾಯುವ’ ದುಶ್ಚಟವೂ ಅದರೊಂದಿಗೆ ಬಂದುಬಿಡುತ್ತದೆ!

(೫೨) ಜಗತ್ತಿನ ಬಗ್ಗೆ ಎಂದಿಗೂ ಅಚ್ಚರಿಪಡಬೇಡಿ. ಅದೆಷ್ಟು ತಿಕ್ಕಲು ಎಂದು ತಿಳಿಯಬೇಕಾದರೆ ಕನ್ನಡಿ ನೋಡಿಕೊಳ್ಳಿ ಸಾಕು!

(೫೩) ’ಶೂನ್ಯ’ ಎಂಬ ನಿರಂತರವಾಗಿ ಪ್ರಸಾರವಾಗುವ, ನಿರಂತರ ಮೆಗಾಸೀರಿಯಲ್ಲಿನ ನಡುವಿನ ’ಕ್ಷಣಿಕ ವಿರಾಮವನ್ನು’ ಬದುಕು ಎನ್ನುತ್ತೇವೆ. ಈ ಸತ್ಯವನ್ನು ನಂಬಲಿಚ್ಛಿಸದವರು ದೇವರು, ತೀರ್ಥಯಾತ್ರೆ, ಮೋಕ್ಷ, ದೈಹಿಕ ವಾಂಛೆ ಮತ್ತು ಮ್ಯಾಕ್ ಡೋನಾಲ್ಡ್ ಪಿಝ್ಜ ಮುಂತಾದ ಜಾಹಿರಾತನ್ನು ಹೆಚ್ಚು ಹೆಚ್ಚು ಅನುಭವಿಸಲಿಚ್ಛಿಸುತ್ತಾರೆ.

(೫೪) ನೋವೆಂಬುದು ನೋವಿನ ಭಯದಲ್ಲಿದೆ. ಸತ್ತವರಿಗಾಗಿ ನಾವು ಅಳುತ್ತೇವೆಯೇ ಹೊರತು ಸ್ವತಃ ಅವರು ದುಃಖಿಸುವುದಿಲ್ಲ! Read more about ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು ೧೧

(೬೧) ನಾನು ಬೇಸರವನ್ನು ಕುರಿತಂತೆ ಒಂದು ಆಸಕ್ತಿಕರ ಪುಸ್ತಕವನ್ನೋದಿದೆ. ಆಸಕ್ತಿದಾಯಕ ವಿಷಯಗಳನ್ನು ಕುರಿತ ಒಂದು ಒಣಪುಸ್ತಕವು ಮನುಷ್ಯನನ್ನು ಸಿನಿಕನನ್ನಾಗಿಸುತ್ತದೆ.

(೬೨) ಪ್ರತಿಯೊಂದರಲ್ಲೂ ಆಸಕ್ತಿಯನ್ನು ಹೊಂದಬೇಕೆಂದು ಬಲ್ಲವರು ಹೇಳುತ್ತಾರೆ.ಹಾಗಿದ್ದಲ್ಲಿ ಬದುಕು ನಿಜಕ್ಕೂ ಏಕತಾನವಾಗಿಬಿಡುತ್ತದೆ. ಏಕತಾನತೆಯು ಬೇಸರದ ಮೊದಲ ಹೆಜ್ಜೆಯಲ್ಲವೆ?

(೬೩) ವಿಶ್ವವನ್ನು ಕುರಿತು ರೋಮಾಂಚನಗೊಳ್ಳಬೇಕಾದ ಅವಶ್ಯಕತೆಯಿಲ್ಲ, ಅದೂ ಸ್ವತಃ ತಾವುಗಳೇ ಅದರ ಭಾಗವಾಗಿರುವಾಗ!

(೬೪) ನಗರದ ರಸ್ತೆಗಳ ಮೇಲೆ ಓಡಿಯಾಡುವುದೆಂದರೆ ನಿಮ್ಮ ಅಕ್ಕಪಕ್ಕದ ಸವಾರರನ್ನು ಸರ್ಹವರ್ತಿಗಳೆಂದು ಭಾವಿಸದೇ ಸಂವಹಿಸುವುದು. ಅಪಾರ್ಟ್‌ಮೆಂಟ್‍ಗಳಲ್ಲಿ ಬದುಕುವುದೆಂದರೆ ಸಂವಹಿಸದೆ ಸಹವರ್ತಿಗಳನ್ನು ಹೊಂದಿರುವುದು! Read more about ಬೇಸರವು ಆಸಕ್ತಿಯ ಸಹವರ್ತಿಯಾದಾಗ ವಿಶ್ವವೇ ರೋಮಾಂಚನದ ಸಂವಹನವಾಗುತ್ತದೆ!

(೭೧)ಬಹಳಷ್ಟು ಜನರು ನೀನು ಏನಾಗಿದ್ದೀಯೋ ಅದಕ್ಕಾಗಿ ನಿನ್ನನ್ನು ಇಷ್ಟಪಡುತ್ತಾರೆ. ಮಿಕ್ಕುಳಿದವರು ನಿನ್ನನ್ನು ಅದೇ ಕಾರಣಕ್ಕಾಗಿ ದ್ವೇಷಿಸಲು ಇಷ್ಟಪಡುತ್ತಾರೆ!

(೭೨) ಅಸ್ತಿತ್ವದಲ್ಲಿರುವ ಪ್ರತಿಯೊಂದು ಕಾಡೂ ಸಹ ಮನುಷ್ಯನ ಸೋಲಿನ ಸಂಕೇತವಾಗಿದೆ. ಅದನ್ನು ಆತ ವಸಾಹತೀಕೃತಗೊಳಿಸಲಾಗದ ಸೋಲು ಅದು!

(೭೩) ಮಿಕ್ಕುಳಿದ ಜಗವು ಮಾನವರ ಸಹಾಯದಿಂದ ಅವರುಗಳನ್ನೇ ಏಕೆ ಬಂಧಿಸಿಟ್ಟುಕೊಂಡಿದೆ ಎಂದು ಮೃಗಾಲಯದೊಳಗಿನ ಪ್ರಾಣಿಗಳು ಅಚ್ಚರಿಪಡುತ್ತವೆ. ಮತ್ತು ತಮ್ಮನ್ನು ಅದರೊಳಗಿಂದ ಏಕೆ ಬಿಡುಗಡೆಗೊಳಿಸಲಾಗಿದೆ ಎಂದೂ ಅರ್ಥವಾಗದೆ ಚಿಂತಿಸುತ್ತವೆ!

(೭೪) ಕಾಡಿನ ಕಸದ ತೊಟ್ಟಿಯನ್ನು ಉದ್ಯಾನವನ ಎನ್ನುತ್ತೇವೆ! Read more about ಉದ್ಯಾನವೆಂಬುದು ಕಾಡಿನ ಕಸದ ತೊಟ್ಟಿಯಾದರೆ ಮೃಗಾಲಯದ ಹೊರಗಿನ ಜಗವು ಸೆರೆವಾಸ!

(೮೧) ನೀವು ಎಂದೂ ಯಾರಿಗೂ ದಾಟಿಸಲಾಗದ ಗುಟ್ಟೊಂದನ್ನು ಹೇಳುವೆ. ಅರ್ಥವಾಯಿತೆ?!

(೮೨) ನಿಮ್ಮನ್ನು ಅಹ್ವಾನಿಸದ ಅಥವ ಹೊರದಬ್ಬದ, ಆದರೆ ನಿಮ್ಮ ಮನೋಭೂಮಿಕೆಯಿಂದ ಹೊರಹೋಗಲಾರದ್ದನ್ನು ಪ್ರೆಸ್‍ಕ್ಲಬ್ ಎನ್ನುತ್ತೇವೆ!

(೮೩) ಬದುಕಿಗೊಂದು ಗುರಿ ಇರಬೇಕು. ಅಸಂಗತವಾದ ಬದುಕನ್ನು ಹೇಗೆ ಎದುರಿಸಬೇಕೆಂಬ ಪರಿಹಾರ ಕಂಡುಕೊಳ್ಳುವ ಗುರಿಯಾಗಿರಬೇಕು ಅದು!

(೮೪) ನಮ್ಮ ಮನೆಯ ಆಗುಹೋಗುಗಳನ್ನು ಮಾತ್ರ ಬದಿಗಿರಿಸಿ ಜಗತ್ತಿನ ವ್ಯವಹಾರಗಳಿಗೆ ಕಣ್ತೆರೆದು ಕೂರುವ ತಂತ್ರವನ್ನು ದೂರದರ್ಶನ ಎನ್ನುತ್ತೇವೆ.

(೮೫) ನಿಮಗೇನಾದರೂ ಯಾವಾಗಲಾದರೂ ಗುಂಡು ತಗುಲಿದರೆ, ನಿಮಗೆ ಶುಭಾಶಯಗಳು! ಜಗತ್ತಿನಲ್ಲಿ ಒಬ್ಬರಾದರೂ ತಮ್ಮ ಗಮನವನ್ನು ಆಕಸ್ಮಿಕವಾಗಿಯೋ ಅಥವ ಮಾರಣಾಂತಿಕವಾಗಿಯೋ ನಿಮ್ಮೆಡೆ ’ಕೇಂದ್ರೀಕರಿಸಿದ್ದಾರೆ’ ಎಂದರ್ಥ! Read more about ಪ್ರೆಸ್‍ಕ್ಲಬ್ ಎಂಬುದೊಂದು ಗುಟ್ಟಾದರೆ ದೂರದರ್ಶನವು ನಿಮ್ಮನ್ನು ಹೊರತುಪಡಿಸಿದ ಸುದ್ಧಿಯಾಗುತ್ತದೆ!

(೯೧) ಆಗಾಗ, ಕೆಲವೊಮ್ಮೆ, ಹಲವು ಸಲ ಮತ್ತು ಎಲ್ಲ ಕಾಲಕ್ಕೂ ನಾವು ಬೇಸರಪಡುವುದೇಕೆ? ಈ ಪ್ರಶ್ನೆಯನ್ನು ನಿರಂತರವಾಗಿ, ನಿಯಮಿತವಾಗಿ ಕೇಳಿಕೊಂಡರೆ, ಆ ಕ್ರಿಯೆಯ ಒಳಗೇ ಉತ್ತರ ಅಡಕವಾಗಿಬಿಟ್ಟಿರುತ್ತದೆ!

(೯೨) ನಾವಿಬ್ಬರೂ ಪರಸ್ಪರ ಅಪರಿಚಿತರಾದರೂ ಸಹ, ಇದನ್ನು ಸಾವಿರ ವರ್ಷದ ನಂತರ ನೀವು ಓದಿದರೂ ಸಹ, ನಮ್ಮಿಬ್ಬರ ಸಂಬಂಧವು ಹದಿನಾರು ಪದಗಳ ಹಿಂದೆ ಪ್ರಾರಂಭಗೊಂಡಿದೆ. ಹಲೋ!

(೯೩) ಸ್ಪೂರ್ತಿ ಅನ್ನುವುದರ ವ್ಯಾಖ್ಯೆ ಬರೆಯಲು ಕಾಯುತ್ತಿದ್ದೇನೆ...

(೯೪) ಸರಿಯಾಗಿ ತೊಡಗಿಸಿಕೊಳ್ಳದೆ ದೊರಕಿದ ಸಾಫಲ್ಯವು ಸೋಲು. ಅಪೂರ್ಣವಾದರೂ ಯೋಜನೆಯೊಂದರ ಮನಃಪೂರ್ವಕ ಅನುಷ್ಠಾನವೇ ಗೆಲುವು! Read more about ಬೇಸರವೆಂಬ ಸೋಲನ್ನು ಅಪರಿಚಿತವಾದ ಸ್ಫೂರ್ತಿಯು ಗೆಲುವನ್ನಾಗಿ ಮಾರ್ಪಡಿಸಬಲ್ಲದು

(೧೦೧) ನಾನು ವಿಶ್ವದ ಕೇಂದ್ರ. ಏಕೆಂದರೆ ಕೇಂದ್ರ ಎಂಬುದು ವೃತ್ತವೊಂದರ ಮೇಲಿನ ಚಿಕ್ಕೆಯಾಗಿದ್ದು ಆ ವೃತ್ತದ ಕೇಂದ್ರವು ಮತ್ತೆಲ್ಲಿಯೋ ಇರುತ್ತದೆ!

(೧೦೨) ಕೆಲಸಕ್ಕೆ ಬರದ ಜಾಗದಿಂದ ಪ್ರಯೋಜನವಾಗುವ ಸ್ಥಳಕ್ಕೆ ಕರೆದೊಯ್ಯುವುದನ್ನು ರಸ್ತೆ ಎನ್ನುತ್ತೇವೆ. ಅಲ್ಲಿ ಕೆಲಸ ಪೂರೈಸಿದ ನಂತರ ಮತ್ತೆ ರಸ್ತೆಯು ಅಪ್ರಯೋಜಕ ಜಾಗದಿಂದ ಪ್ರಯೋಜನದ ಸ್ಥಳಕ್ಕೆ ನಮ್ಮನ್ನು ಕರೆದುಕೊಂಡು ಬರುತ್ತದೆ. ಪ್ರತಿದಿನ ಮನೆ ಮತ್ತು ಆಫೀಸುಗಳ ನಡುವಣ ಓಡಾಟ ಅಂತಹದ್ದು.

(೧೦೩) ಆತ್ಯಂತಿಕ ಹೇಳಿಕೆಃ ಯಾರು ಏನೇ ಹೇಳಿದರೂ ನೀವು ಸ್ವತಃ ಅದನ್ನು ಯೋಚಿಸಿ, ನಂಬಿ, ಅನುಭವಿಸುವವರೆಗೂ ನಂಬಿಬಿಡಬೇಡಿ--ಈ ನನ್ನ ಉಪದೇಶವನ್ನೂ ಸಹ! Read more about ಕೇಂದ್ರವೂ ವೃತ್ತವಾದಾಗ ಯಾರನ್ನೂ ನಂಬದಿರುವುದೇ ಸತ್ಯ!

(೧೧೧) ನೀವು ಎಂದಿಗೂ ಅನುಭವಿಸಲಾಗದ ಆನಂದದ ಅತ್ಯುತ್ಕಟಾವಸ್ಥೆಯನ್ನು ’ಮೋಕ್ಷ’ ಎನ್ನುತ್ತೇವೆ. ಯಾವಾಗಲೂ ಅದನ್ನು ಬೇರೆ ಯಾರೋ ಹಿಂದಿನ ಕಾಲದಲ್ಲೇ ಅನುಭವಿಸಿದವರಾಗಿರುತ್ತಾರೆ. ಮೋಕ್ಷ ಭೂತ. ಯಾವುದೇ ಸಾಧನದಿಂದಲೂ, ಯಾವ ಕಾಲಕ್ಕೂ ದೊರಕಲಾರದಂತಿದ್ದರೂ ಅದರ ಚಟವನ್ನು ಮಾತ್ರ ಹುಟ್ಟಿಸಬಲ್ಲಂತಹ ಅಭಿಪ್ಸೆಯೇ ಮೋಕ್ಷ!

(೧೧೨) ನಿನಗೆ ನಿರಂತರ ಮರೀಚಿಕೆಯಾಗಿರುವುದನ್ನು ಮೋಕ್ಷ ಎನ್ನುತ್ತೇವೆ. ನಿನ್ನನ್ನೇ ನಿರಂತರವಾಗಿ ಅರ್ಥೈಸಿಕೊಳ್ಳಲಾಗದ ನಿನ್ನದೇ ಕಲ್ಪನೆಯನ್ನು ದೇವರೆನ್ನುತ್ತೇವೆ!

(೧೧೩) ನೀನು ಇತರರಿಗೆ ಧಾರಾಳವಾಗಿ ನೀಡಲಿಚ್ಛಿಸುವುದು, ಆದರೆ ಸ್ವತಃ ಎಂದಿಗೂ ಬಯಸದೇ ಇರುವುದನ್ನು ’ಹಿಂಸೆ’ ಎನ್ನುತ್ತೇವೆ! Read more about ಮೋಕ್ಷದಿಂದ ಮುಕ್ತಿಗಾಗಿ ದೈವಕ್ಕೆ ಕೃತಜ್ಞವಾಗಿರಬೇಕಾದ ಹಿಂಸೆಗೆ ಪರಿಹಾರ ಕುಡಿತ!

(೧೨೧) ಯಾರ‍ಾದರೂ ನಿಮ್ಮೆಡೆ ಗುರಿ ಇಟ್ಟಲ್ಲಿ ನೀವು ಅಜರಾಮರರಾಗುವ ಅವಕಾಶ ಪಡೆದಿರಿ ಎಂದರ್ಥ. ಕ್ಯಾಮರದಿಂದ ಗುರಿ ಇಟ್ಟಲ್ಲಿ ಒಂದು ಛಾಯಾಚಿತ್ರವಾಗಿ, ಬಂದೂಕಿನಿಂದ ಗುರಿ ಇಟ್ಟಲ್ಲಿ ’ಸ್ಮೃತಿ’ಯಾಗಿ ಅಮರರಾಗುತ್ತೀರಿ!

(೧೨೨) ನಮಗೇನೂ ಗೊತ್ತಿಲ್ಲದಿರುವುದರ ಬಗ್ಗೆ ಏನೂ ಗೊತ್ತಿಲ್ಲ ಎಂಬ ಅನುಮಾನದಿಂದ ನಾವು ಕಲಿಯುತ್ತೇವೆ. ಕಲಿಯುವುದೆಂದರೆ ಗೊತ್ತಿಲ್ಲದಿರುವುದರ ಇರುವಿಕೆಯನ್ನು ಅನ್ವೇಷಿಸುವುದೇ ಆಗಿದೆ. ಅನ್ವೇಷಿಸುವುದೆಂದರೆ ಗ್ರಹಿಕೆಗೊಂದು ಅಂಗವನ್ನು ಸೇರ್ಪಡೆ ಮಾಡಿದಂತೆಯೇ.

(೧೨೩) ಕಲಿವುದೆಂದರೆ ನಮ್ಮ ಪೂರ್ವಜರು ಏನನ್ನು ಮರೆತಿದ್ದರೆಂಬುದನ್ನು ಪುನರಾವಲೋಕನ ಮಾಡುವುದೇ ಹೊರತು ಅವರು ’ಏಕೆ’ ಮತ್ತು ’ಏನನ್ನು’ ಕಲಿತಿದ್ದರೆಂಬುದನ್ನು ಮರೆವುದಲ್ಲ!

(೧೨೪) ಮೊದಲ ವಸ್ತ್ರವನ್ನು ಧರಿಸಿದ ಕೂಡಲೆ ಮಾನವ ನಿಸರ್ಗದಿಂದ ತನ್ನನ್ನು ಬೇರ್ಪಡಿಸಿಕೊಂಡುಬಿಟ್ಟ. ತೊಡದಿದ್ದರೆ ಸಂಕೋಚವಾಗಬೇಕಿರುವುದು ಆಕೆಗೇ ಎಂದೂ ನಂಬಿಸಿಬಿಟ್ಟ! ಮೊಟ್ಟಮೊದಲ ವಸ್ತ್ರವು ಪ್ರಾಣಿಯ ಚರ್ಮವೇ. ಮತ್ತು ಅದು ಮಾನವ ಪ್ರಾಣಿಯ ಚರ್ಮವಂತೂ ಅಲ್ಲವೇ ಅಲ್ಲ. ಮೊದಲ ನೈಸರ್ಗಿಕ ವಸ್ತ್ರವು ಮಾನವ ಚರ್ಮವೇ ಆಗಿದ್ದರೂ ಸಹ, ನೈಸರ್ಗಿಕ ವಸ್ತ್ರವನ್ನು ತೊಡೆದು ಹಾಕಿದ ಮೊದಲ ಘಟನೆಯೆಂದರೆ ಮಾನವನಿರ್ಮಿತ ವಸ್ತ್ರದ ಮೊದಲ ಪ್ರಯೋಗವೆಂದೇ ಅರ್ಥ. ಅದು ಮೊದಲ ಪ್ರಾಣಿಹಿಂಸೆಯ ಸಂಕೇತವೂ ಹೌದು!

(೧೩೧) ದಂತಕಥೆಗಳು ಪ್ರಕ್ಷುಬ್ಧತೆ, ನೋವು ಮತ್ತು ಹಿಂಸೆಯನ್ನು ಉದ್ದೇಶಿಸುತ್ತವೆ. ಜನರು ಅದನ್ನು ಮರೆಯುವಂತೆ ಮಾಡುವ ಮೂಲಕ ಉದ್ದೇಶಿಸಲಾಗುತ್ತದೆ ಅವುಗಳನ್ನು! ವಿಶೇಷವೆಂದರೆ ಆ ದಂತಕಥೆಗಳೊಳಗಿನ ಪಾತ್ರಧಾರಿಗಳು ಮಾತ್ರ ಇವೆಲ್ಲವನ್ನೂ ಅನುಭವಿಸಬೇಕಾಗಿ ಬರುತ್ತವಷ್ಟೇ!

(೧೩೨) ನಿಜದಲ್ಲಿ ಏನನ್ನು ಕಳೆದುಕೊಂಡಿದ್ದೇವೆಯೋ ಅದನ್ನು ಕಲ್ಪನೆಯಲ್ಲಿ ಪುನರ್-ಸಂಪಾದಿಸಿಕೊಳ್ಳಬಹುದು!

(೧೩೩) ದೇವನೇ ಸರಿಯಾದ ಅಡುಗೆಭಟ್ಟನೆಂದು ಅರಿತವರು ಇತರ ಪ್ರಾಣಿಗಳು. ಹಾಗೆ ತಯಾರಾದ ಊಟಕ್ಕೂ ಅಡುಗೆಯ ಮೂಲಕ ಮಸಾಲೆ ಸೇರಿಸಿ ಹೊಟ್ಟೆ ಕೆಡಿಸಿಕೊಂಡ ಒಂದೇ ಪ್ರಾಣಿ--ಮಾನವ!

(೧೩೪) ಸಣ್ಣದೊಂದು ತಪ್ಪು ಅಳತೆಮೀರಿ ಬೆಳೆವುದನ್ನು ಕೊಲೆ ಎನ್ನಬಹುದು. ದೇಹವೊಂದನ್ನು ಭೌತಿಕವಾಗಿ ಇಲ್ಲವಾಗಿಸುವ ಮೂಲಕ ಸಮಸ್ಯೆಯೊಂದನ್ನು ಕೊನೆಗಾಣಿಸಬಹುದೆಂಬ ಚಿಂತನೆಯ ಸಪಲ ಕ್ರಿಯೆಯೇ ಕೊಲೆ. ಚಿಂತನೆಯೊಂದರೆ ಕೊಲೆಯನ್ನು ಹಿಂಸೆ ಎಂದು ಸಾಮಾನ್ಯವಾಗಿ ಪರಿಗಣಿಸಲಾಗುವುದಿಲ್ಲ! Read more about ’ನಿಜದ ಸೋಲೆಂಬ’ ಕಲ್ಪನೆಯ ಗೆಲುವೇ ದಂತಕಥೆ!

(೧೪೧) ನೈಜಜೀವನದಲ್ಲಿ ಭೂತಕಾಲವನ್ನು ನೆನಪಿನ ಮೂಲಕ ಪುನರ‍್ಸಂಪಾದಿಸುತ್ತೇವೆ. ಘಟನೆಯೊಂದು ಉಂಟಾಗುವ ಮುನ್ನವೇ ಸ್ಮೃತಿಯ ಮೂಲಕ ಬದುಕಿಬಿಡುವುದನ್ನು ಕನಸು ಎನ್ನುತ್ತೇವೆ. ಇದು ಅಸಹಜವೆನ್ನುಸುವುದೇಕೆಂದರೆ, ನೀವುಗಳು ಇದನ್ನು ನೈಜ ಜೀವನದಲ್ಲಿ ಓದುತ್ತಿದ್ದೀರೆಂದು ಕನಸು ಕಾಣುತ್ತಿದ್ದೀರ ಅದಕ್ಕೆ!

(೧೪೨) ತಾನು ಸೃಷ್ಟಿಸಿದ ಮನುಷ್ಯ ತನ್ನನ್ನೇ ಊರ್ಜಿತಗೊಳಿಸುವ ಮುನ್ನವೂ ತಾನು ಅಸ್ತಿತ್ವದಲ್ಲಿದ್ದೆನೆಂಬ ಸತ್ಯವೇ ದೇವರಿಗೆ ತಿಳಿದಿಲ್ಲ!

(೧೪೩) ಭೌತಿಕವಾಗಿ ನಿಮ್ಮೊಂದಿಗಿಲ್ಲದವರೊಂದಿಗೆ ಮಾತನಾಡಲು ಮೊಬೈಲು ಸೌಕರ್ಯ ಮಾಡಿಕೊಡುವುದಿಲ್ಲ. ಬದಲಿಗೆ ನಿಮ್ಮ ಬೆನ್ನಿಗಂಟಿ ನಿಂತವರೊಂದಿಗೆ ಮಾತು ಕಳೆದುಕೊಳ್ಳುವಂತೆ ಮಾಡುತ್ತದದು! Read more about ಆಗುವ ಮೊದಲೇ ಘಟಿಸಿದರೆ ಕನಸು, ರಕ್ತದಾನಕ್ಕಿಂತಲೂ ದಾನಬುದ್ಧಿ ರಕ್ತದಲ್ಲಿರಲು ಸೊಗಸುಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳೂ---೨೭

(೧೫೧) ಆದರೆ ಯಾರೇ ಇಬ್ಬರ ದೇಹದೊಳಗಿ ಜೈವಿಕ ಗಡಿಯಾರವೂ ಪರಸ್ಪರ ಹೋಲಿಕೆಗೆ ಒಪ್ಪಲಾರವು! ಆದರೂ ಕೈಗಡಿಯಾರವು ಎಲ್ಲರ ದೇಹಗಳನ್ನು ಗ್ರೀನ್‍ವಿಚ್ ಕಾಲಮಾನದ ಪ್ರಕಾರ ಅಳೆಯುತ್ತದೆ. ಆದ್ದರಿಂದ ಗಡಿಯಾರಕ್ಕೂ ಕಾಲನಿಗೂ ಸಂಬಂಧವಿಲ್ಲ!

(೧೫೨) ಮಾಡುತ್ತಿರುವ ಕೆಲಸಕಾರ್ಯವನ್ನು ಸ್ಥಗಿತಗೊಳಿಸಲಿರುವ ಅತ್ಯಂತ ಆಕರ್ಷಕ ವಸ್ತು ಕುರ್ಚಿ! ಕುರ್ಚಿಯ ಮೇಲೆ ಕುಳಿತು ಕೆಲಸ ಮಾಡುವುದೇ ಒಂದು ವ್ಯಂಗ್ಯೋಕ್ತಿ!

(೧೫೩) ವಯಸ್ಸಾದಂತೆ ನಾವು ಹೆಚ್ಚು ಹೆಚ್ಚು ತಪ್ಪುಗಳನ್ನೆಸಗುತ್ತೇವೆ ಎಂಬ ಅರಿವು ಮೊಡಲು ನಮಗಿರುವ ಒಂದೇ ಅವಕಾಶವೆಂದರೆ -- ನಮಗೆ ವಯಸ್ಸಾಗುವುದು! ಅಕಾಲಿಕ ಮೃತ್ಯುವನ್ನಪ್ಪುವವರಿಗೆ ಇಂತಹ ದಿವ್ಯದರ್ಶನ ಲಭ್ಯವಾಗದು. ಆದ್ದರಿಂದ ಆತ್ಮಹತ್ಯೆ ಹಾಗೂ ಕೊಲೆಯು ನಿಷಿದ್ಧ. ನಿಮಗೆ ಯಾರ ಬಗ್ಗೆಯಾದರೂ ದ್ವೇಷವಿದ್ದಲ್ಲಿ ಅವರನ್ನು ಆತ್ಮಹತ್ನೆಗೆ ದೂಡದೆ ವಯಸ್ಸಾಗಲು ಬಿಡಿ. ಮತ್ತು ಸೇಡು ತೀರಿಸಿಕೊಳ್ಳಲು ನೀವೂ ಅಲ್ಲಿಯವರೆಗೂ ಕಾಯಿರಿ!

(೧೫೪) ನಾವು ಸೋಲುಗಳೊಂದಿಗೆ ಸಫಲವಾಗಿ ಬದುಕುವ ಉಪಾಯವನ್ನು ಪ್ರೌಢವ್ಯಕ್ತಿತ್ವವೆನ್ನುತ್ತೇವೆ! Read more about ಗಡಿಯಾರವೆಂಬ ಕಾಲವೂ ಕುರ್ಚಿಯೆಂಬ ಕೆಲಸವೂ ವಯಸ್ಸಾಗುವುದನ್ನು ದಡ್ಡತನವೆನ್ನುತ್ತವೆ--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳೂ---೨೯

(೧೬೧) ಎಲ್ಲೆಡೆಯಿಂದ ಹೇಳಿಕೆಗಳನ್ನು ಸಂಗ್ರಹಿಸಿ, ವಿಸ್ತಾರಗೊಳಿಸುವುದನ್ನು ’ಆಧರಿತ’ ಎನ್ನುತ್ತೇವೆ.

(೧೬೨) ಸೌಂದರ್ಯವು ನೋಡುಗನ ಕಣ್ಣಿನಲ್ಲಿರುವುದಾದರೆ ಹೊರಗಿನ ಅಸ್ತಿತ್ವಗಳಾದ ಕ್ಲಿಯೋಪಾತ್ರ ಮತ್ತು ಕಲಾಕೃತಿಗಳು ಏಕಿರಬೇಕು?

(೧೬೩) ಆತ್ಯಂತಿಕ ಸತ್ಯವೆಂಬುದು ಅನಿಶ್ಚಿತ. ಸತ್ಯದ ಅನಿಶ್ಚಿತತೆಯೇ ಸತ್ಯ!

(೧೬೪) ಪರಿಪೂರ್ಣ ಅಂಗಸೌಷ್ಠವ ಇರುವವರು ಅದಕ್ಕೆ ವಸ್ತ್ರವನ್ನು ತೊಡಿಸುತ್ತಾರೆ. ಇಲ್ಲದವರು ಬಟ್ಟೆಗಳ ಒಳಗೆ ಅದನ್ನು ಬಚ್ಚಿಡುತ್ತಾರೆ. ಇದನ್ನು ಪರಿಣಾಮಕಾರಿಯಾಗಿ ಮಾಡುವವರನ್ನು ಒಳ್ಳೆಯ ವಸ್ತ್ರವಿನ್ಯಾಸ ಪ್ರಜ್ಞೆ ಇರುವವರು ಎನ್ನುತ್ತೇವೆ. ವಸ್ತ್ರದೊಂದಿಗಿನ ದೇಹದ ಸಂಬಂಧದ ಮೊಲಕವೇ ದೇಹಕ್ಕೊಂದು ವ್ಯಾಖ್ಯೆ ಸಾಧ್ಯ! Read more about ದೇಹವನ್ನು ಅದಕ್ಕೆ ಹೊದಿಸಿದ ವಸ್ತ್ರದ ಮೊಲಕ ವ್ಯಾಖ್ಯಾನಿಸುವುದನ್ನು ಮುತ್ಸದ್ದಿತನವೆನ್ನುತ್ತೇವೆ--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳೂ---೩೧

(೧೬೯) ಒಬ್ಬನನ್ನು ತುಂಡುತುಂಡಾಗಿ ಕತ್ತರಿಸಿ, ನಂತರ ಅದೊಂದು ಸೃಷ್ಟಿಶೀಲ ಚಟುವಟಿಕೆ ಎಂದು ನಿರೂಪಿಸುವ ಅವಕಾಶವನ್ನು ನಿರಾಕರಿಸುವುದನ್ನು ನಿರ್ವಚನ (ಡಿಕನ್ಸ್‍ಟ್ರಕ್ಷನ್)ಎನ್ನುತ್ತೇವೆ.

(೧೭೦) ಅತಿ ಹೆಚ್ಚು ದ್ವೇಷಿಸಲ್ಪಡುವ ಪದವು ’ದೇವರು’ ಎಂಬುದೇ ಇರಬೇಕು. ಏಕೆಂದರೆ ಯಾವ ವ್ಯಕ್ತಿಯೊ ತನ್ನನ್ನು ತಾನು ಆ ಹೆಸರಿನಿಂದ ಕರೆದುಕೊಳ್ಳುವುದಿಲ್ಲ. ಹಾಗೆ ಕರೆದುಕೊಳ್ಳುವವನನ್ನು ಜನ ’ಹುಚ್ಚ’ ಅಥವ ’ಗುರೂಜಿ’ ಎಂದು ಪುನರ್-ನಾಮಕರಣ ಮಾಡಿಬಿಡುತ್ತಾರೆ!

(೧೭೧) ಚಕ್ರವರ್ತಿಗಿಂತಲೂ ದೇವರು ಬಲಹೀನ ಏಕೆಂದರೆ ಆತ ಯಾರನ್ನೂ ತನ್ನ ರಾಜ್ಯದಿಂದ ಗಡೀಪಾರು ಮಾಡಲಾರ. ಅದೇ ಚಕ್ರವರ್ತಿಗಿಂತಲೂ ಭಿಕ್ಷುಕ ಶಕ್ತಿವಂತ ಏಕೆಂದರೆ ಆತ ಏನನ್ನೂ ಕಳೆದುಕೊಳ್ಳಲಾರ! Read more about ದೇವರೆಂದು ತನ್ನನ್ನು ತಾನು ಕರೆದುಕೊಂಡವನು ಹುಚ್ಚ ಅಥವ...:ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳೂ---೩೩

(೧೮೧) ಅರ್ಥಹೀನವಾಗಿ ನಡೆದುಕೊಳ್ಳುವುದು ನನಗೆ ಬಹಳ ಇಷ್ಟ ಏಕೆಂದರೆ ಅದನ್ನು ರೂಢಿಸಿಕೊಳ್ಳಲು ಮೊಲಭೂತ ಪರಿಜ್ಞಾನದ ಅವಶ್ಯಕತೆಯೊ ಇರುವುದಿಲ್ಲ!

(೧೮೨) ನಾನು ಮುಂದೆಂದಾರರೂ ನಿನ್ನನ್ನು ನೆನೆಸಿಕೊಂಡಿದ್ದೇ ಅದಲ್ಲಿ ಆಶ್ಚರ್ಯಪಡುವ ಅವಶ್ಯಕತೆಯೇನಿಲ್ಲ. ಮಧ್ಯದಲ್ಲಿ ನಾನು ನಿನ್ನನ್ನು ಮರೆತುಹೋಗಿದ್ದೆ ಎಂದು ಅದರರ್ಥ!

(೧೮೩) ಅತ್ಯಂತ ಆಕರ್ಷಕ ವ್ಯಕ್ತಿಯ ವಿಳಾಸವು ಕಲ್ಪನೆಯಲ್ಲಿದೆ!

(೧೮೪) ಅಂತಿಮ ಉತ್ತರ ಹುಡುಕುತ್ತಿರುವ ನಿರಂತರ ಸೋಲುವ ಯೋಜನೆಯನ್ನು ’ಹಬ್ಬ’ ಎಂದು ವಿಂಗಡಿಸಿ, ಅದನ್ನು ವಿಜೃಂಭಣೆಯಿಂದ ಆಚರಿಸುತ್ತೇವೆ! Read more about ಮುಂದೊಮ್ಮೆ ನಿನ್ನ ನೆನೆದರೆ ಈ ನಡುವೆ ನಿನ್ನ ಮರೆತಿದ್ದೆ ಎಂದರ್ಥ!--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳೂ---೩೫

(೧೯೬) ಜಗತ್ತಿನ ಬಗ್ಗೆ ನಮಗೆ ಯಾವುದಾದರೂ ಸಮಸ್ಯೆ ಕಂಡುಬಂದಿತೆಂದರೆ ಆಗ ಜಗತ್ತು ನಮ್ಮ ತಪ್ಪುಗಳನ್ನು ನಿರಂತರವಾಗಿ ಗಮನಿಸುವುದನ್ನು ಬದಿಗಿರಿಸಿ ವಿಶ್ರಮಿಸುತ್ತಿದೆ ಎಂದರ್ಥ!

(೧೯೭) ದೂರವಾಣಿ ಸಂಖ್ಯೆಗಳನ್ನು ಪರಸ್ಪರ ಬದಲಿಸಿಕೊಳ್ಳುವುದೆಂದರೆ, ಜನರು ಪರಸ್ಪರ ಪರಿಚಯಿಸಿಕೊಳ್ಳುವುದು ಎಂದರ್ಥ. ಆದರೆ ಜನರು ಪರಸ್ಪರ ಪರಿಚಯಿಸಿಕೊಳ್ಳುವುದೆಂದರೆ ಮುಖಾಮುಖಿಯಾಗುವುದು ಎಂದೇ ಅರ್ಥ!

(೧೯೮) ಮೇಧಾವಿ ಮತ್ತು ಹುಚ್ಚರಿಬ್ಬರ ನಡುವೆ ಇರಬಹುದಾದ ಒಂದೇ ವ್ಯತ್ಯಾಸವೆಂದರೆ ಸ್ವಾಭಾವಿಕ ಪ್ರಜ್ಞೆ. ಮತ್ತೊಂದು ಒಂದೇ ವ್ಯತ್ಯಾಸವೆಂದರೆ ಅದು ಮಾನವೀಯತೆ! Read more about ದೇವರನ್ನು ಸೃಷ್ಟಿಸಿದ ಮನುಷ್ಯ ಸೃಷ್ಟಿಯು, ದೈವಸೃಷ್ಟಿಯಾದ ಮನುಷ್ಯನಿಗಿಂತ ಮಿಗಿಲು--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೩೮

(೨೦೬) ಜಗತ್ತಿನೊಂದಿಗೆ ಕ್ಯಾಮರಾಗಿರುವ ಒಂದೇ ನಿರ್ದಿಷ್ಟವಾದ ವ್ಯವಹಾರವೆಂದರೆ ಅದರ ನಿರ್ದಿಷ್ಟ ಕ್ಷಣವೊಂದನ್ನು ಭಾಗಶಃವಾಗಿಯಷ್ಟೇ ಹಿಡಿದಿರಿಸುವುದು ಮತ್ತು ಅದನ್ನು ಭೂತಕಾಲಕ್ಕೆ ತಳ್ಳಿಬಿಡುವುದು. ಮಿಕ್ಕಂತೆ ಛಾಯಾಚಿತ್ರದಲ್ಲಿ ಸೆರೆಹಿಡಿಯಲಾಗದಷ್ಟು ವೇಗಗತಿಯಲ್ಲಿರುವುದನ್ನು ಮತ್ತು ಸದಾ ಭವಿಷ್ಯಕಾಲವಾಗಿಬಿಡುವುದನ್ನು ’ಜಗತ್ತು’ ಎನ್ನುತ್ತೇವೆ!

(೨೦೭) ನಾವೇನನ್ನು ಮಾಡಬಾರದು ಎಂದುಕೊಂಡಿರುತ್ತೇವೆಯೋ ಅದನ್ನು ಮಾಡಿಬಿಡುವ ವ್ಯಕ್ತಿಯನ್ನು ’ಅನುಕೂಲಸ್ಥ’ ಎನ್ನುತ್ತೇವೆ. ನಾವು ಮಾಡಲಾಗದುದನ್ನು ಮಾಡಿತೋರಿಸುವ ವ್ಯಕ್ತಿಯನ್ನಷ್ಟೇ ’ಸಾಹಸಿ’ ಎಂದು ಪರಿಗಣಿಸುವುದು.

(೨೦೮) ಬದುಕಿನ ಐಭೋಗಗಳಲ್ಲಿ ಮುಳುಗೇಳಲಾರದ ವ್ಯಕ್ತಿಯನ್ನು ಈರ್ಷ್ಯೆಯಿಂದ ನಾವು ’ಸಫಲಪೂರ್ಣವಾಗಿ ಬಾಳಿಬದುಕಿದಾತ’ ಎಂದು ಕಡೆಗಣಿಸುತ್ತೇವೆ!

(೨೦೯) ಸೋಲು ಸಫಲತೆಯ ಅಹ್ಲಾದವನ್ನು ಹೆಚ್ಚಿಸಿದರೆ ಸಾಫಲ್ಯವು ಸೋಲಿನಲ್ಲಡಗಿರುವ ನೋವನ್ನು ಮರೆತುಬಿಡುತ್ತದೆ!

(೨೧೦) ದೊರದರ್ಶನವು ಆ ಸುದ್ಧಿಯನ್ನು ಭಿತ್ತರಿಸದಿದ್ದಲ್ಲಿ ಜಗತ್ತೂ ಸಹ ಬದಲಾಗಿರುವುದೇ ಇಲ್ಲ! Read more about ಮಾಡಬಾರದು ಅಂದುಕೊಂಡದ್ದನ್ನು ಮಾಡುವಾತ ’ಅನುಕೂಲಸ್ಥ’, ಮಾಡಲಾಗದುದನ್ನು ಮಾಡುವಾತ ’ಸಾಹಸಿ’--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೦

(೨೧೬) ಪ್ರಯಾಣವೊಂದರ ಮಧ್ಯಭಾಗದಲ್ಲಿರುವುದರ ಅರ್ಥವೇನೆಂದರೆ ಸುಸ್ತಾಗಿ ಹಿಂದಿರುಗಿಬಿಡಬೇಕೆನ್ನಿಸಿದಾಗ, ಹಾಗೆ ಮಾಡಲು ಎಷ್ಟು ಶ್ರಮ ಬೇಕೋ ಅಷ್ಟೇ ಶ್ರಮ ಸಾಕು ಅಲ್ಲಿಂದ ಮುನ್ನುಗ್ಗಿ ಪ್ರಯಾಣ ಪೂರೈಸಿಬಿಡಲು!

(೨೧೭) ಸಾಕುಪ್ರಾಣಿಗಳು ಸತ್ತಾಗ ಜನ ಅಳುವುದಕ್ಕೆ ಕಾರಣಃ ನೈಸರ್ಗಿಕ ಬದುಕಿನಿಂದ ಪ್ರಾಣಿಗಳನ್ನು ಬೇರ್ಪಡಿಸಿ, ಸಾಕುಪ್ರಾಣಿಗಳನ್ನಾಗಿ ಪರಿವರ್ತಿಸಿದ ಅಪರಾಧಕ್ಕೆ ಶಿಕ್ಷೆಯ ರೂಪದಲ್ಲಿ ಅವರಿಗೆ ದೊರಕುವ ದುಃಖ! 

(೨೧೮) ಸಾಹಸಮಯ ಸೋಲು ಸೋಂಬೇರಿತನದ ಗೆಲುವಿಗಿಂತಲೂ ಪ್ರಯೋಜನಕಾರಿ.

(೨೧೯) ತಪ್ಪು ಮಾಡುವುದು ಮನುಷ್ಯನಿಗೆ ಸಹಜ ಏಕೆಂದರೆ ತಪ್ಪಿಗೆ ಅಪರಾಧೀಭಾವವೆಂಬ ಪರಿಹಾರವನ್ನು ತನಗೆ ತಾನೇ ಸೂಚಿಸುವವನೂ ಅವನೇ! Read more about ಸಾಹಸಮಯ ಸೋಲು ಹೆಚ್ಚೋ ಸೋಂಬೇರಿತನದ ಗೆಲುವೋ? -- ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೨

(೨೨೬) ನಮ್ಮ ಸಾಫಲ್ಯವು ಅನ್ಯರಿಗೂ ಒದಗುವಂತಹುದಾದರೆ, ಸಾರ್ಥಕ ಭಾವವೆಂಬುದು ನಮಗೆ ಮಾತ್ರ ಸೇರಿದ್ದು!

(೨೨೭) ಬದುಕು ಗಂಭೀರವಾಗಿ ಪರಿಗಣಿಸುವಲ್ಲಿಲ್ಲ, ಬದಲಿಗೆ ಆಳವಾಗಿ ಬದುಕಿಬಿಡುವಲ್ಲಿದೆ!

(೨೨೮) ದೆವ್ವಗಳ ಪೀಡೆ ಆಕಸ್ಮಿಕ. ಆದರೆ ಜೀವಂತ ವ್ಯಕ್ತಿಗಳ ಸಾವು ನಿತ್ಯನಿರಂತರ!

(೨೨೯) ಕಾರ್ಯ-ಕಾರಣ ಸಂಬಂಧದ ಗಡಿ ದಾಟಿ ದೆವ್ವವು ಎಂದೂ ತಪ್ಪು ವಿಳಾಸವನ್ನು ತಲುಪದು!

(೨೩೦) ಅವುಗಳನ್ನು ರೂಪಿಸಿರುವ ಪ್ರಕಟಣೆಗಳು ಮತ್ತು ಅವುಗಳನ್ನು ನೆನಪಿಟ್ಟುಕೊಂಡಿರುವ ವ್ಯಕ್ತಿಗಳು ಜೀವಂತವಿರುವವರೆಗೂ ಗಾದೆಗಳು ಅಜರಾಮರ! Read more about ಬದುಕು ಗಂಭೀರವಾಗಿ ಪರಿಗಣಿಸುವಲ್ಲಿಲ್ಲ, ಬದಲಿಗೆ ಆಳವಾಗಿ ಬದುಕಿಬಿಡುವಲ್ಲಿದೆ! --ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೪

(೨೩೬) ವಿಚ್ಛೇದಿತ/ತೆ ಉವಾಚ: ಸ್ವರ್ಗದಲ್ಲಿ ವಿವಾಹವು ನಡೆದರೂ ನರಕದಲ್ಲಿ ಅದು ಸಾಕಾರಗೊಳ್ಳುತ್ತದೆ. ಆದರೆ ಅದನ್ನು ಭೂಮಿ ಎಂದು ತಪ್ಪಾಗಿ ಭಾವಿಸಲಾಗುತ್ತದೆಯಷ್ಟೇ!

(೨೩೭) ನೀವು ಸಿನೆಮ-ವ್ಯಸನಿಗಳಾಗಿದ್ದಲ್ಲಿ (ಫಿಲ್ಮೊಹಾಲಿಕ್)--ಎಷ್ಟೊಂದು ಚಲನಚಿತ್ರಗಳು ಸೃಷ್ಟಿಯಾಗಿವೆಯೆಂದರೆ--ದೈನಂದಿನ ಬದುಕೆಂಬುದು ಒಂದು ಜಾಹಿರಾತಿನ ವಿರಾಮವಷ್ಟೇ ಆಗಿಬಿಡುತ್ತದೆ!

(೨೩೮) ವೃದ್ಧರಾಗುವುದೆಂಬುದು ಯೌವ್ವನದ ’ನಂತರ’ದ ಸ್ಥಿತಿಯಲ್ಲ. ಬದಲಿಗೆ ಯೌವ್ವನದ ಸೋಂಬೇರಿತನವನ್ನು ಸರಿಪಡಿಸಿಕೊಳ್ಳಲಿರುವ ಸುದೀರ್ಘ ’ಅವಕಾಶ’.

(೨೩೯) ನಶ್ವರವಾದಿ: ದೇವರಾಣೆಗೂ ಆತನನ್ನೇ ಕುರಿತು ನನ್ನಲ್ಲಿ ಸಾಕಷ್ಟು ’ಗೊಂದಲ’ವಿದೆ; ಹಾಗೂ ಈ ಅನಿರ್ದಿಷ್ಟತೆಯನ್ನು ನಶ್ವರತೆ ಎಂದು ’ನಿರ್ದಿಷ್ಟ’ವಾಗಿ ವರ್ಗೀಕರಿಸ ಬಯಸುತ್ತೇನೆ! Read more about ಸಿನೆಮ ವ್ಯಸನವು ಬದುಕನ್ನು ಜಾಹಿರಾತಿನ ವಿರಾಮವನ್ನಾಗಿಸಿಬಿಡುತ್ತದೆ: ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೬

(೨೪೬) ಈ ಪೃಥ್ವಿಯ ಆಚೆ ದೇವರಿಲ್ಲ. ಪಂಜು ಇಲ್ಲದೆ ಕೃತಕ ಬೆಳಕು ಹೇಗೆ ಇರುವುದಿಲ್ಲವೋ ಹಾಗೆ ಮಾನವ ಪ್ರಾಣಿ ಇಲ್ಲದೆ ದೈವವಿರದು ಎಂಬುದನ್ನು ದೇವರೂ ಒಪ್ಪುತ್ತದೆ!

(೨೪೭) ವಿಶ್ವದ ಅಳಿಸಲಾಗದ ವಿಧಿನಿಯಮವೆಂದರೆಃ ಅದಕ್ಕೊಂದು ಭವಿಷ್ಯತ್ ಕಾಲವೆಂಬುದಿದೆ. ವಿಶ್ವದ ಭಾಗವಾದ ಭೂಮಿಯ ಹಣೆಯಬರಹವನ್ನು ಮಾನವ ನಿರ್ಧರಿಸಬಲ್ಲನಾದರೆ, ಸಮಗ್ರ ವಿಶ್ವದ ಒಪ್ಪಿಗೆಯಿಂದಾಗಿ ಮಾತ್ರ ಅದು ಸಾಧ್ಯವಾಗಿದೆ!

(೨೪೮) ವಿಧಿನಿಯಮಕ್ಕೆ ಇಚ್ಛಾಪೂರ್ವಕವಾಗಿ ಶರಣಾಗುವುದು ಮೋಕ್ಷಪಡೆದವರಿಗಿರುವ ಅನಿವಾರ್ಯ ಆಯ್ಕೆ!

(೨೪೯) ನಾವು ಪ್ರಶ್ನೆಗಳನ್ನು ಕೇಳುವುದು ನಿರ್ದಿಷ್ಟ ಉತ್ತರ ಪಡೆಯಲೆಂದೇನಲ್ಲ. ಯಾವುದೇ ಉತ್ತರವನ್ನು ಕೇಳಲು ನಾವು ಈಗ ಸಿದ್ಧರಿದ್ದೇವೆ ಎಂದದರ ಅರ್ಥ! Read more about ದೇವರು, ದೆವ್ವ ಎಂಬ ನಮ್ಮೆಲ್ಲರ ಕನಸಿನ ಕಲ್ಪನೆಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೮

(೨೫೧) ಭಿಕ್ಷುಕ ಮತ್ತು ಧನಿಕರ ನಡುವೆ ಇರುವ ಒಂದೇ ಸಾಮ್ಯತೆ ಮತ್ತು ಒಂದೇ ವ್ಯತ್ಯಾಸವು ಅವರಿಬ್ಬರ ಸಾಮಾಜಿಕ ಅಂತಸ್ತಿನಲ್ಲಿದೆ. ಅದರಲ್ಲಿ ಮೊದಲನೆಯವ ಇನ್ನೂ ಆಳಕ್ಕೆ ಇಳಿಯಲಾರ, ಎರಡನೆಯವ ಇನ್ನೂ ಮೇಲೇರುವ ಆಸೆ ತೊರೆಯಲಾರ!

(೨೫೨) ನಿಮಗೊಂದು ಮಹತ್ವಾಕಾಂಕ್ಷೆ ಇಲ್ಲದಿದ್ದಲ್ಲಿ ನೀವು ಕನಸು ಕಾಣಲಾರಿರಿ. ಮಹತ್ವಾಕಾಂಕ್ಷೆ ಇದ್ದರೂ ಕನಸು ಕಾಣಲಾರಿರಿ. ಏಕೆಂದರೆ ಆಗ ನಿಮಗೆ ನಿದ್ರೆಯೇ ಬರುವುದಿಲ್ಲವಲ್ಲ!

(೨೫೩) ಎರಡು ಸಂದರ್ಭಗಳಲ್ಲಿ ಇತರರು ನಮ್ಮನ್ನು ನಾವು ಇರುವಂತೆಯೇ ಸ್ವೀಕರಿಸಲಾರರು--(೧) ಬದುಕಿದ್ದಾಗ, "ಯಾಕಾದರೂ ಬದುಕಿದ್ದಾನೀತ" ಎನ್ನುತ್ತಾರೆ. (೨) ಸತ್ತಾಗ, "ಸಾಯಬಾರದಾಗಿತ್ತು ಈತ", ಎನ್ನುತ್ತಾರೆ! Read more about ಮಹತ್ವಾಕಾಂಕ್ಷೆ ಇದ್ದರೂ, ಇಲ್ಲದಿದ್ದರೂ ಕನಸು ಮಾತ್ರ ಕಾಣಲಾರಿರಿಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೪೯

(೨೬೧) ಏನನ್ನು ಕಲಿಸಲಾಗುತ್ತದೆಯೋ ಅದು ಯಾರನ್ನೂ ಪ್ರೌಢರನ್ನಾಗಿಸದೆಂಬ ಗುಟ್ಟನ್ನು ಅನಕ್ಷರಸ್ಥರಿಂದ ಮುಚ್ಚಿಡುವ ಹುನ್ನಾರವನ್ನು ಶಿಕ್ಷಣ ಎನ್ನುತ್ತಾರೆ!

(೨೬೨) ಏನನ್ನಾದರೂ ಸಾಧಿಸಬೇಕೆಂಬ ಸುಡುವ ಬೇಗೆಯಂತಹ ತುಡಿತಕ್ಕಿಂತಲೂ ಸಿಡಿಗಳನ್ನು ಸುಡುವ ಅಭ್ಯಾಸವೇ ಇಂದು ಹೆಚ್ಚಿದೆ.

(೨೬೩) ಅತ್ಯಂತ ಶೋಷಿತವಾಗಿರುವ ದೇಹದ ಅಂಗವೆಂದರೆ ಅದು ’ಆರೋಗ್ಯಕರ ಹಲ್ಲುಗಳೇ’ ಇರಬೇಕು. ಅವು ಆಹಾರವನ್ನು ಸ್ವೀಕರಿಸಿ, ಮುರಿದು, ಬೆರೆಸಿ, ಮುಂದಕ್ಕೆ ದೂಡುತ್ತವೆ. ಸ್ವತಃ ಅವುಗಳ ’ಮೇಲೆ’ ಉಳಿದಿರಬಹುದಾದ ಯಃಕಶ್ಚಿತ್ ಊಟವನ್ನೂ ಸಹ ಕೂಡಲೇ ಅವುಗಳಿಂದ ಕಿತ್ತುಹಾಕಲಾಗಿಬಿಡುತ್ತದೆ!

(೨೬೪) ಅಹ್ಲಾದಕರ ಬದುಕನ್ನು ಬದುಕಿನ ಅಹ್ಲಾದದಿಂದ ಭಿನ್ನಗೊಳಿಸುವ ಸಾಮರ್ಥ್ಯವೇ ನಾಗರೀಕತೆಗಿರಬೇಕಾದ ಮೊದಲ ಯೋಗ್ಯತೆ! Read more about ನಾಳೆಗೆ ಅದು ನೆನ್ನೆಯಾಗುತ್ತದೆಂಬುದನ್ನು ಬಿಟ್ಟರೆ ಇಂದು ವಿಶೇಷವೇನೂ ಇಲ್ಲಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೫೧

(೨೭೧) ಒಮ್ಮೆಲೆ ಅತ್ಯಂತ ಸಂತಸದಿಂದಿರುವ ಮತ್ತು ದುಃಖಿತನಾಗಿರುವ ಕನಿಷ್ಠಪಕ್ಷ ಒಬ್ಬ ವ್ಯಕ್ತಿಯಾದರೂ ನನಗೆ ಗೊತ್ತುಃ ಕ್ರಮಬದ್ಧವಾಗಿ ಆ ವ್ಯಕ್ತಿ ’ಮತ್ತೊಬ್ಬರ ಪ್ರಕಾರದ’ ನೀವು ಮತ್ತು ’ನಿಮ್ಮ ಪ್ರಕಾರದ’ ನೀವು. ಇದು ತಿರುವು ಮರುವಾದರೆಷ್ಟು ಚೆನ್ನ!

(೨೭೨) "ನನಗೆ ಗೊತ್ತಿಲ್ಲ ಎಂಬುದು ನನಗೆ ತಿಳಿದಿದೆ" ಎಂಬ ಮನೋಭಾವಕ್ಕಿಂತಲೂ "ನನಗೆ ಗೊತ್ತಿದೆ ಎಂಬುದು ನನಗೆ ತಿಳಿದೇ ಇರಲಿಲ್ಲ" ಎಂಬ ಮನೋಭಾವವು ಹೆಚ್ಚೋ, ಕಡಿಮೆಯೋ ಎಂಬುದನ್ನು ನಿರ್ಧರಿಸುವುದು ಹೇಗೆ ಎಂಬುದು ನನಗೆ ಗೊತ್ತಿದೆಯೋ ಇಲ್ಲವೋ ತಿಳಿಯದಾಗಿದೆ!

(೨೭೩) ಯಾರಿಗೂ ಸಾಯುವ ಇಚ್ಛೆ ಇಲ್ಲದಿರುವುದರಿಂದಲೇ ಅದರಾಚೆ ಏನಿದೆ ಎಂಬುದು ನಮಗಿನ್ನೂ ತಿಳೀಯದಾಗಿರುವುದು!

(೨೭೪) ಎಲ್ಲರಿಗೂ ಬದುಕುವ ಆಸೆ. ಆದ್ದರಿಂದಲೇ ಅದು ಅಷ್ಟೊಂದು ಗೋಜಲಾಗಿರುವುದು. Read more about ಸಾಯುವ ಆಸೆ ಇಲ್ಲದಿರುವುದರಿಂದಲೇ ಅದರಾಚೆಗಿನದು ಎಂದಿಗೂ ನಿಗೂಢಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೫೩

(೨೮೧) ಸಾವು ಎಂಬ ’ಪ್ರೋಗ್ರಾಮಿನ’ ’ಸ್ಕ್ರೀನ್ ಸೇವರನ್ನು’ ನೋವು ಎನ್ನುತ್ತೇವೆ. ಭ್ರಮೆಯೆಂಬ ’ವೈರಸ್’ ಕಾಟದಿಂದಾಗಿ ನೋವನ್ನು ತಾತ್ಕಾಲಿಕವಾಗಿ ’ಹ್ಯಾಂಗ್’ ಮಾಡುವುದನ್ನು ಇಂದ್ರೀಯ ಸುಖ ಎನ್ನುತ್ತೇವೆ!

(೨೮೨) ನೈಜತೆಯ ಸಂಯಮಪೂರ್ಣ ಉತ್ಪ್ರೇಕ್ಷೆಯೇ ಫ್ಯಾಂಟಸಿ.

(೨೮೩) ಇಲ್ಲಿಯವರೆಗೂ ತೆಗೆಯಲಾಗಿರುವ ಛಾಯಾಚಿತ್ರಗಳ ಸಂಖ್ಯೆ ೧೨೩೪೫೬೭೮೯೦. ಇದನ್ನು ಅಲ್ಲಗಳೆಯುವುದಾದರೂ ಹೇಗೆ?!

(೨೮೪) ವೈರುಧ್ಯಮಯ ನಿಲುವು ತಾಳುವ ಮುನ್ನ ಚಿಂತಿಸಿಃ ಚಿಂತನೆಗೆ ವೈರುಧ್ಯಮಯ ನಿಲುವುಗಳು ಬಹಳ ಉಪಯೋಗಕಾರಿ!

(೨೮೫) ನಿಮ್ಮ ದೇಹತೂಕವನ್ನು ಕಡಿಮೆಗೊಳಿಸುವ ಅತ್ಯಂತ ಸುಲಭ ತಂತ್ರವೆಂದರೆ ನಿಮ್ಮ ಜೇಬಿನಿಂದ ಹಣ ಕಳೆದುಕೊಳ್ಳುವುದು!

  Read more about ಸಾವೆಂಬ ಪ್ರೋಗ್ರಾಮಿನ ಸ್ಕ್ರೀನ್ ಸೇವರನ್ನು ನೋವು ಎನ್ನುತ್ತೇವೆಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೫೫

(೨೯೧) ಬೃಹತ್ ವಾದವೊಂದು ಕನಿಷ್ಠ ಅವಕಾಶದಲ್ಲಿ ನೆಲೆ ನಿಂತಿರುವುದನ್ನು ’ಹೇಳಿಕೆ’ ಎನ್ನುತ್ತೇವೆ.

(೨೯೨) ನಾನು ಸುಳ್ಳನೆಂದು ನೀವು ನಿರೂಪಿಸಬಲ್ಲಿರ? ಹಾಗಿದ್ದಲ್ಲಿ ನಾವಿಬ್ಬರೂ ಎರಡು ವೈರುಧ್ಯಮಯ ಜಗತ್ತಿನಲ್ಲಿ ಬದುಕುತ್ತಿದ್ದೇವೆಂದು ’ನಾನು’ ಎಂಬುದು ನಿರೂಪಿಸಿಬಿಡಬಲ್ಲದು.

(೨೯೩) ಪ್ರಯಾಣವೆಂಬುದು ’ಆ’ ಸ್ಥಳದಿಂದ "ಈ" ಸ್ಥಳಕ್ಕೆ ಚಲಿಸುವುದಲ್ಲ. ಏಕೆಂದರೆ ಬೀಜಗಣಿತವು ಹುಟ್ಟುವ ಮುನ್ನವೂ ಜನ ಪ್ರಯಾಣ ಮಾಡುತ್ತಿದ್ದರು!

(೨೯೪) ಅಧಿಕಾರದೊಂದಿಗೆ ಜವಾಬ್ದಾರಿ ಜೊತೆಗೂಡುತ್ತದೆಂಬುದು ದಿಟ. ಆದರೆ ಬೇಜವಾಬ್ದಾರಿ ಎಂಬುದು ಅಧಿಕಾರಹೀನರದ್ದೇ ಹಕ್ಕೇನಲ್ಲವಲ್ಲ!

(೨೯೫) ಒಬ್ಬಾತ ಮಹಾನ್ ಆರ್ಥಿಕತಜ್ಞನಾಗಿದ್ದರೂ ಸಹ ಬದುಕಿನ ಸರಳ ’ಮೌಲ್ಯ’ಗಳನ್ನು ಸರಿಯಾಗಿ ಲೆಕ್ಕ ಹಾಕಲಾಗದೇ ಸೋತುಬಿಡಬಲ್ಲ!

  Read more about ಬೇಜವಾಬ್ದಾರಿಯು ಅಧಿಕಾರಹೀನರದ್ದೇ ಹಕ್ಕೇನಲ್ಲವಲ್ಲಃ ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೫೭

(೩೦೧) ಸತ್ತ ವ್ಯಕ್ತಿಗಳು ಕನಸಿನಲ್ಲಿ ಮಾತ್ರ ನಮ್ಮನ್ನು ಭೇಟಿ ಮಾಡುವುದರಿಂದ, ಎಚ್ಚರದ ಸ್ಥಿತಿಯ ಬಗ್ಗೆ ಏನೋ ಎಡವಟ್ಟಿದೆ.

(೩೦೨) ನೀವು ಎಂದಾದರೂ ನಕ್ಷತ್ರಗಳನ್ನು ನೋಡಿರುವಿರ? ಹೌದೆಂದಾದರೆ ನೀವು ಸುಳ್ಳರು, ಏಕೆಂದರೆ ನಿಮಗೆ ಕಂಡ ನಕ್ಷತ್ರಗಳಲ್ಲನೇಕವು ಈಗಾಗಲೇ ಸತ್ತು ಸ್ವರ್ಗ ಸೇರಿವೆ. ಇಲ್ಲವೆಂದಾದರೂ ನೀವು ಅನುಮಾನಿಗಳುಃ ಏಕೆಂದರೆ ನಕ್ಷತ್ರಗಳಲ್ಲಿ ಕೆಲವು ಇನ್ನೂ ಉಳಿದಿರುವ ಸಾಧ್ಯತೆ ಇದೆ!

(೩೦೩) ತೃಪ್ತಿಕರ ಭಾವವೆಂಬುದು ಖುಷಿಯಾಗಿರುವುದಲ್ಲ. ಬದಲಿಗೆ ಅದು ಎಲ್ಲ ಚಿಂತೆ, ಯೋಚನೆಗಳು ನಿಮ್ಮ ಒಡನಾಟದಿಂದ ಬೇಸರಗೊಳ್ಳುವುದೇ ಆಗಿದೆ!

(೩೦೪) ನಮ್ಮ ಐಡಿಯಗಳನ್ನು ಪರಸ್ಪರ ಬದಲಿಸಿಕೊಳ್ಳುವ? ಹೇಗಿದೆ ನನ್ನ ಐಡಿಯ? Read more about ನಿಮ್ಮ ಒಡನಾಟದಿಂದ ಚಿಂತೆಗೆ ಬೇಸರವಾಗುವುದನ್ನು ತೃಪ್ತಿ ಎನ್ನಬಹುದು--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು---೫೯

(೩೧೧) ಆದಿಭೌತಿಕದಲ್ಲಿ ನಂಬಿಕೆ ಇರಿಸುವುದೊಂದು ಪಲಾಯನವಾದ. ಸ್ವ-ಅನುಮಾನದಿಂದ ಪಲಾಯನ ಮಾಡುವ ವಾದವದು!
(೩೧೨) ಸಧೃಡವಾದ ದೇಹವನ್ನು ’ಪ್ರದರ್ಶಿಸುವುದೆಂದರೆ’ ಕಟ್ಟುಮಸ್ತಾಗಿ ಬೆಳೆಸಿದ್ದರೂ, ಸ್ವಾರ್ಥಕ್ಕಾಗಿ ಬಳಸಲಾಗದ ದೇಹದ 'ತೋರಿಕೆ'ಯನ್ನು ದಾನಮಾಡುವುದು ಎಂದರ್ಥ.
(೩೧೩) ಕ್ಷಮಿಸಿಬಿಡುವುದೆಂದರೆ  ನಮಗಾಗಿರುವ ಅನ್ಯಾಯದ ಒಳಗೇ ಒಂದು ತರ್ಕವನ್ನು ಕಾಣುವುದು. ಮರೆಯುವುದೆಂದರೆ ನಮಗಾದ ಅನ್ಯಾಯವನ್ನು ಅಸಹಾಯಕರಾಗಿ ನುಂಗಿಕೊಂಡುಬಿಡುವುದು.
(೩೧೪) ಮಹತ್ತರ ಸಾಧನೆಯೊಂದರ ಅತಿ-ಪರಿಚಿತತೆಯು ಕ್ಲೀಷೆಯಾಗಿ ಕೊನೆಗೊಳ್ಳಬಹುದು. ಆದರೆ ಕ್ಲೀಷೆ ಎಂಬುದನ್ನು ತಿರುವು ಮರೆವು ಮಾಡಲಾಗದು. ಕ್ಲೀಷೆಯೊಂದರ ಅತಿ ಪರಿಚಿತತೆಯೇ ಒಂದು ಮಹತ್ತರ ಸಾಧನೆಯಾಗಲಾಗದು! Read more about ಅನ್ಯಾಯದೊಳಗಿನ ತರ್ಕದಿಂದ ಕ್ಷಮೆ, ಅದರ ಬಗೆಗಿನ ಅಸಹಾಯಕತೆಯಿಂದ ಮರೆವು--ಎಲ್ಲೆಲ್ಲಿಂದಲೋ ಬರದ ಸಮಕಾಲೀನ ಗಾದೆಗಳು-೬೧

 (೩೨೧) ಪ್ರವಾಸ ಮಾಡುವಾಗ ನಾವುಗಳು ಕಟ್ಟಡ, ಸ್ಮಾರಕ, ಚಿತ್ರಶಾಲೆ, ಅರಮನೆ, ಹೋಟೆಲ್ ಮುಂತಾದುವಕ್ಕೆ ಭೇಟಿ ನೀಡುವುದಕ್ಕೆ ಕಾರಣ ನಾವು ನಮ್ಮ ಮನೆಯಲ್ಲೇ ಇರುವ ಭಾವವನ್ನು ಪುನರ್-ಸಂಪಾದಿಸಿಕೊಳ್ಳಲಿಕ್ಕೆ!

(೩೨೨) ಕೇವನ ಮಾನವರು ಮಾತ್ರ ಪ್ರವಾಸದ ಸ್ವಾದವನ್ನು ಅನುಭವಿಸುತ್ತಾರೆ. ಇತರೆ ಪ್ರಾಣಿಗಳು ಪ್ರವಾಸ ಹೋಗುವುದಿಲ್ಲವೇಕೆಂದರೆ ಅವುಗಳಿಗೆ ಇರಲು ಮನೆಯೆಂಬುದೇ ಇರುವುದಿಲ್ಲವಲ್ಲ!

(೩೨೩) ಮಾತೆಂಬುದು ವೈಯಕ್ತಿಕದಿಂದ ಸಾರ್ವತ್ರಿಕಕ್ಕಿರುವ ಏಕದಿಕ್ಕಿನ ಪ್ರಯಾಣ. ಅದು ತನ್ನ ಜನ್ಮಸ್ಥಾನವಾದ ಮೌನಕ್ಕೆ ಎಂದೂ ಹಿಂದಿರುಗಲಾರದು. 

(೩೨೪) ಯೌವನವು ಅತಿ ಸುಂದರವಾದುದು. ಅದನ್ನು ಉಳಿಸಿಕೊಳ್ಳಲು ಅಥವ ಪುನರ್-ಸಂಪಾದಿಸಿಕೊಳ್ಳಲು ನಿರಂತರವಾಗಿ ಸೋಲುವ ಮಾಪಕವನ್ನೇ ಸೌಂದರ್ಯಮಾಪಕ ಸಾಮಗ್ರಿ ಎನ್ನುತ್ತಾರೆ. Read more about ಪ್ರಾಣಿಗಳ ಪ್ರವಾಸ ಅಸಾಧ್ಯವೇಕೆಂದರೆ ಅವುಗಳಿಗಿರಲೊಂದು ಮನೆಯಿರುವುದಿಲ್ಲ:ಗಾದೆಗೊಂದು ಗುದ್ದು-೬೩

 (೩೩೧) ಅದು ಬಹಿರಂಗಗೊಂಡಾಗ ನಿನ್ನನ್ನು ಕುರಿತಾದ ಆ ವಿಷಯವನ್ನು ಸ್ವತಃ ನಿನಗೆ ನೀನೇ ಹೇಳಿಕೊಳ್ಳಲು ಸಂಕೋಚಪಡುವುದನ್ನೇ ’ಎಂಬರಾಸ್‍ಮೆಂಟ್’ ಎನ್ನುವುದು.

(೩೩೨) ಕನಸುಗಳು ತಾವೇ ತಾವಾಗಿ ಹುಟ್ಟಿಕೊಳ್ಳುತ್ತವೆ. ಸ್ವತಃ ಸರ್ವಶಕ್ತ ಚಕ್ರವರ್ತಿಯೊ ಅದನ್ನು ಸೃಷ್ಟಿಸಲಾರ!

(೩೩೩) ದುರಂತಗಳು ಮಾತ್ರ ಕಣ್ಮನಸೆಳೆವ ಸುದ್ಧಿಯಾಗುವ ಸಾಮರ್ಥ್ಯ ಹೊಂದಿರುವುದು ಸುದ್ಧಿಮಾಧ್ಯಮದ ದುರಂತ!

(೩೩೪) ನಾವು ಮೋಕ್ಷದ ತಿಕ್ಕಲು ಹತ್ತಿಸಿಕೊಂಡಿರುವವರೆಗೂ ಬದುಕಿನ ಆಹ್ಲಾದವನ್ನು ಸವಿಯಲಾರೆವು’ ಎಂಬುದೇ, ಯಾರು ಮೋಕ್ಷ ಪಡೆದವರೆಂದು ನಾವು ಭಾವಿಸಿದ್ದೇವೋ, ಅಂತಹವರ ಬೋಧನೆಯ ಸಾರ! 

(೩೩೫) ಬಸ್ಸಿನಲ್ಲಿ ಪಯಣಿಸುವುದು ಭೂಗೋಳ-ಪ್ರವಾಸವಾದರೆ ಕೆಫೆಯಲ್ಲಿ ಚರ್ಚಿಸುವುದು ಕಾಲ-ಪ್ರವಾಸ! Read more about ಬಸ್ಸು ಪಯಣ ಭೂಗೋಳ-ಪ್ರವಾಸ, ಕೆಫೆಯ ಚರ್ಚೆ ಕಾಲ-ಪ್ರವಾಸ: ಗಾದೆಗೊಂದು ಗುದ್ದು-೬೫

(೩೪೬) ’ಸೋಲು’ ಎಂಬ ಪದವನ್ನು ’ಅವಕಾಶ’ವೆಂಬ ಪದದಿಂದ ಸ್ಥಳಾಂತರಿಸುವ ಕ್ರಮವನ್ನು ಪರ್ಯಾಯ ಚಿಂತನೆ ಎನ್ನುತ್ತೇವೆ.

(೩೪೭) ನನಗೆ ದೇವರನ್ನು ತೋರಿಸಿ. ಮೊದಲಿಗೆ ಆತ ಅಸ್ಥಿತ್ವದಲ್ಲಿರುವನೋ ಹೇಗೆ ಎಂದು ವಿಚಾರಿಸುವೆ. ನಂತರ ಆತನ ಇರುವಿಕೆಯನ್ನೇ ಅನುಮಾನಿಸುವಂತಹ ನನ್ನಂತಹ ಮೂರ್ಖ ಜೀವಿಗಳನ್ನು ಸೃಷ್ಟಿಸಿದ ಆತನ ಮೂರ್ಖತನ ಎಂತಹದ್ದು ಎಂದು ವಿವರಿಸಿ ಹೇಳುವೆ.

(೩೪೮) ಕೆಲವು ಪ್ರಾಣಿಗಳು ಸಾಕುಪ್ರಾಣಿಗಳಾಗಿಬಿಡುವ ಖಾಯಿಲೆಯಿಂದ ನರಳುತ್ತವೆ. ಇದೇ ಖಾಯಿಲೆಯು ಮನುಷ್ಯರಲ್ಲಿ ಉಂಟಾದಾಗ ಅದನ್ನು ’ಸ್ಟಾಕ್‍ಹೋಮ್ ಸಿಂಡ್ರೋಮ್’ ಎನ್ನುತ್ತೇವೆ.

(೩೪೯) ಗೋಡೆಗೊಂದು ಇಟ್ಟಿಗೆ, ದೇಹಕ್ಕೊಂದು ಅಣು ಮತ್ತು ವಿಶ್ವವನ್ನು ಗ್ರಹಿಸುವ ಆಸೆ -- ಈ ಮೂರೂ ಸಹ ವಿಶಾಲ ಚಿಂತನೆಯ ಕೊರತೆಯಿಂದ ನರಳುತ್ತವೆ.   Read more about ಸೋಲೆಂಬ ಅವಕಾಶವನ್ನು ಗುರ್ತಿಸುವುದು ಪರ್ಯಾಯ ಚಿಂತನೆ -- ಗಾದೆಗೊಂದು ಗುದ್ದು

(೩೫೬) ಪ್ರತಿಯೊಬ್ಬ ಸಫಲ ಗಂಡಿನ ಹಿಂದೆ ಒಬ್ಬ ಹೆಣ್ಣಿರುತ್ತಾಳೆ. ಆದರೆ ಪ್ರತಿಯೊಬ್ಬ ಸಫಲ ಗಂಡೂ ಸಹ ಒಂದಕ್ಕಿಂತಲೂ ಹೆಚ್ಚಿನ ಹೆಣ್ಣಿನ ಹಿಂದೆ ಬೀಳುತ್ತಾನೆ--ನಿಜ ಜೀವನದ ಹೆಣ್ಣೊಬ್ಬಳಾದರೆ ಸಫಲತೆ ಎಂಬ ರೂಪಕದ ಹೆಣ್ಣು ಎರಡನೆಯವಳು.

(೩೫೭) ಗುಡಿಸಲುವಾಸಿಗಳು ಅರಮನೆಯಲ್ಲಿ ವಾಸಿಸುವ ಕನಸು ಕಾಣಬಲ್ಲರು. ಆದರೆ ಅರಮನೆ ವಾಸಿಗಳಿಗೆ ಅಂತಹ ಕನಸಿನ ಭಾಗ್ಯವಿಲ್ಲ.

 (೩೫೮) ಯಾರಾದರೂ ಕೈಗೊಳ್ಳಬಹುದಾದ ಒಂದೇ ಒಂದು ಪಯಣವೆಂದರೆ ಅದು ಚಟಗಳಿಂದ ದೂರ.

(೩೫೯) ನಾವು ಮರೆತುಹೋದುದನ್ನು ನೆನಪಿಸಿಕೊಳ್ಳುವುದೇಕೆಂದರೆ ಅದು ಲಾಭದ ಸೊಬಗನ್ನು ಒಳಗೊಂಡಿರಬಹುದೆಂಬ ಆಶಾವಾದದಿಂದಾಗಿ. ನಮಗೆ ನೆನಪಿರುವುದನ್ನು ಎಂದಿಗೂ ಮರೆಯಲಾಗದೇಕೆಂದರೆ ದುರಂತಗಳನ್ನು ಅದರ ಎಲ್ಲ ಸೂಕ್ಷ್ಮಗಳೊಂದಿಗೆ ಗಮನಿಸಿರುತ್ತೇವೆ, ಅದಕ್ಕೆ! Read more about ಎಲ್ಲ ಪಯಣವೂ ಚಟದಿಂದ ದೂರವಾಗುವುದೇ - ಗಾದೆಗೊಂದು ಗುದ್ದು--೭೦

 (೩೬೬) ’ಅಡುಗೆಮನೆ’ ಮತ್ತು ’ವಸ್ತ್ರ’ ಎಂಬ ಎರಡು ಹೆಜ್ಜೆಗಳಿಂದಾಗಿ ಮಾನವ ಪ್ರಕೃತಿಯಿಂದ ದೂರ ಸರಿದುಬಿಟ್ಟ. ಭಗವಂತ ದೊರಕಿಸಿಕೊಡುವುದೇ ನಿಜವಾದ ಅಡುಗೆ ಮತ್ತು ಆತನೇ ಸರಿಯಾದ ದರ್ಜಿ ಎಂದು ಇತರೆ ಪ್ರಾಣಿಗಳಿಗೆ ಸ್ಪಷ್ಟವಾಗಿ ತಿಳಿದಿದೆ.

(೩೬೭) ’ಆಗಿಬಿಟ್ಟಿರುವುದು’ ಆಗುತ್ತಿರುವುದರ ಒಂದು ಭಾಗವಷ್ಟೇ. ’ನೆನ್ನೆ’ ಎಂಬುದು ಇಂದಿನ ಕಲ್ಪನೆಯಷ್ಟೇ.

(೩೬೮) ಭಾಷಣವೊಂದನ್ನು ನಾವು ಕೇಳುವುದೇಕೆಂದರೆ ನಮಗಿಂತಲೂ ಆತನಿಗೆ/ಆಕೆಗೆ ಹೆಚ್ಚು ತಿಳಿದಿದೆ ಎಂಬ ಕೀಳರಿಮೆಯಿಂದಾಗಿ. ಜೊತೆಗೆ ನಮ್ಮಂತೆ ಅವರು ಸಮಸ್ಯೆಗಳನ್ನು ಪರಿಹರಿಸಬಲ್ಲರು ಎಂಬ ವಿಷಯವನ್ನು ನಾವು ನಂಬುವುದೂ ಇಲ್ಲ. Read more about ನೆನ್ನೆ ಎಂಬುದು ಇಂದಿನ ಕಲ್ಪನೆಯಷ್ಟೇಃ ಗಾದೆಗೊಂದು ಗುದ್ದು-೭೨

 (೩೭೬) ಅಕ್ಕಪಕ್ಕವಿರುವ ಎರಡು ಬೃಹದಾಕಾರದ ಬೆಟ್ಟಗಳ ನಡುವಿನ ಪರಸ್ಪರ ಸಾಮರಸ್ಯದ ಕೊರತೆಗೆ ಮನುಷ್ಯ ನೀಡಿದ ಪರಿಹಾರವೆಂಬ ಬೆಸುಗೆಯನ್ನು ಸೇತುವೆ ಎನ್ನುತ್ತೇವೆ!

(೩೭೭) ಎಲ್ಲರಲ್ಲೂ ಹರಿಯುತ್ತಿರುವುದು ಒಂದೇ ತೆರನಾದ ರಕ್ತವಲ್ಲವೆಂಬ ಐತಿಹಾಸಿಕ ಸತ್ಯವು ವೈದ್ಯಕೀಯವಾಗಿ ನಿರ್ಧರಿತವಾದ ಕಾಲಕ್ಕೇ ಅದು ವೈದ್ಯಕೀಯ ಸತ್ಯವೆಂಬುದು ಐತಿಹಾಸಿಕವಾಗಿ ನಿರೂಪಿತವಾದುದು ಖಂಡಿತ ಕಾಕತಾಳೀಯವಲ್ಲ.

(೩೭೮) ನಾನು ಮರೆಯಬೇಕೆಂದು ಯತ್ನಿಸುತ್ತಿರುವ ವ್ಯಕ್ತಿ ನೀವೇ ಅಲ್ಲವೆ?

(೩೭೯) ನಮ್ಮ ಭವಿಷ್ಯದ ಬಗ್ಗೆ ಅದೆಷ್ಟು ಬರವಣಿಗೆಗಳು ಮೂಡಿಬಂದುಬಿಟ್ಟಿವೆಯೆಂದರೆ ಅವುಗಳ ಗತ ನೆನಪಿನ ಬಾದೆಯಿಂದ ಈಗಾಗಲೆ ನಾವುಗಳು ನರಳಲು ಆರಂಭಿಸಿ, ಭವಿಷ್ಯವನ್ನು ಭೂತದಂತೆ ಭಾವಿಸತೊಡಗಿಬಿಟ್ಟಿದ್ದೇವೆ! Read more about ನಾನು ಮರೆಯಬೇಕೆನ್ನುತ್ತಿರುವುದು ನಿನ್ನನ್ನೇ ಅಲ್ಲವೆ? ಗಾದೆಗೊಂದು ಗುದ್ದು--೭೪

 (೩೯೧) ಕಾರಿನ ಮೇಲ್ಛಾವಣೆ ಮತ್ತು ಚಾಲಕನ ನಡುವಣ ವ್ಯತ್ಯಾಸವನ್ನು ಅತ್ಯಂತ ಕಡಿಮೆಗೊಳಿಸಿ, ಚಾಲಕನ ಶಿರದ ಆಕಾರಕ್ಕೆ ಆ ಮೇಲ್ಛಾವಣೆಯನ್ನು ಬಾಗಿಬಗ್ಗಿಸಿದಾಗ ದೊರಕುವುದನ್ನು ಶಿರಸ್ತ್ರಾಣ (ಹೆಲ್ಮೆಟ್) ಎನ್ನುತ್ತೇವೆ.

(೩೯೨) ಸಿಗರೇಟು ಸೇವನೆಯೊಂದೇ ನೇತ್ಯಾತ್ಮಕ-ಧೂಮಪಾನವೆಂಬ (ಪ್ಯಾಸಿವ್ ಸ್ಮೋಕಿಂಗ್) ದುಶ್ಚಟವನ್ನು ತಡೆಯಲಿರುವ ಸೂಕ್ತ ಪರಿಯಾರ!

(೩೯೩) ಸೂಕ್ತಕಂಡ ಮಾನವ ದೇಹವನ್ನು ಆಯ್ದ ಭಂಗಿಗಳಲ್ಲಿ, ವಿವಸ್ತ್ರಿತ ರೂಪದಲ್ಲಿ ಕಲ್ಪಿಸಿಕೊಳ್ಳುವುದೇ ಕಾಮ. ಮಿಕ್ಕುಳಿದ ಇಂತಹದ್ದೇ ಕ್ರಿಯೆಗಳ ಭೌತಿಕ ಆಯಾಮವನ್ನು ಲೈಂಗಿಕತೆ ಎನ್ನುತ್ತೇವೆ.

(೩೯೪) ಎಂದೂ ಸಾಧಿಸಲಾಗದೆ ಕೇವಲ ’ಕೊಡಮಾಡಿರುವುದು’ ಅಥವ ’ಸ್ವೀಕರಿಸಲ್ಪಟ್ಟಿರುವುದನ್ನು’ ಪ್ರಶಸ್ತಿ ಎನ್ನುತ್ತೇವೆ.  Read more about ನದಿ-ತಟಾಕದಲ್ಲಿ ಹರಿವ ನೀರೇ ನದಿಃ ಗಾದೆಗೊಂದು ಗುದ್ದು--೭೭