ಬೆಳಗಿನ ಜಾವದ ಕನಸು
March 10, 2006 - 8:48pm — suchara
ಈ ಕವನಕ್ಕೆ ಸ್ವಲ್ಪ ಪೀಠಿಕೆ ಬೇಕು.
ನಾನು ಇದನ್ನು ಬರೆದದ್ದು ೨೦೦೦ ದ ಡಾಟ್ ಕಾಮ್ ಗುಳ್ಳೆ ಒಡೆದ ಸಮಯದಲ್ಲಿ.
ಜಾವವನ್ನು ನಂಬಿ ಅಮೇರಿಕಾಕ್ಕೆ ಹಾರಿದ್ದ ಅನೇಕರು ಕೆಲಸ ಕಳೆದುಕೊಂದು ಕಷ್ಟ ಪಡುತ್ತಿದ್ದ ಕಾಲವದು.
ಈಗ ಓದಿ.
ಕೆಳಗಡೆ, ಕೆಲವು ಪ್ರಯೋಗಗಳ ಅರ್ಥ ಕೊಟ್ಠಿದ್ದೇನೆ.
ಬೆಳಗಿನ ಜಾವದ ಕನಸು
==============
ಬೆಳಗಿನ ಜಾವದ ಕನಸು
ನನಸಾಗುವುದಂತೆ
ಆದರೆ,
ಜಾವ ಬೆಳಗುವ ಕನಸು ?
"ಬೆಳ್ಳಗಿರುವುದೆಲ್ಲ ಹಾಲಲ್ಲ"
"ಇ ಇರುವುದೆಲ್ಲ ಕಾಮ್ಯವಲ್ಲ"
ಚುಕ್ಕೆಯ ಕಾಮಕ್ಕೆ ಮರುಳಾಗಿ
ಹಾರಿದರು ಎಲ್ಲೆ ಮೀರಿ
"ಕಾಮಾತುರಾಣಾಂ ನ ಭಯಂ ನ ಲಜ್ಜಾ"
ಆದರೀಗ
"ಜಾವಾತುರಾಣಾಂ ನ ಧನಂ ನ ನಿದ್ರಾ ?"
ಜಾವದ ಜವಕ್ಕೀಗ ಜವನ ಜಾವವೇ ?
ಚುಕ್ಕೆಯ ಬಲೆಯಲ್ಲಿ ಸಿಕ್ಕಿಸಿ ಕೊಲ್ಲುವ ಹುನ್ನಾರವೇ ?
ಸಮುದ್ರದ ಅಲೆಗಳು ಅಷ್ಟೊಂದು ಹರಿತವೆ?
ಅಥವಾ ಜಾವಕ್ಕಿದಿನ್ನೂ ಜಾವಳದ ಕರ್ಮವೇ ?
ಕಾದು ನೋಡೋಣ,
ಜಾವಕ್ಕೂ ಹಕ್ಕಿದೆ ಜೀವಿಸುವುದಕ್ಕೆ
- ಸುಚರಾ
೧೪.೦೩.೨೦೦೧
ಜಾವ - ಕಾಲ; ಚುಕ್ಕೆಯ ಕಾಮ - ಡಾಟ್ ಕಾಮ್; ಜವ - ವೇಗ; ಜವ - ಯಮ; ಚುಕ್ಕೆಯ ಬಲೆ - ಡಾಟ್ ನೆಟ್; ಸಮುದ್ರ..ಹರಿತ - ಸಿ ಶಾರ್ಪ್; ಜಾವಳ - ಚೌಲ.
- Login or register to post comments
- 1208 hits
- ಈ ಪುಟವನ್ನು ಇ-ಮೇಯ್ಲ್ ಮಾಡಿ
ಮೇಲಿನ ಪುಟವನ್ನು ಹೋಲುವ ಪುಟಗಳು - 'ಸಂಪದ' ಆರ್ಕೈವಿನಿಂದ
RSS:
ಪ್ರತಿಕ್ರಿಯೆಗಳು
ಪ್ರತಿಕ್ರಿಯೆ:ಬೆಳಗಿನ ಜಾವದ ಕನಸು
ಜಾವದ ಜವಕ್ಕೀಗ ಜವನ ಜಾವವೇ ?
ಚುಕ್ಕೆಯ ಬಲೆಯಲ್ಲಿ ಸಿಕ್ಕಿಸಿ ಕೊಲ್ಲುವ ಹುನ್ನಾರವೇ ?
ಸಮುದ್ರದ ಅಲೆಗಳು ಅಷ್ಟೊಂದು ಹರಿತವೆ?
ಅಥವಾ ಜಾವಕ್ಕಿದಿನ್ನೂ ಜಾವಳದ ಕರ್ಮವೇ ?
ಕಾದು ನೋಡೋಣ, ಜಾವಕ್ಕೂ ಹಕ್ಕಿದೆ ಜೀವಿಸುವುದಕ್ಕೆ
- ಸುಚರಾ
೧೪.೦೩.೨೦೦೧ ಜಾವ - ಕಾಲ; ಚುಕ್ಕೆಯ ಕಾಮ - ಡಾಟ್ ಕಾಮ್; ಜವ - ವೇಗ; ಜವ - ಯಮ; ಚುಕ್ಕೆಯ ಬಲೆ - ಡಾಟ್ ನೆಟ್; ಸಮುದ್ರ..ಹರಿತ - ಸಿ ಶಾರ್ಪ್; ಜಾವಳ - ಚೌಲ.
ವಾಹ್! ಅದ್ಭುತವಾಗಿದೆ. ಪದ ಜೋಡಣೆ ಮತ್ತು ಜಾವಾ ಹಾಗು ಹರಿತಗಳ ಪರಿಕಲ್ಪನೆ. ಈಗ ಐದು ವರ್ಷಗಳ ತರುವಾಯ ಏನನ್ನಿಸುತ್ತದೆ. ಆಗ ಜಾವಾಕ್ಕೆ ಐದೇ ವರ್ಷವಾಗಿತ್ತು. ಈತ್ತೀಚೆಗೆ ದಶಮಾನೋತ್ಸವ ಆಚರಿಸಿದೆ.
ಇಂದು ಚುಕ್ಕೆಯ ಕಾಮವೇ ಜಾವಾ ಎಂಬಂತಾಗಿದೆ....(We are the dot in .com - ಇದು ಸೂರ್ಯನ ಮೌಸ್ ಪ್ಯಾಡ್ ಗಳ ಮೇಲೆ ಕಂಡುಬರುತ್ತದೆ.......)
ಸಮುದ್ರದ ಹರಿತಗಳು ಮತ್ತು ಸೂರ್ಯನ(ಸನ್) ಜಾವ ಒಂದಕ್ಕೊಂದು ವಿರುದ್ಧವಾಗಿ ಒಂದು ಮತ್ತೊಂದನ್ನು ಹಿಂದಿಕ್ಕಲಾಗದೆ ಎರಡೂ ಕೂಡ ಜಗತ್ತಿನಲ್ಲಿ ಹಣದ ಹೊಳೆಯನ್ನೇ ಹರಿಸುತ್ತಿವೆಯಲ್ಲಾ.
ಐದು ವರ್ಷದ ಹಿಂದಿನ ತಂತ್ರಜ್ಞರ ಮನಃಸ್ಥಿತಿಯನ್ನು ಮನೋಜ್ಞವಾಗಿ ಚಿತ್ರಿಸಿದ್ದೀರಿ. ಧನ್ಯವಾದಗಳು
ಉ : ಜಾವದ ಕನಸು
ನಿಮ್ಮ ಮಾತನ್ನು ಸಂಪೂರ್ಣ ಒಪ್ಪುತ್ತೇನೆ.
ಜಾವ,ಸಿಶಾರ್ಪ್ ಎರಡೂ ಹಣದ ಹೊಳೆ ಹರಿಸುತ್ತಿವೆ. ಹಾಗಿಲ್ಲದಿದ್ದರೆ ನಾನಿಂದು ಹೀಗೆ ಕೀಲಿ ಕುಟ್ಟಲಾಗುತ್ತಿರಲಿಲ್ಲ.
ಆದರೆ ಆ ಹಣದ ಬಹು ಕಡಿಮೆ ಪಾಲು ಪಾಪ ಆ ಸೂರ್ಯನಿಗೆ ಸಲ್ಲುತ್ತಿದೆ.
ಧನ್ಯವಾದಗಳು
-ಸುಚರ
ಜವರನ ಜವ್ವನೆ
ಸುಚರ ಅವರೇ ನಿಮ್ಮ ಕವನ (ಕವನ ಅನ್ನಲೋ ಚುಟುಕ ಅನಲೋ? ಚುರುಕು ಮೆಣಸಿನಕಾಯಿ ಇದ್ದ ಹಾಗೆ ಇದೆ), ಬಹಳ ಚೆನ್ನಾಗಿದೆ.
ತಲೆಗೆ ಹೊಳೆದದ್ದನ್ನು ಸುಮ್ಮನೆ ಗೀಚುತ್ತಿರುವೆ. ಹೇಗಿದೆಯೋ ಏನೋ?
ಜಾವದಿ ಜವ್ವನೆಯ ಜಲಸೆಗೆ ಜವರನು ಜಾರಿದ
ಜಾವದಿ - ಕಾಲ
ಜವ್ವನೆ - ಇಲ್ಲಿ ಸಾವಿತ್ರಿ ಅಂತ ಇಟ್ಟುಕೊಳ್ಳಬಹುದು
ಜಲಸೆಗೆ - ಕುಳಿತುಕೊಳ್ಳುವ ಸ್ಥಳ
ಜವರ - ಯಮ
ಜಾರಿದ - ಮೋಸ ಹೋದ
ಸಾವಿತ್ರಿಯ ಮೊಂಡುತನಕ್ಕೆ ಯಮ ಮೋಸ ಹೋದ. ಸತ್ಯವಾನನ ಆತ್ಮವನ್ನು ಕರೆದೊಯ್ಯಲು ವಿಫಲನಾದ.
ವಂದನೆಗಳೊಂದಿಗೆ
---
ತವಿಶ್ರೀನಿವಾಸ
http://asraya.net
ಉ : ಜವರನ ಜವ್ವನೆ
ಚೆನ್ನಾಗಿದೆ.
ಸಾವಿತ್ರಿ ಬಗ್ಗೆ ಎಲ್ಲೋ ಒದಿದ್ದ pun ನೆನಪಿಗೆ ಬಂದಿತು
- ಸತ್ಯವಾನನಿಗೆ ಸಾವ್ ಇತ್ರಿ
ಜಕಾರದ ಝೇಂಕಾರ ಮೊಳಗುತ್ತಿರೆ ಅಣ್ಣಾವ್ರ ಬಬ್ರುವಾಹನದ ಡೈಲಾಗ್ ತಲೆಗೆ ಬಂತು -
"ಅಯ್ಯೋ!... ಜಾರಿಣಿಯ ಮಗ !....
ಸುಚರ
Re: ಉ : ಜವರನ ಜವ್ವನೆ
- ಸತ್ಯವಾನನಿಗೆ ಸಾವ್ ಇತ್ರಿ
ಬಹುಷಃ ಇಲ್ಲಿ?
- ಶ್ರೀವತ್ಸ ಜೋಶಿ
ಸಾವ್ ಇತ್ರಿ
ನಾನು ಅದು ವೈ ಎನ್ ಕೆ ಅವರದಿರಬಹುದು ಎಂದು ಕೊಂಡೆ
ಇನ್ನೊಬ್ಬ ವೈ ಎನ್ ಕೆ - ನಮ್ಮ ಮಾರ್ಗದರ್ಶನ ಮಾಡುತ್ತಿರುವುದು ನಮ್ಮ ಭಾಗ್ಯ.
- ಸುಚರ
ನಿಮ್ಮ ಜಾವ ಕನಸಿನ ಬಗ್ಗೆ
ಪದ್ಯ ತುಂಬಾ ಚೆನ್ನಾಗಿದೆ.ಪದಗಳ ಸಾಂದರ್ಭಿಕ ದ್ವಂದ್ವವನ್ನು ಚೆನ್ನಾಗಿ ಬಳಸಿದ್ದೀರ.
ವಂದನೆಗಳೊಂದಿಗೆ
ಶ್ರೀಕಾಂತ್
ಉ: ಜಾವದ ಕನಸು
'ಆಯ್ಯೊ ಮುಗಿಯಿತೇ ಮಧುಚಂದ್ರ...' ಎಂಬ ಶೀರ್ಶಿಕೆಯಲ್ಲಿ ಡಾ|ಮೈ.ಶ್ರೀ.ನಟರಾಜ್ ಒಂದು ಕವನವನ್ನು ಬರೆದಿದ್ದರು. ಅದರ ಉಲ್ಲೇಖ (http://thatskannada.oneindia.in/sahitya/kavana/honeymoon.html)
ಇಲ್ಲಿ ಪ್ರಸ್ತುತವೆನಿಸುತ್ತದೆ.
ಸುಚರ, ನಿಮ್ಮ ಕವನವೂ ಬಹಳ ಸೊಗಸಾಗಿದೆ.
ಇನ್ನು ನನ್ನ ನೆಚ್ಚಿನ 'ಪನ್' ಬಳಸುವುದಾದರೆ,
ಜಾ = go (ಹಿಂದಿಯಲ್ಲಿ)
ವಾ = come (ತಮಿಳು ಭಾಷೆಯಲ್ಲಿ)
ಜಾವಾ = ಹೋಗಿ ಬಾ (ಭಾರತದಿಂದ ಅಮೆರಿಕೆಗೆ ಹೋಗಿ ಬಾ?)
- ಶ್ರೀವತ್ಸ ಜೋಶಿ
ಉ : ಜಾವದ ಕನಸು
punಡಿತರಿಗೆ ನಮೋ ನಮೋ
ಮೈ. ಶ್ರೀ. ನಟರಾಜರ ಕವನದ ಮುಂದೆ ನನ್ನದು ಬಾಲ ಭಾಷೆ.
ಅವರ ಕವನ ಈಗ ಓದಿದೆ. ಬಹಳ ಚೆನ್ನಾಗಿ (ವೇಗ, ಪ್ರಾಸ) ಓದಿಸಿಕೊಂಡು ಹೋಗುತ್ತದೆ.
ಧನ್ಯವಾದಗಳು.
ಸುಚರ