ವೀರ - ೧
--------
ಹೇಳು ಪ್ರಿಯೆ! ನಿನಗಾಗಿ ನಾ
ಬಾನಿನ ಚಂದಿರನ ತರಲೇ?
ತಾರೆಗಳ ಕಿತ್ತು ತರಲೇ?
ಸೌಗಂಧಿಕಾ ಪುಷ್ಪವ ತರಲೇ?
ಎಂದು ಧೀರನವ ನುಡಿಯುತ್ತಲೇ
ಪೊರಕೆಯಿತ್ತು ಹೀಗೆಂದಳು ತರಳೆ:
ಹೊಡೆದು ಬಾ ಬಚ್ಚಲಲಿದೆ ಜಿರಳೆ!

ವೀರ - ೨
--------
ಮುಂದಿಟ್ಟ ಹೆಜ್ಜೆ ನಾ ಹಿಂದಿಡುವುದಿಲ್ಲ!
ಇದು ನನ್ನ ಶಪಥ ಎಂದನಾ ವೀರ.
ಮಿತ್ರನೆಂದ - ಗೊತ್ತೆನಗೆ ಗೊತ್ತು
ಅದಕೆ ನೀ ಹೆಜ್ಜೆ ಮುಂದಿಡುವುದೇ ಇಲ್ಲ!

ವೀರ - ೩
--------
ಇಂದು ಹೇಳಿಬಿಡುವೆ! ನಿನ್ನಪ್ಪನಿಗೆ
ನಾ ನಿನ್ನ ಮದುವೆಯಾಗುವೆನೆಂದು!
ಕಣ್ಣರಳಿಸಿ ಕೇಳಿದಳವಳು - ಸತ್ಯವೇ?
ಓಹ್! ನೀನೆಷ್ಟು ಧೀರ! ಅಂದಹಾಗೆ
ಈ ಸಾರಿ ಅಪ್ಪ ಬಂದೂಕು ಕೊಂಡಿದ್ದಾರೆ.

ನಿಮ್ಮ
ಬೆನಕ