ಕರುಣ - ೧
---------
ಓ! ಹೋದೆಯಾ ನಲ್ಲೆ!
ಬಿಟ್ಟು ನಿನ್ನೀ ಪ್ರಿಯತಮನ
ಕಾರು, ಬಂಗಲೆ, ಒಡವೆಗಳ
ಕೇವಲ ಕ್ರೆಡಿಟ್ ಕಾರ್ಡ್ ಕದ್ದು!

ಕರುಣ - ೨
---------
ಏಕಳುವೆಯೋ ನೆರೆಯ ಮಿತ್ರ?
ಕಣ್ಣೊರೆಸು, ಮೊಗವೊರೆಸು
"ಮಿತ್ರ, ಬರಲಿಹರು ನೆಂಟರು"
ನೆಂಟರು ಬಂದರೆ ಕಷ್ಟವೇನು?
ಆತಿಥ್ಯಕೆ ಹಣಕಾಸು ಬೇಕೇನು?
ಮರೆಯೆ ನಾ ಹಳೆಯ ನಿನ್ನುಪಕಾರ
ಕಳೆದ ಬಾರಿ ನನ್ನ ನೆಂಟರು ಬಂದಾಗ
ಎನಿತೆಲ್ಲ ಕೊಟ್ಟಿದ್ದೆ, ಏನೆಲ್ಲ ಮಾಡಿದ್ದೆ!
"ಅದಕ್ಕೇ ದುಃಖವೋ ಮಿತ್ರಾ! ಮತ್ತೆ
ಬರುತಿಹರು ನಿನ್ನೀ ಮನೆಗೆ ನೋಡತ್ತ"
ಎಂದವನೇ ಇನ್ನೂ ಜೋರಾಗಿ ಅತ್ತ!

ಕರುಣ - ೩
---------
ಅಪ್ಪ! ಅಪ್ಪ! ಹೊಡೆಯಬೇಡಪ್ಪ!
ಎಂದಳುತ್ತಾ ಮಗರಾಯ ಬೊಬ್ಬಿಟ್ಟ
"ಮಗನೇ! ಅಯೋಗ್ಯನೇ! ಭಡವಾ!
ನನ್ನ ಮರ್ಯಾದೆ ಕಳೆವ ಗಡವಾ!"
ಎಂದೆನುತ ತಂದೆ ಬಡಿಯಹತ್ತಿದ.
ಬಡಿಬಡಿದು ಸುಸ್ತಾಗಿ ಕುಸಿದವನೇ
"ಇನ್ನಾರಿಗೆ ಬೊಗಳಿದೆಯೋ ನಾ
ಜೂಜಾಡುವೆನೆಂದು, ಮಗನೇ?"
ಬೆರಳು ತೋರಿದ ಮಗ ಬಾಗಿಲತ್ತ
ಬೆತ್ತವ ಹಿಡಿದ ಹೆಂಡತಿಯ ಕಂಡು
ತಂದೆ ಬೊಬ್ಬಿರಿದ ಮೊಣಕಾಲೂರಿ
"ಅಯ್ಯೋ! ಹೊಡೆಯಬೇಡವೇ!
ನಿನ್ನ ದಮ್ಮಯ್ಯ! ತಪ್ಪಾಯಿತು!"

ನಿಮ್ಮವ
ಬೆನಕ