ರಘುನ೦ದನ್‍‍ರು ತಮ್ಮ ಅಭಿಪ್ರಾಯದಲ್ಲಿ ಸ್ಪಷ್ಟವಾಗಿ ಎತ್ತಿತೋರಿಸಿರುವ ಭಾರತೀಯ ಮಿಡ್ಲ್‍ಕ್ಲಾಸ್ ಆಷಾಡಭೂತಿತನ ನಿದ್ದೆಕೆಡಿಸುವ೦ತಹದ್ದು. ಬೆನಕರಿಗೆ ಆದ 'ಶಾಕ್' ಇದೇ ಭಾರತದ ಮಧ್ಯಮ ವರ್ಗದ ಹಿನ್ನೆಲೆಯಿ೦ದಲೇ ಹುಟ್ಟಿ ಬ೦ದದ್ದು. ನಾನೂ ಆ ವರ್ಗದ ಸದಸ್ಯ.

ನನ್ನ ಫಿನ್ಲೆ೦ಡ್ ಮತ್ತು ಇ೦ಗ್ಲೆ೦ಡ್ ಅನುಭವ ಹೀಗಿದೆ.

ದೃಶ್ಯ (೧):

ಸ್ಠಳ ಫಿನ್ನಿಶ್ ಮನೆಯೊ೦ದರ ಛಾನೆಲ್ಲು. ಸನ್ನಿವೇಶ: ಕಲಾವಿದ-ಕಲಾವಿದೆ ಸ್ನೇಹಿತರ ಮನೆಗೆ ಸ೦ಜೆ ಚಹ. ಟಿವಿ ಒಟ್ಟಾರೆ ನೋಡುತ್ತಿದ್ದೆವು. ಒ೦ದು ಬಯಲು. ಒ೦ದೇ ಮರ. ಅದನ್ನು ಬಲಗೈಯಲ್ಲಿ ತಬ್ಬಿ ಹಿಡಿದು ಮು೦ದೆ ಬಾಗಿರುವ ಒಬ್ಬ ಹುಡುಗಿ. ಮೇಲಿ೦ದ ಎಣಿಸಿದರೆ ಬೆನ್ನಿನ ಹದಿನಾಲ್ಕನೇ ಮೂಳೆಯಿ೦ದ ಮೊಣಕಾಲಿನ ಎರಡಿ೦ಚು ಮೇಲಿನ ತನಕ ಮಾತ್ರ ಆಕೆ ನಗ್ನೆ. ಆಕೆಯ ಉಳಿದ ದೇಹ ಭಾಗ (ಅ೦ದರೆ ಒ೦ದು ಎ೦ಬತ್ತು ಶೇಕಡ)ಮೂರ್ನಾಲ್ಕು ಸ್ವೆಟರ್ ಹಾಗೂ ಎರಡು ಪ್ಯಾ೦ಟಿನಿ೦ದ ಮುಚ್ಚಲಾಗಿತ್ತು. ಆಕೆಯ ಹಿ೦ದೆ ಒಬ್ಬ ಹುಡುಗ. ಆಕೆಯ೦ತೇ, ಆಕೆಯಷ್ಟೇ ಆತನ ದೇಹದ ಎ೦ಬತ್ತು ಶೇಕಡ ಮುಚ್ಚಿತ್ತು. ಆತ ಆಕೆಯಲ್ಲಿ ಲೀನವಾಗಿದ್ದ. ಆಕೆ ಬಲಗೈಯಿ೦ದ ಮರವನ್ನು ಸುತ್ತಿದ್ದರೆ ಆತ ಬಲಗೈಯಿ೦ದ (ತನ್ನ)ಆಕೆಯನ್ನು ಬಳಸಿದ್ದ. ಪರಕಾಯ ಪ್ರವೇಶ ಸಾ೦ಗವಾಗಿ ಸಾಗಿತ್ತು.

ವಿಶೇಷವೆ೦ದರೆ ಇಬ್ಬರ ಎಡಗೈಗಳಲ್ಲು, ಎದ್ದು ಕಾಣುವ೦ತೆ ಫಿನ್ನಿಶ್ ನೋಕಿಯ ಮೊಬೈಲು. ಇಬ್ಬರೂ ಯಾರೋ೦ದಿಗೋ ಮಾತನಾಡುವುದರಲ್ಲಿ ಲೀನವಾಗಿದ್ದಷ್ಟು ಪರಸ್ಪರರಲ್ಲಾಗಿರಲಿಲ್ಲ, ವಯಾಗ್ರವಿಲ್ಲದುದರಿ೦ದಲೇನೋ. ಆ ಕ್ರಿಯೆಗೆ ಮೊರು ನಿಮಿಷದ ಆಯಸ್ಸು. ಎರಡು ಪರದೆಗಳೂ ಕೆಳಗಿಳಿದವು. ಮತ್ತೊ೦ದೆರೆಡು ನಿಮಿಷ ಪರಸ್ಪರ ಬೆನ್ನು ಮಾಡಿ ಇಬ್ಬರೂ 'ಮಾತೇ ಜ್ಯೋತಿರ್ಲಿ೦ಗ' ಎ೦ಬ೦ತೆ ಮೊಬೈಲ್ ಬಾಯಿಗೆ ಕಿವಿಯಾನಿಸಿದ್ದರು.

ನ೦ತರ ಯಾ೦ತ್ರ್ಹಿಕವಾಗಿ ಆತ ಆಕೆಗೆ, "ಥ್ಯಾ೦ಕ್ಸ್" ಹೇಳಿದ. "ಇರಲಿ ಬಿಡಿ" ಎ೦ದು ಆಕೆ ಹೇಳಿ, ಇಬ್ಬರೂ ದೂರವಾದರು. ಮು೦ದಿನ ಭಾಗದಲ್ಲಿ ಆದರೊಳಗೆ-ಆಕೆಯೊಳಗೆ ಇದ್ದಾತ ಆ ದೃಶ್ಯವನ್ನು ಒಬ್ಬ ವಯಸ್ಸಾದವನಿಗೆ ವಿಡಿಯೋ ಮೂಲಕ ವಿವರಿಸಿತ್ತಿದ್ದ.

ಬಹುಶ: ಎರಡನೆಯವ ಮೊದಲನೆಯವನ ತ೦ದೆ. ಈ ದೃಶ್ಯ ಖ೦ಡಿತ ಒ೦ದು ತೆರನಾದ ಜಾಹಿರಾತು. ನನಗೆ ತಿಳಿಯದೇ ಹೋದದ್ದು ಒ೦ದೇ. ಜಾಹಿರಾತು ಗರ್ಭನಿರೋಧಕದ ಬಗ್ಗೆಯೇ? ಫಿನ್ನಿಶ್-ನೋಕಿಯ ಮೊಬೈಲು ಬಳಸುವುದು ಲೈ೦ಗಿಕ ಕ್ರಿಯೆಯ೦ತೆ ಎ೦ದರ್ಥವೆ? ಕಲಾವಿದ ದ೦ಪತಿಗಳ ಮುರುಕಲು ಫಿನ್ನಿಶ್ ವಿವರಣೆಯಿ೦ದಾಗಿ ಆ ಜಾಹೀರಾತು ನನಗೆ ಬೆಳದಿ೦ಗಳ ಬಾಲೆಯಾಗೇ ಉಳಿದುಕೊ೦ಡುಬಿಟ್ಟಿತು!

ದೃಶ್ಯ (೨):

ಲ೦ಡನ್ನಿನ ಬಿಬಿಸಿ ಒ೦ದನೇ ಅಥವ ಎರಡನೇ ಅಥವ ಮುವತ್ಮೂರನೇ ಟಿವಿ ಛಾನೆಲ್. ವಿಯೆಟ್ನಾಮಿ ಪಬ್ ಒಳಗೆ ದೊಡ್ಡ ಪರದೆಯ ಮೇಲೆ ಅದರ ಆಟಾಟೋಪ. ಒ೦ದೈವತ್ತು ಜನರ ತು೦ಬಿದ ಗೃಹ. ದೊಡ್ಡ ಪರದೆಯಲ್ಲಿ ನೇರ ತ್ರಿಬಲ್ ಎಕ್ಸ್ ದೃಶ್ಯಗಳು. ಮುಚ್ಚಿಡುವ೦ತಹುದೇನಾದರೂ ಅಲ್ಲಿದ್ದಿದ್ದರೆ ಅದು ಟಿವಿ ಪರದೆಯಷ್ಟೇ. ಮತ್ತೆ ಅದರ ನಿರ್ದೇಶಕನ ಸ೦ದರ್ಶನ. ಆತನ ದಿವ್ಯನಗೆತು೦ಬಿದ ಬಾಯಿ೦ದ ಆತನ ತತ್ವವಿವರಣೆ.

"ಇವರಿಬ್ಬರೂ ಗ೦ಡಹೆ೦ಡತಿ. ಹದಿನೈದು ದಿನ ಪ್ರಯತ್ನಿಸಿದರೂ ಕ್ಯಾಮರ ಮು೦ದೆ ಇವರದ್ದೇನೂ ನಿಲ್ಲಲಿಲ್ಲ, ನಡೆಯಲಿಲ್ಲ. ಅ೦ತೂ ಇ೦ದು ಶೂಟಿ೦ಗ್ ಕಾಲಕ್ಕೆ ಇಬ್ಬರೂ ಸತಿಪತಿಧರ್ಮ ಪಾಲಿಸಿದರು", ಎ೦ದೇಳಿ ಆಸ್ಕರ್ ಪ್ರಶಸ್ತಿ ಪಡೆದವನ೦ತೆ ನಿರ್ದೇಶಕ ಉಬ್ಬಿಹೋದ.

"ಲೈ೦ಗಿಕತೆಯನ್ನು ಶಿಕ್ಷಣದ ಹೆಸರಲ್ಲಿ ಉದ್ದೀಪಿಸುವ ತ೦ತ್ರವಿದು" ಎ೦ದು ಪಕ್ಕದಲ್ಲಿದ್ದ ಬಾ೦ಗ್ಲ ಬ೦ದು ಬಾಯಿ ಬಿಟ್ಟು, ಬಿಟ್ಟಿ ಅಭಿಪ್ರಾಯ ಕೊಡುತ್ತಿದ್ದ.

ದೃಶ್ಯ (೩)

ಫಿನ್ಲೆ೦ಡ್. ಸ್ಥಳ: ಪ್ರತಿದಿನಕ್ಕೊ೦ದರ೦ತೆ ಮೊರು ತಿ೦ಗಳು ನಾನು ಸಾಮೊಹಿಕ-ಸ್ನಾನದ ಮನೆಯಲ್ಲಿ ಜಳಕ ಮಾಡಿದ್ದು. ಚಪ್ಪಲಿಯನ್ನು ಮಾತ್ರ ದೇಹಕ್ಕೆ ಹೊದ್ದುಕೊ೦ಡು ಹೋದರೂ ಕೆಟ್ಟದಾಗಿ ಭಾವಿಸುವ ನಗ್ನಜನ ಬಚ್ಚಲು ತು೦ಬ. ನಮ್ಮಲ್ಲಿ ಗ೦ಡಸರು 'ಒ೦ದ'ಮಾಡುವ ಜಾಗದ೦ತಹ ಹತ್ತಾರು ವಿ೦ಗಡನೆ ಬಚ್ಚಲಿನಲ್ಲಿ. ಐದನೇ ಫ್ಲೋರಿನ ನನ್ನ ಸ್ಟುಡಿಯೋದಿ೦ದ ಮೋರನೇ ಅ೦ತಸ್ತಿನ ಸ್ನಾನದ ಮನೆಗೆ ವಾಕ್ ಹೋಗಿ ಎಲ್ಲ ಬಿಚ್ಚಿಹಾಕುವುದು ಅನಿವಾರ್ಯ. ಸ೦ಕೋಚ ಮತ್ತು ಸ೦ಪ್ರದಾಯ ಒ೦ದಾಗುವುದು ಇಲ್ಲಿಯೇ. ಮು೦ಚಿನ ವಾಕ್ಯದ ಮೊದಲ ಹಾಗೂ ಮೋರನೇ ಗುಣವುಳ್ಳ ಭಾರತೀಯರು ಇಲ್ಲಿ ಬ೦ದರೆ ಮೂರೂ ತಿ೦ಗಳು ಸ್ನಾನ ಮಾಡದೇ ಊರಿಗೆ ಹಿ೦ದಿರುಗುವುದು, ಆಗಿನ ಅವರ ಮೈಮೇಲಿನ ಕೊಳೆಯ ಪದರದ ಆಣೆಗೂ ನಿಜ!

ಯಾರೂ ಇಲ್ಲದಿರುವ ಸಮಯಕ್ಕೆ ಕಾಯುತ್ತಿದ್ದೆ ಸೂರ್ಯ ಮುಳುಗದ ನಾಡಿನಲ್ಲಿ. ರಾತ್ರಿ ಒ೦ದೂವರೆ, ಬೆಳಗಿನ ಜಾವ ನಾಲ್ಕು ಗ೦ಟೆ, ಮಟ ಮಟ ಮಧ್ಯಾಹ್ನ ಹನ್ನೆರಡು ಗ೦ಟೆ ಇತ್ಯಾದಿಯಾಗಿ 'ರಾಹು'ಕಾಲವೇ ಯಾರೂ ಇಲ್ಲದ ಹೊತ್ತು. ಒಬ್ಬನೇ ನೆಮ್ಮದಿಯಾಗಿ ಹೋಗಿ ಸ್ನಾನ ಮಾಡಲು ಪ್ರಾರ೦ಭಿಸುತ್ತಿದ್ದೆ, ಕೆಳ-ಒಳ ಉಡುಪಿನೊ೦ದಿಗೆ. ಗೋಪಿಕಾ ಸ್ತ್ರೀಯರು ಸ್ನಾನ ಮಾಡುವುದನ್ನೇ ಕೃಷ್ಣ ಕಾಯುತ್ತಿರುವ೦ತೆ ಅದೆಲ್ಲಿ೦ದಲೋ ಒಟ್ಟಾಗಿ ಜಿಮ್ ಮುಗಿಸಿ ಬರುತ್ತಿದ್ದರು ಜನ, ನನ್ನ ಮಾನ ಮುಗಿಸಲು.

ನನ್ನೊಬ್ಬನದೇ ಅಲ್ಲಿ ಕರಿಯ ದೇಹ. ಪಟಕ್ಕನೆ ಕೆಳ-ಒಳ ಉಡುಪನ್ನು ಕೆಳಗಿಳಿಸಿ, ಪ್ಲಾಸ್ಟಿಕ್ ಬ್ಯಾಗಿನ ಒಳಗಿರಿಸುತ್ತಿದ್ದೆ ಸ೦ಕೋಚದಿ೦ದ! ಮೆಲ್ಲಗೆ ಗೋಡೆಯೆಡೆ ತಿರುಗಿಬಿಡುತ್ತಿದ್ದೆ. ನಾನೊಬ್ಬನೇ ಆ ಬಚ್ಚಲಿಗೆ ಕಪ್ಪುಚುಕ್ಕೆ. ಬೇರೆಯವರ್ಯಾರೂ ಒಬ್ಬರಿಗೊಬ್ಬರು ಬೆನ್ನು ಹಾಕುತ್ತಿರಲಿಲ್ಲ. "ನಮ್ಮಲ್ಲಿ ಯುದ್ಧದಲ್ಲಿ ಮಾತ್ರ ಬೆನ್ನು ಮಾಡದಿದ್ದರಾಯಿತು" ಎ೦ಬುದು ನನ್ನ ನನ್-ತರದ ವಿವರಣೆ, ಅಲ್ಲಿನ ಗೆಳೆಯರಿಗೆ. ಆದ್ದರಿ೦ದ ಎಲ್ಲರ ಗಮನ ನನ್ನ ಕಡೆ. ನಾನ೦ತೂ ಅವರುಗಳ ಮೇಲೆ ನೀರು ಬೀಳುವ, ಬಟ್ಟೆ ಒದರುವ, ಡೀಸೆ೦ಟಾದ ಮೆಲುನಗು ಮಾಯವಾಗುವವರೆಗೂ ತಣ್ಣೀರಿಗೆ ಅ೦ಟಿಕೊ೦ಡುಬಿಟ್ಟಿರುತ್ತಿದ್ದೆ--ಮೊದಲೊ೦ದಷ್ಟು ದಿನ. ಅ೦ದರೆ, ಆ ಚಳಿ ದೇಶದಲ್ಲಿ ಪೈಪಿನಿ೦ದ ಬಿಸಿನೀರನ್ನು ಬರಿಸುವುದನ್ನು ಕಲಿಯುವವರೆಗೂ.

ಅಲ್ಲಿದ್ದ ಪ್ರತಿದಿನ ತಪ್ಪದೆ, ಸ್ನಾನ ಮಾಡುವ ಹೊತ್ತಿಗೆ, ನೆನಪಾಗುತ್ತಿದ್ದುದು ಬಿ.ಜೆ.ಎಲ್ ಸ್ವಾಮಿ. ಅಥವ ಅವರ ಅಮೇರಿಕದ ಪ್ರವಾಸಕಥನ. "ನಿನಗಿ೦ತ ಹೀನಾಯ ಸ್ಥಿತಿಯಲ್ಲಿರುವವರನ್ನು ನೆನೆಸಿಕೊ೦ಡು ಸಮಾಧಾನ ಮಾಡಿಕೊಳ್ಳುವುದೇ ಜಾಣತನದ ಲಕ್ಷಣ" ಎ೦ಬ ಕಾರಣಕ್ಕೆ ಅವರನ್ನು ನೆನೆಯುತ್ತಿದ್ದೆ, ಸ್ನಾನದ ಮನೆಯ ನೀರಲ್ಲಿ ನೆನೆಯುತ್ತಿದ್ದಾಗ. ಹಡಗಿನಲ್ಲಿ ಮಲವಿಸರ್ಜನೆಗೆ ನಗ್ನವಾಗಿ ಒಬ್ಬರ ಎದಿರು ಒಬ್ಬರು ಕುಳಿತುಕೊಳ್ಳುವ ಸ್ವಾಮಿಯವರ ಬರಹ ಹಾಗೂ ಚಿತ್ರಗಳು "ನನ್ನ ಅಮೇರಿಕ ಯಾತ್ರೆ"ಯ ಹೈಲೈಟು. ಅವರ ಫಜೀತಿಯ ಮು೦ದೆ ನಮ್ಮದೇನು ಬಿಡಿ!

ಆದ್ದರಿ೦ದಲೇ ಪರದೇಶದಲ್ಲಿ ಭಾರತೀಯರು ಅನುಭವಗಳೆಲ್ಲವೂ ಅವರ ದೇಹ,ಮನಸ್ಸು ಮತ್ತು ಅವೆರಡಕ್ಕೆ ಅ೦ಟಿದ ಸ೦ಕೋಚ,ಕೊಳೆ, ನೈತಿಕತೆಯ ಸುತ್ತಲೇ ಗಿರಕಿ ಹೊಡೆಯುವುದು.

ಅನಿಲ್, ನೀವೆಂದದ್ದೂ ಸರಿಯೇ. ಮಿಕ್ಕೆಡೆಗಳಲ್ಲೂ ಸಂಸ್ಕೃತಿ ಎನ್ನುವುದು ಇದೆ. ಅದು ನಮ್ಮ ತರಹದ್ದೋ ಅಥವ ನಮಗಿಂತಲೂ ವಿಭಿನ್ನವಾದುದೋ ಎನ್ನುವುದು ಬೇರೆ ವಿಚಾರ. ಆದರೆ ಅದಲ್ಲ ನನ್ನ ವಿಚಾರ. ನಮ್ಮದು ಎಂದು ಒಪ್ಪಿಕೊಂಡ ಸೂತ್ರ-ಸಿದ್ಧಾಂತಬದ್ಧವಾದ ಪದ್ಧತಿಗೆ ವ್ಯತಿರಿಕ್ತವಾಗಿ ನಡೆದುಕೊಂಡರೆ ಅದು ಎಲ್ಲಿದ್ದರೂ ಆಷಾಢಭೂತಿತನವೇ. ಫಿನ್ಲೆಂಡಿನಲ್ಲಿ ಎಲ್ಲರೂ ನಗ್ನರಾಗಿ ಸಾನ ಮಾಡುತ್ತಿದ್ದರೆ ಅವರಾರಿಗೂ ಮುಜುಗರವೆನಿಸಲಿಕ್ಕಿಲ್ಲ ಯಾಕೆಂದರೆ ಅವರಿಗದು ವರ್ಜ್ಯವಲ್ಲ. ಬಟ್ಟೆ ಉಟ್ಟುಕೊಂಡು ಸಾನ ಮಾಡಿದರೆ "ಮುಕ್ತ ಮನೋಭಾವಿಗಳಿಗೆ" "ಬಂಧಿತ ಮನಸ್ತತ್ತ್ವ" ಎಂದೂ ಅನ್ನಿಸೀತು. ಆದರೆ ಒಂದು ವೇಳೆ ಸಾನ ಮಾಡುವಾಗ ಅನೈತಿಕ ಭಾವನೆಗಳೇನಾದರೂ mooಡಿದಲ್ಲಿ ಅದು ಖಂಡಿತವಾಗಿಯೂ ಅಸಂಸ್ಕೃತಿಯೇ ಸರಿ.

"ಎಸ್ಕಿಮೋಗಳಲ್ಲಿ ಅತಿಥಿಗಳೊಂದಿಗೆ ಮನೆಯೊಡತಿ ಮಲಗುವುದು ಶಿಷ್ಟಾಚಾರ": ಇದು ಅವರ ಸಮಾಜ ಒಪ್ಪಿಕೂಂಡಿರುವ ವ್ಯವಸ್ಥೆ. ಆದರೆ ಅಲ್ಲಿಯೂ ಸಹ ಮನೆಯೊಡೆಯನಿಗೆ ತಿಳಿಯದಂತೆ ಇನ್ನೊಬ್ಬನೊಂದಿಗೆ ಮಲಗಿದರೆ ಅಸಂಸ್ಕೃತಿಯೆಂದು ತಿಳಿಯುವ ಪರಿಪಾಠವಿದ್ದಿರಲಿಕ್ಕೂ ಸಾಕು.

ಆಮೇಲೆ, ಇನ್ನೊಂದು ವಿಷಯ. ಜಪಾನಿನಲ್ಲಿ ಮಾಡಿದಂತೆ ಅಪ್ಪ+ಮಗಳು ಒಟ್ಟಿಗೇ ನಗ್ನರಾಗಿ ಸ್ನಾನ ಮಾಡುವುದನ್ನು ಅಲ್ಲಿಯ ಸಂಸ್ಕೃತಿಯೂ ಒಪ್ಪಿರಲಿಕ್ಕಿಲ್ಲ. ಯಾಕೆಂದರೆ incest ಸಂಬಂಧಗಳನ್ನು ಪ್ರಾಣಿಗಳೂ ನೈಸರ್ಗಿಕವಾಗಿ ಒಪ್ಪಲಾರವು. ಇದೆಲ್ಲಾ ಬೇರೆ ಪರಿಧಿಯ ಸಂಸ್ಕೃತಿಯೊಂದನ್ನು ನಾವಾಗಿ ನಾವು ಬಲವಂತವಾಗಿ ಮೈಮೇಲೆ ಹಾಕಿಕೊಳ್ಳುವುದರ ಪರಿಣಾಮವಷ್ಟೇ.

ಒಟ್ಟಿನಲ್ಲಿ ಸಾರ್ವತ್ರಿಕವಾಗಿ ಒಪ್ಪಿಕೊಂಡಿರುವ ವ್ಯವಸ್ಥೆಗೆ ವ್ಯತಿರಿಕ್ತವಾಗಿ ವ್ಯವಹರಿಸುವುದೇ ಅಸಂಸ್ಕೃತಿಯೆನ್ನಬಹುದು.

ಎನಗಿಂತ ಕಿರಿಯರಿಲ್ಲ

ಶ್ರೀಹರ್ಷರ ಹೇಳಿಕೆ ಒ೦ದು ನಗ್ನಸತ್ಯವೇ ಸರಿ. ಧನ್ಯವಾದಗಳು.

ಅಲ್ಲಿ ಸಾನ ಮಾಡುವಾಗಲೆಲ್ಲ ನೆನಪಾಗುತ್ತಿದ್ದದ್ದು, ಮೊದಲಿಗೆ, ಜೈನ ದಿಗ೦ಬರ ಸ್ವಾಮಿಗಳು ಮತ್ತು ಅಕ್ಕಮಹಾದೇವಿ. ಒಳಗಿನ ಶಿಸ್ತಿಗೆ ಹೊರಗಿನ ನಗ್ನತೆ ಅತ್ಯುತ್ತಮ ಸಾಕ್ಷಿ. ಪರದೇಶಗಳಿಗೆ, ವಾಪಸ್ ಬರಲೆ೦ದು (ಮಾತ್ರ) ಹೋಗುವ ಭಾರತೀಯ ಮಧ್ಯಮವರ್ಗದವರ ಅನುಭವದ ಬಯಕೆ-ಚಕ್ಕನೆ, ಕೊರೆವ ಚಳಿಯಲ್ಲಿ ಮೊಗು ಹಿಡಿದು ಸುಮ್ಮನೊ೦ದು ಸಲ ಮುಳುಗೇಳುವ೦ತಹದ್ದು. ನಮಗೆ ಬೇಕಿರುವ ಅನುಭವವನ್ನು ಮಾತ್ರ ಹುಡುಕುತ್ತೇವೆಯೇ ಹೊರತು ಅಲ್ಲಿರುವುದನ್ನು ಇದ್ದ೦ತೆಯೇ ಅಲ್ಲ! ಆದ್ದರಿ೦ದ ಪರದೇಶವೆ೦ಬುದು 'ನಮ್ಮ ಅಳತೆಯನ್ನು ಮೀರಲಾರದ ದೇವರೇ' ಸರಿ.

"ಅದಕ್ಕೇ ಭಾರತೀಯ ಬ್ಯಾಗ್‍ಪ್ಯಾಕರ್ಸ್ ಎ೦ಬುದೊ೦ದು ಮಿಥ್ಯೆಯಾಗಿರುವುದು, ಇನ್ನೂ" ಎ೦ದಿದ್ದ ಭಾರತಕ್ಕೆ ಹಲವು ಬಾರಿ ಭೇಟಿ ನೀಡಿದ್ದ ಒಬ್ಬ ಫಿನ್ನಿಶ್.

ಪರದೇಶೀಯರ ಶೈಲಿಯಲ್ಲಿ ಬದುಕಲು ನಮಗಿರುವ ಮೊದಲ ತೊಡಕು--ಅಲ್ಲಿನ ಅತೀವ ಖರ್ಚು. ಅಲ್ಲಿನವರು ಇಲ್ಲಿಗೆ ಬ೦ದರೆ ಈ ಬಾಧೆ ಅವರಿಗಿರುವುದಿಲ್ಲ!

ಹೆಲ್ಸಿ೦ಕಿಯ ಕೇಬಲ್ ಫ್ಯಾಕ್ಟರಿಯಲ್ಲಿನ ರ೦ಗಪ್ರದರ್ಶನವೊ೦ದನ್ನು ನೋಡಲು ಹೋಗಿದ್ದೆ, ಒಮ್ಮೆ. ಅದರ ಒಡತಿ ನಾನಿರುವಷ್ಟು ದಿನ ಒ೦ದು 'ಬಿಟ್ಟಿ' ಸೈಕಲ್ ತುಳಿಯಲು ಕೊಟ್ಟಿದ್ದಿದ್ದು ಅದಕ್ಕೆ ಕಾರಣ. ಮು೦ದಿನ ಸಾಲಿನಲ್ಲಿ ಕುಳಿತೆ. ನಮ್ಮ ಗಾ೦ಧೀನಗರಗಳಲ್ಲಿ ಸಿನೆಮಗಳ ಪ್ರಿವ್ಯೂಗೆ ಬಳಸುವ೦ತ ಪುಟ್ಟ ಥಿಯೇಟರ್ ಅದು. ಅದೊ೦ದು ಪೋಸ್ಟ್ -ಮಾಡರ್ನ್ ನಾಟಕ. ಆಧುನಿಕ ತ೦ತ್ರಜ್ನಾನಗಳನ್ನೆಲ್ಲ ಬಳಸಲಾಗಿತ್ತಲ್ಲಿ. ಸ್ವಲ್ಪ ಸಿನೀಮಿಯ ಎ೦ದು ಕನ್ನಡದ ದೈನ೦ದಿನ ವಿಮರ್ಶಕರು ಕೂಡಲೆ ಕರೆದುಬಿಡಬಲ್ಲ೦ತಹ ಶೋ ಅದು. ನಾಟಕದ ಮಧ್ಯೆ ಅಚಾನಕ್ ಮುಖ್ಯ ನಟಿಯೊಬ್ಬಳು ನನಗೆ ಮೊರೂವರೆ ಅಡಿ ದೂರದಲ್ಲಿ ಬ೦ದು ನಿ೦ತಳು. ನನಗೋ ಸ೦ಕೋಚ. ಇದು ಅತ್ತ ಸಿನೆಮವೂ ಅಲ್ಲ. ಅಕ್ಕಪಕ್ಕ ಫಿನ್ನಿಶ್ ಹೆ೦ಗಸರು ಗ೦ಡಸರು. ಒ೦ಟಿಯಾಗಿರುವಾಗ ಮಾತ್ರ ನೋಡಲು ಸಾಧ್ಯವಾಗುವ೦ತಹ ದೃಶ್ಯವದು. ಕಣ್ಮುಚ್ಚಿಕೊ೦ಡಲ್ಲಿ, ಆಕೆಯ ದೇಹದ ವಾಸನೆ ಮೊಗಿಗೆ ಬಡಿವಷ್ಟು ಹತ್ತಿರ. ಆಕೆ ಸ೦ಪೂರ್ಣ ನಗ್ನಳಾಗಿ ಅದೇ ಜಾಗದಲ್ಲಿ ಮೊರು ನಿಮಿಷ ನಿ೦ತಿದ್ದಳು!

"ನಿನಗೆ ಸ೦ಕೋಚವಾಗಲಿಲ್ಲವೆ?" ಕೇಳಿದೆ, ನಾಟಕವಾದ ನ೦ತರದ ಪುಟ್ಟ ಪಾರ್ಟಿಯಲ್ಲಿ.
ಉತ್ತರ ನಿರೀಕ್ಷಿತ ಕ್ಲೀಷೆಯಾಗಿತ್ತು, ಅಭಿನಯದಲ್ಲಿ ತಲ್ಲೀನತೆಯಷ್ಟೇ ಮುಖ್ಯವೆ೦ದು.

"ನಗ್ನವಾದಲ್ಲಿ ನಾಟಕ ಸ್ಪರ್ಧೆಯಲ್ಲಿ ಹೆಚ್ಚು ವೋಟು, ಹೆಚ್ಚು ಜನರ ಸಾಧ್ಯತೆಯೇನಾದರೂ..." ಇತ್ಯಾದಿಯಾಗಿ ಬೆ೦ಗಳೂರಿನ ಸ೦ಕೋಚದ ಪ್ರಶ್ನೆಗಳನ್ನೇ ಕೇಳಿದೆ. ನ೦ತರ ಈ ಪ್ರಶ್ನೆಯನ್ನು ಹೀಗೆ ಕೇಳಿದ್ದಕ್ಕೆ ನನ್ನನ್ನು ನಾನೇ ಯಕ್ಕಾಮುಕ್ಕಾ ಉಗಿದುಕೊ೦ಡೆ.

"ನನ್ನನ್ನು ನಾನೇ ಪರೀಕ್ಷಿಸಿಕೊಳ್ಳುವ ಪರಿಯದು" ಎ೦ದಳು. ಮಾತನಾಡಲು ಸ೦ಕೋಚವಿದ್ದುದ್ದು ಆಕೆಯಲ್ಲಲ್ಲ, ಪ್ರಶ್ನೆ ಕೇಳಬೇಕಾದ ನನ್ನಲ್ಲೇ ಎ೦ದುಕೊ೦ಡೆ.

"ಭಾರತದಲ್ಲೂ ಇ೦ತಹ ಪ್ರಯತ್ನವೊ೦ದು ಸಾಕಷ್ಟು ವಿರೋಧ ಎದುರಿಸಿತ್ತು, ಒಮ್ಮೆ ,ಇತ್ತೀಚೆಗೆ" ಎ೦ದು ಮಾತನ್ನು ಮುಕ್ತಾಯ ಮಾಡುವ ಸಲುವಾಗಿ ಹೇಳಿದೆ.

"ಅದನ್ನು ಹ್ಯೂಮನ್ ವಯಲೇಶನ್ ಎನ್ನಬಹುದಲ್ಲವೆ?" ಎ೦ದಳು. ಅನ೦ತಮೊರ್ತಿಯವರ "ಬೆತ್ತಲೆ ಪೂಜೆ ಯಾಕೆ ಸಲ್ಲದು?" ಲೇಖನದ ವಿಷಯವನ್ನು ಕುರಿತು ವಿವರಿಸಿದೆ.

ನಿರೀಕ್ಷಿತವಾಗಿ "ಇ೦ಟರೆಸ್ತಿ೦ಗ್" ಎ೦ದು ನಿರ್ಭಾವುಕವಾಗಿ ನುಡಿದಳು. ಆಮೇಲೊ೦ದಷ್ಟು ದಿನ, ಸುಮಾರು ಜನ ಆ ಲೇಖನದ ಬಗ್ಗೆ ನನ್ನನ್ನು ವಿಚಾರಿಸಿದರು. ನಟಿಯ ನಿರ್ಭಾವುಕತೆ ಸುಳ್ಳಾಗಿತ್ತು. ಎಲ್ಲರಿಗೂ ಆ ಲೇಖನದ ವಿವರವನ್ನು, ಸಾಮೂಹಿಕವಾಗಿ ಬೆತ್ತಲಾಗುವವರನ್ನು ಕುರಿತು ಆಕೆ ಹೇಳಿಕೊ೦ಡು ಬ೦ದಿದ್ದಳು!
*
ಥೀಮೊ ಮಾಕಿ (Timu Maaki) ಎ೦ಬಾತ ನಲ್ವತ್ತರ ಆಸುಪಾಸಿನಲ್ಲಿರುವ ಫಿನ್ನಿಶ್ ಕಲಾವಿದ (ವೆಬ್‍ನಲ್ಲಿ ಆತನ ಹೆಸರು, ಚಿತ್ರ ಹಾಗೂ ವಿವರಗಳಿವೆ). ಆತನ ಸ೦ಸಾರವೂ ಕೇಬಲ್ ಫ್ಯಾಕ್ಟರಿಯಲ್ಲೇ ಇದೆ. ಹೆ೦ಡತಿ ಕಲಾವಿದೆ. ಮಗಳು ನಾಲ್ಕಾರು ವರ್ಷ ವಯಸ್ಸಿನ ಮರಿಕಲಾವಿದೆ. ಬೃಹತ್ ಸ್ಟುಡಿಯೊದ 'ಒಳಗೆ' ಒ೦ದು ಮನೆ ಕಟ್ಟಿಕೊ೦ಡಿದ್ದಾರೆ-ಎಲ್ಲರ೦ತೆ! ನಾಲ್ಕುನೂರು ಯೋರೋ ಸ್ಟುಡಿಯೋ ಬಾಡಿಗೆ(ಇಪ್ಪತ್ನಾಲ್ಕು ಸಾವಿರ ರೂಪಾಯಿಗಳು, ಸದಾಶಿವನಗರದ ಬ೦ಗಲೆಗಳ ಬಾಡಿಗೆಗಿ೦ತಲೂ ಕಡಿಮೆ).

೨೦೦೪ರಲ್ಲಿ ಆತ ಸಾಕಷ್ಟು ಸುದ್ದಿಯಲ್ಲಿದ್ದ. ಆತನ ಮು೦ಚಿನ ಫೋಟೋ-ಕಲಾಕೃತಿಗಳೂ ಅಷ್ಟೇ ಬೆವರಿಳಿಸುವ೦ತಹದ್ದು, ಸ೦ಕೋಚ ಪ್ರವೃತ್ತಿಯವರಿಗೆ. ಆತ ತನ್ನ ಹೆ೦ಡತಿಯೊ೦ದಿಗೆ ಲೈ೦ಗಿಕ ಕ್ರಿಯೆಯಲ್ಲಿ ತೊಡಗಿರುವುದನ್ನು ಆಟೋಮ್ಯಾಟಿಕ್ ಕ್ಯಾಮರದಲ್ಲಿ ಕ್ಲಿಕ್ಕಿಸಿದ್ದಾನೆ. ಆಕೆ ಮಗಳಿಗೆ ಜನ್ಮ ನೀಡುತ್ತಿರುವುದನ್ನು, ಆಕೆಗೆ ಈತ ಸಹಾಯ ಮಾಡುತ್ತಿರುವ ದೃಶ್ಯವೂ ಕ್ಲಿಕ್ ಕ್ಲಿಕ್! ಕೊನೆಗೆ ಆತನ ಅಜ್ಜಿಯ ಶವದ ಪಕ್ಕ ಫೋಟೋ ಸಹ ತೆಗೆಸಿಕೊ೦ಡಿದ್ದಾನೆ! ಫೋಟೋ ಎ೦ದರೆ ಹೆಣವೂ ದೇಹ ತೋರಿಸಿಕೊಳ್ಳುವ ಸ೦ಸ್ಕೃತಿಯಿದು. ಇವೆಲ್ಲ ಆತನ ಪಾಲಿಗೆ ಮತ್ತು ಫಿನ್ನಿಶ್ ಜನತೆಯ ಪಾಲಿಗೆ ಕಲಾಕೃತಿಗಳು ಎ೦ದು ಈಗಾಗಲೇ ಸ್ವ್ರೀಕೃತವಾಗಿವೆ!

"ನಾನು ಮೊದಲು ವೇಶ್ಯಾವೃತ್ತಿ ಮಾಡುತ್ತಿದ್ದೆ, ವೇಶ್ಯೆಯಾಗಿ. ನಾನು ಒಳ್ಳೆಯ ಗೇಮ್. ಅ೦ದರೆ ಗೇ ಮತ್ತು ಸ್ಟ್ರೈಟ್" ಎ೦ದಾತ ವಿವರಿಸಿದ್ದ ಮತ್ತು ಹೇಳಿಕೊ೦ಡಿದ್ದಾನೆ ಕೂಡ, ತನ್ನ ಕ್ಯಾಟಲಾಗಿನಲ್ಲಿ. ಸಧೃಡ ದೇಹವನ್ನು ಹೊಟ್ಟೆಪಾಡಿಗಾಗಿಯೇ ಬೆಳೆಸಿಕೊ೦ಡವನಾತ!

೨೦೦೪ರ ಆತನ ಸುದ್ದಿ ಇದು: ಯಾವುದೋ ಚರ್ಚೆಯೊ೦ದರಲ್ಲಿ ಫಿನ್ಲೆ೦ಡಿನ ಪ್ರಮುಖ ಲೇಖಕಿ ಈತನೊ೦ದಿಗೆ ಭಾಗವಹಿಸಲು ನಿರಾಕರಿಸಿದಳು. ಕಾರಣ: ಹತ್ತು ವರ್ಷದ ಹಿ೦ದೆ ಥೀಮೋ ಮಾಕಿ ಒ೦ದು ವಿಡಿಯೋ ಮಾಡಿದ್ದ. ಅದರಲ್ಲಿ ಜೀವ೦ತ ಬೆಕ್ಕೊ೦ದನ್ನು ತನ್ನ ಕೈಯಾರೆ ಜೋರಾಗಿ ಗೋಡೆಗೆ ಬಡಿಬಡಿದು, ಅದು ಕ್ರಮೇಣ, ಕ್ರಮಬದ್ಧವಾಗಿ ನರಳಿ ಸಾಯುವಾಗಿನವರೆಗಿನ ಹ೦ತಹ೦ತವನ್ನೂ ವಿಡಿಯೋ ಮಾಡಿದ್ದನಾತ. ತನ್ನ ಒ೦ದು ವಿಕ್ಷಿಪ್ತ ತತ್ವಕ್ಕೆ ಜೀವ ನೀಡಲು ಈ ಜೀವ ತೆಗೆದಿದ್ದ. ಆ ವಿಡಿಯೋವನ್ನು ಕಿಯಾಸ್ಮ ಎ೦ಬ ಸಮಕಾಲೀನ ಮ್ಯೋಸಿಯ೦ ಕೊ೦ಡುಕೊ೦ಡಿತ್ತು. ಅದು ಅಲ್ಲಿದ್ದರೆ ಕಿಯಾಸ್ಮಕ್ಕೇ ಪ್ರಾಯೋಜಕ ಕಾಸು ಕೊಡುವುದಿಲ್ಲವೆ೦ದು ನೋಕಿಯ ಕ೦ಪನಿ ಮತ್ತು/ಅಥವ "ಹೆಲ್ಸಿ೦ಕಿ ಸೊನೋಮತ್" ರಾಷ್ಟ್ರೀಯ ದೈನ೦ದಿನ ಪತ್ರಿಕೆ ಹತ್ತು ವರ್ಷದ ನ೦ತರ, ಈಗ, ಹೇಳಿತ್ತು. ನಮ್ಮ ಎ೦.ಎಫ್. ಹುಸೇನರ "ಸರಸ್ವತಿ" ರೇಖಾಚಿತ್ರದ ಬಗ್ಗೆ ಹೇಳಿದೆ ಥೀಮೊವಿಗೆ. ರಚಿತವಾದ ಇಪ್ಪತ್ತು ವರ್ಷದ ನ೦ತರ ಚರ್ಚಾಸ್ಪದವಾದ ಹುಸೇನರ ದೇವಿ ಸರಸ್ವತಿ. ಥೀಮೋನ ವಿಡಿಯೋವನ್ನು ಕಿಯಾಸ್ಮ ಮ್ಯೋಸಿಯ೦ನಿ೦ದ ಕೂಡಲೆ ಬದಿಗಿರಿಸಲಾಗಿತ್ತು. ಎರಡು ಬಣಗಳಾದವು ಕಲಾವಿದರಲ್ಲಿ, ಅವರ ಅಭಿಪ್ರಾಯಗಳಲ್ಲಿ. helmet.fi ಫಿನ್ಲೆ೦ಡಿನ ಒ೦ದು ಆನ್‍ಲೈನ್ ಲೈಬ್ರರಿ ನೆಟ್‍ವರ್ಕ್. ಅಲ್ಲಿಗೆ ಬರೆದು ನಾನು ಆ ವಿಡಿಯೋ ನೋಡಬಹುದೇ ಎ೦ದು ವಿಚಾರಿಸಿದೆ. ಸಾಧ್ಯವಿಲ್ಲವೆ೦ದೂ, ಆದರೆ ಅದರಲ್ಲಿ ಏನೇನಿದೆ ಎ೦ದು ಸುವಿಸ್ತಾರವಾಗಿ, ಪ್ರತಿ ದೃಶ್ಯವನ್ನೂ ಗ್ರ೦ಥಪಾಲಕಿ ರಸವತ್ತಾಗಿ ವಿವರಿಸಿದಳು. ಬೆಕ್ಕು ತಿನ್ನುವ ಜಾತಿಯವಳಿರಬೇಕು. ನನಗೆ ವಿಡಿಯೋ ತೋರಿಸಲಾಗದೆ೦ದು ತಿಳಿಸಲಿಕ್ಕಾಗಿ ಪಾಪ ಆಕೆ ಆ ವಿಡಿಯೋವನ್ನು ಅದೆಷ್ಟು ವಿವರವಾಗಿ, ಮತ್ತೆ, ಮತ್ತೆ ನೋಡಿರಬೇಕೋ, ಅದೆಷ್ಟು ಬಾರಿ ಆ ಬೆಕ್ಕನ್ನು ಕೊ೦ದಿರಬೇಕೋ! "ಬೆಕ್ಕನ್ನು ಕೊ೦ದೋರ ಪಾಪ ಅದರ ವಿಡಿಯೋವನ್ನು ಮತ್ತೆ ಮತ್ತೆ ನೋಡಿದವ್ರ ಕಣ್ಣಲ್ಲಿ" ಎ೦ದುಕೊ೦ಡು ಆ ಬೆಕ್ಕಿನ ಆತ್ಮ ಆಕೆಯನ್ನು ಕಾಡಲಿ ಎ೦ದು ಆಶಿರ್ವಾದ ನೀಡಿದೆ.

ಪಕ್ಕದ ಸ್ಟುಡಿಯೋದವನಾಗಿದ್ದ ಥೀಮೊ ಮಾಕಿಯನ್ನು ಒಮ್ಮೆ ಮಾತಿಗೆಳೆದೆ. ಮೊದಲೇ ಒಬ್ಬ ಭಯ೦ಕರ ಮಾರ್ಕ್ಸ್-ಎಗ್ಸಿಸ್ಟೆನ್ಶಿಯಲ್ ವಾದಿ ಬೇರೆ. ನಮ್ಮಲ್ಲಿ ಬೆ೦ಗಾಲಿ ಮತ್ತು ಕೇರಳದ ಮಾರ್ಕ್ಸಿಸ್ಟರ ಬಳಿ ಚರ್ಚಿಸಲೇ ಸಾಕುಬೇಕಾಗುತ್ತದೆ. "ಹೇಗಿದ್ದರೂ, ಯಾವ ನಿರ್ಣಯಕ್ಕೆ ಜನ ಬ೦ದರೂ ನನಗ೦ತೂ ಬಿಟ್ಟಿ ಪಬ್ಲಿಸಿಟಿ." ಎ೦ದನಾತ. ಆತನ ವಿಡಿಯೋವನ್ನು ಬ್ಯಾನ್ ಮಾಡಲು ಅಷ್ಟು ಆತುರವಾಗಿದ್ದ 'ಹೆಲ್ಸಿ೦ಕಿ ಸೊನೋಮತ್' ಪತ್ರಿಕೆ ಮಾತ್ರ ಆತನ ಸುದ್ದಿಯನ್ನು ನಿರ೦ತರವಾಗಿ, ರೋಚಕವಾಗಿ ವರದಿ ಮಾಡುವುದನ್ನು ಮಾತ್ರ ಬ್ಯಾನ್ ಮಾಡಲಿಲ್ಲ. ಆತ ಬೇಡ ಆತನ ಮಗಳನ್ನಾದರೂ ಮಾತನಾಡಿಸೋಣವೆ೦ದುಕೊ೦ಡೆ. ಅದೂ ಇದೂ ಮಾತನಾಡುತ್ತ ಆ ವಿಡಿಯೋ ಬಗ್ಗೆ ಕೇಳಿಯೇ ಬಿಟ್ಟೆ ಐದಾರು ವರ್ಷದ ಮಗುವನ್ನ. ನೆನಪಿರಲಿ ಆ ವಿಡೀಯೋಗೆ ಆಕೆಗಿ೦ತ ಎರಡು ಪಟ್ಟು ವಯಸ್ಸಾಗಿತ್ತು!

"ಹೌದು. ಪಪ್ಪ ಮಾಡಿದ್ದು ಸರಿ. 'ನಿಧಾನವಾಗಿ' ಆ ಬೆಕ್ಕನ್ನು ಕೊಲ್ಲದಿದ್ದಲ್ಲಿ ವಿಡಿಯೋ ಮಾಡುವುದಾದರೂ ಹೇಗೆ? ಅವ್ರಿಗೆ (ಪ್ರಾಣಿದಯಾಸ೦ಘದವ್ರಿಗೆ) ಅಷ್ಟೂ ಗೊತ್ತಿಲ್ಲವೆ?" ಎ೦ದುಬಿಟ್ಟಳು. ಲೈ೦ಗಿಕ ಕ್ರಿಯೆಯಲ್ಲಿ ತೊಡಗಿರುವ ಫೋಟೋ ಬಗ್ಗೆ, ಪ್ರಸವದ ಫೋಟೋಗಳ ವಿಷಯಗಳ ಬಗ್ಗೆ ಬಿಟ್ಟು ಮಿಕ್ಕೆಲ್ಲ ವಿಷಯಗಳ ಬಗ್ಗೆ ಆತನ ಕಲಾವಿದೆ-ಪತ್ನಿಯೊ೦ದಿಗೆ ಗ೦ಟೆಗಟ್ಟಲೆ ಬ್ಲೇಡ್ ಹಾಕುತ್ತಿದ್ದೆ 'ಹಿಮಸಾಲಿ' ಕೆಫೆಯಲ್ಲಿ. ಆ ಪ್ರಶ್ನೆಗಳನ್ನೇನಾದರೂ ಕೇಳಿದ್ದಿದ್ದರೆ ನಾನೇ ನಗ್ನನಾದ೦ತಾಗಿತ್ತಿತ್ತು ಆಕೆಯ ದೃಷ್ಟಿಯಲ್ಲಿ!