ಗೆಳೆಯರೇ,

ಜಪಾನಿನಲ್ಲಿ ಈಗಿನ ರಾಜಕಾರಣ ರಂಗೇರುತ್ತಿದೆ. ಈಗಿನ ಪ್ರಧಾನ ಮಂತ್ರಿ ಜುನ್‍ಇಚಿರೊ ಕೊಇಜುಮಿ ನಂತರದ ಪ್ರಧಾನಿ ಅಭ್ಯರ್ಥಿಯನ್ನು ಆರಿಸಲು ಆಡಳಿತಾರೂಢ ಜಿಮಿಂತೋ [ಸ್ವತಂತ್ರ ಪ್ರಜಾಪ್ರಭುತ್ವವಾದೀ ಪಕ್ಷ] ಇನ್ನಿಲ್ಲದ ಹರಸಾಹಸ ಮಾಡುತ್ತಿದ್ದರೂ, ಹಿರಿಯ ತಲೆಗಳಾದ ಮೂವರಲ್ಲಿ ಯಾರು ಕುರ್ಚಿ ಹಿಡಿಯುವರೆಂಬ ಜಿಜ್ಞಾಸೆ ಎಲ್ಲರಲ್ಲಿ ಮೂಡತೊಡಗಿದೆ. ಆ ತ್ರಿಮೂರ್ತಿಗಳೇ - ಶಿಂಜೋ ಅಬೆ(ಮುಖ್ಯ ಕಾರ್ಯದರ್ಶಿ), ಸದಕಜು ತನಿಗಕಿ(ಅರ್ಥ ಮಂತ್ರಿ), ತರೊ ಅಸೊ(ವಿದೇಶಾಂಗ ಮಂತ್ರಿ). ಈ ಮುನ್ನ ಇವರೆಲ್ಲರಿಗಿಂತ ಹಿರಿಯರಾಗಿದ್ದು ಜಪಾನಿನ ಇತಿಹಾಸದಲ್ಲೇ ದಾಖಲೆ ಅವಧಿಯ ಮುಖ್ಯ ಕಾರ್ಯದರ್ಶಿಯಾಗಿದ್ದ ಯಾಸುಓ ಫುಕುದ ಕೂಡ ಸ್ಪರ್ಧೆಯಲ್ಲಿದ್ದರೂ, ಜುಲೈ ೩೧ ರಂದು ತಾವಾಗಿಯೇ ಹಿಂದೆ ಸರಿದರು. ಆರೋಗ್ಯ ಹಾಗೂ ವಯಸ್ಸಿನ ಕಾರಣ ನೀಡಿದರೂ, ಅವರ ಮುಖದಲ್ಲಿ ಅತೃಪ್ತಿ ಎಲ್ಲರಿಗೂ ಕಾಣದಿರಲಿಲ್ಲ! ಎಲ್ಲರ ಕಣ್ಣೂ 'ಅಬೆ'ಯವರ ಮೇಲೆಯೇ ಇದ್ದು, ಅವರೇ ಮುನ್ನುಗ್ಗುವುದರಲ್ಲಿ ಸಂಶಯವಿಲ್ಲ ಎನ್ನಲಾಗುತ್ತಿದೆ. ೨೦೦೬ದಲ್ಲಿ ನಿವೃತ್ತಿ ಹೊಂದುವ ಆಸೆ ವ್ಯಕ್ತಪಡಿಸಿದ ಕೊಇಜುಮಿಯವರು ಮುಂದಿನ ಪ್ರಧಾನಿಗೆ ಕುರ್ಚಿಯ ಜೊತೆಗೆ ಸಂಕಟಗಳನ್ನೂ ಸಂದಿಗ್ಧಗಳನ್ನೂ ಬಳುವಳಿಯಾಗಿ ನೀಡಲಿದ್ದಾರೆ: ಯಾಸುಕುನಿ ಮಂದಿರದ ವಿವಾದ, ಉತ್ತರ ಕೊರಿಯಾದಿಂದ ಅಪಹೃತರ ಸಮಸ್ಯೆ, ಅಂಚೆಯ ಖಾಸಗೀಕರಣದ ತಲೆನೋವು, ಹಿರಿಯ ನಾಗರಿಕರ ವಾರ್ಷಿಕ ನಿಧಿಯ ಫಜೀತಿ, ಸಮುದ್ರದೊಳಗಿಂದ ತನ್ನ ತೈಲವನ್ನೆಲ್ಲಾ ಹೀರುತ್ತಿರುವ ಚೀನಾದ ಸಮಸ್ಯೆ, ದಕ್ಷಿಣ ಕೊರಿಯಾದ ಗಡಿದ್ವೀಪ ಸಮಸ್ಯೆ, ರಷಿಯಾದಿಂದ ಹಿಡಿಯಲ್ಪಟ್ಟ ಬೆಸ್ತರ ಬಿಡುಗಡೆಯ ಜವಾಬ್ದಾರಿ, ನಡುನೀರಿನಲ್ಲಿ ಕೈಬಿಡುವಂತೆ ಕಾಣುವ ಅಮೆರಿಕದ ಬಿಗಿಹಿಡಿತ!......ಒಂದೇ ಎರಡೇ.. ಇನ್ನೂ ಇವೆ!

ಹೀಗಿರುವಾಗ ಮತ್ತೊಂದು ತಲೆನೋವು ಹುಟ್ಟಿಕೊಂಡಿದೆ : ಹುಟ್ಟಲಿರುವ ಎರಡನೇ ಯುವರಾಜನ ಮೂರನೆಯ ಮಗು! ಸತತ ಐವತ್ತು ವರ್ಷಗಳಿಂದ ರಾಜವಂಶದಲ್ಲಿ ಗಂಡು ಸಂತಾನವೇ ಇಲ್ಲದೆ, ಈಗಿನ ಯುವರಾಜ ಚಕ್ರವರ್ತಿಯಾದರೆ, ಮುಂದೆ ಯುವರಾಜನಾರು? ಸಿಂಹಾಸನಕ್ಕೆ ವಾರಸುದಾರರಾರು? ಎಂಬುದು ರಾಜಕೀಯ ವಲಯದಲ್ಲಷ್ಟೇ ಅಲ್ಲ, ಜನರಲ್ಲೂ ಆತಂಕ ಮೂಡಿಸಿದೆ. ಇದುವರೆಗೂ ಜಪಾನ್ ಸಿಂಹಾಸನ ರಾಜರ ಆಳ್ವಿಕೆಯಲ್ಲೇ ಇತ್ತು; ಮುಂದೆ ರಾಣಿಗೆ ಪಟ್ಟ ಕಟ್ಟಬೇಕೆಂದೂ, ರಾಜಕುವರಿಗೆ ಪಟ್ಟಕಟ್ಟಬೇಕೆಂದೂ ಬಹಳ ಬಿರುಸಿನ ಚರ್ಚೆ ನಡೆಯುತ್ತಿದೆ. ರಾಜಪುತ್ರಿಯ ಸಂತಾನ ಗಂಡಾದರೂ ಅದಕ್ಕೆ ರಾಜನಾಗುವ ಅರ್ಹತೆ ಇಲ್ಲವೆಂದೂ, ಪುತ್ರನೇನು ಪುತ್ರಿಯೇನು ಒಟ್ಟಿನಲ್ಲಿ ರಾಜನ ರಕ್ತವೆಂದೂ, ಅದರಲ್ಲಿ ಎಕ್ಸ್-ವೈ ವಂಶವಾಹಿಗಳು ಬೇರೆಯೆಂದೂ ಇನ್ನೂ ಬೇರೆ ಬೇರೆ ಚರ್ಚೆ ನಡೆಯುತ್ತಿರುವಾಗ, ಎರಡನೆಯ ಯುವರಾಜನ ಪತ್ನಿ - ಯುವರಾಣಿ ಮೂರನೆಯ ಮಗುವಿನ ಗರ್ಭಿಣಿ ಎಂಬ ಸುದ್ದಿ ತಿಳಿದು ಜನ ಹರ್ಷೋದ್ಗಾರ ಮಾಡತೊಡಗಿದರು. ರಾಜನಿರಲಿ, ಕಸ ಗುಡಿಸುವವನೂ ಈ ಸಂತಾನ ಗಂಡಾಗಲೆಂದು ಸಿಕ್ಕ ಸಿಕ್ಕ ದೇವರಿಗೆಲ್ಲ ಹರಕೆ ಹೊತ್ತಿದ್ದಾರೆ! ಈಗಾಗಲೇ ರಾಜವಂಶಕ್ಕೆ ಭ್ರೂಣದ ಲಿಂಗ ತಿಳಿದಿದೆಯಾದರೂ(ಜಪಾನಿನಲ್ಲಿದು ಕಾನೂನು ಬದ್ಧವಾಗಿದೆ) ಯಾರೂ ತುಟಿಬಿಚ್ಚಿಲ್ಲ! ಆ ಯುವರಾಣಿಗೆ ಹೆಣ್ಣಾದರೆ, ಕಾನೂನು ಬದಲಿಸಲು ಸಿದ್ಧತೆಯೂ ನಡೆದಿದೆ! ಗಂಡಾದರೆ...... ವಿಜಯೋತ್ಸವದ ಸಿದ್ಧತೆಯೂ ನಡೆದಿದೆ! ಆ ಯುವರಾಣಿಗೆ ನಾಳೆಯೇ ಪ್ರಸವ.......!

ಜಪಾನಿನ ಈಗಿನ ಚಕ್ರವರ್ತಿ ಅಕಿಹಿತೊ, ಚಕ್ರವರ್ತಿನಿ ಮಿಚಿಕೊ; ಇವರಿಬ್ಬರಿಗೆ ನರುಹಿತೊ, ಫುಮಿಹಿತೊ ಎಂಬ ಇಬ್ಬರು ರಾಜಕುಮಾರರು ಹಾಗೂ ಸಯಕೊ ಎಂಬ ಒಬ್ಬಳು ರಾಜಕುಮಾರಿ.
ಯುವರಾಜ ನರುಹಿತೊ ಹಾಗೂ ಪತ್ನಿ ಯುವರಾಣಿ ಮಸಕೊ ದಂಪತಿಗೆ ಮದುವೆಯಾಗಿ ಎಂಟು ವರ್ಷಗಳ ನಂತರ ಹುಟ್ಟಿದ ರಾಜಪುತ್ರಿಯೇ ಐಕೊ! ಇಷ್ಟರಲ್ಲಿ ಎರಡನೆಯ ರಾಜಕುಮಾರ ಫುಮಿಹಿತೊ ಹಾಗೂ ಪತ್ನಿ ಕಿಕೊ ದಂಪತಿಗಳಿಗೆ ಇಬ್ಬರು ಮಕ್ಕಳಾಗಿದ್ದರು; ಈರ್ವರೂ ಕುವರಿಯರೇ - ಕಕೊ ಮತ್ತು ಮಕೊ! ಮೊನ್ನೆ ಮೊನ್ನೆ ಚಕ್ರವರ್ತಿಯ ಕುಮಾರಿ ಸಯಕೊ, ತನ್ನ ಸಾರಥಿಯನ್ನೇ ಮದುವೆಯಾಗಿ ಎಲ್ಲರೂ ಹುಬ್ಬೇರಿಸುವಂತೆ ಮಾಡಿದಳು. ಈಗಿನ ಚಕ್ರವರ್ತಿಯ ದಾಯಾದಿಗಳಿಗೂ ಗಂಡು ಸಂತಾನವಿಲ್ಲ! ಹೀಗಾಗಿ, ಮುಂದಿನ 'ಯುವರಾಜ' ಹಾಗೂ 'ಚಕ್ರವರ್ತಿ' ಯಾಗುವ ಮಗು ಕಳೆದ ಐವತ್ತು ವರ್ಷಗಳಲ್ಲಿ ರಾಜಕುಟುಂಬದಲ್ಲಿ ಹುಟ್ಟೇ ಇಲ್ಲ! ಇಂತಹ ಸಂದಿಗ್ಧದಲ್ಲಿ ಎರಡನೆಯ ಯುವರಾಣಿ ಕಿಕೊ ಗರ್ಭಧರಿಸಿ ಕದನಕುತೂಹಲವಾಗಿತ್ತು; ನಾಳೆ ಆಕೆಗೆ ಶಸ್ತ್ರಪ್ರಸವದ ಮುಹೂರ್ತವಿಡಲಾಗಿದೆ.......

ಮುಂದಿನ ಚಕ್ರವರ್ತಿ ನಾಳೆ ಹುಟ್ಟುವನೇ.......??

ನಿಮ್ಮವ

ಬೆನಕ