25
October
2014

ಸಂಪದ - Sampada

'ಹೊಸ ಚಿಗುರು, ಹಳೆ ಬೇರು'

ದಾಯ್ ಜನ್ ಗುಮ್!

September 12, 2006 - 10:49am
benaka
To prevent automated spam submissions leave this field empty.

ದಾಯ್ ಜನ್ ಗುಮ್!
ಗೆಳೆಯರೇ,
ಜಪಾನಿನ ದೂರದರ್ಶನದ ದುರ್ದರ್ಶನದ ಬಗ್ಗೆ ಈ ಹಿಂದೆ ಬರೆದಿದ್ದೆನಲ್ಲವೇ? ಇದ್ದುದರಲ್ಲಿ ಉತ್ತಮವೆನ್ನುವಂಥ, ಮನೆಮಂದಿಯೆಲ್ಲ ಕುಳಿತು ನೋಡುವಂಥ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುವಲ್ಲಿ ಸರ್ಕಾರೀ ಕೃಪಾಪೋಷಿತ ವಾಹಿನಿ ಎನ್ ಎಚ್ ಕೆ [ನಿಹೋನ್ ಹೋಸೋ ಕ್ಯೋಕಯ್ = ಜಪಾನ್ ಪ್ರಸಾರ ಸಹಕಾರ ಸಂಘ] ಒಳ್ಳೆಯ ಹೆಸರು ಪಡೆದಿದೆ. ಎಲ್ಲ ದೇಶದ ಉತ್ತಮ ಕಾರ್ಯಕ್ರಮಗಳನ್ನೂ, ಸಾಂಸ್ಕೃತಿಕ ವೈವಿಧ್ಯಗಳನ್ನೂ ಸಂಗ್ರಹಿಸಿ ಜಪಾನ್ ಭಾಷೆಯ ದನಿಗೂಡಿಸಿ ಜನರು ಮೆಚ್ಚುವಂತೆ ಒಳ್ಳೆಯ ಗುಣಮಟ್ಟದ ಸರಣಿಯನ್ನು, ಗಣಕ ಚಿತ್ರಣಗಳನ್ನೂ, ಉತ್ತಮ ವಿವರಣೆಯನ್ನೂ ಸೇರಿಸಿ ಪ್ರಸಾರ ಮಾಡುತ್ತದೆ. ತನ್ನದೇ ಆದ ಛಾಪು ಮೂಡಿಸುವ ಕಿರುಚಿತ್ರ, ಧಾರಾವಾಹಿಗಳನ್ನೂ ನಿರ್ಮಿಸಿ ಒಳ್ಳೆಯ ಹೆಸರುಗಳಿಸಿದೆ. ೧೯೮೦ ರ ದಶಕದಲ್ಲಿ ಭಾರತದಲ್ಲಿ ವಾರಕ್ಕೊಮ್ಮೆ ಪ್ರಸಾರವಾಗುತ್ತಿದ್ದ ಜನಪ್ರಿಯ ಧಾರಾವಾಹಿಗಳಾಗಿದ್ದ 'ಜಯಂಟ್ ರೋಬೋಟ್', 'ಓಶಿನ್' ಗಳನ್ನು ನಿರ್ಮಿಸಿದ್ದೇ ಈ ವಾಹಿನಿ. ಇತ್ತೀಚೆಗೆ ಈ ವಾಹಿನಿಯಲ್ಲಿ (ಜಪಾನಿನಲ್ಲಿ) 'ನಮ್ಮ ಭೂಮಿ' ಎಂಬ ಸೊಗಸಾದ ವೈಜ್ಞಾನಿಕ ಧಾರಾವಾಹಿ ಪ್ರಸಾರವಾಯಿತು; ಅದನ್ನು ನೋಡಿದ ಎಂತಹ ದಡ್ಡನಿಗೂ ಭೂಮಿಯ ಹುಟ್ಟಿನಿಂದ ಅಂತ್ಯದವರೆಗಿನ ಸಕಲವೂ ತಿಳಿಯುವಂತಿತ್ತು! ಭಾರತದಲ್ಲಿ ಇನ್ನೂ ಅತ್ತೆ-ಸೊಸೆಯ ಜಗಳವೇ ಬಂಡವಾಳವಾಗಿರುವ ದೈನಂದಿನ ಧಾರಾವಾಹಿಗಳೇ ಓಡುತ್ತಿವೆ; ಎಲ್ಲಾ ಒಂದೇ ರೀತಿಯ ಕಥೆಗಳು!!! ಸುಮ್ಮನೆ ಐಟಿ ! ಐಟಿ ! ಎಂದು ಕೂಗಿದರೇನು ಬಂತು? ಜನಕ್ಕೆ ಮಾಹಿತಿಯನ್ನು ತಲುಪಿಸಲು ಭಾರತದ ವಾಹಿನಿಗಳಿಗೆ ಬಿಡುವೇ ಇಲ್ಲ! ನೂರು 'ಮನೆ ಮನೆ ಕತೆ'ಗಳಿಗೊಂದು 'ಜ್ಞಾನಾರ್ಜನೆಯಾಗುವ ಕತೆ' ಬೇಡವೆ? ಯಾವಾಗ ಭಾರತದ ಉಪಗ್ರಹವಾಹಿನಿಗಳಿಗೆ ಬುದ್ಧಿ ಬರುವುದೋ ತಿಳಿಯದು!

ಸರಿ ನಮ್ಮವರಿಗೆ ಸಹಸ್ರನಾಮಾರ್ಚನೆ ಮಾಡುವುದಕ್ಕೆ ಇನ್ನೂ ಜನ ಸಾಲಿನಲ್ಲಿದ್ದಾರೆ; ಅದನ್ನು ಬಿಡಿ. ನಾನು ಹೇಳುತ್ತಿದ್ದ ಎನ್.ಎಚ್.ಕೆ ವಾಹಿನಿ ಸುಮಾರು ಒಂದೂವರೆ ವರ್ಷದಿಂದ ಹೊಸ ಸಾಪ್ತಾಹಿಕ ಧಾರಾವಾಹಿಯನ್ನು ಪ್ರಸಾರಮಾಡುತ್ತಿದೆ - ಕೊರಿಯಾದ ಇತಿಹಾಸದ ಪ್ರಸಿದ್ಧ ಮೊದಲ ಅರಮನೆಯ ವೈದ್ಯೆ 'ದಾಯ್ ಜನ್ ಗುಮ್'ಳ ಬದುಕಿನ ಕಥೆ. ಜಪಾನಿನಲ್ಲಿ ಅದರ ಹೆಸರು 'ಚಂಗುಮು ನೊ ಚಿಕಾಯ್' ಅಂದರೆ 'ಚಗುಂಳ ಶಪಥ'. ನೀವೆಂದುಕೊಳ್ಳಬಹುದಾದಂತೆ ಇದು ಇನ್ನೊಂದು 'ಅತ್ತೆ -ಸೊಸೆ' , 'ತುಳಸಿ', 'ಪಾರ್ವತಿ', 'ಸರೋಜಿನಿ' ಅಲ್ಲ! ಅಲ್ಲವೇ ಅಲ್ಲ! ಬದಲಿಗೆ, 'ಮಂಗಮ್ಮನ ಶಪಥ', 'ಕಿತ್ತೂರು ಚೆನ್ನಮ್ಮ', 'ರಾಣಿ ಲಕ್ಷ್ಮೀಬಾಯಿ', 'ಒನಕೆ ಓಬವ್ವ' ನಂತಹ ಕತೆ! ಪೌರಾಣಿಕವೂ ಅಲ್ಲದ ಆಧುನಿಕವೂ ಅಲ್ಲದ ಮಧ್ಯಕಾಲೀನ ಕೊರಿಯಾದ ಅರಸೊತ್ತಿಗೆಯ ಇತಿಹಾಸದ ಪುಟಗಳಲ್ಲಿ ಬರೆದಿಟ್ಟ ಕತೆ!

ಎಂತಹ ಅದ್ಭುತ ನಿರ್ದೇಶನವೆಂದರೆ, ಪ್ರತಿವಾರ ಒಂದು ಗಂಟೆ ದೂ.ದ. ಬಿಟ್ಟು ಅತ್ತಿತ್ತ ಕದಲಲು ಸಾಧ್ಯವಿಲ್ಲ! ಕತೆಗೆ ತಕ್ಕ ಸ್ವಲ್ಪ ಒಗ್ಗರಣೆ ಇದ್ದೇ ಇದ್ದರೂ, ಎಲ್ಲಿಯೂ ಹದತಪ್ಪದೆ ಮೂಡಿಬಂದಿದೆ. ಮೂರು ವರ್ಷಗಳ ಹಿಂದೆ ಜಪಾನಿನ ಬೇರೆ ವಾಹಿನಿಯೊಂದು ಜಪಾನಿನ ಇತಿಹಾಸದಲ್ಲಿ ಕುಖ್ಯಾತ ರಾಣಿಯೊಬ್ಬಳ ಸುತ್ತ ಹೆಣೆದ 'ಓಒಕು'(=ಅಂತಃಪುರ)ವನ್ನು ಪ್ರಸಾರ ಮಾಡಿತ್ತಾದರೂ, ಕೊರಿಯಾದ ಅಭಿರುಚಿಯ ಕಾಲುಗುರಿಗೂ ಸಮವಾಗಿರಲಿಲ್ಲ! ನಾನಂತೂ ಕೊರಿಯಾದ ನಾಲ್ಕೈದು ಧಾರಾವಾಹಿಗಳನ್ನು ನೋಡಿ, ಜಪಾನಿನವುಗಳನ್ನು ನೀವಾಳಿಸಿ ಎಸೆಯಬೇಕೆಂದುಕೊಂಡದ್ದೂ ಇದೆ! ಜೊತೆಗೆ ಕೊರಿಯದ ತರುಣಿಯರು ಇಷ್ಟೊಂದು ಸುಂದರಿಯರೇ ಎಂದು ನಾನಲ್ಲ..... ಜಪಾನೀಯರೇ ಹೊಟ್ಟೆಯುರಿದುಕೊಂಡದ್ದಿದೆ! ಐದು ವರ್ಷಗಳ ಹಿಂದೆ ಪ್ರಸಾರವಾದ 'ಫುಯು ನೊ ಸೊನಾತ'( = 'ಶಿಶಿರದ ಜತಿಸ್ವರ')ದ ನಾಯಕ-ನಾಯಕಿಯರಾದ 'ಪೇ ಯೊನ್ ಜುನ್ - ಚೆ ಜು' ಜೋಡಿಯ ಮೋಡಿಗೆ ಎಲ್ಲರೂ ಮೋಹಗೊಂಡು ಹಾನ್-ಗುಲ್(ಕೊರಿಯದ ಭಾಷೆ) ಕಲಿಯಲು ಆರಂಭಿಸಿದ್ದಾರೆ! ಮೊನ್ನೆ ಮೊನ್ನೆ ಪೇ ಯೊನ್ ಜುನ್ ಇಲ್ಲಿಗೆ ಬಂದಾಗ ಮಧ್ಯವಯಸ್ಕ ಯುವತಿಯರೆಲ್ಲ ಮುಗಿಬಿದ್ದು 'ಯೊನ್ ಸಮ...'(ಯೊನ್ ಅವರೇ..) ಎಂದು ರಾಮನನ್ನು ಕಂಡ ಶಬರಿಯರಂತೆ ಮೂರ್ಛೆಬಿದ್ದದ್ದೂ ಇದೆ!

ಅಂತಹ ಸುಂದರ-ಸುಂದರಿಯರು ಹೇರಳವಾಗಿರುವ 'ದಾಯ್ ಜನ್ ಗುಮ್' ಶನಿವಾರ ರಾತ್ರಿ ೧೧ ರಿಂದ ೧೨ ರವರೆಗೆ ಜಾಹಿರಾತುಗಳ ಕಾಟವಿಲ್ಲದೆ ನಿರಂತರ ಒಂದು ಗಂಟೆ ಕಾಲ ಜಪಾನನ್ನು ಮನೆಗಳಲ್ಲಿ ಹಿಡಿದಿಡುತ್ತದೆ! ಈಗಾಗಲೇ ಇದು ಕೊರಿಯಾ, ಚೀನಾ, ಹಾಂಗ್-ಕಾಂಗ್, ತೈವಾನ್, ಮಲೇಷಿಯಾ, ಸಿಂಗಪುರ, ಫಿಲಿಫೈನ್ಸ್, ಅಮೆರಿಕ, ಕೆನಡಾ ದೇಶಗಳಲ್ಲಿ ಗಳಲ್ಲಿ ಪ್ರಸಾರವಾಗಿದೆ. ನೋಡಿ:ದಾಯ್ ಜನ್ ಗುಮ್. ಆಂಗ್ಲದಲ್ಲಿ ಕಥೆಯೂ ಹಾಂಗ್-ಕಾಂಗ್ ನ ಈ ಕೊಂಡಿಯಲ್ಲಿ ಲಭ್ಯವಿದೆ:ದಾಯ್ ಜನ್ ಗುಮ್ - ಕಥೆ

ನಿಮ್ಮವ
ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್‍.ಕಾಮ್

ಪುಟವಿಡಲು ನುಡಿಯೇನು, ನೆಲವೇನು, ಹೊಳೆವುದೀ ನಾಡಿನಲಿ ಚಿನ್ನವಾಗಿ!

ಲೇಖನ ವರ್ಗ (Category): 

ಪ್ರತಿಕ್ರಿಯೆಗಳು

Submitted by hpn on

[quote=benaka]
ಭಾರತದಲ್ಲಿ ಇನ್ನೂ ಅತ್ತೆ-ಸೊಸೆಯ ಜಗಳವೇ ಬಂಡವಾಳವಾಗಿರುವ ದೈನಂದಿನ ಧಾರಾವಾಹಿಗಳೇ ಓಡುತ್ತಿವೆ; ಎಲ್ಲಾ ಒಂದೇ ರೀತಿಯ ಕಥೆಗಳು!!! ಸುಮ್ಮನೆ ಐಟಿ ! ಐಟಿ ! ಎಂದು ಕೂಗಿದರೇನು ಬಂತು? ಜನಕ್ಕೆ ಮಾಹಿತಿಯನ್ನು ತಲುಪಿಸಲು ಭಾರತದ ವಾಹಿನಿಗಳಿಗೆ ಬಿಡುವೇ ಇಲ್ಲ!
[/quote]

ಒಪ್ಪಬಹುದಾದಂತಹ ಮಾತು. ಆದರೆ ಅಂತಹ ದಾರಾವಾಹಿಗಳಲ್ಲೇ (ಜನಪ್ರಿಯ ವಾಹಿನಿಯಲ್ಲೇ) ಮಾಹಿತಿ ತಲುಪಿಸುವ ಪ್ರಯತ್ನ ಮಾಡುತ್ತಿರುವ ಟಿ ಎನ್ ಸೀತಾರಾಂ ಮುಂತಾದವರ ಪ್ರಯತ್ನ ಕೂಡ ಮರೆಯಕೂಡದು.

ನಾನು ಪುಟ್ಟವನಿದ್ದಾಗ "ಟರ್ನಿಂಗ್ ಪಾಯಿಂಟ್" ಎಂಬ ಕಾರ್ಯಕ್ರಮ ತಪ್ಪದೇ ನೋಡುತ್ತಿದ್ದ ನೆನಪು. (ಗಿರೀಶ್ ಕರ್ನಾಡ್ ಕೂಡ ಅಗಾಗ ಅದನ್ನು ನಡೆಸಿಕೊಡುತ್ತಿದ್ದರು - he used to anchor the show). ಈಗಲೂ ಅಂತಹ ಒಳ್ಳೆಯ ಪ್ರೋಗ್ರಾಮುಗಳು ಇಲ್ಲದಿಲ್ಲವೆಂದುಕೊಂಡಿದ್ದೇನೆ (ಇತ್ತೀಚೆಗೆ ಟಿ ವಿ ನೋಡೋಕ್ಕೆ ಸಾಧ್ಯವಾಗೋದೇ ಕಷ್ಟವಾಗಿದೆ. ಕಷ್ಟ ಪಟ್ಟು ಸಮಯ ಮಾಡಿಕೊಂಡು ನೋಡಲು ಕುಳಿತರೂ ಬೇಕಾದ ಚ್ಯಾನಲ್ಲು ಸಿಗೋದೇ ಕಷ್ಟ!) ಬರೇ ಕ್ರಿಕೆಟ್ ನೋಡೋದಕ್ಕೆ ಮೂರ್ಖಪೆಟ್ಟಿಗೆ ಶರಣು ಹೋಗೋ ನನ್ನಂತವರಂತೂ ಮನೆಯಲ್ಲಿ ಇತರರ ಆಯ್ಕೆಗಳ ಮೆಜಾರಿಟಿಗೆ ತಲೆ ಬಾಗಿ ಟಿ ವಿ ಬಿಟ್ಟುಕೊಡಲೇಬೇಕು ;-)

ದೂರದರ್ಶನದಲ್ಲಿ (ನಮ್ಮ ಸರಕಾರದ ವಾಹಿನಿ) ಸಾಕಷ್ಟು ಒಳ್ಳೆಯ ಪ್ರೋಗ್ರಾಮುಗಳು ಬಂದು ಹೋಗಿವೆ. ಈಗಲೂ ಸಾಕಷ್ಟು ಪ್ರಯತ್ನ ನಡೆಯುತ್ತಿರಬಹುದು. ಶಾಲೆಯಲ್ಲಿದ್ದಾಗ ಪ್ರತಿ ಭಾನುವಾರ "ಗುಚ್ಛಾ" ಎಂಬ ಪ್ರೋಗ್ರಾಂ ಡಿ ಡಿ ನ್ಯಾಶನಲ್ ನಲ್ಲಿ ಬರುತ್ತಿತ್ತು. ಇತ್ತೀಚೆಗೆ ಅದನ್ನು ನಿರ್ದೇಶಿಸಿದವರಲ್ಲಿ ಓಂಕಾರ ಹಾಗೂ ಮಕ್ಬೂಲ್ ಖ್ಯಾತಿಯ "ವಿಶಾಲ್ ಭಾರದ್ವಾಜ್" ಕೂಡ ಒಬ್ಬರೆಂದು ತಿಳಿದುಬಂತು!

***

NHK ಚ್ಯಾನಲ್ಲು ಇಲ್ಲೂ ಬರುತ್ತದೆ ಅನ್ಸತ್ತೆ. ನಾನೊಮ್ಮೆ ಯಾವಾಗಲೋ ಚ್ಯಾನಲ್ಲು ತಿರುವಿ ಹಾಕುವಾಗ ನೋಡಿದ ನೆನಪು. ಜಾಹಿರಾತು ಇಲ್ಲದೆ ದಾರಾವಾಹಿ ಪ್ರಸಾರ ಮಾಡುತ್ತಾರೆಂದು ಕೇಳಿ ಆಶ್ಚರ್ಯವೂ ಸಂತೋಷವೂ ಆಯಿತು.

--
[:http://hpnadig.net/blog|Check my Blog]
[:http://kn.wikipedia.org|Kannada wikipedia]

"ಹೊಸ ಚಿಗುರು, ಹಳೆ ಬೇರು"

Submitted by gvmt on

'ದೂರ ಕಲಿಕೆ'ಗೆಂದು ಯೂ.ಜಿ.ಸಿ ಹಾಗೂ ಅದರ ಅಂಗಸಂಸ್ಥೆಗಳು ತಯಾರಿಸಿದ ಕಾರ್ಯಕ್ರಮಗಳು ಮಧ್ಯಾಹ್ನದ ವೇಳೆ (೧ರಿಂದ ೨ ಘಂಟೆಗಳವರೆಗೆ) ಬಿತ್ತರವಾಗುತ್ತಿದ್ದವು. ಬಿ.ಬಿ.ಸಿಯವರು ಮಾಡಿಸಿದ ಚಿತ್ರಗಳನ್ನೂ ಆಗಾಗ ತೋರಿಸುತ್ತಿದ್ದರು. ಈಗಿನ ಸೀರಿಯಲುಗಳಲ್ಲಿರುವಂತೆ "production values" ಇಲ್ಲದಿದ್ದರೂ ಮಾಹಿತಿಗೇನೂ ಕೊರತೆಯಿರಲಿಲ್ಲ. ಕೊರತೆಯೇನಿದ್ದರೂ ನೋಡುವವರ ಸಂಖ್ಯೆಯಲ್ಲಿ.

ವೆಂ.

Submitted by shreekant.mishrikoti on

ಯೂ. ಜಿ. ಸಿ. ಕಾರ್ಯಕ್ರಮಗಳು ಈಗಲೂ ದೂರದರ್ಶನದಲ್ಲಿ ಇವೆ ; ಬೆಳಿಗ್ಗೆ ೫-೬ / ೬-೭ ಗಂಟೆ ಹೊತ್ತಿನಲ್ಲಿ ಇವೆ ಬಹುಶ: ೧೦-೧೧ ಗಂಟೆಗೂ ಇವೆ.

ಬೆಂಗಳೂರಿನಲ್ಲಿ UGC ಯ ಜ್ಞಾನವಾಣಿ ಎಂಬ FM ವಾಹಿನಿ ಕೂಡ ಇದೆ. ಬಹಳ ಒಳ್ಳೊಳ್ಳೇ ಕಾರ್ಯಕ್ರಮಗಳು ಅಲ್ಲಿವೆ . ದಿನಕ್ಕೆ ಏಳೆಂಟು ಗಂಟೆ ಪ್ರಸಾರವಿದೆ. ಕೇಳಿ .

"ಕನ್ನಡದ ಪುಲ್ಲೆನಗೆ ಪರಮ ಪಾವನ ತುಳಸಿ"

Submitted by benaka on

ಗೆಳೆಯರೇ,

ಖಂಡಿತವಾಗಿ ಭಾರತದಲ್ಲಿಯೂ 'ಮಾಹಿತಿ ತಲುಪಿಸುವ ಪ್ರಯತ್ನ' ನಡೆದಿದೆ ಎಂದು ಗೊತ್ತು; ಆದರೆ ಬಹುಪಾಲು ಅದು ಸರ್ಕಾರೀ ಸ್ವಾಮ್ಯದ ದೂರದರ್ಶನಕ್ಕೇ ಮೀಸಲಾಗಿರುವುದು ಖೇದಕರ ಸಂಗತಿ. ನಾನೂ ಯು.ಜಿ.ಸಿ. ಯ ಕಾರ್ಯಕ್ರಮಗಳನ್ನು ಬಹುವಾಗಿ ಮೆಚ್ಚಿದ್ದಿದೆ; ಆದರೆ ಅದು ಪ್ರಸಾರವಾಗುವ ವೇಳೆಗೆ ನಾವೆಲ್ಲ ಶಾಲಾಕಾಲೇಜುಗಳಲ್ಲಿರುತ್ತಿದ್ದೆವು. ಹಿಂದಿರುಗಿದ ನಂತರ ಅಂತಹ ಒಂದು ಕಾರ್ಯಕ್ರಮವೂ ಇರುತ್ತಿರಲಿಲ್ಲ; ಇದರ ಬಗ್ಗೆ ದೂದಕ್ಕೆ ಹಲವು ಬಾರಿ ದೂರಿತ್ತರೂ, ಧನಿಕ ಜಾಹೀರಾತು-ಪ್ರಾಯೋಜಕರೆಲ್ಲ ರಾತ್ರಿಯ ಧಾರಾವಾಹಿಯ ಕೈಹಿಡಿದು, ಯು.ಜಿ.ಸಿಯ ಕಾರ್ಯಕ್ರಮಗಳಿಗೆ ಯಾರೂ ಸಿಗದೆ ಹೋಗಿ, ಪ್ರಸಾರವೇ ನಿಂತದ್ದೂ ಇತಿಹಾಸ!

ಇನ್ನು 'ಮುಕ್ತ'ದಂತಹ ಧಾರಾವಾಹಿ ಅತಿವಿರಳ; ಸೀತಾರಾಂ ಅವರ ಪ್ರಯತ್ನ ಉತ್ತಮವೆಂಬುದರಲ್ಲಿ ಎರಡು ಮಾತಿಲ್ಲ. ಚಂದನದಲ್ಲಿ ಹೆಚ್ಚು ನಿರೀಕ್ಷಿಸುವಂತಿಲ್ಲ; ಕ್ಷಮಿಸಿ ಅದೇನು ಕಾಕತಾಳೀಯವೋ ಏನೋ, ನಾನು ಚಂದನ ನೋಡುವಾಗೆಲ್ಲ, ಯಕ್ಷಗಾನವೋ, ಡೊಳ್ಳುಕುಣಿತವೋ ಬರುತ್ತಿದ್ದುದು ಸ್ವಲ್ಪ ಬೇಸರವೆನಿಸಿತ್ತು; ಇರಲಿ ಅದೂ ನಮ್ಮ ಸಂಸ್ಕೃತಿಯ ಅಂಗ. ಆದರೂ ನಮ್ಮ ಹೆಗ್ಗಳಿಕೆಯೆಂದು ಹೇಳಿಕೊಳ್ಳುವ ಗಣಕ ಚಿತ್ರಣ - ಗ್ರಾಫಿಕ್ಸ್ ಅನ್ನು ಉಪಯೋಗಿಸಿ, ಎಲ್ಲರಿಗೆ ತಿಳಿಯುವಂತೆ ವಿವಿಧ ವಿಚಾರಗಳನ್ನು ಬಿತ್ತರಿಸಬಹುದಲ್ಲವೇ? ಹೋಗಲಿ, ಚಂದನಕ್ಕೇನೋ ಆರ್ಥಿಕ ತೊಂದರೆಯಿರಬಹುದು; ಇತರ ವಾಹಿನಿಗಳೇನು ಮಾಡುತ್ತಿವೆ? ಬರಿಯ ಚಿತ್ರಲೋಕದ ಸುದ್ದಿಗಳು, ಚಲನಚಿತ್ರ, ಚಿತ್ರಗೀತೆಗಳ ಚಿತ್ರಾನ್ನವನ್ನೇ ಉಣಬಡಿಸುತ್ತಿರುವ ವಾಹಿನಿಗಳು, ಸ್ವಲ್ಪವಾದರೂ ಇತ್ತ ಗಮನ ಹರಿಸಬಾರದೆ?

ಜಪಾನಿನಲ್ಲಿ ನಾನು ಇಲ್ಲಿಯವರೆಗೆ ವಾರ್ತೆಗಳಲ್ಲಿ ಹೆಣ, ರಕ್ತ, ಕೊಲೆಯಾದವನ, ಸತ್ತವನ ಮುಖ ನೋಡಿದ್ದೇ ಇಲ್ಲ; ಎಲ್ಲವೂ ಗಣಕ-ಚಿತ್ರಣದಲ್ಲಿ ಲಭ್ಯ! ನಮ್ಮಲ್ಲಿ ಕ್ರೈಂಡೈರಿ, ಪೋಲೀಸ್ ಡೈರಿ ಇತ್ಯಾದಿಗಳನ್ನು ನೋಡಿ ಆಶ್ಚರ್ಯವಾಯಿತು! ರಕ್ತಸಿಕ್ತ ಚಿತ್ರಗಳನ್ನು ತೋರಿಸಿ ಕೊನೆಗೆ ಆ ಕಾರ್ಯಕ್ರಮ ಮಾಡುವುದಾದರೂ ಏನು? ಕಿರಿಯರಲ್ಲಿ ಕುತೂಹಲ, ಭಯ, ಭಾವಾವೇಶ, 'ಹೇಗೆ ಮಾಡಬಹುದೆಂಬ' ಸಚಿತ್ರ ಉದಾಹರಣೆ!? ನನ್ನ ಮಿತ್ರರೊಬ್ಬರು ಹೇಳುತ್ತಿದ್ದರು:

"ಥೂ! ನಮ್ಮನೇಯವ್ರಿಗೆಲ್ಲಾ ರಾತ್ರಿ ೧೦:೩೦ ಗೆ ಟೀವೀಲಿ ಎರಡು ಹೆಣ ಬೀಳೋವರ್ಗೂ ನಿದ್ದೇನೇ ಬರೋಲ್ಲಯ್ಯಾ! ನನ್ ಮಗನಂತೂ ನೆನ್ನೆ ಚಾಕು ಹಿಡಿದು ಅದೆಂಥದೋ ದಂಡುಪಾಳ್ಯ ಅಂತ ಆಟಶುರುಮಾಡಿದ್ದ!"

ನಮಗೆ ಬೇಕಿರುವುದು ಇಂಥ ಮಾಹಿತಿಯಂತೂ ಖಂಡಿತಾ ಅಲ್ಲ!
ನಿಮ್ಮವ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.

Submitted by hpn on

ಹೌದ್ರಿ, ಟಿವೀಲಿ ರಕ್ತಸಿಕ್ತ ಬಾಡಿಗಳನ್ನು ಇದ್ದಕ್ಕಿದ್ದ ಹಾಗೇ ಕಣ್ಣ ಮುಂದೆ ಬಿತ್ತರಿಸುವುದು ಬೇಸರದ ವಿಷಯವೇ. ಇದಕ್ಕೆ ಕಾನೂನು ಇಲ್ಲವೇ ಎಂದು ನಾನೂ ಕೂಡ ಆಲೋಚಿಸುತ್ತಿದ್ದೆ. ಅಮೇರಿಕೆಯಲ್ಲಿ ಇಂತಹ ದೃಶ್ಯಗಳಿರುವ ಪ್ರೋಗ್ರಾಮುಗಳನ್ನು ತೋರಿಸುವ ಮುನ್ನ "viewer descretion requested" ಅನ್ನೋ ಸಂದೇಶವನ್ನಾದರೂ ಹಾಕ್ತಾರಂತೆ.

ನಮ್ಮವರಿಗೆ ಆ ಸೌಜನ್ಯವೂ ಇಲ್ಲ! ಇಂಗ್ಲೀಷು ಮೂವಿಗಳನ್ನು ನೋಡಿ ದೃಶ್ಯಮಾಧ್ಯಮದಲ್ಲಿ ರಕ್ತ, ಹೆಣ ನೋಡಿ ಅಭ್ಯಾಸವಾಗಿರುವ ನಮ್ಮಂತವರಿಗೆ ಹೆಚ್ಚು ಮಾನಸಿಕ ತೊಂದರೆಯಾಗದು. ಆದರೆ ಅದನ್ನು ಮೊದಲ ಬಾರಿಗೆ ನೋಡುತ್ತಿರುವವರ ಗತಿ ಅಧೋಗತಿ!

ಟಿ ವಿ ಚ್ಯಾನಲ್ಲುಗಳು ಪೈಪೋಟಿಯಂತೆ ಅಂತಹ ದೃಶ್ಯಗಳನ್ನು ತೋರಿಸುತ್ತಿರುವುದು ಖೇದದ ವಿಷಯವೇ.

--
[:http://hpnadig.net/blog|Check my Blog]
[:http://kn.wikipedia.org|Kannada wikipedia]

"ಹೊಸ ಚಿಗುರು, ಹಳೆ ಬೇರು"

Submitted by SHANKAR MURTHY.K.N on
ಬೆನಕ, ನಿಮ್ಮ ಲೇಖನ ಇಂದಿನ ಎಲ್ಲಾ ದೂರದರ್ಶನದ ಕಾರ್ಯಕ್ರಮಗಳಿಗೆ ಹಿಡಿದ ಕೈಗನ್ನಡಿ.........! ಡಿ.ಡಿ.೧ ರಲ್ಲಿ ಹಿಂದೆ ಸಿದ್ದಾರ್ಥ್ ಕಕ್ ಮತ್ತು ರೇಣುಕಾ ಶಹಾನೆ ನಡೆಸಿಕೊಡುತ್ತಿದ್ದ " ಸುರಭಿ "(ಹಿಂದಿ) ಕಾರ್ಯಕ್ರಮವನ್ನು ನೋಡಲು ಕಾಯುತ್ತಿದ್ದೆವು. ಅದೇ ರೀತಿಯ ಕಾರ್ಯಕ್ರಮಗಳು ಇಂದು ಇಲ್ಲವೇ ಇಲ್ಲ ಎಂದರೂ ತಪ್ಪಿಲ್ಲ......! ಈ ನಿಟ್ಟಿನಲ್ಲಿ ಪ್ರಯತ್ನ ಪ್ರಾರಂಭವಾಗಬೇಕಾಗಿದೆ.

ಟ್ವಿಟ್ಟರಿನಲ್ಲಿ ಸಂಪದ