ನವರಸದ ನಗೆ - ಬೀಭತ್ಸ, ರೌದ್ರ

ಬೀಭತ್ಸ - ೧
-----------
ಬಚ್ಚಲ ರೊಚ್ಚದು ಹನಿದು ಸೋರಿ
ಮೈಯೆಲ್ಲ ಜಿನುಗಿ ರಕ್ತವೊಸರಿ
ಕೀವು ಬಳಿದಂತೆ ಅಂಟು-ಜಿಗುಟು
ಬೆವೆತ ಮೈ ಬೆರೆತ ಕಮಟು
ಗಬ್ಬು ವಾಸನೆ, ಮೈಯೆಲ್ಲ ಒದ್ದೆ
ಬರುತಲಿದೆ ಸಹಿಸಲಾಗದ ನಿದ್ದೆ
ನಾನಲ್ಲ ಯೋಧ! ಇದಾವ ರಣರಂಗ!
ಅರೆರೆ! ಇದು ನನ್ನದೇ ಪಲ್ಲಂಗ!
ಹಾಸಿಗೆಯೆಲ್ಲ ಹೇಸಿಗೆ ದುರ್ಗಂಧ!
ಗಬ್ಬೆಬ್ಬಿಸಿ ನಗುತಲಿದ್ದವನು ಕಂದ!

ರೌದ್ರ - ೧
----------
ಬಗಿವೆ ಹೂತು ಮಣ್ಣೆರಚಿ ಮತ್ತೆ
ನೀರೆರಚಿ ಪಕ್ಕೆಗಳ ಬಡಿದು ಕೆತ್ತಿ
ಕಾದು ಕಾರ್ಮುಗಿಲ ಕರೆಮಳೆಗೆ
ಕೆಸರೆತ್ತಿ ಎರಚಿ ಸಗಣಿ ಕರಿಯಿಳೆಗೆ
ಕುಡಿಯ ಕಾಯ್ವೆನರಿಯ ಬಡಿದು
ಸುಳಿಯ ಕಂಬವ ಸೀಳಿ ಕಡಿದು
ನರಹರಿಯಂತೆ ಹರಿಹರಿದು ನರವ
ಮಾಲೆ ಕಟ್ಟುವೆ ಹಿಂಡಿ ರಸವ
ಕಡಿದು ತೋಳ್ಗಳ ರಸದೂಟ ಬಡಿಸಿ
ಹಣ್ಣುಗಾಯಿಯ ಮಾಡಿ ಚಪ್ಪರಿಸಿ
ಚಪ್ಪರಕಿಕ್ಕುವೆನು ಎಳೆಗೊನೆಯ
ಬಿಡುವೆನೇನಿನ್ನು ಬಾಳೆಯ ಗೊನೆಯ!

ನಿಮ್ಮವ
ಬೆನಕ