ಎಂತಹ ದಿವ್ಯ ದೃಶ್ಯ! ಆಹಾ! ನೋಡಲೆರಡು ಕಣ್ಣುಗಳು ಸಾಲವು! ದೇವನ ಸಾಕ್ಷಾತ್ಕಾರವಾದರೆ ಅವನ ಪ್ರಭೆಗೆ, ಆ ದಿವ್ಯ ಸೌಂದರ್ಯವನ್ನು ಕಂಡು ಮಾತು ಹೊರಡದೆ ಮೂಕರಾಗಿ, ಆ ಬ್ರಹ್ಮಾನಂದಕ್ಕೆ ಬೇರೆಲ್ಲ ಶಬ್ದಗಳೂ ನಿಶ್ಶಬ್ದವಾಗಿ ಕಿವುಡರಾಗಿ, ಜಗದ ಉಸಿರೇ ತನ್ನೆದುರು ನಿಂತಿರುವ ಭಾವೋದ್ವೇಗಕ್ಕೆ ಉಸಿರೇ ನಿಂತಂತಾಗಿ, ಕಣ್ಣೆವೆಯಿಕ್ಕದೆ ಏನನ್ನೂ ತಿಳಿಯದೆ ನೋಡುತ್ತಿರುವಾಗ - ಆ ದಿವ್ಯ ಮೂರುತಿ ತನ್ನ ಏಕರೂಪವನ್ನು ಒಮ್ಮೆಲೇ ಅನೇಕರೂಪವನ್ನಾಗಿಸಿ, ತನ್ನ ಸಾವಿರ ಕೈಗಳನ್ನೊಮ್ಮೆ ಕ್ಷಣಾರ್ಧದಲ್ಲಿ ಬಿಡಿಸಿ ಆಶೀರ್ವದಿಸಿ, ಪ್ರಭಾವಳಿಯಂತೆ ಕೈಗಳನ್ನೇ ಜೋಡಿಸಿ, ಮತ್ತೆ ಕ್ಷಣಾರ್ಧದಲ್ಲೇ ಎಲ್ಲವನ್ನು ಉಪಸಂಹರಿಸಿ ಏಕರೂಪಕ್ಕೆ ಬಂದು ನಕ್ಕರೆ - ಆ ದೃಶ್ಯಕ್ಕೆ ತಿಳಿಯದಂತೆಯೇ ಪರವಶತೆಯಿಂದ ಕಣ್ಣೀರು ಧಾರೆಯಾಗಿ ಸುರಿಯುತ್ತದೆ! ಅಂಥ ಆನಂದ ಮೊನ್ನೆ ನನಗಾಯಿತು!

ನನ್ನ ಮುಂದೆ ನಿಂತವನು ತನ್ನ ಸೊಬಗಿನಿಂದ ನನ್ನನ್ನು ಮೂಕ-ಕಿವುಡನನ್ನಾಗಿಸಬಲ್ಲ ಜಗದ ಉಸಿರಾದ ಲಯಕರ್ತ ಶಂಭುವಲ್ಲ! ಬದಲಿಗೆ ತಮ್ಮ ಉಸಿರಿನಲ್ಲೇ ತಾಳ-ಲಯವನ್ನು ತಿಳಿಯುವ ಮೂಕ-ಕಿವುಡ ಚೀನೀ ಬಾಲೆಯರು! ದೇವ ನಿಮಗೆ ಕಾಣುವನೋ ಇಲ್ಲವೋ, ಆದರೆ ಈ ಬಾಲೆಯರ ನರ್ತನ ನಿಮಗೆ ದೇವದರ್ಶನವನ್ನು ಮಾಡಿಸುವುದರಲ್ಲಿ ಸಂದೇಹವೇ ಇಲ್ಲ! ಉತ್ಪ್ರೇಕ್ಷೆಯಲ್ಲ; ಅಕ್ಷರಶಃ ನಿಜ! ಈ ತರುಣಿಯರ ತಂಡದ ಹೆಸರೂ ಅವರು ಅಭಿನಯಿಸುವ ದೇವನ ಹೆಸರೇ - "ಸೆಂಜು ಕನೊನ್"! ಸಂಸ್ಕೃತದಲ್ಲಿ ಈ ಬೋಧಿಸತ್ವನನ್ನು "ಸಹಸ್ರಭುಜ ಆರ್ಯ ಅವಲೋಕಿತೇಶ್ವರ" ಎನ್ನುತ್ತಾರೆ; ಅವನೇ ಬೌದ್ಧಧರ್ಮದ ಹಿರಿಯ ದೈವ - ಶ್ರೀಕೃಷ್ಣನ ವಿಶ್ವರೂಪದ ವಿರಾಟ್ಪುರುಷನಷ್ಟೇ ಪ್ರಸಿದ್ಧ. ಕನ್ನಡದಲ್ಲಿ 'ಸಾವಿರಕೈಗಳೊಡೆಯ' ಎನ್ನಲಡ್ಡಿಯಿಲ್ಲ. ಆ ವಿರಾಡ್ರೂಪವನ್ನು ಮನಮುಟ್ಟುವಂತೆ - ಈಗಿನ ಗಣಕಚಿತ್ರದ ತಂತ್ರಜ್ಞಾನವನ್ನೂ ನೀವಾಳಿಸಿ ಎಸೆಯುವಂತೆ - ಅಭಿನಯಿಸುತ್ತಾರೆ! ಒಂದೇ ಒಂದು ಸೆಕೆಂಡಿನಲ್ಲಿ ಸಹಸ್ರಭುಜಗಳೂ ಒಂದಾದ ಮೇಲೊಂದು ಹೊರಮೂಡಿ ಒಳಹೋಗುವ ದೃಶ್ಯ ನೋಡಿದೊಡನೆಯೇ ನಿಮ್ಮ ಅದ್ಭುತಾನಂದ ಎದೆಯನ್ನು ಬಿರಿಯುತ್ತದೆ; ಕಣ್ಣೆವೆ ಬಡಿಯದೆ ನಿಲ್ಲುತ್ತದೆ; ಉಸಿರು ಪೂರಕ, ರೇಚಕಗಳನ್ನು ಮರೆತು ಕುಂಭಕದಲ್ಲಿ ನಿಲ್ಲುತ್ತದೆ! ಬಾಯ್ತೆರೆದು ಸಂತಸದಿಂದ, ಮತ್ತೊಂದು ಕಣ್ಣಾಗುತ್ತದೆ! ನೋಡಿದ ಐದೇ ಐದು ನಿಮಿಷದಲ್ಲಿ ಆ ಬಾಲೆಯರ ಕಿವುಡ-ಮೂಕತನವೆಲ್ಲ ನಿಮ್ಮೊಳಗೆ ಸೇರುತ್ತವೆ!

ನೋಡಿ:

ಸಹಸ್ರಭುಜಾವಲೋಕಿತೇಶ್ವರ ಪ್ರಭಾವಳಿ

ಸೆಂಜು ಕನೊನ್ - ತರುಣಿಯರ ಅದ್ಭುತ ನೃತ್ಯ

ಶಾಂಘಾಯ್ ಮೂಲದ ಈ ತಂಡ ೨೦೦೮ ರ ಬೀಜಿಂಗ್ ಒಲಿಂಪಿಕ್ಸ್ ಗೆ ಭಾರೀ ಕಸರತ್ತು ನಡೆಸುತ್ತಿದೆ. ಇತ್ತೀಚೆಗೆ ಅಭ್ಯಾಸಾರ್ಥವಾಗಿ ೪೦-೫೦ ಪ್ರದರ್ಶನ ನೀಡಿದೆ; ಅದನ್ನು ನೋಡಿಯೇ ಸುಸ್ತಾದ ವಿದೇಶೀಯರು ಒಲಿಂಪಿಕ್ಸ್ ನಲ್ಲಿ ಚೀನೀಯರು ಇನ್ನೇನೆಲ್ಲಾ ಮಾಡಬಹುದೋ ಎಂದು ಅಚ್ಚರಿಗೊಂಡಿದ್ದಾರೆ! ಭಾರತದವರನ್ನು ಬಿಡಿ ಎಂದಿನಂತೆ- ಓ! ಅದೇನು? ಅದು ನಮಗೆ ಮೊದಲೇ ಗೊತ್ತು; ನಾವೂ ಅಷ್ಟಲಕ್ಷ್ಮಿನರ್ತನ ಮಾಡಿಲ್ಲವೇ ಎಂದು ಹೀಗಳೆಯುವರೇನೋ! ಹಾಗೆನ್ನುವವರಿಗೊಂದು ಕಹಿ ಸುದ್ದಿ - ಈಗ ಭಾರತದ ಯಾವ ನೃತ್ಯದ ತಂಡವೂ 'ಸೆಂಜು ಕನೊನ್'ನ ಕಾಲ ಕಿರಿಬೆರಳ ಉಗುರಿನ ಹುಡಿಗೂ ಸಮವಾಗಲಾರದು; ಅಂತಹ ಅಭ್ಯಾಸ, ಪರಿಶ್ರಮ ಅವರದು! ಕನಿಷ್ಠಪಕ್ಷ, ಮುಂದಾದರೂ ನಮ್ಮವರು ಎಚ್ಚೆತ್ತುಕೊಳ್ಳುವರೇನೋ ನೋಡೋಣ! ಭಾರತದ ನೂರುಕೋಟಿ ಜನರಿಗೆ ನೂರು ಜನರಾದರೂ - ಚೀನೀಯರೇಕೆ ನಾವೂ ಮಾಡಬಲ್ಲೆವೆಂದು - ತೋರಿಸುವ ದಿನ ಬರುವುದೆಂದೇ ನಾನು ಕಾಯುತ್ತಿದ್ದೇನೆ. ಅಲ್ಲಿಯವರೆಗೆ ದಾಸರಂತೆ ನಾನೂ - "ಎಂದಿಗಾವುದೋ ನಿನ್ನ ದರುಶನ..?" ಎಂದು ಬೇಡಲಷ್ಟೇ ಸಾಧ್ಯ!

ನಿಮ್ಮ
ಬೆನಕ
ಕನ್ನಡಪುಟ . ಬ್ಲಾಗ್‍ಸ್ಪಾಟ್ . ಕಾಮ್