ಅನನ್ಯ ಅಲ್ಲಮ ೪ (೪)

" ಹೌದು ,ನಿಮ್ಮ ಬಗ್ಗೆಯೇ , ಬಸವಣ್ಣನವರು ಶರಣರ ಪಡೆಯನ್ನು ಕಟ್ಟಿಕೊಂಡು ರಾಜ್ಯಾಪಹಾರ ಮಾಡುವ ಸನ್ನಾಹದಲ್ಲಿದ್ದಾರೆ ,ಎಂದು ನನಗೆ ವರದಿಯಾಗಿದೆ ,, 

ಬಸವಣ್ಣನವರು ನಕ್ಕುಬಿಟ್ಟರು , " ಮತ್ತೆ ಇನ್ನೇನೇನು ವರದಿಯಾಗಿದೆ ?,, 

" ನಾನೂ ನಿಮ್ಮ ಹಾಗೆ ನಕ್ಕುಬಿಟ್ಟೆ ,  ಅಪ್ರತಿಭನಾದ ಆಸುದ್ದಿಯನ್ನು ತಂದ ವ್ಯಕ್ತಿ , ’ನೀವು ನಂಬಲಾರಿರಿ , ನಂಬುವ ಕಾಲ ಬರುತ್ತದೆ ’ ಎಂದು ಬೆದರಿಸಲು ನೋಡಿದ . ನಾನು ಅವನಿಗೆ ಹೇಳಿದೆ , " ಬಸವಣ್ಣನವರನ್ನು ಬರ ಹೇಳು , ಅವರು ರಾಜ್ಯಾಪಹಾರ ಮಾಡುವ ಅಗತ್ಯವೇನಿದೆ ? ತಂಗಿ  ನೀಲಲೋಚನೆಯ ಮದುವೆಯ ಸಮಯದಲ್ಲಿ ಅವರು ನಮ್ಮಿಂದ ಏನೂ ಪಡೆಯಲಿಲ್ಲ , ಬಲವಂತ ಮಾಡಿ ಕೊಡಲು ಹೋದ ಅಲ್ಪ ಧನವನ್ನೂ ನಾಡಿನ ಶಿಕ್ಷಣ ಕೇಂದ್ರಗಳಿಗೆ , ಚಿಕಿತ್ಸಾಲಯಗಳಿಗೆ ಕೊಡಿಸಿಬಿಟ್ಟರು . ಈ ಕಲಚುರ್ಯ ರಾಜ್ಯದಲ್ಲಿ ನಮಗೆ ಎಷ್ಟು ಹಕ್ಕಿದೆಯೋ , ತಂಗಿ ನೀಲಲೋಚನೆಗೂ ಅಷ್ಟೇ ಹಕ್ಕಿದೆ . ಸಂತೋಷವಾಗಿಯೇ ಅವರಿಗೆ ಅದನ್ನು ಕೊಟ್ಟುಬಿಡುತ್ತೇವೆ , ಎಂದು ನಾನು ಹೇಳಿದಾಗ ಆ ವ್ಯಕ್ತಿ ತಲೆ ತಗ್ಗಿಸಿ ಹೊರಟು ಹೋದ ,, 

ಬಸವಣ್ಣನವರಿಗೆ ಬಿಜ್ಜಳನ ವ್ಯಕ್ತಿತ್ವವೇ ಅರ್ಥವಾಗದಷ್ಟು ಒಗಟಾಗಿ ಹೋಯಿತು ,

" ಇಷ್ಟು ವಿವೇಕವಿರುವ ತಾವು , ತೈಲಪರನ್ನು ಸೆರೆಯಲ್ಲಿಡುವ ಅಗತ್ಯವಾದರು ಏನಿತ್ತು ? ,,

 " ಅದೇ ವಿಷಯವನ್ನು ತಿಳಿಸಲು ನಾನು ತಮ್ಮನ್ನು ಕರೆದುದು ,  ಸೇವುಣರು ತೈಲಪ ಚಕ್ರವರ್ತಿಗಳನ್ನು ಕೊಲ್ಲಿಸುವ ಸಂಚು ರೂಪಿಸಿದ್ದು ತಿಳಿದು ಬಂತು , ಅದೂ ಅವರ ಅತ್ಯಂತ ದುರ್ಬಲ ಸ್ವಭಾವವಾದ ವಿಷಯಾಸಕ್ತಿಯ ಲಾಭ ಪಡೆದು . ಹೊಯ್ಸಳನಾಡಿನ ನಮ್ಮ ಗುಪ್ತಚರರು ಆ ಸುದ್ದಿಯನ್ನು ಕಳಿಸಿದರು , ಹೊಯ್ಸಳರ  ನರಸಿಂಹನು ಸಾಮಾನ್ಯನಲ್ಲ , ಅಂದಗಾತಿಯರನ್ನು ಸೆಳೆದು ತರುವಲ್ಲಿ ನಮ್ಮ ತೈಲಪರನ್ನು ಮೀರಿಸಿದವನು ಅವನು . ದೇವಗಿರಿಯಿಂದ ಬಂದು ಹೊಯ್ಸಳನ ಅಂತಃಪುರವನ್ನು ಸೇರಿದ ಬಿನ್ನಾಣಗಾತಿಯೊಬ್ಬಳು ಕುಡಿದ ಮತ್ತಿನಲ್ಲಿ ಗೆಳತಿಯರೊಡನೆ ಈ ಬಗೆಯ ಸುಳುಹು ನೀಡಿದಳು . ತನ್ನ ಜೊತೆಗೇ ಬಂದು ಚಾಲುಕ್ಯರ ಅರಮನೆಯನ್ನು ಪ್ರವೇಶಿಸಲು ಕಾದಿರುವ ಚದುರೆಯೋರ್ವಳು ತೈಲಪರ ಜೀವಕ್ಕೆ ಎರವಾಗುತ್ತಾಳೆ ಎಂಬ ವಿಷಯವನ್ನು . ನಮ್ಮ ದಕ್ಷಿಣದ ಗೂಢಚಾರರಿಗೆ ಈ ವಿಷಯ ತಿಳಿದು , ನರಸಿಂಹನಿಗೆ ತಿಳಿಯದಂತೆ ಅವಳನ್ನು ಬಂಧಿಸಿ ಅಪಹರಿಸಿ ವಿಚಾರಣೆಗೆ ಗುರಿಪಡಿಸುವ ವೇಳೆಯಲ್ಲಿ ಅವಳು ವಿಷ ಸೇವಿಸಿ ಪ್ರಾಣ ಕಳೆದುಕೊಂಡಳು ,, 

ಈ ವಿವರಗಳಿಂದ ಬೇಸರ ಹೊಂದಿದ ಬಸವಣ್ಣನವರು 

" ಪ್ರಸಿದ್ದ ಸಾಮ್ರಾಜ್ಯಗಳು ನಾಶವಾಗಿರುವುದೇ ಮದಿರೆ ಮತ್ತು ಮಾನಿನಿಯರಿಂದ ,ರಾಜಮನೆತನದಲ್ಲಿ ಹುಟ್ಟುವ ಪ್ರತಿ ಶಿಶುವೂ ಶಾಪಗ್ರಸ್ತವಾಗಿರುತ್ತದೆ . ಹುಟ್ಟುವ ಕಂದನಿಗೆ ಅದರ ತಾಯಿಯ ಹಾಲು ಸಿಕ್ಕುವುದಿಲ್ಲ ; ಅರಮನೆಯ ದಾಸಿಯರ ಸ್ತನ್ಯಪಾನವೇ ಅದಕ್ಕೆ ಗತಿ , ತಾನು ಹೆತ್ತ ಮಗುವಿನ ಪ್ರೇಮಕ್ಕಿಂತ ರಾಣಿಯರೆಂಬ ಬಿಂಕ , ಅರಮನೆಯ ಆತ್ಮವನ್ನೇ ನಾಶಮಾಡಿ ಬಿಡುತ್ತದೆ .

ಅದಕ್ಕೆ ಬಿಜ್ಜಳ 

" ತಮ್ಮ ಮಾತು ಸತ್ಯ ಬಸವರಾಜರೇ , ನಾಡಿನಲ್ಲಿ ಕಂಡ ಸುಂದರಿಯರನ್ನು ಹಿಡಿದು ತಂದು ದಾಸಿಯರನ್ನಾಗಿ ಮಾರ್ಪಡಿಸಿಕೊಳ್ಳುವ ಅರಸರು ’ ಅವರಲ್ಲಿ ಹೆಚ್ಚಿನವರನ್ನು ಭ್ರಷ್ಟಗೊಳಿಸಿರುತ್ತಾರೆ , ಇಂತಹ ಹೀನ ವಾತಾವರಣದಲ್ಲಿ , ತಾಯಿಯ ಪ್ರೀತಿಯನ್ನು ಕಾಣದೆ , ದಾಸಿಯರ ಸಂಗದಲ್ಲಿ ಬೆಳೆಯುವ ಮಗು ಸ್ವಾಭಾವಿಕವಾಗಿಯೇ ರೂಕ್ಷವಾಗಿರುತ್ತದೆ . ಸ್ವಲ್ಪ ವಯಸ್ಸಿಗೆ ಬಂದಕೂಡಲೇ ಕೈಚಾಚಿದತ್ತ ದೊರೆಯುವ ಮದಿರೆ , ಮಾನಿನಿಯರ ದೆಸೆಯಿಂದ  , ವಿವೇಕ ಹೇಳುವವರಿಗಿಂತ ; ಓಲೈಸುವವರೇ ತುಂಬಿರುವ ಪರಿಜನರಿಂದ ; ಅನಿರ್ಬಂಧಿತ ಅಧಿಕಾರದ ಅಮಲಿನಿಂದ , ವಿವೇಕಿ ರಾಜನಾಗಬೇಕಾದವನು ಹುಚ್ಚನಾಗುತ್ತಾನೆ . ಇಂತಹ ವಿಷವೃತ್ತದಿಂದ ಪಾರಾಗುವವನು ಯಾರೋ ಒಬ್ಬ ಅದೃಷ್ಟವಂತ . ಈಗ ತಮ್ಮ ಸಂದೇಹದ ವಿಚಾರಕ್ಕೆ ಬರುತ್ತೇನೆ . ಹೊರಗಿನ ಶತ್ರುಗಳಿಂದ ಮತ್ತು ಒಳಗಿನ ವ್ಯಸನ ಮತ್ತು ರೋಗಗಳಿಂದ ಅಪಾಯದಲ್ಲಿದ್ದ ಚಕ್ರವರ್ತಿಗಳನ್ನು ಪಾರು ಮಾಡಬೇಕೆಂಬ ಉದ್ದೇಶದಿಂದಲೇ ತೈಲಪ ಚಕ್ರವರ್ತಿಯ ಬಂಧನದ ಕತೆಯನ್ನು ಸೃಷ್ಟಿಸಲಾಯಿತು ; ಅವರನ್ನು ಸಾಮಾನ್ಯ ಬಂದಿಯಂತೆ ಸೆರೆ ಮನೆಗೆ ತಳ್ಳಲಾಗಿದೆ ಎಂಬ ವದಂತಿಯನ್ನು ಹಬ್ಬಿಸಲಾಯಿತು . ತೈಲಪರ ಆರೋಗ್ಯವೂ ತೀರಾ ಸೂಕ್ಷ್ಮ ಘಟ್ಟವನ್ನು ಮುಟ್ಟಿರುವುದರಿಂದ ,ಅವರನ್ನು ನೋಡಿಕೊಳ್ಳಲು ಚತುರ ಪಂಡಿತರನ್ನು ನೇಮಿಸಲಾಗಿದೆ  . ಅವರನ್ನು ಎಲ್ಲಿಟ್ಟಿರುವೆವೆಂಬ ವಿಷಯಮಾತ್ರ ರಾಜ ರಹಸ್ಯ ,ಸೂಕ್ತ ಕಾಲ ಬಂದಾಗ ಅದನ್ನು ತಮಗೆ ತಿಳಿಸಲಾಗುವುದು ,,

ಇಷ್ಟನ್ನು ಹೇಳಿ ಬಿಜ್ಜಳನು ಎದ್ದು ಅಲ್ಲಿಯೇ ಹತ್ತಿರದಲ್ಲಿದ್ದ ಪೆಠಾರಿಯಿಂದ ಎರಡು ರಾಯಸಗಳನ್ನು ತಂದು ಬಸವಣ್ಣನವರ ಕೈಗೆ ಕೊಟ್ಟನು , ಅವನ್ನು ಬಿಡಿಸಿ ನೋಡಿದಾಗ ಒಂದರಲ್ಲಿ ಮಹಾರಾಣಿ ಸುಕಾಮದೃಮೆಯು ಇಂತಹ ವಿಷಮ ಪರಿಸ್ಥಿತಿಯಲ್ಲಿ ಸಹಾಯವನ್ನು ಯಾಚಿಸಿ ಬರೆದ ಒಂದು ಪತ್ರ , ಇನ್ನೊಂದರಲ್ಲಿ ಸೂಕ್ತ ವ್ಯವಸ್ಥೆಗಳನ್ನು ಮಾಡಲು ಬಿಜ್ಜಳನಿಗೆ ಸಂಪೂರ್ಣ ಸರ್ವಾಧಿಕಾರವನ್ನು ವಹಿಸಿ ಕೊಟ್ಟಿರುವ ವಿಷಯಗಳು ಸ್ಪಷ್ಟವಾಗಿದ್ದವು .ಬಿಜ್ಜಳನು , 

" ಬಸವರಾಜರೇ ,ನಾಡಿನ ಪರಿಸ್ಥಿತಿ ತಮಗರಿಯದುದಲ್ಲ , ಎಲ್ಲ ಸಾಮ್ರಾಜ್ಯಗಳೂ ಕುದಿಯುವ ಬಿಂದುವಿನಲ್ಲಿವೆ . ಭಾರತ ಭೂಖಂಡದ ವಾಯುವ್ಯ ಭಾಗವು ಅಗ್ನಿಕುಂಡವಾಗಿದೆ , ಹೊರಗಿನ ದಾಳಿಕಾರರು ಜನರ ಬದುಕನ್ನು ಮಸಣ ಮಾಡಿದ್ದಾರೆ ; ನಿತ್ಯದ ದಾಳಿಗಳು , ಲೂಟಿಗಳಿಂದ ಜನ ತತ್ತರಿಸುತ್ತಿದ್ದಾರೆ . ದಕ್ಷಿಣದಲ್ಲೂ ಈ ಹಿಂದೆ ದಾಳಿಗಳು ನಡೆದಿವೆಯಾದರೂ ಅದು ನಿತ್ಯದ ನರಕವಾಗಿಲ್ಲ . ಸದ್ಯಕ್ಕೆ ಹೊರಗಿನವರ ಉಪಟಳವೂ ದೂರದ ದಕ್ಷಿಣದತ್ತ ಕಡಿಮೆಯೇ ಆಗಿದೆ . ಆದರೂ ಸಂಭವನೀಯ ಬರ್ಬರ ದಾಳಿಕಾರರ ಭೀತಿಯಿಂದ , ಜನ ಭವಿಷ್ಯದ ಬಗ್ಗೆ ಚಿಂತಿತರಾಗಿದ್ದಾರೆ . ದಕ್ಷಿಣ ಕರ್ನಾಟಕ , ಅತಂತ್ರ ಪ್ರಭುತ್ವಗಳಿಂದ ನಡುಗುತ್ತಿದೆ . ಎಲ್ಲೆಲ್ಲಿಯೂ ಪಾಳೆಯಪಟ್ಟುಗಳು ತಲೆ ಎತ್ತುತ್ತಿವೆ , ಅವುಗಳಲ್ಲಿರುವ ಅವಿವೇಕಿ ಆಡಳಿತಗಾರರಿಂದ ಪ್ರಜೆಗಳು ಅಸಹನೀಯ ನೋವು ಅನುಭವಿಸುತ್ತಿದ್ದಾರೆ . ಗ್ರಾಮಗಳಲ್ಲಿ ಚಲುವೆಯರು ಕಣ್ಣಿಗೆ ಬೀಳುವಂತಿಲ್ಲ ; ಯಾರಾದರೂ ಕಷ್ಟಾರ್ಜಿತದಿಂದ ಮುಂದಕ್ಕೆ ಬರುವಂತಿಲ್ಲ , ಚಲುವೆಯರೂ , ಪರಧನವೂ ಬಲಾತ್ಕಾರದಿಂದ ಪಾಳೆಯಗಾರರ ವಾಡೆಯನ್ನು ಸೇರಬೇಕಾದ ಕೆಟ್ಟ ವಾತಾವರಣವಿದೆ .ಇದನ್ನೆಲ್ಲಾ ಕಂಡೂ ಸಹ ಚಾಲುಕ್ಯರ ಮಾಂಡಲಿಕನಾಗಿ ನನ್ನ ಕರ್ತವ್ಯಗಳನ್ನು ನಿರ್ವಹಿಸಲೇ ? ಅಥವಾ ಅಪನಿಂದೆ ಅಪವಾದಗಳಿಗೆ ಅಂಜಿ ಪಲಾಯನ ಮಾಡಲೇ ? ,,