ಅನನ್ಯ ಅಲ್ಲಮ ೮ (೧)

ಅಲ್ಲಮ ಸಿದ್ದರಾಮರು ಕಲ್ಯಾಣದ ಹೊರವಳಯದಲ್ಲಿ ಬಂದು ನಿಂತರು . ಕಲ್ಯಾಣವನ್ನು ಅವರು ತಲುಪುತ್ತಿದ್ದಂತೆ ಕಲ್ಯಾಣದ ದಾರಿ ಗೌಜಿನಿಂದ ತುಂಬಿದ್ದು ಕಂಡಿತು . ಪಟ್ಟಣಕ್ಕೆ ಪ್ರತ್ಯೇಕ ಮಾರ್ಗದಲ್ಲಿ ಅವಸರದಿಂದ ಪ್ರವೇಶಿಸುತ್ತಿದ್ದ ಮತ್ತು ನಿರ್ಗಮಿಸುತ್ತಿದ್ದ ರಥಗಳು ಮತ್ತು ಆಶ್ವಗಳು ;  ಇನ್ನೊಂದು ಮಾರ್ಗದಲ್ಲಿ ಸಾಲಾಗಿ ನಿಂತಿದ್ದ ಸರಕು ತುಂಬಿದ ಬಂಡಿಗಳು , ತೆರುವ ಸುಂಕವನ್ನು ತೆತ್ತು ನಿಧಾನಕ್ಕೆ ಪುರ ಪ್ರವೇಶ ಮಾಡುತ್ತಿದ್ದವು . ಒಳ ಪ್ರವೇಶಿಸುವ ಎಲ್ಲ ವಾಹನಗಳು ,  ಪಾದಚಾರಿಗಳು ಮತ್ತು ಪ್ರಾಣಿಗಳ ಸಕಲ ವಿವರಗಳನ್ನು  ನಮೂದಿಸಿಕೊಳ್ಳುವ ಅನೇಕ ಸುಂಕದ ಕಟ್ಟೆಗಳು . ಇವೆಲ್ಲವನ್ನು ಕಂಡು ಅಚ್ಚರಿಗೊಂಡ ಸಿದ್ದರಾಮರು " ಸೊನ್ನಲಿಗೆ , ಮಂಗಳವೇಡೆಗಳಿಗಿಂತ ಇದು ಬಹಳ ದೊಡ್ಡ ನಗರ . ಇದರ ಪಾರುಪತ್ಯ ಬಸವೇಶ  ಬಿಜ್ಜಳಾದಿಗಳಿಗೆ ಸಾಮಾನ್ಯವಲ್ಲ  ,, ಎಂದರು .

 ಪ್ರಭುದೇವರು ನಗುತ್ತಾ "ಕಲ್ಯಾಣ ಸಾಮಾನ್ಯ ನಗರವಲ್ಲ . ರಾಜಹಂಸಗಳು ತೇಲುವ ಸುಂದರಕೊಳ ; ಹಾಗೇಯೇ ಪಕ್ಕದಲ್ಲಿಯೇ ಕೊಳದ ಪರಿಚಯವೇ ಇಲ್ಲದೆ ಜವಾಬ್ದಾರಿಯ ಪರಿವೆ ಇಲ್ಲದೆ  ಹರಟುತ್ತಾ , ಕೊಚ್ಚೆಗಳಲ್ಲಿಯೇ ಮುಳುಗೇಳುತ್ತಿರುವ ಕ್ರಿಮಿಗಳ  ರಾಸಿಗಳು . ಒಂದೆರಡಲ್ಲ ಇದರ ಅದ್ಭುತಗಳು ! ಅರಸನಿಷ್ಟ ರಾಜದೂತರು ; ನಿಷ್ಟೆಯ ವೇಷ ತಳೆದ ಧೂರ್ತ ವಿದೂಷಕರು , ಹೊರಗೆ ಢಂಬದಿಂದ ಮೆರೆಯುತ್ತಾ , ಒಳಗೆ ಅಧಿಕಾರಸ್ಥರ ಕಾಲು ನೆಕ್ಕುವ ಶ್ವಪಚೋಪಜೀವಿಗಳು . ಹೊರಗೆ ನೋಡಲು ಸಾತ್ವಿಕ ಸುಪ್ರಸಿದ್ದ ಆಚಾರ ನಿಷ್ಟರು ; ಒಳಗೆ ಪರಧನ , ಪರಸ್ತ್ರೀ ಪರಸ್ವತ್ತುಗಳಿಗಾಗಿ  ಬಾಯಿ ಬಾಯಿ ಬಿಡುತ್ತಿರುವ ಹಸೀ ಲಂಪಟರು . ಯಾರು ಬೇಕು ಸಿದ್ದರಾಮಯ್ಯ ನಿನಗೆ ? ರಾಜಕಾರಣದ ವಿಸ್ತಾರವಾದ ಮಜಲುಗಳು ಬೇಕೋ ? ಅಧ್ಯಾತ್ಮದ ಆಳವರಿಯಲಾರದದ ಅನುಭಾವ ಬೇಕೋ ? ನೀನು ಇಷ್ಟಪಡುವುದೆಲ್ಲ ಎಟುಕುತ್ತದೆ .  ಹಾಗೆಯೇ ಅಧ್ಯಯನ ಧ್ಯಾನಸಂಪನ್ನ ಜ್ಞಾನಾರ್ಜನೆಯ ತಾಣಗಳು ಬೇಕೆ ? ಲೆಕ್ಕವಿಲ್ಲದಷ್ಟು ಅಂತಹ ಕೇಂದ್ರಗಳ ಮಾಹಿತಿಯನ್ನೇ ಚನ್ನಬಸವಣ್ಣ ಬಾಗಿಲಲ್ಲಿಯೇ ಟಂಕಿಸಿ ಹಾಕಿಸಿದ್ದಾರೆ ಆಯ್ಕೆ ಮಾತ್ರ ಅಂತರಂಗದ ಅಂತಸ್ತಿಗೆ ಬಿಟ್ಟದ್ದು    .  

" ಚನ್ನಬಸವಣ್ಣನವರ ಶಾಸನವನ್ನು ನಾನೂ ನೋಡಿದೆ , ಅದನ್ನು ನೋಡಿ ಅಚ್ಚರಿವಡೆದು ನಿಂತುಬಿಟ್ಟೆ , ಅಷ್ಟೆಲ್ಲಾ ಇರುವುದು ನಿಜವೆ ಕಲ್ಯಾಣಪಟ್ಟಣದಲ್ಲಿ ?

" ಅದನ್ನು ಪದಶಃ ಅರ್ಥವಿಸಲು ಏಕೆ ಹೋದೆ  ಸಿದ್ದರಾಮಯ್ಯ ? ಅದರ ಅರ್ಥ ಸೀಮಿತವಲ್ಲ , ಸೀಮಾತೀತ . ಕಲ್ಯಾಣವೆಂಬುದು ಬರಿಯ ಪಟ್ಟಣವಲ್ಲ , ’ಹದಿನಾಲ್ಕು ಭುವನಕ್ಕೆ ಕಳಶವೆಂದಿನಿಸುವ ರುದ್ರಲೋಕವೆ ಮರ್ತ್ಯಲೋಕಕ್ಕಿಳಿತಂದು ಕಲ್ಯಾಣವೆಂಬ ಪುರವಾಗಿ ಹುಟ್ಟಿತ್ತು ನೋಡಿರಯ್ಯ , ಎನ್ನುತ್ತಾರೆ  ಚನ್ನ ಬಸವಣ್ಣ ,  ಏನು ಅದರ ಅರ್ಥ ? ಇಳೆಗಿಳಿದ ಅಪರೂಪದ ಮಾನವ ಜನ್ಮವೆಂದಲ್ಲವೆ . ಅರ್ಥವಾಗದವರಿಗೆ ಹೇಗೆ ಹೊಳೆದೀತು ಆದರ ಅರ್ಥ ? ಮನುಷ್ಯ , ಮನುಷ್ಯನ ದೇಹ ಎಂದ ಮೇಲೆ ಅಲ್ಲಿ ಏನಿಲ್ಲ ? ಏನುಂಟು ?ಸುಜ್ಞಾನದ ದೀವಟಿಕೆ ಹೊತ್ತಿ ಉರಿಯುತ್ತಿಲ್ಲವೇ ? ಅಜ್ಞಾನದ ಅಂಧಕಾರ ಮುತ್ತಿ ಕಾಡುತ್ತಿಲ್ಲವೇ ? ಅದರ ಪರಿಯನ್ನು ವಿವರಿಸಲು ಚನ್ನಬಸವಣ್ಣ ಹೆಣೆದ ಶಬ್ದಜಾಲ ಈ ಶಾಸನ . ಚನ್ನಬಸವಣ್ಣ ಹೊರಗೆ ತೋರಿಸಿರುವುದು ಕಲ್ಯಾಣ ಪಟ್ಟಣದ ವೀಧಿಗಳ ಪರಿಚಯ ; ಒಳಗೆ ಮಾಡಿಸುತ್ತಾ ಹೋಗುವುದು ಆತ್ಮ ನಡೆದು ಬಂದ ದಾರಿಗಳ ಇಣುಕು ನೋಟ .  ಹೊರಗೆ ಕಲ್ಯಾಣದಲ್ಲಿ ಅಚ್ಚುವಡೆದಿರುವ ಅರಮನೆ ಮಂತ್ರಿ ಪಸಾಯಿತರ ಗೃಹಗಳ ಬಣ್ಣನೆ , ಒಳಗೆ ಮನೋಶೋಧನೆಯ ವಿಚಿತ್ರ ಕೋಶಗಳ ವ್ಯೂಹಾತ್ಮಕ ರಚನೆಗಳ ವಿನ್ಯಾಸದ ವರ್ಣನೆ ,, ಯಾವುದನ್ನು ನಂಬುತ್ತೀಯ ?  

ತನುವೆಂಬ ದೇವಸ್ಥಾನದೊಳಗೆ

 ಮಸ್ತಕಾಗ್ರವೆಂಬ ಸಜ್ಜಾಗೃಹದಲ್ಲಿ

ಪ್ರಾಣಲಿಂಗ ಸ್ವಯಂಭು ಪ್ರತಿಷ್ಟೆಯಾಗಿರಲು ..........

ಜ್ಞಾನ ಕ್ರಿಯೆ ಎರಡು ,

 ಪಾದ ದ್ವಯವೆರಡು ಕೂಡಿ

 ನಾಲ್ಕು ಗಾಲಿಗಳಂ ಹೂಡಿ 

ಪಂಚೇಂದ್ರಿಯಗಳೆಂಬ ಪತಾಕೆಗಳ ಧರಿಸಿ 

ಏಕೋಭಾವವೆಂಬ ಕಳಶವನಿಟ್ಟು 

ದಶವಾಯುಗಳೆಂಬ ಪಾಶಮಂ ಬಂಧಿಸಿ.................

ಆನಂದವೆಂಬರಸು ನಿರಾಳವೆಂಬಪರಿಮಿತ ಪಟ್ಟಣವ

 ಪ್ರವೇಶವಾದನು ಕಾಣಾ ಗುಹೇಶ್ವರ 

ಚನ್ನಬಸವಣ್ಣ ಹುಡುಗ , ಹೊರಗೆ ನೋಡಿದರೆ ;  ಒಳಗೆ ಪ್ರವೇಶಿಸಿದರೆ ಅತ್ಮವೃದ್ದ  ಜ್ಞಾನಾವೃತ ಜೀವ ಅದು . ಬಸವಣ್ಣನ ಆಟಾಟೋಪ ಒಂದು ಘಳಿಗೆಯೂ ಇಲ್ಲ ; ಚನ್ನಬಸವಣ್ಣನೆಂಬ ಜ್ಞಾನಜ್ಯೋತಿ  ಇಲ್ಲದಿದ್ದರೆ !

ಹಸಿದ ಕಾಳೋರಗನ ಹೆಡೆಯ ನೆಳಲಲ್ಲಿ

ಕಾಳಾಂಧನೆಂಬ ಕಪ್ಪೆ -

ಅಂತಹ ಕಾಳೋರಗನ ಏಳ ನುಂಗಿತ್ತು

ಅದರ ಬೇಳುವೆಯಲ್ಲಿ ಮೇಲಾಗಿ ಬದುಕಿದೆ

ಚೆನ್ನಬಸವಣ್ಣನಿಂದ ಗುಹೇಶ್ವರಲಿಂಗವೆಂಬುದು ಪ್ರಾಮಾಣಾಯಿತ್ತು 

ಸಿದ್ದರಾಮರು   "ನನಗಿದು ಹೊಳೆದೇ ಇರಲಿಲ್ಲ ಪ್ರಭುವೇ , ಆ ಇಡೀ ಶಾಸನವನ್ನು ಪ್ರತಿ ಮಾಡಿಕೊಳ್ಳುತ್ತೇನೆ , ಅದನ್ನು ನಾನು ಅಭ್ಯಾಸ ಮಾಡಬೇಕು ,, 

"  ಸಿದ್ದರಾಮಯ್ಯ , ಆ ಶಾಸನವನ್ನೇಕೆ ಪ್ರತಿಮಾಡಿಕೊಳ್ಳಲು ಹೋಗುವೆ ?  ಆ ಚನ್ನಬಸವಣ್ಣನಿರುವ ಊರಿಗೇ ಬಂದಿದ್ದೀಯಲ್ಲ ,  ಅವರ ಹತ್ತಿರ ತಾನೇ ನೀನು ಹೋಗುತ್ತಿರುವುದು ; ಅಲ್ಲಿ

ಅಂತಹ ಎಷ್ಟು ಎಣಿಕೆ ಇಲ್ಲದ ವಚನಗಳು ಬೇಕು ? ನೀನು ಶ್ರೀಶೈಲದಲ್ಲಿ ಕಲಿತುದು ಮಾತ್ರ ವಿದ್ಯೆಯಲ್ಲ ,    ಅಲ್ಲಿ ಕಾಳಾಮುಖ ದರ್ಶನವನ್ನು ನಿನ್ನ ಗುರು ಕಪಿಲ ಸಿದ್ದರು ಮಾಡಿಸಿದರು ; ಇಲ್ಲಿ ನಿನಗಾಗಿ ಬಹು ಮುಖ ದರ್ಶನ ಕಾಯುತ್ತಾ ಕುಳಿತಿದೆ . ಒಂದು ಕಾಳಾಮುಖ , ಒಂದು ಕಾಪಾಲಿಕ , ಒಂದು ಪಾಶುಪತ ಇವೆಲ್ಲ  ಏನು  ? ಗಾಣ ತಿರುಗುವ ಎತ್ತಿನ ಕಣ್ಣಿಗೆ ಕಟ್ಟಿದ ಕಪ್ಪು ಪಟ್ಟಿಗಳು  , ಕಣ್ಣಿಗೆ ಕಪ್ಪು ಪಟ್ಟಿ ಕಟ್ಟಿದ ವೃಷಭ ಬಲು ದೂರ ಸಂಚರಿಸಿರುವುದಾಗಿ ಭಾವಿಸಿರುತ್ತದೆ ಆದರೆ ಅದು ಹೊಡೆದಿರುವುದು ಮಾತ್ರ  ಗಾಣಕ್ಕೆ ಸುತ್ತು  . ಹಾಗೆಯೇ ಈ ಮತ ಪಂಥಗಳೆಂಬ ಗಾಣಗಳು ಜೀವವನ್ನು ತನ್ನ ಸುತ್ತ ಸುತ್ತು ಹೊಡೆಸುತ್ತವೆ . ಮುಂದಕ್ಕೆ ಕೈ ಹಿಡಿದು ನಡೆಸುವ ಯೋಗ್ಯತೆ ಅವಕ್ಕಿಲ್ಲ . ಕಣ್ಣಿನ ಕಪ್ಪು ಪಟ್ಟಿಯನ್ನು ಹರಿದು , ಸ್ವಛ್ಛಂದ ವಿಚಾರದ ಲಹರಿಗೆ ತೆರೆದುಕೊಳ್ಳದಲ್ಲದೆ ನವ ಜ್ಯೋತಿಯೂ  ಇಲ್ಲ ; ನವ ವಾಯುವೂ ಇಲ್ಲ   ; ನವ ದಿಗಂತಗಳೇ ಇಲ್ಲ . ಶ್ರೀಶೈಲದಲ್ಲಿ  ನೀನು ಕಲಿತ ವಿದ್ಯೆಯ ಮುಂದಿನ ಭಾಗ ಇಲ್ಲಿದೆ ನಿನಗೆ ;  ಈ ಕಲ್ಯಾಣದಲ್ಲಿ  . ನಿನ್ನನ್ನು ಚನ್ನಬಸವಣ್ಣ ಕೈ ಹಿಡಿದು ನಡೆಸುತ್ತಾರೆ , ನಿನ್ನ ಶ್ರೀಶೈಲದ ಗುರು ಕಪಿಲ ಸಿದ್ದ ಮಲ್ಲಿಕಾರ್ಜುನರ ಮುಂದಿನ ಅವತಾರವೇ ಜ್ಞಾನಸಿದ್ದನಾದ ಚನ್ನಬಸವಣ್ಣನ ರೂಪದಲ್ಲಿ ಮೈದಳೆದು ನಿಂತಿದೆ . ನಿನಗೆ ನೆನಪಿದೆಯೇ ? ನಿನಗೆ ಅನುಗ್ರಹಿಸಬೇಕಾದುದನ್ನೆಲ್ಲ ಅನುಗ್ರಹಿಸಲಾಗುತ್ತಿಲ್ಲ  ಸಿದ್ದರಾಮ !  ಈಗ ಅದು ನನ್ನಿಂದ ಸಾಧ್ಯವೂ ಇಲ್ಲ , ಆದರೆ ಖಂಡಿತ ಈ ಜನ್ಮದಲ್ಲಿಯೇ ನನ್ನನ್ನೇ ಧಾರೆ ಎರೆದು ನಿನ್ನೊಳಗೆ ಜ್ಯೋತಿಯಾಗಿ ಉರಿದು ಹೋಗುತ್ತೇನೆ  . ಎಂದು ನಿನ್ನ ಗುರು ನಿನಗೆ  ವಚನವಿತ್ತಿರಲಿಲ್ಲವೆ ? ಅದನ್ನು ಪೂರೈಸಲೆಂದೇ ನಾನು ನಿನ್ನನ್ನು ಇಲ್ಲಿಗೆ ಕರೆ ತಂದುದು , ಕಾರಣ ಜನ್ಮನಾದ ಚನ್ನಬಸವಣ್ಣನ ಮರ್ತ್ಯದ ಇರವು ಹೆಚ್ಚುದಿನ ಇಲ್ಲ ಸಿದ್ದರಾಮಯ್ಯ , ಕಲ್ಯಾಣದ ಪ್ರಣತಿಯನ್ನು ಮುಂದೆ ಹಿಡಿದು ನಡೆಸುವ ಧೀರ ಬೇಕು  ; ಅದಕ್ಕಾಗಿ ಹಾತೊರೆಯುತ್ತಿದೆ ಚನ್ನ ಬಸವಣ್ಣನ ಆತ್ಮ ಜ್ಯೋತಿ , ಆ ಧೀರ ನೀನೆಂದು  ನನ್ನ ಬಗೆಗೆ ಗೋಚರಿಸಿದುದರಿಂದ ನಿನ್ನನ್ನು ನಿನ್ನ ಕಾರ್ಯಕ್ಷೇತ್ರದಿಂದ ವಿಮುಖನನ್ನಾಗಿ ಮಾಡಿ ಇಲ್ಲಿಯವರೆಗೆ ಕರೆತರಬೇಕಾಯಿತು ,, 

ಆಗ ಆರ್ತರಾದ ಸಿದ್ದರಾಮರು , " ಪ್ರಭುವೇ ನೀವು ಕಾರಣ ಜನ್ಮರು , ನಿಮ್ಮನ್ನು ಅರಿಯಲು ನಾನೆಷ್ಟರವನು ? ಕೈ ಹಿಡಿದು ಕರೆ ತಂದಿದ್ದೀರಿ , ಮುನ್ನಡೆಸುವ ಹೊಣೆ ನಿಮ್ಮದೇ , ನಿಮ್ಮ ಆಜ್ಞಾಧಾರಕ ಶಿಶು ಮಾತ್ರ  ನಾನು ,, ಎಂದು ಅಂತಃಕರಣದುಂಬಿ ನುಡಿದರು , 

" ಹಾಗಲ್ಲ ಸಿದ್ದರಾಮಯ್ಯ , ಇಲ್ಲಿ ನಾನೂ ನೀನೂ ಎಷ್ಟರವರು ಎನ್ನುವುದು ಪ್ರಶ್ನೆಯಲ್ಲ , ತುಂಬಿಸಿಕೊಳ್ಳುವ ಯೋಗ್ಯತೆ ಇರುವ ಪಾತ್ರಕ್ಕೆ ಮಾತ್ರ ಧಾರೆ ಎರೆಯಲು ಸಾಧ್ಯ? ಅಪಾತ್ರಕ್ಕೆ ನಾನೆಲ್ಲಿಂದ ತಂದು ಸುರಿಯಲಿ ? ನನ್ನ ಪಾತ್ರವೂ ನಿನ್ನಹಾಗೆಯೇ  ; ಸದ್ಯಕ್ಕೆ ಸುರಿಯುವ ಪಾತ್ರದಲ್ಲಿದ್ದೇನೆ ಸುರಿಯುತ್ತೇನೆ . ಪಾತ್ರ ಬದಲಾದರೆ ನೀನೇ ಸುರಿಯಬೇಕಾಗಿ ಬರಬಹುದು ಯಾರು ಬಲ್ಲ ,,ಎಂದು ನಕ್ಕುಬಿಟ್ಟರು . 

ಕಾಲು, ಕರ , ಕಾಯ , ಜೀವದೊಳಗಾಡುವ ಭಾವವೇ ದೈವವೇ ?

ತಾನೆಂಬುದ ತಾನಳಿದಲ್ಲಿ ಗುಹೇಶ್ವರ ಲಿಂಗವು ತಾನೆ
ಕರ ಚರಣಾದಿಗಳು ಬೇರಾದವಲ್ಲದೆ

ಅರಿದು ಮುಟ್ಟುವುದೊಂದೆ

ಆತ್ಮಬಿಂದುವಿನೊಂದು ಸಾಗರದಲ್ಲಿ

ಸಸಿ ಹಲವು ನಾಮ ಬೆಳೆವಂತೆ !

ಗುಹೇಶ್ವರ ಲಿಂಗದಲ್ಲಿ ನಾನೀನೆಂಬ ಭಾವವಿಲ್ಲ ಸಿದ್ದರಾಮಯ್ಯ

ಸಿದ್ದರಾಮರು ಪ್ರಭುವಿನ ಮಾತುಗಳಿಂದ ಮಂಕುವಡೆದು ಹೋಗಿದ್ದರು , ಅಯ್ಯೋ ಈ ಪುಣ್ಯಾತ್ಮ ನನಗೆ  ಅರ್ಥವೇ ಆಗುತ್ತಿಲ್ಲವೇ ? ಎಂದುಕೊಳ್ಳುತ್ತಾ . 

ಕಲ್ಯಾಣದ ಹೆಬ್ಬಾಗಿಲನ್ನು ಪ್ರವೇಶಿಸುತ್ತಿದ್ದಂತೆಯೇ ಎಲ್ಲ ಒಳ ಪ್ರವೇಶಿಸುವವರ ತನಿಖೆ ನಡೆಯುತ್ತಿತ್ತು ,  ಅವರು ಯಾವ ದೇಶದವರು ? ಬಂದ ಕಾರಣ ಏನು ? ಉಳಿದುಕೊಳ್ಳುವುದೆಲ್ಲಿ ? ಪಟ್ಟಣದಲ್ಲಿ ಅವರ ಪರಿಚಿತರು ಯಾರು  ಯಾರು ? ಎಲ್ಲ ವಿವರಗಳನ್ನು ನಮೂದಿಸಿ ಒಳ ಪ್ರವೆಶಿಸಬೇಕಾಗಿತ್ತು 

ಆದರೆ ಸನ್ಯಾಸಿಯ ವೇಷದಲ್ಲಿದ್ದವರಿಗೆ ಯಾವ ಪರೀಕ್ಷೆಯೂ , ಪ್ರಶ್ನೆಗಳೂ ಏನೊಂದೂ ಇರಲಿಲ್ಲ . ನಮಸ್ಕರಿಸಿ ಒಳಗೆ ಬಿಡುತ್ತಿದ್ದ್ದರು . ಒಳ ಪ್ರವೇಶಿಸಿದ ಸಿದ್ದರಾಮರಿಗೆ ಇದು ತುಂಬಾ ವಿಚಿತ್ರವೆನಿಸಿತು " ಅಲ್ಲಮ ತಂದೆ , ಅದೇಕೆ ಇಲ್ಲಿ ಸನ್ಯಾಸಿಗಳಿಂದ ಯಾವ ಮಾಹಿತಿಗಳನ್ನೂ ಕೇಳುತ್ತಿಲ್ಲ ; ಸನ್ಯಾಸಿಗಳ ವೇಷದಲ್ಲಿ ಕಳ್ಳರು  , ಸುಳ್ಳರು ಪುರಪ್ರವೇಶ ಮಾಡಬಾರದೆಂದಿದೆಯೇ ?,,ಎಂದು ಪ್ರಶ್ನಿಸಿದರು 

" ಕಳ್ಳರೇನು ಪೆದ್ದರೆ , ಸನ್ಯಾಸಿಗಳ ವೇಷದಲ್ಲಿ ಪುರ ಪ್ರವೇಶ ಮಾಡಲು ? ಅವರಿಗೆ ಚನ್ನಾಗಿ ಗೊತ್ತು , ಇಲ್ಲಿ ಪ್ರಶ್ನೆಗಳಿಲ್ಲದೆ ಸಗೌರವಗಳಿಂದ ಒಳ ಕರೆದುಕೊಳ್ಳುವುದು ಕೇವಲ ತೋರಿಕೆಯ ಉಪಚಾರ ಮಾತ್ರ ಎಂಬುದು . ಸಾಮಾನ್ಯರಿಗೆ ಒಮ್ಮೆ ಮುಖ್ಯ ದ್ವಾರದಲ್ಲಿಯೇ ಎಲ್ಲ ಪರೀಕ್ಷೆಗಳೂ ನಡೆದು ಹೋಗುತ್ತವೆ , ನಂತರ ಪುರದಲ್ಲಿ ಅವರನ್ನು ಸಾಮಾನ್ಯವಾಗಿ ಯಾರೂ ಕೇಳುವವರಿರುವುದಿಲ್ಲ . ಆದರೆ ಸನ್ಯಾಸಿಯ ಪಾಡು ಹಾಗಲ್ಲ , ಹೆಜ್ಜೆ ಹೆಜ್ಜೆಗೆ ಅವನ ಮೇಲೆ ಹದ್ದಿನ ಕಣ್ಣಿರುತ್ತದೆ , ಅವನು ಪಟ್ಟಣದಲ್ಲಿ ಎಲ್ಲಿಗೆ ತೆರಳುತ್ತಾನೆ ? ಯಾರನ್ನೆಲ್ಲ ಭೇಟಿ ಮಾಡುತ್ತಾನೆ? ಅವರ ವಿವರಗಳೆಂತಹವು ಅವನು ಗೂಢಚಾರನೆ ? ಕಳ್ಳನೆ ? ಕೊಲೆಗಡುಕನೆ ? ಪಾತಕಿಯೆ ? ಎಲ್ಲ ವಿವರಗಳು ತಲುಪುವ ಜಾಗಕ್ಕೆ ತಲುಪುತ್ತಿರುತ್ತವೆ  ,ಅನುಮಾನ ಬಲವಾದರೆ ಸೆರೆವಾಸ ತಪ್ಪಿದ್ದಲ್ಲ , ಯಾರು ಬಲ್ಲರು ? ನಮ್ಮನ್ನೂ ಬಂಧಿಸಿ ಸೆರೆಗೆ ದೂಡಬಹುದು ! ,, 

ಪ್ರಭುವಿನ ಮಾತು ಕೇಳಿ ಸಿದ್ದರಾಮರಿಗೆ ನಗು ಬಂದಿತು . " ನಿಮ್ಮನ್ನು ಕೂಡಿ ಹಾಕುವಂತಹ ಸೆರೆಮನೆಯನ್ನು ಯಾರು ಕಟ್ಟಿದ್ದಾರೆ ದೊರೆಯೇ ? , ನಿಮ್ಮನ್ನು ಕೂಡಿಹಾಕಬಲ್ಲ ಶಕ್ತಿ ಇರುವುದು ಕಲ್ಯಾಣದ ಶರಣರ ಸಂದಣಿಗೆ ಮಾತ್ರ , ಪಾಪ ಅವರೂ ಸಹ ಎಷ್ಟೊಂದು ವರ್ಷಗಳು ನಿಮಗಾಗಿ ಕಾದು ಕುಳಿತರು  ? , ಅವರಿಗೇ ನೀವು ದೊರಕಲು ಇಷ್ಟು ಕಷ್ಟವಾಗಿರುವಾಗ , ಇನ್ನು ಯಾವ ಅರಸ ತಾನೆ ನಿಮ್ಮ ತಂಟೆಗೆ ಬಂದಾನು , ಈಗ ನಾವು ತಮ್ಮ ಆಣತಿಯಂತೆ ಯಾವುದೇ ಮುನ್ಸೂಚನೆ ನೀಡದೆ ಕಲ್ಯಾಣಕ್ಕೆ ಬಂದಾಗಿದೆ , ತಾವು ಇಲ್ಲಿಯೇ ಇರುವ ಮಂಟಪಗಳಲ್ಲೊಂದರಲ್ಲಿ  ವಿಶ್ರಮಿಸುತ್ತಿದ್ದರೆ , ನಾನು ಬೇಗನೆ ಮಹಾಮನೆಗೆ ತೆರಳಿ ಅಲ್ಲಮಪ್ರಭುದೇವರು ಬಂದಿರುವರೆಂಬ ಸಂತಸದ ಸುದ್ದಿಯನ್ನು ಅಲ್ಲಿ ಬಿತ್ತರಿಸುತ್ತೇನೆ , ಆಗ ಶರಣರು ಕಲಶ ಕನ್ನಡಿಗಳೊಡನೆ ಸಂಭ್ರಮದಿಂದ ನಿಮ್ಮನ್ನು ಸ್ವಾಗತಿಸಲು ಬರುವರು. ಕಲ್ಯಾಣಕ್ಕೆ ಅಲ್ಲಮಪ್ರಭುಗಳು ಬಂದಿರುವ ವಾರ್ತೆ ಮನೆ ಮನೆಗೆ ಪಸರಿಸಿ ನಗರಕ್ಕೆ  ನಗರವೇ ಸಂಭ್ರಮಪಡುವುದು ,,