ನಾನು ಬರೆವ ಕವಿತೆ ನನಗೆ...

ನಾನು ಬರೆವ ಕವಿತೆ ನನಗೆ
ನನ್ನ ಮನದ ಕನ್ನಡಿ
ಪ್ರೀತಿ ಸ್ನೇಹ ತ್ಯಾಗ ಸ್ವಾರ್ಥ
ಎಲ್ಲ ಇದಕೆ ಮುನ್ನುಡಿ

ಮನದ ಎಲ್ಲ ಕದವು ತೆರೆಯೆ
ಭಾವ ಹೊರಗೆ ಹರಿವುದು
ಅದಕೆ ನೈಜ ರೂಪವನ್ನು
ಎನ್ನ ಕವಿತೆ ಕೊಡುವುದು

ಮನವು ಹರ್ಷದಿಂದ ಕುಣಿಯೆ
ಕವಿತೆ ತುಂಬ ಪದಗಳು
ಒಮ್ಮೆ ಮನವು ಅಳುತ ಕೂತ್ರೆ
ಕಣ್ಣ ತುಂಬ ಹನಿಗಳು

ಮನಸು ಅಳಲು ಕವಿತೆ ಬರೆಯೆ
ಎಲ್ಲ ಎಲ್ಲ ನಶ್ವರ
ಮನಸು ಕುಣಿಯೆ ಕವಿತೆ ಬರೆಯೆ
ಎಲ್ಲಾ... ಬೇಕೋ ಈಶ್ವರ

ಪ್ರೀತಿ ನೀನು ಪ್ರೇಮ ನೀನು
ಮನದ ನೂರು ಆಸೆ ನೀನು
ತ್ಯಾಗ ನೀನು ಸ್ವಾರ್ಥ ನೀನು
ಮನದ ಕವಲು ದಾರಿ ನೀನು

ನಗುವು ನೀನು ನೋವು ನೀನು
ಕಣ್ಣ ನೂರು ಹನಿಯು ನೀನು
ಬದುಕು ಸಾವು ಎಲ್ಲಾ ನೀನು
ನೀನೆ ನಾನ ಪಯಣ ಹಾದಿಯು

ನೀನೆ ಬಂಧು ನೀನೆ ಬಳಗ
ನನ್ನ ಪ್ರೀತಿ ಕವಿತೆಯೇ
ನೀನೆ ನನಗೆ ಎಲ್ಲಾ ಇಂದು
ನನ್ನ ಮನದ ಭಾವವೇ

ಮನಕೆ ಹರ್ಷ ತರುವ ನಿನಗೆ
ವರ್ಷಧಾರೆಯಾಗಲಿ
ನನ್ನು ಬರೆದ ನನ್ನ ಕವಿತೆ
ನೂರು ಮನವ ಗೆಲ್ಲಲಿ...