ಮುನ್ನುಡಿ

ಕನ್ನಡ ಎಂಬ ಪದವು ಅನೇಕ ಸಾಮಾಜಿಕ ಮೌಲ್ಯಗಳನ್ನು (ಅಂದರೆ ಭಾಷೆ, ಜನ, ಮಾರುಕಟ್ಟೆ, ಬೇಸಾಯ, ಉದ್ಯೋಗ, ಕಲಿಕೆ, ಚಿಂತನೆ....) ಹೊರಸೂಸುತ್ತದೆಯಾದರೂ, ಈ ಲೇಖನದಲ್ಲಿ ನುಡಿ ಎಂಬುದಾಗಿ ಅರ್ಥೈಸಿಕೊಳ್ಳೋಣ.

ಕರಡು
ಶತಮಾನಗಳಿಂದ ನಮ್ಮ ಕನ್ನಡ ಭಾಷೆ ಯಾವುದೇ ಮಡಿವಂತಿಕೆಯನ್ನು ಬೆಳೆಸಿಕೊಳ್ಳದೆ, ಬೇರೆ ಬೇರೆ ಸಮುದಾಯಗಳಿಂದ ಎಷ್ಟೋ ವಿಚಾರಗಳನ್ನು ತನ್ನ ತೆಕ್ಕೆಗೆ ಹಾಕಿಕೊಳ್ಳುತ್ತಾ ಮುನ್ನಡೆದಿರುವದು ಹೆಮ್ಮೆಯ ವಿಷಯವೇ ಸರಿ. ಆದರೆ ನಾವು ಹೊಸತನ್ನು ಬರಮಾಡಿಕೊಳ್ಳುವ ಆತುರದಲ್ಲಿ ನಮ್ಮದೇ ಎಷ್ಟೋ ಅನರ್ಘ್ಯ ರತ್ನಗಳನ್ನು ಚೆಲ್ಲಿಬಿಟ್ಟಿದ್ದೇವೆಯೇ ಎಂಬು ಅನುಮಾನ ಕೆಲವೊಮ್ಮೆ ಕಾಡದೇ ಇರುವದಿಲ್ಲ. ಈ ವಿಷಯವಾಗಿ ಯೋಚಿಸಿದಾಗ ಕೆಲವೊಮ್ಮೆ ಎಷ್ಟೋ ವಿಚಾರಗಳು ಉತ್ತರ ಸಿಗದೇ ಹೋಗುತ್ತವೆ. ಈ ನಿಟ್ಟಿನಲ್ಲಿ ಕೆಲವು ವಿಚಾರವನ್ನು ನಿಮ್ಮ ಮುಂದಿಟ್ಟು, ಕೊನೆಯಲ್ಲಿ ಒಂದು ಉದಾಹರಣೆಯನ್ನು ನೀಡುತ್ತದೆ ಈ ಲೇಖನ. ಕನ್ನಡದ ನುಡಿಯ ಬಗ್ಗೆ ಹೆಚ್ಚು ಅಭ್ಯಾಸ ಮಾಡಿದವರು, ಈ ಲೇಖನದಲ್ಲಿರಬಹುದಾದ ತಪ್ಪುಗಳನ್ನು ತಿದ್ದಿ, ಈ ನಿಟ್ಟಿನಲ್ಲಿ ಕನ್ನಡದ ಬೆಳಕು ಎಲ್ಲರಿಗೂ ಸಿಗುವಂತೆ ಮಾಡಬೇಕೆಂದು ಕೋರಿಕೆ.

ಹಳಗನ್ನಡವೆಂಬ ಜ್ಞಾನಭಂಡಾರ

ಹಳಗನ್ನಡದಿಂದ ಹೊಸಗನ್ನಡದಲ್ಲಾದ ಎಷ್ಟೋ ಬದಲಾವಣೆಗಳಲ್ಲಿ ಅತಿಮುಖ್ಯವಾಗಿ ನಾವು ಪ->ಹ ಮಾರ್ಪಾಟನ್ನು ಕಾಣಬಹುದು. ಈ ಪ->ಹ ವಿಚಾರಕ್ಕೆ ಬಂದರೆ, ಎಷ್ಟೋ ಬಳಕೆಗಳು ನಮ್ಮ ಮುಂದೆ ಸುಳಿಯುತ್ತವೆ. ಪಾಲು->ಹಾಲು, ಪಣೆ->ಹಣೆ, ಪಾಡು->ಹಾಡು, ಪನಿ->ಹನಿ, ಪಲವು->ಹಲವು, ಪಳ್ಳ->ಹಳ್ಳ, ಪೞೆಯ->ಹಳೆಯ. ಇವುಗಳನ್ನು ಕುರಿತಾಗಿ ಎಷ್ಟೋ ವೇಳೆ ನಾವು ತಪ್ಪು ತಿಳಿಯುವದು. ಪನಿ, ಪಾಲು ಮುಂತಾದವು ತಮಿಳು ಪದಗಳು, ತಮಿಳಿನಿಂದ ಮಾರ್ಪಾಟಾಗಿ ಹನಿ, ಹಾಲು ಅಂತ ಕನ್ನಡಕ್ಕೆ ಬಂದಿದೆ ಎಂಬುದಾಗಿ. ಇದು ನಮ್ಮ ತಪ್ಪು ತಿಳಿವಳಿಕೆ. ನಿಜವಾಗಿ ಪರಿಶೀಲಿಸಿ ನೋಡಿದಾಗ ಕನ್ನಡ ಕಾವ್ಯಗಳಲ್ಲಿಯೂ ಇದರ ಬಳಕೆಗಳು ಹಲವಾರು ಕಂಡುಬರುತ್ತದೆ. ಪಲವುಂ ಪಳ್ಳ ಸಮುದ್ರವೈ ಅಂತ ಸೋಮೇಶ್ವರ ಶತಕದ ಮೊದಲ ಪದ್ಯದಲ್ಲಿಯೇ ಇದೆ (೧೨ನೇ ಶತಮಾನವಿರಬಹುದು). ಈ ಪ->ಹ ಮಾರ್ಪಾಟುಗಳನ್ನು ಕವಿರಾಜಮಾರ್ಗದಲ್ಲಿಯೂ ಕೆಲವೆಡೆ ಕಾಣಬಹುದು. ಕವಿರಾಜಮಾರ್ಗ (ಸುಮಾರು ೮೫೦ ಎ.ಡಿ) ರಚಿತವಾದ ಕಾಲಕ್ಕೇ ಕನ್ನಡವು ಆಗಿನ ಕಾಲಕ್ಕೆ ಹಳೆಯದಾಗಿತ್ತು. ಇದರ ಬಗ್ಗೆ ಕವಿರಾಜಮಾರ್ಗದ ಕರ್ತೃವೇ ಹಿಂದಿನ ಕವಿಗಳು ಪೞಗನ್ನಡದಲ್ಲಿ ಕಾವ್ಯ ರಚಿಸಿರುವರು, ಅದು ಆಗಿನ ಕಾಲಕ್ಕೆ ಸರಿಹೊಂದಿದ್ದಿರಬಹುದು, ಆದರೆ ಈಗ ತಾನು ಹೊಸ ಪ್ರಯೋಗ ಮಾಡುತ್ತೇನೆ ಎಂಬಂತಹ ಮಾತುಗಳನ್ನಾಡಿದ್ದಾನೆ. ಏಕೆ ಈ ಪ್ರಸ್ತಾಪ ಮಾಡಿದೆನಂದರೆ ಕನ್ನಡ ಭಾಷೆ ತುಂಬಾ ಹಳೆಯದು ಎಂದು ಹೇಳುವದಕ್ಕಲ್ಲ, ಬದಲಾಗಿ ಪನಿ, ಪಾಲು ಇವುಗಳು ಕೇವಲ ತಮಿಳು ಪದಗಳು, ಕನ್ನಡ ಪದಗಳಲ್ಲ ಎಂಬ ತಪ್ಪುಗ್ರಹಿಕೆ ದೂರಮಾಡಲು ಹೇಳಿದೆನಷ್ಟೇ.

ಹೀಗಾಗಿ ವಿದ್ವಾಂಸರುಗಳು ಪೂರ್ವಹಳೆಗನ್ನಡ, ಹಳೆಗನ್ನಡ ಮತ್ತು ಹೊಸಗನ್ನಡ ಎಂಬ ಬಳಕೆಗಳನ್ನು ರೂಢಿಗೆ ತಂದಿದ್ದಾರೆ.

ಪ->ಹ ಮಾರ್ಪಾಟು

ಸಂಸ್ಕೃತಕ್ಕೆ ಹೊರತಾದ ಕನ್ನಡದಲ್ಲಿಯೇ ಈ ಪ->ಹ ಪ್ರಕ್ರಿಯೆ ಪ್ರಾರಂಭವಾಗಿದೆ. ಕಡೇ ಪಕ್ಷ ೯ನೇ ಶತಮಾನದಿಂದಲಾದರೂ. ಕನ್ನಡವು ಕೆಲವು ಶತಮಾನಗಳಿಂದ ಕಳೆದುಕೊಳ್ಳುತ್ತಿರುವ ಈ "ಪ" ಅಕ್ಷರವನ್ನು ಈಗಿನವರಾದ ನಾವು ಹೇಗೆ ಬಳಸಿಕೊಳ್ಳಬಹುದು ? ಈ "ಪ" ಅಕ್ಷರವನ್ನು ಈಗಿನ ಕಾಲಕ್ಕೆ ಪ್ರಸ್ತುತವಾಗಿಸಬಹುದೇ ? ಪ್ರಸ್ತುತವಾಗಿಸಬಹುದಾದರೆ ಹೇಗೆ ಆಗಿಸುವದು. ಹಾಂ! ನಾವು ಈ ದಿಸೆಯಲ್ಲಿ ಅಗತ್ಯವಾಗಿ ನೆನಪಿನಲ್ಲಿಡಬೇಕಾದದ್ದು, "ಪ" ಪ್ರಸ್ತುತವಾಗಿಸೋಣ ಎಂದ ಮಾತ್ರಕ್ಕೆ ಈ ಕ್ಷಣದಿಂದಲೇ ಎಲ್ಲರೂ ಪಾಲು, ಪಾಡು, ಪಲವು ಎಂಬು ಪದಗಳನ್ನು ಬಳಸೋಣ ಎಂಬುದಲ್ಲ. ಪ->ಹ ಮಾರ್ಪಾಟು ಕನ್ನಡದ ಮಟ್ಟಿಗೆ ಒಂದು ಒಳ್ಳೆಯದೇ ಆಗಿದೆ. ಎಷ್ಟೋ ವೇಳೆ, "ಹ"ದಿಂದ ಪ್ರಾರಂಭವಾಗುವ ಪದಗಳು (ಹಾಡು) ಕ್ರಿಯಾಪದ ಇಲ್ಲವೇ, ವಿಶೇಷಣ ಇವುಗಳನ್ನು ಪಡೆದಿವೆ, ಆದರೆ "ಪ"ದಿಂದ ಪ್ರಾರಂಭವಾಗುವ ಅದರ ಹಳೆಯ ರೂಪಗಳು ಇಂದಿಗೆ ಇನ್ನೂ ನಾಮಪದದ ರೂಪವನ್ನು ಉಳಿಸಿಕೊಂಡಿವೆ(ಪಾಡು). ಇದೊಂದು falsifiable ವಾಕ್ಯವಿರಬಹುದು. ಇದಕ್ಕೆ ಆಧಾರವಾಗಿ ಬಳಕೆಗಳನ್ನು ನೀಡಬಹುದಷ್ಟೇ. ಆದರೆ ಆಧಾರಸಮೇತ ನಿರೂಪಿಸಲಾಗುವದಿಲ್ಲ.

ಈಗ್ಗೆ ಕೆಲವು ದಿನಗಳಿಂದ ನನಗೆ ಹೊಳೆದಿದ್ದ ಆಲೋಚನೆಯೆಂದರೆ ಈ "ಪ" ಅಕ್ಷರವನ್ನು ನಾವು conceptualizationಗೆ ಬಳಸಿಕೊಂಡು ಅದರ "ಹ" ಪ್ರಯೋಗಗಳನ್ನು ಅದರ implementationಗಳಿಗೆ ಬಳಸಿಕೊಳ್ಳಬಹುದೇ ? ಎಂಬುದೇ ನಮ್ಮ ಮುಂದಿರುವ ಪ್ರಶ್ನೆ.

ಉದಾಹರಣೆಗೆ -
ಹನಿಗಳು, ಹನಿಗಳಿಂದ, ಹನಿಯನ್ನು, ಹನಿಸು, ಹನಿಕು ಈ ಪ್ರಯೋಗಗಳಿಗೆ ಹಳೆಗನ್ನಡದ ಪನಿ ಎಂಬ ಪದವೇ ಆಧಾರ. ಈಗಿನ ಕಾಲಘಟ್ಟದಲ್ಲಿರುವ ನಮಗೆ ಪನಿ ಎಂಬ ಪದವು ಒಂದು ನಾಮಪದವನ್ನು ಮಾಡಲು ಸಹಕಾರಿಯಾಗುತ್ತದೆ. ಅಂದರೆ ಪನಿ ಎಂಬುದು ಒಂದು concept ಆಗಿ ಅದರ ವಿವಿಧ ರೂಪಗಳಾದ ಹನಿ, ಹನಿಕೆಗಳು ಇವಗಳು implementationಗಳಾಗಿವೆ. ಹಾಗೆಯೇ ಹಾಡು, ನಾವುಗಳಿಂದು "ಹಾಡುವಾಗ, ಹಾಡುತ್ತಿದ್ದಾಗ, ಹಾಡುಗಳು" ಎಂಬುದಾಗಿ ಬಳಸುವದಕ್ಕೆ ಹಳೆಗನ್ನಡದ ಪಾಡು ಸಹಾಯಕ್ಕೆ ಬರುತ್ತದೆ. ಈಗಿನ ನಮ್ಮ ದಿನನಿತ್ಯದ ಮಾತಿನಲ್ಲಿ ಪಾಡುವಾಗ ಎಂಬ ಬಳಕೆ ದೂರ ಸರಿದಿದೆ.

conceptualization ನಿಂದ ಆಗುವ ಪ್ರಯೋಜನಗಳು

ಈಗಿನ ಎಷ್ಟೋ ತಾಂತ್ರಿಕ ಮಂದಿ GRE ಇಂಗ್ಲೀಷ್ ಅಭ್ಯಾಸ ಮಾಡುವಾಗ ಇದು ಗಮನಕ್ಕೆ ಬಂದಿರುತ್ತದೆ. ಯಾವುದೋ, ಕಂಡಿಯೇ ಇರದ, ಕೇಳಿಯೇ ಇರದ ಪದಕ್ಕೆ Synonym ಹುಡುಕುವಾಗ ಸಹಾಯಕ್ಕೆ ಬರುವದು ಆ ಪದದ roots. ಈ rootಗಳ ಆಧಾರದಲ್ಲಿ ಈ ಪದದ ಅರ್ಥ ಹೀಗಿರಬಹುದು ಎಂಬುದನ್ನು ಊಹಿಸಬಹುದು.

ಇದಕ್ಕೊಂದು ಉದಾಹರಣೆ

ಈ ದಿನ ಗೂಗಲ್ನಲ್ಲಿ ಚಾಟ್ ಮಾಡುವಾಗ, Status Message ಎಂಬುದಕ್ಕೆ ಕನ್ನಡದಲ್ಲಿ ಏನು ಹೇಳಬಹುದು ಎಂದು ಯೋಚಿಸುತ್ತಿದ್ದೆ. ಏಲ್ಲೆಲ್ಲೋ ಹೋಗಿ ಕೊನೆಗೆ ಅಲ್ಲಿಗೆ ಬಂದರು ಎನ್ನುವ ನಾಣ್ಣುಡಿಯ ಹಾಗೆ ಒಂದು ಒಳ್ಳೆಯ ವಿಚಾರ ಹೊಳೆಯಿತು. ಈ ವಿಚಾರವು ಹೊಳೆದಾಗಿನಿಂದ ನನ್ನ ಆತ್ಮವಿಶ್ವಾಸವಂತೂ ಹೆಚ್ಚಾಗಿದೆ. ನಿಮಗೂ ಇದರ ಅನುಭವವಾದರೆ ಈ ಲೇಖನದ ಉದ್ದೇಶ ಸಾರ್ಥಕವಾದಂತೆ.

ನಾವೆಲ್ಲರೂ, ಹೀಗೊಂದು ವಚನವನ್ನು ಓದಿರುತ್ತೇವೆ, ಅಥವಾ ಕೇಳಿರುತ್ತೇವೆ. ಬಹುಶಃ ಬಸವಣ್ಣನವರದ್ದಿರಬಹುದು. ಏನು ಬಂದಿರಿ ಹದುಳಿದ್ದಿರೆ ಎಂದರೆ ನಿಮ್ಮ ಐಸಿರಿ ಹಾರಿ ಹೋವುದೇ? ..ಹೀಗೆ ಸಾಗುತ್ತದೆ ಆ ವಚನ, ನನಗೆ ಪೂರ್ತಿ ತಿಳಿದಿಲ್ಲ. ತಿಳಿದವರು ಪೂರ್ತಿ ಪದ್ಯವನ್ನು ಹಾಕಿದರೆ ಒಳ್ಳೆಯದಾಗುವದು. ಇಲ್ಲಿ ಹದುಳ ಎಂದರೆ ಏನು ಗೊತ್ತೇ ? ಅಚ್ಚಗನ್ನಡದವರು ಅಥವಾ ಆಂಡಯ್ಯನ ಅಭಿಮಾನಿಗಳು ಹಮ್ಮೆಪಡಬಹುದಾದಂತಹ ಪದವಿದು.

ಗೆಳೆಯರೆ ಮೇಲಿನ ವಚನದಲ್ಲಿ ಬಂದಿರುವ ಅಚ್ಚಗನ್ನಡದ ಹದುಳ ಎಂಬ ಪದವನ್ನು ಗಮನಿಸಿ, ಈ ಪದದ root ಕಂಡುಹಿಡಿಯಬಲ್ಲಿರಾ ? ಈ ಹದುಳ ಎಂಬ ಪದವು ಹಳೆಗನ್ನಡದ ಪದುಳ ಎಂಬುದರಿಂದ ಬರುತ್ತದೆ. ಈ ಪದುಳ ಎಂಬ ಪದದ root ಪದ. ಅಚ್ಚಕನ್ನಡದ ಹದುಳ ಪದದ root ಸಂಸ್ಕೃತದ ಪದವೇ ಎಂದು ಹುಬ್ಬೇರಿಸಬೇಡಿ. ಸರಿ, ಈಗ "ಪದ" ಎಂಬ ಪದದ ಬಗ್ಗೆ ನೀವುಗಳು ವಿವರಣೆ ನೀಡಬಲ್ಲಿರಾ ? ನಾವುಗಳಿಂದು ತಿಳಿದುಕೊಂಡಿರುವ ಹಾಗೆ ಪದ ಎಂಬ ಪದವು ಸಂಸ್ಕೃತದ್ದು ಎಂಬುದಾಗಿ. ಆದರೆ ನಾವಿಂದು ಬಳಸುವ "ಪದ" ಎಂಬ ಪದ ಸಂಸ್ಕೃತದ್ದು ಎಂದು ಹೇಳುವುದಕ್ಕೆ ಬರುವದಿಲ್ಲ. ಕನ್ನಡದಲ್ಲಿಯೂ "ಪದ" ಎಂಬ ಪದವಿದೆ. ಆದರೆ ಹಳೆಗನ್ನಡದಿಂದ ಹೊಸಗನ್ನಡಕ್ಕೆ ನಾವು ಪಲ್ಲಟವಾಗುವಾಗ ಇದರ ಮಹತ್ವವನ್ನು ಅರಿಯದೇ ಸುಮ್ಮನಾಗಿಬಿಟ್ಟಿದ್ದೇವೆ. ಹಳೆಗನ್ನಡದ "ಪದ" ಎಂಬ ಪದವು ಹೊಸಗನ್ನಡದಲ್ಲಿ "ಹದ" ಎಂದಾಗಿದೆ. ಪದ ಎಂದರೆ ಒಳ್ಳೆಯ ಸ್ಥಿತಿಯಲ್ಲಿರುವದು, ಚೆನ್ನಾಗಿ ಕಳಿತಿರುವದು. ಕಿಟ್ಟೆಲ್ ಪದಕೋಶವನ್ನು ಆಧಾರವಾಗಿಟ್ಟುಕೊಂಡಿರುವ ಡ್ರಾವಿಡಿಯನ್ ಪದಕೋಶ ಹೀಗೆ ಹೇಳುತ್ತದೆ.

Ka. pada proper or good state or condition, the right degree of ripeness....

ಈ ಕಾರಣದಿಂದಲೇ ಪದ್ಯ, ಪದಪುಂಜ ಎಂಬು ಪ್ರಯೋಗಗಳೂ ಕನ್ನಡಿಗರಿಗೆ ಹತ್ತಿರವೆನಿಸುತ್ತವೆ. "ಪದ" ಎಂಬ ಪದ ಕನ್ನಡದ್ದೇ ಎಂದು ತಿಳಿದಾಗ ಸಂತೋಷವಾಯಿತೇ ? ಅಗತ್ಯವಾಗಿ ತಿಳಿಸಿ. ಇದನ್ನು ತಿಳಿಯದಿದ್ದ ನಾನೇ ಪದ ಎಂಬುದಕ್ಕೆ ಬದಲಾಗಿ ಒರೆ ಎಂದು ಕೆಲವೆಡೆ ಬಳಸುತ್ತಿದ್ದೆ, ಆದರೆ ಯಾವ ದಿನ ಪದ ಎಂಬುದು ಕನ್ನಡದ್ದೇ ಎಂದು ತಿಳಿಯಿತೋ ಆದಿನ ಆದ ಆನಂದ ಅಷ್ಟಿಷ್ಟಲ್ಲ. ಗ್ರಾಮ್ಯವಲ್ಲದೆಯೂ ಕನ್ನಡವಿದೆ ಎಂಬ ನನ್ನ ನಂಬಿಕೆಗೆ ಮತ್ತಷ್ಟು ಬಲ ಬಂದಿದೆ. ಇಂತಹ ಇನ್ನೂ ಎಷ್ಟೋ ಅನರ್ಘ್ಯ ರತ್ನಗಳು ಕನ್ನಡದಲ್ಲಿರಬಹುದು. ಅವುಗಳು ಕಂಡಾಗ ಎಲ್ಲರೊಡನೆ ಹಂಚಿಕೊಳ್ಳೋಣ.

ಈ ರೀತಿಯ ಪದಪ್ರಯೋಗಗಳ(ಪದಪ್ರಯೋಗವೆಂದರೆ ಚೆನ್ನಾಗಿರುವ ಪ್ರಯೋಗಗಳು ಎಂತಲೂ ಅರ್ಥೈಸಬಹುದು, word'uಗಳ ಬಳಕೆಗಳಲ್ಲ) ಜ್ಞಾನವಿದ್ದ ನಮ್ಮ ಹಿಂದಿನವರು ಯಾವ ಯಾವ ಪದಗಳನ್ನು ಬಳಸಬೇಕು, ಎಂತಹ ಪದಗಳನ್ನು ಬೇರೆ ಭಾಷೆಯಿಂದ ಎರವಲು ಪಡೆಯಬೇಕು, ಎಂತಹವನ್ನು ಬಿಡಬೇಕು ಇತ್ಯಾದಿಯಾಗಿ ಯೋಚಿಸುತ್ತಿದ್ದರೆಂದು ಕಾಣುತ್ತದೆ. ಆದರೆ ಈಗಿನ ಕನ್ನಡಿಗರಾದ ನಾವು, ಸಮಯದ ಅಭಾವ ಹಾಗು Globalization, Liberalization ಪರಿಣಾಣದ ಮೇಲೆ ಬೊಟ್ಟು ಮಾಡಿ ಕನ್ನಡದಲ್ಲಿಯೇ ಇರುವ ಇಂತಹ ರತ್ನಗಳ ಬಗ್ಗೆ ಚರ್ಚಿಸದೇ ಇವುಗಳನ್ನು ಕಳೆದುಕೊಳ್ಳಲು ಸಿದ್ಧರಾಗೋಣವೇ ?

ಮುಗಿಸುವ ಮುನ್ನ
ಸರಿ, ಒಂದು ಉದಾಹರಣೆ ನೀಡುತ್ತೇನೆ ಎಂದು ಹೇಳಿದ್ದೆ, Status Messageಗೆ ಕನ್ನಡದಲ್ಲಿ ಏನು ಹೇಳಬಹುದು. ಸಂಸ್ಕೃತದ ಸ್ಧಿತಿ(?????). ಸ್ಥಿತಿ ಎನ್ನುವದು State ಅನ್ನು ಸೂಚಿಸುತ್ತದೆಯೇ ಹೊರತು Status(??).

ಲೇಖನವನ್ನು ಪೂರ್ಣವಾಗಿ ಓದುವಾಗ ನಿಮ್ಮ ಗಮನಕ್ಕೆ "ಪದ" ಬಂದಿರಬಹುದು.
pada - proper or good state or condition, proper degree or temperature, the seasoning of any food, the right degree of ripeness, keenness of edge or sharpness;

paduḷa - well-being, prosperity, happiness, tranquillity, security, safety;

Status Message ಎನ್ನುವದಕ್ಕೆ ಕನ್ನಡದಲ್ಲಿ ಪದ ಅಥವಾ ಹೆಚ್ಚು ಪಕ್ವವಾಗಿ ಪದುಳ ಎಂಬುದಾಗಿ ಬಳಸಬಹುದು. ಇದಕ್ಕೆ ಸಹಾಯಕ್ಕೆ ಕನ್ನಡ ಕಾವ್ಯವೂ ಬೆನ್ನುಲುಬಾಗಿ ನಿಲ್ಲುತ್ತದೆ.

ಕನ್ನಡದಲ್ಲಿರುವ ಇಂತಹ ಅನರ್ಘ್ಯ ರತ್ನಗಳನ್ನು ಹೆಕ್ಕಿ ತೆಗೆಯಲು ನಾವೇನು ಹರಸಾಹಸ ಮಾಡಬೇಕಿಲ್ಲ. ನಾವುಗಳು ಏನನ್ನಾದರೂ ಓದುವಾಗ ಇಂತಹ ವಿಚಾರಗಳು ಎದುರಾದರೆ ಎಲ್ಲರೊಡನೆ ಹಂಚಿಕೊಂಡರೆ ಸಾಕು. ನಮಗಿಂತ ಹೆಚ್ಚು ತಿಳಿದವರು ಇದರ ಬಗ್ಗೆ ಚರ್ಚಿಸುತ್ತಾರೆ. ಹೆಚ್ಚು ಹೆಚ್ಚು ವಿಚಾರ ವಿನಿಮಯವಾಗುತ್ತದೆ. ಎಲ್ಲಕ್ಕಿಂತ ಹೆಚ್ಚಾಗಿ ಕನ್ನಡ ನುಡಿಯ ಬಗೆಗಿನ ಹೆಮ್ಮೆ ಮತ್ತಷ್ಟು ಹೆಚ್ಚಾಗುತ್ತದೆ. ಕನ್ನಡ ನುಡಿಯ ಬಗ್ಗೆ ನಮಗೆ ನಾವೇ ಸಂಕುಚಿತ ಭಾವನೆ ಬೆಳೆಸಿಕೊಂಡು, ನಮ್ಮ ಹಣವಂತಿಕೆಯ ಬಗ್ಗೆ ಎಷ್ಟು ಕೊಚ್ಚಿದರೆ ಏನು ಬಂತಲ್ಲವೇ ಭಾಗ್ಯ.

ಕೊನೆಯ ಮಾತು

ಲೇಖನ ನಿಮಗೆ ಹಿಡಿಸಿತೇ ? ಲೇಖನದ ಉದ್ದೇಶದ ಬಗ್ಗೆ ನೀವೇನಾದರೂ ಹೇಳಬಯಸುವಿರೇ ? ಏನಾದರೂ ಹೇಳಬೇಕೆನಿಸಿದರೆ ಅಗತ್ಯವಾಗಿ ನಿಮ್ಮ ಅಭಿಪ್ರಾಯಗಳನ್ನು ಮುಂದಿಡಿ.