ಲಾಲಿ
October 4, 2007 - 11:48am — srinivasps
ಲಾಲಿ
ಬಾ ಬಾರೋ ಚಿನ್ನ, ಇನ್ನೆಷ್ಟು ಆಡುವೇ?
ಬೇಡವೆ ಆಟಕೆ ಪುರುಸೊತ್ತು?
ಬೇಡವೆ ಆಟಕೆ ಪುರುಸೊತ್ತು, ನನ್ನ ಚಿನ್ನ?
ನಿದ್ದೆ ಮಾಡುವ ಹೊತ್ತು ಈಗಾಯ್ತು...||
ಬೆಳಗಿಂದ ನೀನು ಎಷ್ಟೊಂದು ಆಡಿದೆ,
ದಣಿವಿಲ್ಲವೇನೋ ನನ್ನ ರಾಜ
ದಣಿದಿಲ್ಲವೇನೋ ನನ್ನ ಮುದ್ದು ರಾಜಣ್ಣ
ನಿದ್ದೆ ಮಾಡುವ ಹೊತ್ತು ಈಗಾಯ್ತು...||
ನಾಳೆ ಆಡುವೆಯಂತೆ, ತೀಟೆ ಮಾಡುವೆಯಂತೆ,
ನಿದ್ದೆಯ ಮಾಡೋ ಬಂಗಾರ
ನಿದ್ದೆಯ ಮಾಡೋ ಬಂಗಾರ - ದಮ್ಮಯ್ಯ
ಮಲಗುವ ಹೊತ್ತು ಈಗಾಯ್ತು...||
ಹಾಲು ಕೆನ್ನೆಯ ರಾಜ, ಕಪ್ಪು ಕಂಗಳ ತೇಜ
ತೂಗುವೆ ಬಾರೋ ನನ್ನ ಪುಟ್ಟ
ತೂಗುವೆ ಬಾರೋ ನನ್ನ ಮುದ್ದು ಪುಟ್ಟಣ್ಣ
ಮಲಗುವ ಹೊತ್ತು ಈಗಾಯ್ತು...||
ಜೋಗುಳವಾ ಹಾಡುವೆನೋ, ನಿನ್ನ ಮುದ್ದಾಡುವೆನೋ
ಬಿಗಿದಪ್ಪಿ ಹಾಡುವೆನೋ, ನಿನ್ನ ಮುದ್ದಾಡುವೆನೋ
ಮಡಿಲಿಗೆ ಬಾರೋ ತುಂಟಣ್ಣ
ಮಡಿಲಿಗೆ ಬಾರೋ ತುಂಟಣ್ಣ - ನನ್ನೊಡೆಯ
ಮಲಗುವ ಹೊತ್ತು ಈಗಾಯ್ತು...
ನಿದ್ದೆ ಮಾಡುವ ಹೊತ್ತು ಈಗಾಯ್ತು...
ಮಲಗಲು ಬಾರೋ ತುಸು ಹೊತ್ತು...
ಮಲಗುವ ಹೊತ್ತು ಈಗಾಯ್ತು...||
=================================================
ಪ್ರತಿ ದಿನ, ನನ್ನಕ್ಕನ ಮಗ ಪ್ರದ್ಯುಮ್ನ, ಅಕ್ಕನನ್ನು ಗೋಳು ಹೊಯ್ದುಕೊಳ್ಳುವುದೇ ಈ ಲಾಲಿಗೆ ಸ್ಫೂರ್ತಿ!
ಮಧ್ಯಮಾವತಿ ರಾಗವನ್ನು ಬಳಸಿದ್ದೇನೆ...
=================================================
- Login or register to post comments
- 509 hits
- ಈ ಪುಟವನ್ನು ಇ-ಮೇಯ್ಲ್ ಮಾಡಿ
ಮೇಲಿನ ಪುಟವನ್ನು ಹೋಲುವ ಪುಟಗಳು - 'ಸಂಪದ' ಆರ್ಕೈವಿನಿಂದ
RSS:
ಪ್ರತಿಕ್ರಿಯೆಗಳು
ಉ: ಲಾಲಿ
ವಾವ್, ಲಾಲಿ ಹಾಡನ್ನೂ ಶಾಸ್ತ್ರೀಯ ರಾಗದ ಚೌಕಟ್ಟಿನಲ್ಲಿ ಸೇರಿಸುವ ಪರಿಪಾಠವಿದೆ ಅಂತ ಇವತ್ತೇ ನನಗೆ ತಿಳಿದದ್ದು. ಸೂಪರ್.
ಉ: ಲಾಲಿ
ಧನ್ಯವಾದಗಳು.
ಲಾಲಿ ಹಾಡನ್ನು ಶಾಸ್ತ್ರೀಯ ರಾಗದ ಚೌಕಟ್ಟಿನಲ್ಲಿ ಬಳಸಿರುವ ಬಹಳಷ್ಟು ಉದಾಹರಣೆಗಳಿವೆ.
ಈಗ ನನಗೆ ಥಟ್ಟನೆ ನೆನಪಿಗೆ ಬಂದದ್ದು ಪುರಂದರ ದಾಸರ - 'ಲಾಲಿ ಗೊವಿಂದ'.
ಯಾವುದೇ ಹಾಡು ಯಾವುದಾದರೂ ರಾಗದಲ್ಲಿ ಅಥವಾ ರಾಗಮಾಲಿಕೆಯಲ್ಲಿ ಇರುವುದಲ್ಲವೆ?
ರಾಗದ ಹೆಸರು ತಿಳಿಯದಿರಬಹುದು ಅಥವಾ ಆ ದಿಕ್ಕಿನಲ್ಲಿ ನಾವು ಯೋಚಿಸದಿರಬಹುದು.
ಉ: ಲಾಲಿ
veena.
ಶ್ರೀನಿವಾಸ್ ಅವರೆ,
ಲಾಲಿ ಹಾಡು ಬಹಳ ಚೆನ್ನಾಗಿದೆ. ಮಕ್ಕಳನ್ನು ಮಲಗಿಸಲು ಸಿನಿಮಾ ಹಾಡುಗಳನ್ನು ಹೇಳುವ ಇಂದಿನ ಪೀಳಿಗೆಗೆ ಇಂತಹ ಲಾಲಿ ಹಾಡುಗಳ ಅಗತ್ಯ ತುಂಬಾ ಇದೆ. ಇದೇ ರೀತಿ ನಮ್ಮ ಅಮ್ಮ, ಅಜ್ಜಿಯಂದಿರ ಕಾಲದ ಲಾಲಿ ಹಾಡುಗಳು ಯಾರಿಗಾದರೂ ಬರುತ್ತಿದ್ದಲ್ಲಿ ದಯವಿಟ್ಟು ಬ್ಲಾಗಿಸಿ, ನಮ್ಮಂತಹ ಎಳೆಯ ಮಕ್ಕಳ ತಾಯಂದಿರಿಗೆ ಅನುಕೂಲವಾಗುತ್ತದೆ.
ಉ: ಲಾಲಿ
ಲೋ ಶಾಸ್ರೀಯವಾಗಿ ನಿದ್ದೇ ಮಾಡೋ ಮಕ್ಕಳಿಗೆ ಹೀಗೆ ಶಾಸ್ತ್ತೀಯವಾದ ಲಾಲಿ!!
ಸುಮ್ನೆ.. ತರಲೆ..
ಲಾಲಿ ಹಾಡು ಮಲಗಿಸಿದ್ರೆ ಸಾಕು, ಶಾಸ್ತ್ರೀಯವೋ, ಶಾಸ್ತ್ತೀಯವಲ್ಲವೋ!!
ಉ: ಲಾಲಿ
ಈ ಹಾಡು ನನ್ನ ಅಕ್ಕನ ಮಗನನ್ನು ಮಲಗಿಸಲು ಸಹಾಯ ಮಾಡಿದ್ದಂತೂ ನಿಜ...
ಬರೆದ ಹಾಡು ಸಾರ್ಥಕವಾಯಿತು ಅಂತಲೇ ಅನ್ನಬಹುದು
-ಶ್ರೀ
ಉ: ಲಾಲಿ
ತುಂಬಾ ಚೆನ್ನಾಗಿದೆ, ಒಳ್ಳೆ ಜೋಗುಳ.
ಉ: ಲಾಲಿ
ವೀಣಾ ಅವರೇ ಮತ್ತು ಪೂರ್ಣಿಮಾ ಅವರೇ,
ಧನ್ಯವಾದಗಳು. ನಿಮ್ಮಗಳ ಪ್ರೋತ್ಸಾಹ ಹೀಗೆ ಮುಂದುವರೆಯಲಿ