ರತ್ನಾಕರವರ್ಣಿಯಲ್ಲಿರುವ ಒಂದು ಪ್ರಮುಖ ಗುಣವನ್ನು ನಾವು ಗಮನಿಸಲೇಬೇಕು. ಈಗ ನೋಡಿ, ನಾವು ಓದುಗರು ಒಂದು ಭ್ರಮೆ ಕಟ್ಟಿಕೊಂಡಿರುತ್ತೇವೆ. ಮಹಾಕಾವ್ಯ ಎಂದರೆ ಹೀಗಿರಬೇಕು, ಹಾಗಿರಬೇಕು. "ಇಂತಹ ಮಾತುಗಳು", "ಇಂತಿಂತಹ ಪದಗಳು", "ಅಂತಹ ಮಹಾ ಸಾಹಿತ್ಯದಲ್ಲಿ" ಇರಬಾರದು ಎಂಬ ಕಲ್ಪನೆಯಲ್ಲಿದ್ದುಬಿಡುತ್ತೇವೆ. ಆದರೆ, ಗಮನಿಸಿ, ರತ್ನಾಕರವರ್ಣಿ ಭರತೇಶ ವೈಭವದಂತಹ ಮಹಾಕಾವ್ಯದಲ್ಲಿಯೂ ಕೂಡ ದೇಸೀನುಡಿಗಟ್ಟುಗಳನ್ನು ಬಳಸುವುದಕ್ಕೆ ಹಿಂಜರಿಯುವುದಿಲ್ಲ. ಹಿಂದೆ ಈಗಾಗಲೇ ಅದರ ಒಂದು ಉದಾಹರಣೆ ತೋರಿಸಿಕೊಟ್ಟಿದ್ದೆ. ಈ ದಿನ ಮತ್ತೊಂದು ತುಂಬಾ ನಗುತರಿಸುವ ಪದ್ಯವನ್ನು ಗಮನಿಸೋಣ.

ಸಕಲ ಲಕ್ಷಣವು ವಸ್ತುಕಕೆ, ವರ್ಣಕಕಿಷ್ಟು ವಿಕಳವಾದರು ದೋಷವಿಲ್ಲ.
ಸಕಲ ಲಕ್ಷಣಕಾಗಿ ಬಿರುಸು ಮಾಡಿದರೆ ಪುಸ್ತಕದ ಬದನೆಕಾಯಹುದು || ೮ ||

ಈ ರೀತಿಯ ನುಡಿಗಟ್ಟುಗಳು ಭರತೇಶ ವೈಭವದಲ್ಲಿ ಮತ್ತಷ್ಟು ಇವೆ. ಅದೇನೇ ಇರಲಿ, "ಬದನೆಕಾಯಿ"ಯಂತೂ ಒಂದು ಕಾಲದಲ್ಲಿ ಕನ್ನಡಿಗರನ್ನು ತುಂಬಾ ಮೋಡಿ ಮಾಡಿತ್ತು ಅನ್ಸತ್ತೆ