ಭರತೇಶ ವೈಭವದ ಕಲ್ಪುಗಳನ್ನು ಓದುತ್ತಿರುವವರಿಗೆ, "ಕಾವ್ಯವೆಂಬುದು ಮಡಿವಂತಿಕೆಯ ಚೌಕಟ್ಟಲ್ಲ", ಎಂಬುದು ಗಮನಕ್ಕೆ ಬಂದಿರಬಹುದು. ಕಾವ್ಯಗಳಲ್ಲಿ ಜನಪದ ನುಡಿಗಟ್ಟುಗಳನ್ನು ತರುವುದು ಒಬ್ಬ ಕವಿಯ ಪ್ರಬುದ್ಧತೆ ಹಾಗು ತನ್ನ ಕೃತಿಯ ಮೇಲಿನ ಹಿಡಿತವನ್ನು ತೋರುತ್ತದೆ. ಈ ದಿನ ಗಾದೆಯನ್ನೊಳಗೊಂಡ ಒಂದು ಪದ್ಯ ಹಾಗು ಭರತೇಶ ವೈಭವದಿಂದ ಈಗಿನ ಫಿಸಿಕ್ಸ್ ಸ್ಟೂಡೆಂಟುಗಳು ಸೃಷ್ಟಿಸಬಹುದಾದ ಅಪ್ಲೈಡ್ ಟರ್ಮಿನಾಲಜಿಗಳನ್ನು ಗಮನಿಸೋಣ.

೧. ಉಂಡುಪವಾಸಿ ಬಳಸಿ ಬ್ರಹ್ಮಾಚಾರಿ ಭೂ
ಮಂಡಲವಿದ್ದು ನಿಸ್ಸಂಗ |
ಮಂಡೆಬೆಳೆದು ಮನಬೋಳಾದ ತಪಸಿಯ
ಕೊಂಡಾಡಲಳವೆ ಚಕ್ರಿಯನು ||

ರತ್ನಾಕರವರ್ಣಿ, ತನ್ನ ನಾಯಕನನ್ನು ಅತ್ಯುಚ್ಛ ಆದರ್ಶಜೈನನನ್ನಾಗಿ ಕಾಣುತ್ತಾನೆ. ಹಾಗಾಗಿಯೇ, ಭರತೇಶನಿಗೆ ಅಷ್ಟೆಲ್ಲ ಹೆಂಡತಿಯರಿದ್ದರೂ ಕವಿಯು ಮಾತ್ರ ತನ್ನ ರಾಜನ ಆತ್ಮಕಲೆಯನ್ನು ಮಾತ್ರ ಬಿಟ್ಟುಕೊಡುವುದಿಲ್ಲ. ಹಾಗಾಗಿ, ಭರತ, "ಉಂಡಿದ್ದರೂ ಉಪವಾಸಿ, ಬಳಸಿಯೂ ಬ್ರಹ್ಮಚಾರಿ".

ಸಂಪದದಲ್ಲಿ ಶ್ರೀಕಾಂತ ಮಿಶ್ರಿಕೋಟಿಯವರು, ಆಗಾಗ ಧಾರವಾಡ ಕನ್ನಡದ ಬಗ್ಗೆ ತಿಳಿಸಿಕೊಡುತ್ತಿರುತ್ತಾರೆ. ಹೀಗೆ ಒಮ್ಮೆ ಅವರ, ’ಅ’ ಮತ್ತು ’ಆ’ ನಡುವೆ ಒಂದು ಸ್ವರ ? (ಧಾರವಾಡ ಕನ್ನಡ-೨) ಎಳೆಯಲ್ಲಿ "ಅಳ" ಎಂಬ ಪದದ ಪ್ರಸ್ತಾಪವಾಗಿತ್ತು. ಭರತೇಶ ವೈಭವದಲ್ಲಿ ಎಷ್ಟೋ ಕಡೆ ಈ "ಅಳ" ಪದ ಬಂದಿದೆ. ಒಂದು ಕಡೆ, ಕವಿ ತನ್ನ ರಾಯನನ್ನು ಹೊಗಳುವುದಕ್ಕೆ ನನಗೆ "ತುಂಬಾ ಹೆಮ್ಮೆ, ಗರ್ವ" ಎನ್ನುವ ಧಾಟಿಯಲ್ಲಿ
೨. ಪುರು ಪರಮೇಶನ ಹಿರಿಯ ಕುಮಾರನು
ನರಲೋಕಕೊಬ್ಬನೆ ರಾಯ
ಮುರಿದು ಕಣ್ಣಿಟ್ಟರೆ ಕ್ಷಣಕೆ ಮುಕ್ತಿಯ ಕಾಂಬ
ಭರತ ಚಕ್ರಿಯ ಹೇಳಲಳವೇ

ಅಳ – power, strength, force, ability, possibility, practicability.
ಅಳವೇ - question on own’s ಅಳ.("ಮಾಡಿ ಮುಗಿಸೋದೇ", "ಕತ್ತರಿಸಿ ಬಿಸಾಕೋದೇ", “ಅದೇ ಮತ್ತೆ”, “ಹೌದು ಮತ್ತೆ” ಅಂತೀವಲ್ಲ, ಹಾಗೆ)

ಧಾರವಾಡದ ಕಡೆ, "ಅಳ" ಬಳಕೆಯಲ್ಲಿದ್ದರೂ, "ಘನಗಂಭೀರ ಸಾಹಿತ್ಯಕ ಪಾಂಡಿತ್ಯಮಾನ ಕನ್ನಡ"ದಲ್ಲಿ "ಅಳ" ಬಳಕೆಯಲ್ಲಿಲ್ಲವಲ್ಲ ಎಂದು ಯೋಚಿಸಿದಿರಾ. ಒಂದು ನಿಮಿಷ ತಡೆಯಿರಿ. "ಅಳವಡಿಸು" ಎಂಬ ಪದ ಹೇಗೆ ಬಂತು ಎಂಬುದನ್ನು ಯೋಚಿಸಿ. ಆಗ ತಿಳಿಯುತ್ತದೆ.
ಅಳ + ಪಡಿಸು -> ಅಳವಡಿಸು -> ಭದ್ರಪಡಿಸು, apply ಮಾಡು, fit ಮಾಡು, prepare ಮಾಡು. ಇದಂತೂ ಸಿಕ್ಕಾಪಟ್ಟೆ ಫೇಮಸ್ ಪದ.
೧. ಕಡಿಮೆ ವಿದ್ಯುತ್ ಬಳಸಿ ಹೆಚ್ಚು ಬೆಳಕು ನೀಡುವ ಫ್ಲೋರೋಸೆಂಟ್ ಬಲ್ಪುಗಳನ್ನು ಅಳವಡಿಸಿದ್ದರಿಂದ ಈ ಬಾರಿ ಕಂಪೆನಿಯ ಖರ್ಚು ಕಡಿಮೆಯಾಗಿದೆ.
೨. ಈ ಬಾರಿ ಹತ್ತನೇ ತರಗತಿಗೆ “ಆಂಡಯ್ಯನ ಕಬ್ಬಿಗರ ಕಾವನ್” ಪಠ್ಯವನ್ನು ಅಳವಡಿಸಲಾಗಿದೆ.

ಅಳ ಎಂಬುದು ಸಕಾರಾತ್ಮಕ ಅಂಶಗಳನ್ನು ಹೊರಸೂಸಿದರೆ, "ಅಳು" ಪದ ನಕಾರಾತ್ಮಕ ಪ್ರಧಾನವಾದುದು. ಗಮನಿಸಿ, ಅಳು + ಉಂಕು -> ಅಳುಂಕು -> ಅಳುಕು.(ಹಿಂಜರಿಕೆ), ಹಾಗೆಯೇ ಅಳುಮುಂಜಿ ಪದವನ್ನೂ ನೆನಪಿಸಿಕೊಳ್ಳಿ. ಅಳು - negating probabilities, ಅಳ - positive assertion.

ಕೊಕೊ - ಈ ರೀತಿ ಧಾರವಾಡ-ಮೈಸೂರು ಸೀಮೆಗಳ ನಡುವೆ ಕೊಟ್ಟುತಂದು ಮಾಡಿಕೊಂಡರೆ "ಇಂಟರ್ ಕನ್ನಡ ಭಾಷಾ ಸಾಮರಸ್ಯ" ಹೆಚ್ಚೋದು ಅಳ (ಗ್ಯಾರೆಂಟಿ).