ಈಗ ಕನ್ನಡದಂತಹ ಪ್ರಾದೇಶಿಕ ಭಾಷೆಗಳ , ಉಳಿವು ಅಳಿವುಗಳ ಬಗ್ಗೆ ಹುಯಿಲೆದ್ದಿದೆ. ಆಧುನಿಕ ಜಗತ್ತಿನ ತಂತ್ರಜ್ಞಾನದ ಹುಚ್ಚು ಹೊಳೆಯಲ್ಲಿ ಅನೇಕ ಭಾಷೆಗಳು ಕೊಚ್ಚಿ ಹೋಗುತ್ತವೆನ್ನುವ ಆತಂಕ, ಆಯಾಯ ಭಾಷಿಕರ ಮನದಲ್ಲಿ ಸಂಶಯದ ಸುಳಿಗಳನ್ನು ಶೃಷ್ಟಿಸಿದೆ.

ಕನ್ನಡದಂತಹ ಎರಡು ಸಾವಿರಕ್ಕೂ ಹೆಚ್ಚು ವರ್ಷಗಳ ಇತಿಹಾಸವನ್ನು ಹೊಂದಿರುವ , ಸಮೃದ್ದ ಶಬ್ಧ ಸಂಪತ್ತಿನಿಂದ ;ಅಪಾರ ನುಡಿಗಟ್ಟುಗಳಿಂದ ಜೀವಂತವಾಗಿರುವ ಭಾಷೆ ಅಳಿಯುವುದೆಂದರೆ,ಅದರ ಜೊತೆಯಲ್ಲಿಯೇ ಆ ಇಡೀ ಜನಾಂಗದ ಸಂಸ್ಕೃತಿ, ಜಾನಪದ ವೈಶಿಷ್ಟ್ಯಗಳು,ನಂಬಿಕೆ, ಆಚರಣೆ, ಭಾಷೆಗಿರುವ ತನ್ನದೇ ಆದ ಲಯ ,ಅಂದರೆ ಕೋಟ್ಯಾಂತರ ಜನ ಮಾನಸದ ಅನೇಕ ಮಜಲುಗಳು ವಿನಾಶವಾಗಿ ಹೋದಂತೆಯೇ ಸರಿ .

ಆದರೆ ಭಾಷಾ ನಾಶದ ಈ ಎಲ್ಲ ಗೊಂದಲಗಳು, ಕೇವಲ ಕಾಲ್ಪನಿಕ ಮತ್ತು ನಿರಾಧಾರ ಆಲೋಚನೆಗಳು ಎನ್ನುವುದೇ ಅತ್ಯಂತ ಸಮಾಧಾನದ ಸಂಗತಿ . ಯಾವ ವಿದ್ಯುನ್ಮಾನ ಮಾಧ್ಯಮಗಳು ಪ್ರಾದೇಶಿಕ ಭಾಷೆಗಳನ್ನು ಕೊಂದು ಹಾಕುತ್ತವೆಂದು ಆತಂಕಪಡಲಾಗಿತ್ತೋ ? ಅವೇ ಮಾಧ್ಯಮಗಳು ಇಂದು ಪ್ರಾದೇಶಿಕ ಭಾಷೆಗಳ ಬೆಳವಣಿಗೆಗೆ ಬಹು ವಿಧದ ಆಯಾಮಗಳನ್ನು ಒದಗಿಸಿ ಎಲ್ಲ ಕಾಲ್ಪನಿಕ ಆತಂಕಗಳನ್ನು ನಿವಾರಿಸಿವೆ. ಕಳೆದ ಶತಮಾನದಲ್ಲಿ ವಿದೇಶಗಳಿಗೆ ಹೋದವರಿಗೆ , ಸ್ವಭಾಷೆಯ ಗಂಧ ಸಹ ಸುಳಿಯುತ್ತಿರಲಿಲ್ಲ ಹತ್ತಾರು ವರ್ಷ ಅನಿವಾರ್ಯವಾಗಿ ತಾಯಿನಾಡಿನಿಂದ ದೂರವಾದವರಿಗೆ ತಮ್ಮ ಭಾಷೆಯೇ ಮರೆತು ಹೋಗುವ ಅಪಾಯವಿತ್ತು . ಇನ್ನು ಅವರ ಮಕ್ಕಳು ಮರಿಗಳ ಪಾಡನ್ನಂತೂ ಹೇಳುವುದೇ ಬೇಡ. ಅಕ್ಷರಶಃ ಅವರು ವಿದೇಶೀಯರೇ ಆಗಿಬಿಡುತ್ತಿದ್ದರು.
ಇಂದು ಕನ್ನಡಿಗರು ಯಾವ ದೇಶದಲ್ಲೇ ಇರಲಿ , ಕನ್ನಡದ ಟಿವಿ ಚಾನಲ್ ಗಳನ್ನು ನೋಡುವ ಅವಕಾಶ ಇದ್ದೇ ಇದೆ. ಅಂತರ್ಜಾಲದಲ್ಲಂತೂ ಕನ್ನಡ ತುಂಬಿಕೊಳ್ಳುತ್ತಿದೆ .ಕನ್ನಡಿಗರು ಬೆಂಗಳೂರಿನಲ್ಲಿದ್ದರೂ ಒಂದೇ ನ್ಯೂಯಾರ್ಕ್ ನಲ್ಲಿದ್ದರೂ ಒಂದೇ, ಭಾಷೆ , ಸಂಸ್ಕೃತಿ ಎಲ್ಲವೂ ಬೆರಳ ತುದಿಯಲ್ಲಿ ಲಭ್ಯ.

ಇಂತಹ ವಿದ್ಯಮಾನಕ್ಕೆ ಎಲೆಯ ಮರೆಯ ಕಾಯಿಯಂತೆ ಸದ್ದಿಲ್ಲದೆ ಕೆಲಸ ಮಾಡುತ್ತಿರುವ ಅನೇಕ ಸುಸಂಸ್ಕೃತ ಮನಸ್ಸುಗಳು ಕಾರಣವಾಗಿರುವುದು ಹೆಮ್ಮೆಯ ವಿಷಯ . ಬಹು ಹಿಂದೆಯೇ ಕನ್ನಡಕ್ಕೆ ’ಶ್ರೀಲಿಪಿ’ ಯಂತಹ ಬರಹ ಮಾಧ್ಯಮವನ್ನು ರೂಪಿಸಿದಂತಹ ಕೆ.ಪಿ. ರಾವ್, ಹಾಗೆಯೇ ’ಬರಹ’ದಂತಹ ಸರಳ ಲಿಪಿಯನ್ನು ಶೋಧಿಸಿದ ವಾಸು,(ಕನ್ನಡದಲ್ಲಿ ನಡೆದ ಈ ಬೆಳವಣಿಗೆಯೇ ಭಾರತೀಯ ಭಾಷೆಗಳ ಲಿಪಿಗಳಿಗೆ ಪ್ರೇರಣೆಯಾದುದು ಇನ್ನೂ ಹೆಮ್ಮೆಯ ವಿಷಯ)

ಅಂತರ್ಜಾಲ ಲೋಕದಲ್ಲಿ ಕನ್ನಡವನ್ನು ಕಟ್ಟಲು ಶ್ರಮಿಸಿದ ಯು.ಬಿ. ಪವನಜ, ಸಂಪದದಂತಹ ಸಂವಹನ ಮಾಧ್ಯಮವನ್ನು ಅಂತರ್ಜಾಲದಲ್ಲಿ ರೂಪಿಸಿ, ಬಹು ಜನರನ್ನು ಸೆಳೆದ ,ಹರಿಪ್ರಸಾದ್ ನಾಡಿಗರು ಮತ್ತು ಅವರ ಮಿತ್ರ ವೃಂದ ಇವರೆಲ್ಲರ ಕನ್ನಡ ಪ್ರೀತಿಯ ಪರಿಣಾಮವಾಗಿ ಇಂದು ಅಂತರ್ಜಾಲದಲ್ಲಿ ಕನ್ನಡ ತಲೆ ಎತ್ತಿ ನಿಂತಿದೆ .

ಅತಿ ದೊಡ್ಡ ವ್ಯಾಪಾರಿ ಕಂಪನಿಗಳಾದ ಗೂಗಲ್,ಯಾಹೂ,ರೆಡಿಫ್ ಮುಂತಾದವರೆಲ್ಲ ಪ್ರಾದೇಶಿಕ ಭಾಷೆಗಳ ಕಡೆಗೆ ಗಮನ ಹರಿಸಿರುವುದು,ಇದರಿಂದಾಗಿ ಕನ್ನಡ ಎಲ್ಲ ಕಡೆ ವಿಸ್ತರಿಸುತ್ತಾ ,ಹೊಸ ಜಗತ್ತಿನ ಸವಾಲಿಗೆ ಹೊಂದಿಕೊಳ್ಳುತ್ತಿರುವುದು ಎಲ್ಲವೂ ಆಶಾದಾಯಕ ವಾತಾವರಣವನ್ನು ಮೂಡಿಸಿವೆ .ಪತ್ರಿಕೆಗಳು,ಪುಸ್ತಕಗಳು,ಲೇಖನಗಳು,ವಿಕೆಪಿಡಿಯ,ಅಸಂಖ್ಯ ಬ್ಲಾಗುಗಳು ಹೀಗೆ ಅಂತರ್ಜಾಲದಲ್ಲಿ ಶ್ರೀಮಂತಗೊಳ್ಳುತ್ತಿರುವ ಸನ್ನಿವೇಶವನ್ನು ಕಂಡಮೇಲೂ ಕನ್ನಡ ಅಪಾಯದ ಅಂಚಿನಲ್ಲಿದೆ ಎಂದು ಯಾರಾದರೂ ಹೇಳಿದರೆ , ಅವರು ಗ್ರಹಿಕೆ ತಪ್ಪು ಎನ್ನದೆ ವಿಧಿ ಇಲ್ಲ.