ಮೈಕ್ರೊಸಾಫ್ಟ್ ಕಂಪೆನಿಯು ತನ್ನ ವಿಂಡೋಸ್ ವಿಸ್ತ ಆಪರೇಟಿಂಗ್ ಸಿಸ್ಟಮ್ ಗೆ ಮೊದಲ ಸರ್ವೀಸ್ ಪ್ಯಾಕ್ (ಅಂದರೆ ಮೊದಲ ದೊಡ್ಡ ಅಪ್ಡೇಟ್) ನಿನ್ನೆ ರಿಲೀಸ್ ಮಾಡಿದೆ.

ವಿಸ್ತ ಬಳಸಿ ಬೇಸತ್ತು ಹೋದವರಿಗೆ ಇದು ಬಹುಶಃ ಸಿಹಿ ಸುದ್ದಿಯಾಗಬಹುದು. ಬಳಸಿ ನೋಡಿ ಸಿಹಿ ಕಹಿಯ ಅನುಭವ ಹಂಚಿಕೊಳ್ಳುವವರು ಸದ್ಯದಲ್ಲೇ ಬ್ಲಾಗ್ ಮಂಡಲದಲ್ಲಿ ಕಾಣಿಸಿಕೊಳ್ಳುವರು. ಆದರೆ ಹಲವರು "ಬೇರೆಯವರು ಬಳಸಿ ಇದರ ಬಗ್ಗೆ ಬರೆಯಲಿ, ಆಮೇಲೆ ಬಳಸಿ ನೋಡುತ್ತೇವೆ... ನಮಗೆ ನಮ್ಮ ಕಂಪ್ಯೂಟರ್ ಬಹುಪ್ರಿಯವಾದುದು" ಎಂದು ಅಲ್ಲಲ್ಲಿ ಅಂತರ್ಜಾಲದಲ್ಲಿ ಬರೆದದ್ದನ್ನು ಓಡಿ ನನಗೆ ಆಶ್ಚರ್ಯವಾಯ್ತು. ಒಂದಾಗುತ್ತ ಒಂದು ಸಾಫ್ಟ್ವೇರ್ ಮಾರ್ಕೆಟ್ಟಿನಲ್ಲಿ ಹೊರಬರುವ, ಸಿಕ್ಕಾಪಟ್ಟೆ ಖರೀದಿಯಾಗುವ ವಿಂಡೋಸ್ ಆಪರೇಟಿಂಗ್ ಸಿಸ್ಟಮುಗಳಿಗೆ ಬಹುಶಃ ಇಂತಹ ಸ್ಥಿತಿ ವಿಂಡೋಸ್ ME (ಮಿಲೇನಿಯಮ್ ಎಡಿಶನ್) ನಂತರ ಇದೇ ಮೊದಲು. ಹದಗೆಟ್ಟ ಯೋಜೆನೆಯೊಂದು ಹೊರಬಂದಾಗ ಹೀಗಾಗುವುದು ಸಹಜ ಎಂಬುದು ಈ ಬಗ್ಗೆ ವರದಿ ಹೊತ್ತ ಆನ್ಲೈನ್ ಪತ್ರಿಕೆಗಳ ಅಂಬೋಣ. ಯೋಜನೆ ಹದಗೆಟ್ಟಿದೆಯೆಂದು ಮೈಕ್ರೊಸಾಫ್ಟಿನವರು ತಮ್ಮ ತಮ್ಮಲ್ಲೇ ಮಾತನಾಡಿದ್ದನ್ನು ಕೋರ್ಟ್ ಕೇಸೊಂದನ್ನ ಫಾಲೋ ಮಾಡುತ್ತಿದ್ದ ನ್ಯೂ ಯಾರ್ಕ್ ಟೈಮ್ಸ್ ವರದಿ ಮಾಡಿತ್ತು - "They Criticized Vista. And They Should Know" ಎಂಬ ಶೀರ್ಷಿಕೆಯಡಿ.
ಈ ಮಧ್ಯೆ ವಿಸ್ತ ಬೆಲೆ ಇಳಿಸಲ್ಪಟ್ಟಿರುವುದು ಸಾಕಷ್ಟು ಸಂಶಯಗಳನ್ನು ಹುಟ್ಟುಹಾಕಿದೆ ಎಂಬುವುದು ಸುಳ್ಳಲ್ಲ.

ಅದಿರಲಿ, ಈ ವಿಸ್ತ ಸರ್ವೀಸ್ ಪ್ಯಾಕಿನಲ್ಲಿ ಏನು ಹೊಸತು? ಮೈಕ್ರೊಸಾಫ್ಟ್ ೫೫ ಪುಟಗಳ ಡಾಕ್ಯುಮೆಂಟ್ ರೆಡಿ ಮಾಡಿದೆಯಂತೆ, ಏನೇನು ಬದಲಾವಣೆಗಳು ಎಂಬುದಾಗಿ. ವೆಬ್ ತಾಣ inventorspotನ ಬೆನ್ ಅರ್ನಾಲ್ಡ್ ಅದನ್ನೋದಿ ಮುಖ್ಯವಾದವುಗಳನ್ನು ಪಟ್ಟಿ ಮಾಡಿದ್ದಾರೆ. ಅವುಗಳನ್ನು ಕನ್ನಡದಲ್ಲಿ ನಾನು ಕೆಳಗಿನಂತೆ ಪಟ್ಟಿ ಮಾಡಿರುವೆ:

* ಎಚ್ ಡಿ - ಡಿವಿಡಿ ಮತ್ತು ಬ್ಲೂ ರೇ ಡಿಸ್ಕುಗಳಿಗೆ ಹೆಚ್ಚಿನ ಬೆಂಬಲ (ಜೊತೆಗೆ ವಿಂಡೋಸ್ ಮೀಡಿಯ ಸೆಂಟರಿನ ಎಕ್ಸ್ಟೆಂಡರುಗಳು - ಡಿಜಿಟಲ್ ಟಿ ವಿ, ನೆಟ್ವರ್ಕಿನ ಮೂಲಕ ಓದಬಹುದಾದ ಡಿ ವಿ ಡಿ ಮುಂತಾದವುಗಳಿಗೆ ಕೂಡ) ಹೆಚ್ಚಿಸಿದ್ದಾರಂತೆ.
* ವಿಸ್ತ ಬಳಕೆದಾರರನ್ನು ಬೇತಾಳದಂತೆ ಕಾಡಿದ್ದ ಎರರ್ ರಿಪೋರ್ಟಿಂಗ್ ಸವಲತ್ತು (!) ಸ್ವಲ್ಪ ಕಡಿಮೆ ರೇಜಿಗೆಯಾಗುವಂತೆ ಮಾಡಿದ್ದಾರಂತೆ.
* ಈ ಹಿಂದೆ ಕೆಲವೊಮ್ಮೆ (ಕೆಲವು ಲ್ಯಾಪ್ ಟಾಪುಗಳಲ್ಲಿ) ಹಾರ್ಡ್ ಡಿಸ್ಕ್ ಸರಿಯಾಗಿ ತಿರುಗದೆ ತೊಂದರೆಯಾಗುತ್ತಿತ್ತಂತೆ, ಕೆಲವೊಮ್ಮೆ ವೀಡಿಯೋ ಚಿಪ್ಸೆಟ್ಟು ಸಿಸ್ಟಮಿಗೆ 'ಮಲ್ಕೋ ಹೋಗು' ಅಂತ ತಪ್ಪಾಗಿ ಹೇಳುತ್ತಿತ್ತಂತೆ. ಇದನ್ನು ಸರಿಪಡಿಸಿದ್ದಾರಂತೆ. ಈಗ ಪ್ರಾಸೆಸ್ಸರ್ ಮಲಗಿದ್ದರೆ display ಬದಲಾಗದ ಹೊರತು ಸಿಸ್ಟಮ್ ಎಚ್ಚರವಾಗುವುದಿಲ್ಲವಂತೆ.
* ಡೈರೆಕ್ಟರಿಯೊಂದರಲ್ಲಿ ಸುಮಾರು ಫೈಲ್ಸ್ ಇದ್ದಾಗ ಅದನ್ನು ಸ್ಥಳಾಂತರಿಸುವುದು ವಿಸ್ತ ಭ್ರಮನಿರಸನ ಉಂಟು ಮಾಡಿದ್ದುಂಟು ಅಂತ ಹಲವು ವರದಿಗಳು ಬಂದಿದ್ದವು. ಈಗ ಇದನ್ನು ಸರಿಪಡಿಸುವ ಪ್ರಯತ್ನ ಸರ್ವೀಸ್ ಪ್ಯಾಕ್ ೧ ರಲ್ಲಿ ಮಾಡಿದ್ದಾರಂತೆ.
* ಮೇಲಿನಂತೆ ಫೈಲ್ಸ್ ಸ್ಥಳಾಂತರ ಯೂ ಎಸ್ ಬಿ ಹಾಗೂ ನೆಟ್ವರ್ಕ್ ಮೂಲಕ ಮಾಡುವಾಗಲೂ ಹಿಡಿಯುವ ಸಮಯವನ್ನು ಕಡಿಮೆ ಮಾಡಲಾಗಿದೆಯಂತೆ.
* ರಿಮೋಟ್ ಡೆಸ್ಕ್ ಟಾಪ್ ಸಂಪರ್ಕಗಳನ್ನು ಉತ್ತಮ ಪಡಿಸುವ ಹೊಸ ಕಂಪ್ರೆಶನ್ ಅಲ್ಗಾರಿದಮ್ (ಮಾಹಿತಿಯನ್ನು ಮಡಚಿ, ಒತ್ತಿ ಸಣ್ಣದಾಗಿಸುವ ಅಲ್ಗಾರಿದಮ್) ಬಳಕೆಯಾಗಿದೆಯಂತೆ.
* ಇತ್ತೀಚೆಗೆ ಹೊರಬಂದ ವೈರ್ಲೆಸ್ ನೆಟ್ವರ್ಕಿಂಗ್ ಕುರಿತ IEEE ಡ್ರಾಫ್ಟಿಗೆ ತಕ್ಕಂತೆ ಸಂಪೂರ್ಣ ಬೆಂಬಲ ಹೊಂದಿಸಿದ್ದಾರಂತೆ.
* ವಿಂಡೋಸ್ ನಲ್ಲಿ ಇರುವ ಬಹಳ ದೊಡ್ಡ ತೊಂದರೆಯೆಂದರೆ ಪ್ರತಿಯೊಂದನ್ನೂ install ಮಾಡಿದ ಕೂಡಲೆ "ರೀಬೂಟ್ ಮಾಡಿ" ಎಂದು ಅದು ಗೋಳು ಹೊಯ್ದು ಕೊಳ್ಳುವುದು. ರೀಬೂಟ್ ಮಾಡದೆ ಹಾಗೆ ಸ್ಥಾಪಿಸಿದ ಹೊಸ ತಂತ್ರಾಂಶ ಕೆಲಸ ಮಾಡುವುದು ಕಡಿಮೆ. ಸಿಸ್ಟಮಿಗೆ ಹಾಕಿದ ಪ್ಯಾಚುಗಳಂತೂ ರೀಬೂಟ್ ಮಾಡದೇ ಕೆಲಸವೇ ಮಾಡೋಲ್ಲ. ಈಗ ಹಾಟ್ ಪ್ಯಾಚ್ ಎಂಬ ಸವಲತ್ತು ಹೊಂದಿರುವ ಕಂಪ್ಯೂಟರುಗಳಿಗೆ ರಿಬೂಟ್ ಮಾಡದೆ ಹೊಸ ಪ್ಯಾಚುಗಳನ್ನು ಅದು ಹಾಕಿಕೊಳ್ಳುವಂತೆ ಬರೆದಿದ್ದಾರಂತೆ.
* ಪವರ್ ಹೋದ್ರೆ ಕಂಪ್ಯೂಟರು ಹದಗೆಡದಂತೆ ಹೆಚ್ಚಿನ ಕ್ರಮಗಳನ್ನು ತಗೊಂಡಿದಾರಂತೆ.
* ಈ ಹಿಂದೆ ವಿಸ್ತದಲ್ಲಿ ಗೂಗಲ್ ಸರ್ಚ್ ಬಳಸುವವರಿಗೆ ಬಹಳ ತೊಂದರೆಯಾಗುತ್ತಿತ್ತಂತೆ. ಡೀಫಾಲ್ಟ್ ಅದನ್ನು ಹಾಕಿಕೊಳ್ಳಲು ಹೋದರೆ ಬಿಡುತ್ತಿರಲಿಲ್ಲವಂತೆ. ಈಗ ಅದನ್ನು ಸರಿಪಡಿಸಿದ್ದಾರಂತೆ.
* ಲಿನಕ್ಸಿನಿಂದ ಕಾಪಿ ಹೊಡದ ಒಂದು ಸವಲತ್ತು - ನಿರ್ವಹಣೆ ಕೆಲಸಗಳನ್ನು ಮಾಡುವಾಗ ಪಾಸ್ವರ್ಡ್ ಕೇಳುವುದು. ಇದು ವಿಸ್ತದಲ್ಲಿ ಬಹುಶಃ ಹಲವರ ತಾಳ್ಮೆ ಕೆಡಿಸಿತ್ತು. ಈಗ ಅದು ಕಡಿಮೆ ಬಾರಿ ನಿಮಗೆ ತೊಂದರೆ ಕೊಡುತ್ತಂತೆ.

ಇಷ್ಟು ನಾನು ಓದಿ ಅರ್ಥೈಸಿಕೊಂಡಂತೆ ಕನ್ನಡದಲ್ಲಿ ಬರೆದಿರುವ ಪಾಯಿಂಟುಗಳು. ಕೆಲವು ತಪ್ಪುಗಳಾಗಿರಬಹುದು. ಹಾಗೆ ಆಗಿದ್ದರೆ ದಯವಿಟ್ಟು ಕಾಮೆಂಟ್ ಮೂಲಕ ತಿಳಿಸಿ.

ಡಿಸ್ಕ್ಲೇಮರ್ (disclaimer): ೧) ಇದನ್ನು ನೆಚ್ಚಿಕೊಂಡು ವಿಸ್ತ ಬಳಸಲು ಅಥವ ಬಳಸದೇ ಇರಲು ನಿರ್ಧಾರ ಕೈಗೊಂಡರೆ ಅದು ನಿಮ್ಮ ಹೊಣೆ, ಅಥವ ಹೊಣೆ ನಿಮ್ಮದೆ. ನನ್ನ ತಲೆಗೆ ಏನೂ ಕಟ್ಟಬಾರದು ಮತ್ತೆ. ಇಲ್ಲಿರುವ ಪಾಯಿಂಟುಗಳ ಸತ್ಯಾಸತ್ಯತೆ ನನಗೂ ಗೊತ್ತಿಲ್ಲ.
೨) ವಿಸ್ತ, ಮೈಕ್ರೊಸಾಫ್ಟ್ ಇವೆಲ್ಲ ಮೈಕ್ರೊಸಾಫ್ಟಿನ ಟ್ರೇಡ್ ಮಾರ್ಕುಗಳು.

ಚಿತ್ರ ಕೃಪೆ: inventorspot.com