ಸಿನೆಮಾ ನಟನಟಿಯರು ಏನೇ ಪ್ರಚಾರ ಮಾಡಲಿ,
ಪೆಪ್ಸಿ, ಕೊಕಾಕೋಲ, ಗೊರಟಿಲ್ಲದ ಮಾವಿನ ಜ್ಯೂಸ್ ಎಲ್ಲಾ
ಪುನರ್ಪುಳಿ (ಕೋಕಂ) ಜ್ಯೂಸ್‌ನ ಎದುರಿಗೆ ಬಚ್ಚಾಗಳು.

ಎಂಥಾ ಕಲರ್-ಕೆಂಪು ಕೆಂಪು.. ನ್ಯಾಚುರಲ್ ಬಣ್ಣ.
ಹುಳಿ-ಸಿಹಿ ರುಚಿ, ಹೊಟ್ಟೆ,ತಲೆ,ಮೈಗೆ ತಂಪು ತಂಪು.
ಇದರಲ್ಲಿ ಉತ್ಪ್ರೇಕ್ಷೆ ಏನೂ ಇಲ್ಲ.

೨೦ ರಿಂದ ೩೦ ಅಡಿ ಎತ್ತರ ಬೆಳೆಯುವ ಕೋಕಂ ಮರ ದ.ಭಾರತದ ಕೊಂಕಣ,ಗೋವಾ ಭಾಗದಲ್ಲಿ ಹೆಚ್ಚಾಗಿ ಕಂಡುಬರುವುದು.
ಸಿಪ್ಪೆ ಕೆಂಪು ಬಣ್ಣದಿದ್ದು ಒಳಗಿನ ಹಣ್ಣು ಸಿಹಿ-ಹುಳಿ ರುಚಿ.
ಬೀಜ ೫-೭ ಇರುವುದು.

ಬೆಳೆದ ಹಣ್ಣುಗಳನ್ನು ಹಿಚುಕಿ, ಬೀಜ ತೆಗೆದು,ಸಿಪ್ಪೆ ಜತೆಯಲ್ಲಿ ಬೇಯ್ಸಿ, ಸೋಸಿ, ಸಾಕಷ್ಟು ಪ್ರಮಾಣದಲ್ಲಿ ಸಕ್ಕರೆ ಬೆರೆಸಿ, ಪಾಕ ಮಾಡಿ ಬಾಟಲಲ್ಲಿ ತುಂಬಿಸಿ ಇಟ್ಟುಕೊಂಡರಾಯಿತು.-ಪುನರ್ಪುಳಿ ಜ್ಯೂಸ್.

ಪುನರ್ಪುಳಿಯ ಸಿಪ್ಪೆಯನ್ನು ಒಣಗಿಸಿ ತೆಗೆದಿಟ್ಟುಕೊಂಡರೆ, ಯಾವ ಕಾಲಕ್ಕೂ ಸಾರು ಮಾಡಲು ಆಗುವುದು. ಪಿತ್ತಕ್ಕೆ ಒಳ್ಳೆಯದಂತೆ.

ಇನ್ನು ಬೀಜಗಳನ್ನು ಒಣಗಿಸಿ, ನೀರಲ್ಲಿ ಕುದಿಸಿ ಆರಿಸಿದಾಗ- ಬೀಜದೊಳಗಿದ್ದ ಎಣ್ಣೆ ಅಂಶ ನೀರಲ್ಲಿ ತೇಲತೊಡಗುತ್ತದೆ. ಈ ತೈಲವನ್ನು ಬೆಣ್ಣೆಯಂತೆ (kokum butter) ತೆಗೆಯಬಹುದು. ಈ ತೈಲ ಗಾಯಗಳಿಗೆ ಅದರಲ್ಲೂ ಸುಟ್ಟಗಾಯಗಳಿಗೆ ರಾಮಬಾಣ.

ಸಂ : ವೃಕ್ಷಾಮ್ಲ, ತಿತಿಡೀಕ, ರಕ್ತಪೂರಕ.

ಕ : ಮುರುಗಲು, ಬೀರುಂಡ.

ಇಂ : kokaum butter tree, red mango, mangosteen.
*********************************************

ನಾವು ಚಿಕ್ಕವರಿದ್ದಾಗ ಹಳ್ಳಿಯಲ್ಲಿ, ಕ್ರಿಕೆಟ್ ಆಟ ಮುಗಿಸಿ (ಜಗಳದಲ್ಲಿ), ಹತ್ತಿರದ ತೋಟಕ್ಕೆ ( ಕಾಡು ಎನ್ನಬಹುದು) ನುಗ್ಗುತ್ತಿದ್ದೆವು.
ತೋಟದ ಮಾಲಿಕರ ಮಕ್ಕಳೂ ನಮ್ಮ ಜತೆ ಇರುವುದರಿಂದ ಭಯವಿರಲಿಲ್ಲ.
ಎಷ್ಟೊಂದು ಹಣ್ಣಿನ ಮರಗಳು- ಗೇರು,ಮಾವು,ಹಲಸು, ಹೆಬ್ಬಲಸು,ನೇರಿಳೆ..

ಗೇರು ಹಣ್ಣು ಎಷ್ಟು ಬೇಕಾದರೂ ತಿನ್ನಬಹುದು. ಬೀಜ ಅಲ್ಲೇ ಬಿಸಾಡಬೇಕು. ಇದೊಂದೇ ಕಟ್ಟುಪಾಡು.
ಈ ಹೆಬ್ಬಲಸು (ಪೆಜಕ್ಕಾಯಿ) ಬಹಳ ಎತ್ತರಕ್ಕೆ ಬೆಳೆಯುವ ಮರ. ಮಕ್ಕಳು ಇದಕ್ಕೆ ಹತ್ತಲು ಕಷ್ಟ. ‘ನಿಜ’ ಮಂಗಗಳಿಗೆ ಈ ಒಂದು ಹಣ್ಣಾದರೂ ಉಳಿಯಲಿ ಎಂದು ದೇವರು ಮಾಡಿದ ವ್ಯವಸ್ಥೆ ಇರಬೇಕು. ಆದರೂ ನಾವು ಕಲ್ಲು ಹೊಡೆದು ಬೀಳಿಸಿ,
ಅರ್ಧಂಬರ್ದ ಬಜ್ಜಿಯಾದುದನು ತಿನ್ನುತ್ತಿದ್ದೆವು.

---ಈ ಹೆಬ್ಬಲಸನ್ನು ಹಲಸಿಗೆ ಕಸಿಕಟ್ಟಲು ಸಾಧ್ಯವಿಲ್ಲವೇ?

---ಕೊಟ್ಟೇಹಣ್ಣು ಮತ್ತು ನಾಣಿಲೆ (ತುಳು ಹೆಸರುಗಳು?) ಯ ವಿವರ (ಕನ್ನಡ,ಸಂಸ್ಕೃತ ಹೆಸರು) ಯಾರಿಗಾದರೂ ಗೊತ್ತಿದೆಯಾ?
(ನಾಣಿಲೆ-ಉದ್ದಕ್ಕೆ,ತೆಳು ಹಣ್ಣು.ಸಪೋಟದ ಬೀಜದ ತರಹ ಒಂದು ಬೀಜವಿರುವುದು)

-ಗಣೇಶ.