ಪಥನಿರೀಕ್ಷೆ

ಪಥನಿರೀಕ್ಷೆ

ಚೆಲುವೆ ಎನ್ನೊಡನೆ ನೀ ಬರಬಲ್ಲೆಯಾ ?
ಮುಳ್ಳುಗಳ ಮೇಲಡಿಯ ಇಡಬಲ್ಲೆಯಾ ?

ಹಾರುವೆನು ಕಮರಿಯಲಿ ಜಿಗಿವೆನೆತ್ತರ ಗಿರಿಯ
ಹೊತ್ತು ಮುಳುಗುವ ಮುನ್ನ ಮತ್ತೆ ಬರುವೆ
ಚಿತ್ತದೊಳಗಂಜಿಕೆಯು ಮೃತ್ಯು ಪಾಶದ ಭಯವು
ಮತ್ತ ಮುಸುಕಿದರೇನು ಬೇಗ ಬರುವೆ
ಬಂದು ಮುತ್ತು ಕೊಡುವೆ

ನಿಲ್ಲ ನೀ ಮನೆಯಲ್ಲಿ ಹೂವಿನಂಗಳಗೊಳಿಸು
ಹೊಸ್ತಿಲಿನ ಶೋಭೆಗಿಡು ರಂಗವಲ್ಲಿ
ಹೊತ್ತಮುತ್ತಿನ ಹೊರೆಯ ದಣಿವಿಂದ ನಾನಿರಲು
ಜಡೆಯ ಬೀಸುವೆ ನೀನು ನಗುವ ಚೆಲ್ಲಿ

ಹೊತ್ತಿನ್ನು ಬಂದಿಲ್ಲ ಬಾರದಿರು ಎನ್ನರಸ
ಮೆತ್ತನೆಯ ಇರುಳನ್ನೇ ಕಾಯುತಿರುವೆ
ಸದ್ದಿರದು ನೀನಾಗ ಬಂದರೆನ್ನಾಲಯಕೆ
ನಗುವೊಂದೆ ನಿನಗೀಗ ನೀಡುತಿರುವೆ
ಎಂದು ಬಯಕೆಗಳ ರಭಸವನು ತಣಿಸುತಿರುವೆ

-    ಸದಾನಂದ