ಮತದಾರ ಪ್ರಜಾಕೋಟಿ ಬಾಲಮುದುಡಿಕೊಂಡಿದ್ದುಬಿಡಬೇಕೇ?

ರಾಜ್ಯ ಸರ್ಕಾರವು ಲೋಕಾಯುಕ್ತ ಹಾಗೂ ಉಪಲೋಕಾಯುಕ್ತರ ನೇಮಕದಲ್ಲಿ ಸರ್ವಾಧಿಕಾರಿ ಧೋರಣೆಯನ್ನು ತಳೆದಿರುವುದು ಕಂಡು ಬರುತ್ತದೆ. ಮುಖ್ಯ ನ್ಯಾಯಾಧೀಶರು ಸೂಚಿಸಿದ ಯಾವ ವ್ಯಕ್ತಿಯೂ ಉಪಲೋಕಾಯುಕ್ತ ಹುದ್ಧೆಗೆ ಬಾರದೆ ಇರುವುದು ಗಂಭೀರ ಲೋಪ ಹಾಗೂ ಸರಕಾರ ಸರ್ವಾಧಿಕಾರಿಯಾಗಿ ನಡೆದು ಕೊಳ್ಳುತ್ತಿದೆ ಎಂಬುದರ ಸೂಚಕ. ವಿರೋಧ ಪಕ್ಷದ ಮುಖಂಡರು, ಮುಖ್ಯ ನ್ಯಾಯಾಧೀಶರು ಹೀಗೆ ಎಲ್ಲರಿಗೆ ಒಪ್ಪಿಗೆಯಾಗುವ ವ್ಯಕ್ತಿಯನ್ನು ಲೋಕಾಯುಕ್ತ ಹಾಗೂ ಉಪಲೋಕಯುಕ್ತ ಆಗಿ ನೇಮಿಸುವುದು ಅಗತ್ಯ. ಹೀಗೆ ಮಾಡದೇ ಕೇವಲ ಅವರೊಡನೆ ಸಲಹೆ ಕೇಳುವುದು ಮತ್ತು ಅದನ್ನು ಪಾಲಿಸದೆ ಇರುವುದು ಮಾಡಿದರೆ ಅದು ಪ್ರಜಾಪ್ರಭುತ್ವ ಆಗುವುದಿಲ್ಲ, ಅದು ಸರ್ವಾಧಿಕಾರ ಆಗುತ್ತದೆ. ಮುಖ್ಯ ನ್ಯಾಯಾಧೀಶ ಹಾಗೂ ವಿರೋಧ ಪಕ್ಷದ ನಾಯಕರ ಜೊತೆ ಸಮಾಲೋಚನೆ ಮಾಡಬೇಕು ಎಂಬ ನಿಯಮ ಲೋಕಾಯುಕ್ತದಲ್ಲಿ ಸೇರಿಸಿರುವುದು ಸಂವಿಧಾನಿಕ ಸಮತೋಲನ ಕಾಯ್ದುಕೊಳ್ಳಲು ಎಂಬುದು ಮೂಲಭೂತ ತಿಳುವಳಿಕೆ. ಇದರ ಉದ್ಧೇಶ ನಿಷ್ಪಕ್ಷಪಾತ, ಪ್ರಾಮಾಣಿಕ, ದೃಢ ನಿಲುವಿನ ವ್ಯಕ್ತಿ ಆ ಸ್ಥಾನಕ್ಕೆಆಯ್ಕೆಯಾಗಬೇಕು ಎಂಬುದೇ ಆಗಿದೆ. ಇಂಥ ತಿಳುವಳಿಕೆ ಸರ್ಕಾರಕ್ಕಿರಲಿಲ್ಲ ಎಂದು ತಿಳಿಯಬೇಕಿಲ್ಲ. ಇಂಥ ತಿಳುವಳಿಕೆ ಸರ್ಕಾರಕ್ಕೆ ಚೆನ್ನಾಗಿಯೇ ಇದೆ, ಆದರೆ ನಾವು ಏನು ಮಾಡಿದರೂ ನಡೆಯುತ್ತದೆ ಎಂಬ ಅಹಂಕಾರವನ್ನು ಸರ್ಕಾರ ನಡೆಸುವವರು ಪದೇ ಪದೇ ವ್ಯಕ್ತ ಪಡಿಸುವುದನ್ನು ನಾವು ನೋಡುತ್ತಿದ್ದೇವೆ. ಇದರಿಂದಾಗಿ ಸರ್ಕಾರದ ವರ್ಚಸ್ಸು ಹಾಗೂ ವಿಶ್ವಾಸಾರ್ಹತೆ ಕಡಿಮೆಯಾಗುತ್ತಿದೆ. ಪ್ರಜಾಪ್ರಭುತ್ವದ ಮೂಲಭೂತ ಮೌಲ್ಯಗಳಿಗೆ ಬೆಲೆ ಕೊಡದ ಈ ಸರ್ಕಾರಕ್ಕೆ ಏನು ಹೇಳಿದರೂ "ಗೋರ್ಕಲ್ಲ ಮೇಲೆ ನೀರೆರೆದಂತೆ " ಆಗುವುದನ್ನು ನಾವು ನೋಡುತ್ತಲೇ ಇದ್ದೇವೆ. ಮುಖ್ಯ ನ್ಯಾಯಾಧೀಶರನ್ನೂ ಕೇಂದ್ರ ಸರ್ಕಾರದ ಏಜೆಂಟ್ ಎಂದು ಇವರು ಹೇಳಿದರೂ ಹೇಳಬಹುದು.