ಶೈವಮತದ ಹಲವು ಮುಖಗಳು: ಭಾಗ ೫ ವೀರಶೈವಮತ

ಒಮ್ಮೆ ಒಬ್ಬ ಪಾದ್ರಿ ಧರ್ಮೋಪದೇಶ ಮಾಡಬೇಕೆಂದು ಒಂದು ಊರಿಗೆ ಹೋದನಂತೆ. ಅವನು ನಿರೀಕ್ಷಿಸಿದಂತೆ ಅಲ್ಲೇನು ಹೆಚ್ಚು ಜನರಿರದೆ ಕೇವಲ ಒಬ್ಬನೇ ಒಬ್ಬ ಕುರುಬನಿದ್ದನಂತೆ. ಪಾದ್ರಿ ಒಬ್ಬನೇ ಇರುವುದನ್ನು ನೋಡಿ ಇಲ್ಲೇನು ಧರ್ಮೋಪದೇಶ ಮಾಡುವುದು ಎಂದುಕೊಂಡು ಹಿಂದೆ ಹೋಗುತ್ತಿದ್ದಾಗ ಆ ಕುರಿ ಕಾಯುವವನು ತಡೆದು, ಅಲ್ಲಾ ಸ್ವಾಮಿ ಕುರಿಗೆ ಮೇವು ಹಾಕಲು ಬಂದ ಮೇಲೆ ಒಂದೇ ಒಂದು ಕುರಿಯಿದೆಯೆಂದು ಕುರುಬ ಹಿಂದೆ ಹೋಗುತ್ತಾನೆಯೇ? ಇಲ್ಲವಲ್ಲ ಅವನು ಇದ್ದ ಒಂದೇ ಕುರಿಗೆ ಮೇವು ಹಾಕಿ ಹೋಗುತ್ತಾನೆ ಎಂದು ಪಾದ್ರ ಮರು ಉತ್ತರಿಸಿ ಅವನಿಗೆ ಧರ್ಮೋಪದೇಶ ಮಾಡಲು ಷುರುವಿಟ್ಟುಕೊಂಡ. ಸ್ವಲ್ಪ ಸಮಯವಾದ ಮೇಲೆ, ಆ ಕುರುಬ ಅವರನ್ನು ತಡೆದು, ಇನ್ನು ಸಾಕು ಮಾಡಿ ಸ್ವಾಮಿ ನಿಮ್ಮ ಧರ್ಮೋಪದೇಶ ಎಂದನಂತೆ. ಆಗ ಆ ಪಾದ್ರಿ ನೀನೇ ತಾನೇ ಒಂದೇ ಕುರಿಯಿದ್ದರೂ ಅದಕ್ಕೇ ಮೇವು ಹಾಕಬೇಕು ಅಂತಾ ಹೇಳಿದ್ದು ಅಂದನಂತೆ. ಆಗ ಆ ಕುರುಬ ಅದೇನೋ ಸರಿ ಸ್ವಾಮಿ ಒಂದಿಡೀ ಮಂದೆಗಾಗುವಷ್ಟು ಒಂದೇ ಕುರಿಗೆ ಹಾಕಿದರೆ ಹೇಗೆ? ಎಂದು ಪ್ರಶ್ನಿಸಿದಾಗ ಆ ಪಾದ್ರಿ ಏನೂ ಮಾತನಾಡದೇ ಸುಮ್ಮನೇ ಹೊರಟು ಹೋದನಂತೆ.

(ಅದಕ್ಕೇ ಎಲ್ಲಾ ಕುರಿಗಳಿಗೆ ಹಾಕಬೇಕಾದಷ್ಟನ್ನು ಕೆಲವೇ ಕುರಿಗಳಿಗೆ ಹಾಕಿ ಅಜೀರ್ಣ ಮಾಡಿಸುವುದು ಬೇಡವಲ್ಲ ನಾವಡರೇ :))

ಆ ಪುಸ್ತಕದಲ್ಲಿ ಲಭ್ಯವಿದ್ದ ಮಾಹಿತಿಯನ್ನಷ್ಟೇ ಇಲ್ಲಿ ಪ್ರಚುರಪಡಿಸಿದ್ದೇನೆ. ಮುಂದಿನ ವಾರದಿಂದ ಇನ್ನೊಂದು ಮಾಲಿಕೆಯನ್ನು ಪ್ರಾರಂಭಿಸುತ್ತಿದ್ದೇನೆ. ನಿಮ್ಮ ನಿರಂತರ ಪ್ರೋತ್ಸಾಹಕ್ಕೆ ಧನ್ಯವಾದಗಳು.

ವಂದನೆಗಳೊಂದಿಗೆ,
ಶ್ರೀಧರ್ ಬಂಡ್ರಿ

ಕುಲಕರ್ಣಿಗಳೆ,
ನಿಮ್ಮ ಅಭಿಪ್ರಾಯ ಮತ್ತು ಉತ್ಸಾಹಕ್ಕೆ ನಾನು ಚಿರರುಣಿ. ನಿಮ್ಮ ಗೀತೆಯ ಗುಟ್ಟು 2; ಇದೀಗ ತಾನೇ ಓದಿದೆ. ಚೆನ್ನಾಗಿ ಮೂಢಿ ಬರುತ್ತಿದೆ, ತಪ್ಪದೇ ಮುಂದುವರೆಸಿಕೊಂಡು ಹೋಗಿ.

ಪಾರ್ಥಸಾರಥಿಗಳೆ,
ಈ ಸರಣಿ ಬೇಗನೇ ಮುಗಿಸಿದ್ದಕ್ಕೆ ಕ್ಷಮೆಯಿರಲಿ. ಬಸವಣ್ಣನವರ ಸಮಕಾಲೀನ ಜೀವನ ಪದ್ಧತಿ ಮತ್ತು ಆಧ್ಯಾತ್ಮಿಕ ವಿಚಾರಗಳ ಬಗ್ಗೆ ಅಲ್ಲಮ ಪ್ರಭುವಿನ ಮೂಲಕ ಬಹುದೊಡ್ಡ ಸರಣಿಯನ್ನೇ ಸೋಮಶೇಖರಯ್ಯನವರು ಬರೆದಿದ್ದಾರಲ್ಲ. ಸಂಪದವನ್ನು ಸ್ವಲ್ಪ ಹಿಂದೆ ತಿರುವಿ ಹಾಕಿ; ಅದರಲ್ಲಿ ಎಲ್ಲಾ ವಿಚಾರಗಳನ್ನು ಅತ್ಯುತ್ತಮವಾಗಿ ಮತ್ತು ಪೂರ್ಣ ವಿವರಗಳೊಂದಿಗೆ ಅವರು ಬರೆದಿದ್ದಾರೆ. ಮುಂದಿನ ವಾರದಿಂದ ಇನ್ನೊಂದು ವಿಷಯದ ಮೇಲೆ ತರಗತಿಗಳು ಪ್ರಾರಂಭವಾಗುತ್ತವೆ. :))

ನಿಮ್ಮ ಉತ್ಸಾಹ, ಆಸಕ್ತಿ ಮತ್ತು ಪ್ರೋತ್ಸಾಹಕ್ಕೆ ಧನ್ಯವಾದಗಳು.
ವಂದನೆಗಳೊಂದಿಗೆ, ಶ್ರೀಧರ್ ಬಂಡ್ರಿ

ಸತೀಶರೆ ನಿಮ್ಮ ಆಸಕ್ತಿಗೆ ಧನ್ಯವಾದಗಳು. ನಾನು ಇದನ್ನು ಕಡಿಮೆ ಕಂತುಗಳಲ್ಲಿ ಮುಗಿಸಿದ್ದು ಕುರಿಗಳ ಸಂಖ್ಯೆಯ ಕೋನದಿಂದ ಅಲ್ಲ ಆದರೆ ಈ ಕುರುಬನ ಇರುವ ಮೇವಿನ ಸ್ಟಾಕ್ ಖಾಲಿ ಆಗಿ ಹೋಗಿದೆ :))

1. ರೇವಣಾರಾಧ್ಯ, ಪಂಡಿತಾರಾಧ್ಯ ಮತ್ತು ಮರುಳಾರಧ್ಯರು ಕಾಲ್ಪನಿಕ ವ್ಯಕ್ತಿಗಳೆಂದು ಕೆಲವರು ಅಭಿಪ್ರಾಯ ಪಟ್ಟಿರುವುದರಿಂದ (ಮೂಲ ಲೇಖಕರ ಪ್ರಕಾರ) ಅದರ ಬಗ್ಗೆ ಎರಡೂ ರೀತಿಯ ಅಭಿಪ್ರಾಯಗಳನ್ನು ಕೊಡಲಾಗಿದೆ.
2. ಇವರು ಬಸವಣ್ಣನವರ ಸಮಕಾಲೀನರೆಂದು ನೀವು ಅಭಿಪ್ರಾಯ ಪಟ್ಟಿರುವುದರಿಂದ ನೀವು ಹೇಳಿದಂತೆ ಬದಲಾಯಿಸಿಕೊಂಡು ಓದಲು ಅಡ್ಡಿಯೇನಿಲ್ಲ. ಆದರೆ ಬಸವಣ್ಣನವರು ವೈದಿಕ ಧರ್ಮದ ಪ್ರಕಾರ ಉಪನಯನ ಕಾರ್ಯವನ್ನು ನಿರಾಕರಿಸಿವುದು ಅವರಿಗೆ ಜಾತವೇದ ಮುನಿಗಳು ಲಿಂಗ ಧಾರಣೆ ಮಾಡಿದ್ದರಿಂದ ಎಂದು ಪ್ರಾಥಮಿಕ ಶಾಲಾ ಪಠ್ಯ ಪುಸ್ತಕದಲ್ಲಿ ಓದಿದ ನೆನಪು (1977 ನೆ ಇಸವಿಯಲ್ಲಿ ನನ್ನ‌
ಏಳನೇ ತರಗತಿಯ ಪಠ್ಯ.) ಇದನ್ನು ನಿಜವೆಂದು ಒಪ್ಪಿಕೊಂಡರೆ ವೀರಶೈವ ಧರ್ಮವು ಬಸವಣ್ಣನವರಿಗಿಂತ ಮುಂಚಿನದೆಂದು ಅರ್ಥವಾಗುತ್ತದೆ ಎಲ್ಲವೇ? ಆದ್ದರಿಂದ ಅದನ್ನು ಪ್ರಾಚುರ್ಯಕ್ಕೆ ತಂದರೆನ್ನುವುದು ಸೂಕ್ತವೆಂದು ಕೊಳ್ಳುತ್ತೇನೆ.
3. ನೀವು ಪ್ರಸ್ತಾವಿಸಿರುವ ವಾಕ್ಯದ ಮೊದಲ ವಾಕ್ಯದಲ್ಲಿ ವೀರಶೈವರು ಶಿವಲಿಂಗ ಅಥವಾ ಲಿಂಗವನ್ನು ಗೌರವಾದರಗಳಿಂದ ಪೂಜಿಸುವುದರಿಂದ ಅವರಿಗೆ ಈ ಪ್ರಯೋಗ ಸೂಕ್ತವಾಗಿದೆ ಎಂದು ತಿಳಿಸಲಾಗಿದೆ.
4. ನಾವು ಮೂರು ರೀತಿಯ ಮಲಗಳಿಂದ ಆವರಿಸಲ್ಪಟ್ಟಿರುವುದರಿಂದ ನಮಗೆ ನಮ್ಮ ನಿಜವಾದ ಸ್ವರೂಪದ ಅರಿವಾಗದು. ಅದರ ಸಾಕ್ಷಾತ್ಕಾರವಾಗಬೇಕಾದರೆ ಈ ಮಲಗಳನ್ನು ಹೋಗಲಾಡಿಸಿಕೊಳ್ಳಬೇಕು ಎನ್ನುತ್ತಾರೆ. ಅದರೆ ಪ್ರಕಾರ ಶಿವ ಮತ್ತು ಜೀವ ಬೇರೆಯಲ್ಲ; ಈ ರೀತಿ ಬೇರೆಯಾಗಿ ಕಾಣುತ್ತಿರುವುದು ಈ ಮೂರು ರೀತಿಯ ಕಶ್ಮಲಗಳಿಂದ ಎನ್ನುವುದು ಷಟ್ ಸ್ಥಲ ಸಿದ್ಧಾಂತ ಹಿಂದಿರುವ ತತ್ವ್. ಇನ್ನು ಶಿವನು ಚೇತನಾಸ್ವರೂಪಿ ಅಥವಾ ಜ್ಯೋತಿ ಸ್ವರೂಪನಾಗಿರುವುದರಿಂದ ನೀವು ಕೊಟ್ಟಿರುವ ಅಲ್ಲಮನ ವಚನದಿಂದ ವ್ಯತ್ಯಾಸವೇನೂ ಉಂಟಾಗದು.
5. ಕಾಶ್ಮೀರ ಶೈವ ತತ್ವದ 36 ಸಿದ್ದಾಂತವನ್ನು ಯಥಾವತ್ತಾಗಿ ಲಿಂಗಾಯತ ಮತವು ಒಪ್ಪಿಕೊಂಡಿರುವುದರಿಂದ ಈ ಮಾತಿಗೆ ಪುಷ್ಟಿ ಕೊಡುತ್ತದೆ. ಇದೇ ಸರಣಿಯ 2ನೇ ಲೇಖನವನ್ನು ಓದಿ.

ಜಯಪ್ರಕಾಶ್ ಅವರೆ,
ತಡವಾಗಿ ನಿಮ್ಮ ಪ್ರಶ್ನೆಗೆ ಉತ್ತರಿಸುತ್ತಿರುವುದಕ್ಕೆ ಕ್ಷಮೆಯಿರಲಿ. ಈ ಲೇಖನ ಸರಣಿಯು ಶೈವ ಮತದ ವಿವಿಧ ಮುಖಗಳನ್ನು ತಿಳಿದುಕೊಳ್ಳುವ ಉದ್ದೇಶದಿಂದ ಬರೆಯಲಾಗಿತ್ತು. ಹಾಗಾಗಿ ಇದರಲ್ಲಿ ಆಧ್ಯಾತ್ಮಿಕ ವಿಷಯಗಳಿಗೆ ಹೆಚ್ಚು ಒತ್ತು ಕೊಡಲಾಗಿದೆ, ಸಾಂದರ್ಭಿಕವಾಗಿಯಷ್ಟೇ ಕೆಲವೊಂದು ಐತಿಹಾಸಿಕ ವಿಷಯಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಇರಲಿ, ಇಲ್ಲಿ ಒಂದು ವಿಷಯವನ್ನು ಪ್ರಸ್ತುತ ಪಡಿಸಲು ಇಷ್ಟಪಡುತ್ತೇನೆ, ಅದೇನೆಂದರೆ ಆದಿ ಶಂಕರರು ಧರ್ಮವನ್ನು ದೇಶದ ವಿವಿಧ ಭಾಗಗಳಲ್ಲಿ ಪ್ರಾಚುರ್ಯಕ್ಕೆ ತರಬೇಕೆಂದುಕೊಂಡು ಉತ್ತರದ ಬದರಿನಾಥ, ದಕ್ಷಿಣದ ಶೃಂಗೇರಿ, ಪಶ್ಚಿಮದ ದ್ವಾರಕೆ ಮತ್ತು ಪೂರ್ವದ ಪುರಿಯಲ್ಲಿ ನಾಲ್ಕು ಪೀಠಗಳನ್ನು ಸ್ಥಾಪಿಸಿದರು. ಮಧ್ಯ ಭಾಗದಲ್ಲೂ ಪೀಠವೊಂದರ ಅವಶ್ಯಕತೆಯಿದೆ ಎಂದು ಕಂಚಿಯಲ್ಲೂ ಒಂದು ಪೀಠದ ಸ್ಥಾಪನೆಯಾಯಿತು. ಬಹುಶಃ ಇವರು ಬೌದ್ಧ ಮತದ ವಿಹಾರಗಳಿಂದ ಸ್ಪೂರ್ತಿ ಪಡೆದಿರಬಹುದು. ಇದೇ ರೀತಿ ವೀರಶೈವ ಮತದಲ್ಲಿ ದೇಶವನ್ನು ಅಡ್ಡವಾಗಿ ಐದು ಭಾಗಗಳಾಗಿ ವಿಭಜಿಸಿ ಉತ್ತರದ ತುತ್ತತುದಿಯಲ್ಲಿ ಕೇದಾರ ಪೀಠ, ಉತ್ತರದ ಮಧ್ಯ ಭಾಗಕ್ಕೆ ಕಾಶಿ ಪೀಠ, ಮಧ್ಯ ಭಾಗಕ್ಕೆ ಉಜ್ಜೈನಿ (ಮಧ್ಯ ಪ್ರದೇಶ), ದಕ್ಷಿಣ ಮಧ್ಯಭಾಗಕ್ಕೆ ಶ್ರೀಶೈಲ ಪೀಠ ಮತ್ತು ದಕ್ಷಿಣಕ್ಕೆ ಬಾಳೇಹೊನ್ನೂರಿನಲ್ಲಿ ರಂಭಾಪುರಿ ಪೀಠವನ್ನು ಸ್ಥಾಪಿಸಿದ್ದಾರೆ. ಈ ಮಠಗಳಿಗೆ ಆಚಾರ್ಯರಾದವರೆ ಪಂಚಾಚಾರ್ಯರು. ಇವಕ್ಕೆ ತಮ್ಮದೇ ಆದ ಶಾಖಾ ಮಠಗಳೂ ಇದ್ದವು. ಈ ಉಜ್ಜೈನಿಯ ಒಂದು ಶಾಖಾಮಠವೇ ಈಗ ಬಳ್ಳಾರಿ ಜಿಲ್ಲೆಯ ಕೂಡ್ಲಿಗಿ ತಾಲ್ಲೂಕಿನಲ್ಲಿರುವ ಉಜ್ಜನಿಯಲ್ಲಿರುವ ಪೀಠ. ಮಧ್ಯಭಾರತದಲ್ಲಿ ಹಲವಾರು ಚಾರಿತ್ರಿಕ ಕಾರಣಗಳಿಂದ ಅಲ್ಲಿನ ಪೀಠದ ಕಾರ್ಯಕಲಾಪಗಳು ಸ್ಥಗಿತಗೊಂಡಾಗ ಇಲ್ಲಿದ್ದ ಶಾಖಾಮಠವೇ ಪೂರ್ಣಪ್ರಮಾಣದ ಪೀಠವಾಯಿತು. ಈ ಮಠಗಳ ಆಧೀನಕ್ಕೆ ಒಳಪಡದೆ ಸ್ವತಂತ್ರವಾಗಿ ಧರ್ಮ ಪ್ರಚಾರವನ್ನು ಕೈಗೊಂಡದ್ದೇ ವಿರಕ್ತ ಮಠಗಳು. ಇವಕ್ಕೆ ಉದಾಹರಣೆಯಾಗಿ ಮೃತ್ಯುಂಜಯ ಮಠ, ಮೂರು ಸಾವಿರ ಮಠ ಇವುಗಳನ್ನು ಹೆಸರಿಸಬಹುದು. ಉಜ್ಜೈನಿ ಪೀಠದಿಂದ ಅಭಿಪ್ರಾಯ ಭೇದ ಹೊಂದಿ ತಮ್ಮದೇ ಮಠವನ್ನು ಸ್ಥಾಪಿಸಿಕೊಂಡವರು ಸಹೋದರರು (ಕಾಲಾನುಕ್ರಮದಲ್ಲಿ ಇವರು ಸಾದರು ಎಂದು ರೂಪಾಂತರವಾಗಿದ್ದಾರೆ). ಈ ಸಾದರ ಮಠವು ಈಗಿನ ಚಿತ್ರದುರ್ಗ ಜಿಲ್ಲೆಯ ಭರಮಸಾಗರ ತಾಲೂಕಿನ ಸಿರಿಗೇರಿಯಲ್ಲಿದೆ. ಅದೇ ರೀತಿ ಶ್ರೀಶೈಲ ಪೀಠದಿಂದ ಹೊರಬಂದವರು ಹಾಸನ, ಶಿವಮೊಗ್ಗ ಜಿಲ್ಲೆಗಳಲ್ಲಿರುವ ನೊಣಬ ಲಿಂಗಾಯತರು.

ಈ ಹಿನ್ನಲೆಯನ್ನು ಹೇಳುವ ಉದ್ದೇಶವಿಷ್ಟೇ ಬಳ್ಳಾರಿ ಜಿಲ್ಲೆಯಲ್ಲಿರುವ ಮಠ ಮೂಲಮಠವಲ್ಲ ಎನ್ನುವುದು. ಇನ್ನು ನೀವು ಪ್ರಸ್ತಾಪಿಸಿರುವಂತೆ ಅದು ಜೈನ ಮಂದಿರವೆನ್ನುವ ವಿಷಯ ನಿಜವಿರಬಹುದು. ಅದೇ ರೀತಿಯ ದೇವಾಲಯಗಳು ನಿಮಗೆ ಹರಪನಹಳ್ಳಿ ತಾಲೂಕಿನ ಅಂಬಳಿ, ಮೊದಲಾದ ಊರುಗಳಲ್ಲಿ ದೊರಕುತ್ತದೆ. ಒಂದು ಕಾಲದಲ್ಲಿ ಸಂಪೂರ್ಣವಾಗಿ ವೈದಿಕ ಅಥವಾ ಇತರೇ ಸನಾತನ ಧರ್ಮಗಳು ಕರ್ನಾಟಕದಲ್ಲಿ ಇದ್ದವು. ಒಂದು ಮತ್ತು ಎರಡನೇ ಶತಮಾನಗಳಲ್ಲಿ ಉತ್ತರ ಭಾರತದಲ್ಲಿ ಬೌದ್ಧ ಮತವು ಪ್ರಾಚುರ್ಯಕ್ಕೆ ಬಂದರೆ ಕರ್ನಾಟಕ ಮತ್ತು ಆಂಧ್ರ ಪ್ರಾಂತ್ಯಗಳಲ್ಲಿ ಗುಜರಾತಿನ ಮೂಲಕವಾಗಿ ಜೈನ ಧರ್ಮ ಪ್ರಾಚುರ್ಯಕ್ಕೆ ಬಂತು. ಕನ್ನಡದಲ್ಲಿ ಪ್ರಥಮ ಸಾಹಿತ್ಯ ಹುಟ್ಟಿದ್ದೇ ಜೈನರ ಧಾರ್ಮಿಕ ಗ್ರಂಥಗಳಿಂದ. ಮುಂದೆ ಜೈನ ಬಿಟ್ಟಿದೇವನು ರಾಮಾನುಜರ ವಿಚಾರಗಳಿಂದ ಅಥವಾ ಅವರು ನಡೆಸಿದರೆಂದು ಹೇಳುವ ಪವಾಡದಿಂದಾಗಿ ವೈಷ್ಣವನಾದದ್ದು ತಮಗೆ ತಿಳಿದೇ ಇದೆ. ಅದೇ ರೀತಿ ಉತ್ತರ ಕರ್ನಾಟಕದಲ್ಲಿ ವೀರಶೈವ ಧರ್ಮದ ಪ್ರಭಾವವು ಉಂಟಾಗಿ ಬಹಳ ಜನರು ಅದರಿಂದ ಆಕರ್ಷಿತರಾದುದಲ್ಲದೆ ಅದರ ಅನುಯಾಯಿಗಳಾದರು. ಜೈನ ಧರ್ಮದ ಅವನತಿಯ ನಂತರ ಮತ್ತೆ ಸನಾತನ (ವೈದಿಕ ಧರ್ಮವು) ಪ್ರಾಬಲ್ಯ ಪಡೆದು ಮತ್ತೆ ತದನಂತರ ಕಾಲದಲ್ಲಿ ವೀರಶೈವ ಧರ್ಮವು ಪ್ರಾಚುರ್ಯಕ್ಕೆ ಬಂತು. ಹಾಗಾಗಿ ಇಂದಿಗೂ ನಿಮಗೆ ಲಿಂಗಾಯತರಲ್ಲಿ ಎಲ್ಲಾ ಕುಲಕಸುಬಿನ ಜಾತಿಗಳು ಉಪಜಾತಿಗಳಾಗಿ ಹಾಗೇ ಉಳಿದುಕೊಂಡು ಬಿಟ್ಟಿವೆ.

ಪ್ರತಿಕ್ರಿಯೆ ಬಹಳ ಉದ್ದವಾಗಿರುವುದಕ್ಕೆ ಬೇಸರಿಸಬೇಡಿ. ನಿಮ್ಮ ವಿಶಿಷ್ಟ ಶೈಲಿಯ ಪದ್ಯಗಳೊಂದಿಗೆ ಮತ್ತೆ ಸಂಪದದಲ್ಲಿ ಸಕ್ರಿಯರಾಗಿ. ವಂದನೆಗಳೊಂದಿಗೆ, ಶ್ರೀಧರ್ ಬಂಡ್ರಿ