ನೀವು ಬಹಳ ಒಳ್ಳೆಯ ಇಚಾರಗಳನ್ನೇ ಕೇಳಿದ್ದೀರಿ, ಅದಕ್ಕಾಗಿ ನಮನಗಳು. 

1.ಬೇಗರಣ ಎಂಬ ಪದದ ವ್ಯುತ್ಪತ್ತಿ ಅಥವಾ ಅದರ ಮೂಲವನ್ನು ವಿವರಿಸುತ್ತೀರಾ

ಇದು 'ವ್ಯಾಕರಣ' ಎಂಬ ಸಕ್ಕದದ ಪದದಿಂದ ಬಂದದ್ದು. ಹೊರಗಿನ ಪದಗಳ ಬರುವಿಕೆಗೆ ನಾನು ಬೇಡವೇ ಬೇಡ ಎಂದು ಹೇಳುವುದಿಲ್ಲ, ಆದರೆ ಅವು ಕನ್ನಡ ಪದಗಳಾಗಿ ಬದಲಾಗದೇ, ಕಗ್ಗಲ್ಲಿನಂತೆ ಹಾಗೆಯೇ ಉಳಿಯುವುದು ಬೇಡ ಎನ್ನುತ್ತೇನೆ. ಹಿಂದೊಮ್ಮೆ ನಾನು 'ಬೆಂದಕಾಳೂರು' bangalore ಆದುದನ್ನು ಒಂದು ಮಾದರಿಯಾಗಿ ನೀಡಿದ್ದೇನೆ. 'ಳ' ಅಕ್ಕರವು ಇಂಗಲೀಸಿನಲ್ಲಿ ಇಲ್ಲದ್ದು, ಇಂಗಲೀಸಿಗೆ ಬೆಂಗಳೂರನ್ನು ತನ್ನ ಪದವಾಗಿಸಲು ಸಹಾಯ ಮಾಡಿತು.

2.ಮಾಡಿಸಿಸು, ಕೇಳಿಸಿಸು ಎಂಬ ಪ್ರಯೋಗಗಳು ಎಲ್ಲಿವೆ. ಅಂದರೆ ಬರೆಹ/ಆಡು ಮಾತಿನಲ್ಲಿ ಎಲ್ಲಿ ಬಳಕೆಯಲ್ಲಿವೆ. ಇದ್ದರೆ ಅದನ್ನು ಹೇಗೆ ಬಳಸಲಾಗುತ್ತದೆ ಎಂಬುದಕ್ಕೆ ಒಂದು ಉದಾಹರಣೆ ಕೊಡಿ.

ನನಗೆ ತಿಳಿದಂತೆ ಹಳ್ಳಿಗರ ಬಾಯಲ್ಲಿ ಇವುಗಳ ಬಳಕೆ ಹಾಸು ಹೊಕ್ಕಾಗಿವೆ. ಆದರೆ ಕಲಿತುಕೊಂಡಿರುವ ಪಟ್ಟಣಿಗರಲ್ಲಿ ಕಡಿಮೆ. ಇಸುವಿನ ಈ ಬಗೆಯ ಬಳಕೆಯ ಬಹಳ ಮಾದರಿಗಳು ಸಿಗುತ್ತವೆ. ಇವುಗಳ ಬಗ್ಗೆ ನನಗೆ ತಿಳಿದಿತ್ತು ಆದರೆ ಹೊಳೆದಿರಲಿಲ್ಲ.

೧ ) ಕೊಡು, ಕೊಡಿಸು, ಕೊಡಿಸಿಸು

"ಅಪ್ಪ, ಅಪ್ಪ ನನಗೊಂದು ಬೊಂಬೆ ಕೊಡು"

"ಅಪ್ಪ, ಅಪ್ಪ ಜಾತರೆಯಲ್ಲಿ ನನಗೊಂದು ಬೊಂಬೆ ಕೊಡಿಸು"

"ಅಪ್ಪ, ಅಪ್ಪ ಮಾಮನಿಗೆ ಹೇಳಿ, ಜಾತರಿಯಲ್ಲಿ ನನಗೊಂದು ಬೊಂಬೆ ಕೊಡಿಸಿಸು"

೨) ಹೊಡಿ, ಹೊಡಿಸು, ಹೊಡಿಸಿಸು

ಮಾದರಿ :

ರಾಮು : ಏ! ನಿನ್ನ ಹೊಡೆಯುವೆನು.

ಸೋಮು : ನಿನಗೆ ಆಟೊಂದು ಬಲವಿಲ್ಲ.

ರಾಮು : ಹಾಗಾದರೆ ನಮ್ಮಣ್ಣನ ಕಡೆಯಿಂದ ಹೊಡೆಸುವೆನು.

ಸೋಮು : ನಿಮ್ಮಣ್ಣ ನಿನ್ನ ಮಾತು ಕೇಳಿಯಾನೆ?

ರಾಮು : ಅವನು ನಮ್ಮಪ್ಪನ ಮಾತನ್ನು ಕೇಳುತ್ತಾನೆ, ಅಪ್ಪನಿಂದ ಹೇಳಿಸಿ, ಹೊಡೆಸಿಸುವೆನು.

೩) ಕಳುಹು, ಕಳುಹಿಸು, ಕಳುಹಿಸಿಸು

ಸಂದೇಸದೊಂದಿಗೆ ಬಟನನ್ನು ಕಳುಹುವುದು.

ಬಟನ ಕೈಯಲ್ಲಿ ಓಲೆಯನ್ನು ಕಳುಹಿಸುವುದು.

ಮಂತರಿಗೆ ಹೇಳಿ ಓಲೆಯನು ಕಳುಹಿಸಿಸುವುದು.

ಇಲ್ಲಿ ಮಂತರಿ ಇನ್ನಾರ ಕೈಯಲ್ಲೋ ಅದನ್ನು ಕೊಟ್ಟು ಕಳಿಸುವನೆಂಬುದು ವೇದ್ದೆಯಾಗುವುದು.

೩) ಮಾಡು, ಮಾಡಿಸು, ಮಾಡಿಸಿಸು

ನಾನೊಂದು ಗೊಂಬೆ ಮಾಡಿದೆನು

ನಾನೊಂದು ಗೊಂಬೆ ಮಾಡಿಸಿ ತಂದೆನು

ನಮ್ಮಣ್ಣನಿಗೆ ಮಾಡಿಸಲು ಹೇಳಿ, ಈ ಗೊಂಬೆ ಮಾಡಿಸಿಸಿದೆನು.

೪) ಕುಣಿ, ಕುಣಿಸು, ಕುಣಿಸಿಸು ( ಕುಣಿಸುವಂತೆ ಮಾಡು)

ಕುಣಿಸು ಎಂಬುದು ಬಳಕೆಯಲ್ಲಿರುವುದಂತೂ ಎಲ್ಲರಿಗೂ ತಿಳಿದಿದೆ, ಕುಣಿ - ನರ್ತಿಸು ಆದರೆ, ಕುಣಿಸು - ನರ್ತಿಸಿಸು ಆಗುವುದು, ಆದರೆ ನರ್ತಿಸಿಸು ಬಗೆಯ ಬಳಕೆಯೂ ಇಲ್ಲ. ನರ್ತನ ಮಾಡಿಸು ಎಂದೇ ಬಳಕೆಯಲ್ಲಿದೆ. ಅಂದರೆ 'ಕುಣಿ'ಯ ಬದಲು ನರ್ತಿಸು ಎಂಬುದನ್ನೇ ಬಳಕೆ ಮಾಡುತ್ತ ಹೋದರೆ, ಬರೀ ಕುಣಿಸಿಸು ಅಲ್ಲ, ಕುಣಿ, ಕುಣಿಸು ಗಳೂ ಮರೆತೇ ಹೋಗುತ್ತವೆ. ಆಗ ಕುಣಿಸು, ಕುಣಿಸಿಸು ಎಂಬುದನ್ನು ಹೇಳಬೇಕಾದಾಗ, ನಮಗೆ ಹೇಗೇ ಹೇಳಬೇಕೆಂಬುದೇ ತಿಳಿಯದಾಗುತ್ತದೆ (ಏಕೆಂದರೆ ಪದವೇ ಮರೆತಿದೆಯಲ್ಲ!). ಇದರಿಂದಾಗಿ ಇಂಗಲೀಸಿನ ಪದಕ್ಕೆ ಮಾಡು ಸೇರಿಸಿ ಮಾತನಾಡುವ ಚಾಳಿ ಪಟ್ಟಣಿಗರಲ್ಲಿ ಹೆಚ್ಚಾಗಿ ಕಾಣುತ್ತದೆ. enjoy ಮಾಡಿದೆ, shopping ಮಾಡಿದೆ, win ಮಾಡಿ ಹೀಗೆ. ಮೊದಲನೆಯದಾಗಿ ಇದು ಹೆಚ್ಚುಗಾರಿಕೆ ತೋರಿಸಲು, ಎರಡನೆಯದಾಗಿ ಓದಿನಿಂದ ಕಲಿತದ್ದು.

ಇತ್ತೀಚಿನ ದಿನಗಳಲ್ಲಿ ಇಂಗಲೀಸಿನ ಪದಗಳಿಗೂ ಈ ಇಸು ಸೇರಿಕೊಳ್ಳುತ್ತಿದೆ. phone ಮಾಡು ಎನ್ನಲು "ಫೋನಾಯಿಸು". "ಕ್ಲಿಕ್ಕಿಸು", "ಟೈಪಿಸು" ಹೀಗೆ.

ಮೂರನೆ ಕೇಳಿಕೆ ;- 

3. ಕನ್ನಡವನ್ನು ಸರಿಯಾಗಿ ಬರೆಯುವುದು ಅಂದರೇನು?

ಕನ್ನಡವನ್ನು ಕನ್ನಡದಂತೆಯೇ ಬರೆಯುವುದು ಎಂದು. "ತೆಗೆದುಕೊಂಡರು" ಅನ್ನುವದನ್ನು "ಸ್ವೀಕ 'ರಿಸಿ' ದರು" (ಸ್ವೀಕಾರ ಮಾಡಿದರು) ಎಂದು ಬರೆಯುವುದು ಬೇಡವೆಂದು, ಕಾರಣ:- ನಮ್ಮ ಪದಗಳು ಮರೆತು ಹೋಗಬಾರದೆಂದು.

ಸ್ವೀಕಾರ ಮಾಡಿಕೊಂಡರು ಇದು ಸ್ವೀಕರಿಸಿದರು ಆಗಿದೆ, recieve ಮಾಡಿಕೊಂಡರು ರಿಸೀವಿಸಿಕೊಂಡರು ಮಾಡಬಹುದೇ?

OLNರು ಒಂದು ಬರಹದಲ್ಲಿ ಕನ್ನಡದ ಬೇಗರಣ, ಕನ್ನಡದ ಎಲ್ಲ ಪದಗಳನ್ನೂ ಬಿಡಿಸಿ ಹೇಳುವಟ್ಟು ಬೆಳೆದೇ ಇಲ್ಲವೆಂದಿದ್ದಾರೆ, ಇದು ನಿಜವೇ, ಆದರೆ ಹಾಗೆ ಸರಿಯಾದ ಬೇಗರಣವನ್ನೆ ಬೆಳೆಸಿಕೊಳ್ಳದ ನುಡಿಗೆ ಏಳು ಉನ್ನತ ಮಟ್ಟದ ಮೆಡಲ್‍ಗಳು!

ಕೇಳಿಕೆ ೪;-

ಇದುವೇ ಸರಿಯಾದ ಕನ್ನಡ ಎಂಬುದನ್ನು ಸಂಸ್ಕೃತ, ಕನ್ನಡ ವ್ಯಾಕರಣ ನಿಯಮಗಳನ್ನು ತಿಳಿಯದ ಆದರೆ ಕನ್ನಡದಲ್ಲಿ ಮಾತನಾಡುತ್ತಾ, ಬರೆಯುತ್ತಾ ಇರುವ ನನ್ನಂಥವರು ತಿಳಿದುಕೊಳ್ಳುವುದು ಹೇಗೆ?

ಹೇಗೆ ಎಂಬುದು ಮನಸ್ಸಿನಲ್ಲಿ ಒಮ್ಮೆ ಮೂಡಿದರೆ, ಉತ್ತರಗಳು ತಾನೇ ತಾನಾಗಿ ಸಿಗುತ್ತಾ ಹೋಗುವವು. ಮಾದರಿಗೆ ನಾನು ಸರಿ ಅಂದುಕೊಂಡಿರುವ ಮತ್ತು ಅಳವಡಿಸಿಕೊಂಡಿರುವ ಒತ್ತಕ್ಕರದ ಕಟ್ಟಳೆ ಯನ್ನೊಮ್ಮೆ ಜತುನ ಮಾಡಿ ನೋಡಿ, ಆಗ ಕನ್ನಡದ್ದೇ ಪದಗಳು ಸಿಗಬಹುದು ಇಲ್ಲವೇ ಹೊರಗಿನವು ಕನ್ನಡದ್ದವಾಗಬಹುದು. ಎರಡನೆಯದಾಗಿ ನಾಮಪದಕ್ಕೆ ಇಸುವನ್ನು ಸೇರಿಸಬಾರದು. 'ಕೇಳು' ಇದು ಕೆಲಸಪದ 'ಪ್ರಶ್ನೆ' ಇದು ಹೆಸರುಪದ. 'ಇಸು'ವನ್ನು ಕೆಲಸಪದಕ್ಕೆ ಅಟ್ಟೇ ಸೇರಿಸಬಹುದು.

ಕೇಳಿಕೆ ೫ ;-

5. ಇದನ್ನೆಲ್ಲಾ ತಿಳಿದುಕೊಳ್ಳದೆ ಬರೆಯುವುದು ಇಲ್ಲವೇ ಮಾತನಾಡುವುದು ತಪ್ಪಾಗುತ್ತದೆಯೇ?

ಯಾವುದನ್ನೆಲ್ಲ? ತಿಳಿಯಲಿಲ್ಲ.

6. ತಪ್ಪು ಎಂದಾದರೆ ಕನ್ನಡವನ್ನು ಸರಿಪಡಿಸಿ ಉಳಿಸುವ ನಿಮ್ಮ ಕೆಲಸ ಕನ್ನಡವನ್ನು ಲ್ಯಾಬೊರೇಟರಿಯಲ್ಲಿ, ಮ್ಯೂಸಿಯಂನಲ್ಲಿ ಉಳಿಸುವ ಪ್ರಯತ್ನವಾಗುವುದಿಲ್ಲವೇ?

ಹಾಗಿದ್ದಲ್ಲಿ ನಾನು ಇದನ್ನು ಚರುಚೆಗೆ ತರಲು ಜನ್ನುತ್ತಲೇ(ಪ್ರಯತ್ನ ಮಾಡು) ಇರಲಿಲ್ಲ. ಎಲ್ಲರೂ ಒಟ್ಟಾಗಿ ಸರಿಪಡಿಸಿಕೊಳ್ಳಬೇಕೆಂಬುದು ನನ್ನ ಬಯಕೆಯಾಗಿದೆ.

ಕೇಳಿಕೆ 7 ;-

7. ಭಾಷೆಯನ್ನು ಶುದ್ಧವಾಗಿ ಉಳಿಸಬೇಕೆಂದು ನೀವು ಮಾಡುತ್ತಿರುವ ಪ್ರಯತ್ನಗಳು ಕೇವಲ ಅಭಿವ್ಯಕ್ತಿಯನ್ನು ಮುಖ್ಯವಾಗಿಟ್ಟುಕೊಂಡು ಭಾಷೆಯನ್ನು ಬಳಸುವವರನ್ನು ಬೆದರಿಸಲಾರದೆ.

ಏನೋ ಹೇಳಬೇಕಿರುವುದನ್ನು ಒಣ ಮಾತುಗಳಲ್ಲಿ/ಬರಹದಲ್ಲಿ ಹೇಳಿಕೊಂಡು ಹೋದರೆ ಜಗತ್ತಿನಲ್ಲಿ ಈಸೊಂದು ನುಡಿಗಳೇ ಇರುತ್ತಿರಲಿಲ್ಲ ಮತ್ತು ಬೇಕಿರಲಿಲ್ಲ. ಕನ್ನಡದಲ್ಲಿ ಮಾತನಾಡುವಾಗ ಎಸೋ ಇಸಯಗಳನ್ನು ಬಹಳ ಸೊಗಸಾಗಿ ಹೇಳುತ್ತೇವೆ. ಹೆಜ್ಜೆಗೊಂದರಂತೆ ನುಡಿಗಟ್ಟುಗಳನ್ನು ಬಳಸುತ್ತೇವೆ. ಅವು ಜೀವಂತಿಕೆಯಿಂದ ಕೂಡಿರುತ್ತವೆ. ಮಾದರಿಗೆ, ಬಹಳ 'ದುಃಖಿ' ಸಿದನು ಎಂಬುದನ್ನು ಕರುಳು ಕಿತ್ತು ಬರುವಂತೆ ಅತ್ತನು ಅನ್ನುತ್ತೇವೆ. ಹೀಗೆ ಬರೀ ವರದಿ ಒಪ್ಪಿಸುವುದು ಅಟ್ಟೇ ನುಡಿಯ ಕೆಲಸವಲ್ಲ. ಕೇವಲ 'ಅಭಿವ್ಯಕ್ತಿ'ಯೇ 'ಮುಖ್ಯ'ವಾದರೆ ಸರಳವಾದ ಇಂಗಲೀಸಿನಲ್ಲಿಯೇ ಬರೆಯಬಹುದಲ್ಲ?

ಉತ್ತರಗಳು ನಿಮಗೆ ಸರಿ ಅನಿಸಿದವೇ?