ಪ್ರಶ್ನೆಗಳು

ಕವಿತೆ ಗರ್ಭಧರಿಸುವುದಕ್ಕೆ ಸಾಮಾಜಿಕ ಕಟ್ಟಳೆಗಳಿಲ್ಲ
ಬೆಳಕು ಮರೆಯಾಗಿ ಬರುವ ಕತ್ತಲಿಗಾಗಿ ಕಾಯುವುದಿಲ್ಲ
ಕವಿ ನನಸಲ್ಲಿದ್ದಾನೋ ಕನಸಲ್ಲಿದ್ದಾನೋ, ಪ್ರೇಮಿಯೋ
ಭಗ್ನ ಪ್ರೇಮಿಯೋ ಎಂದರಿತುಕೊಂಡು ಹೊರ ಬರುವುದಿಲ್ಲ
ಪ್ರೀತಿಯನ್ನು ಹುಡುಕುತ್ತಿದ್ದಾನೋ, ಪ್ರೀತಿಯ ಮುಂಗಾರಿನಲ್ಲಿ
ತೊಯ್ದು ಹೋಗಿರುತ್ತಾನೋ ಎಂದರಿತು ಹೊರ ಬರುವುದಿಲ್ಲ

ಆಂತರಿಕ ಹೊಯ್ದಾಟಗಳು ಅಕ್ಷರಗಳ ರೂಪ ತಳೆವಾಗಲೆಲ್ಲಾ
ಬಾಹ್ಯದ ಆಗುಹೋಗುಗಳಿಗೆ ಭಾವ ಸ್ಪಂದನ ಆಗುವಾಗಲೆಲ್ಲಾ
ನವಮಾಸ ತುಂಬಿದ ಗರ್ಭಿಣಿಯ ಗರ್ಭವನು ಬಿಟ್ಟು ಹೊರ ಜಗಕೆ
ಕಾಲಿಡುವ ಶಿಶುವಿನಂತೆ ಮನದಿಂದ ಹೊರ ಹೊಮ್ಮುವುದೇ ಕವಿತೆ
ಒಂದು ಮನದಿಂದ ಹೊರ ಹೊಮ್ಮಿ ಇನ್ನೊಂದು ಮನವನ್ನು ಸ್ಪರ್ಶಿಸಿ
ಅಲ್ಲೂ ಭಾವ ಸ್ಪಂದನಕ್ಕೆ ಆಸ್ಪದ ಮಾಡಿಬಿಡುವ ಸಾಧನವೇ ಕವಿತೆ
ಕವಿತೆ ಮನವ ಮುಟ್ಟಲು ಮನ ಮುದಗೊಂಡರೆ ಆನಂದದ ಅನುಭಾವ
ಕವಿ ಯಾರೆಂಬುದು ಅಲ್ಲಿ ಯಾವಾಗಲೂ ಗೌಣ
ಕವಿತೆಗೆ ಮೊದಲ ಪ್ರತಿಕ್ರಿಯೆ ಗಂಭೀರ ಮೌನ !!!

-ಆಸು ಹೆಗ್ಡೆ, ಬೆಂಗಳೂರು.