ವ್ಯವಸ್ಥೆಯ ಅಧ್ವಾನಕ್ಕೆ ಮುಗ್ಧ ಜೀವವೊಂದು ಬಲಿಯಾಯಿತು ; ಬಲಿಯ ನಂತರ ಬಲಿಯ ಮೇಲೆ ಹದ್ದಿನಂತೆ ಎರಗಿದ ಎಲ್ಲರಲ್ಲೂ ಇದ್ದದ್ದು ಮಾತ್ರ ಹೇಸಿಗೆ ತರಿಸುವಷ್ಟು ಸ್ವಾರ್ಥ ಮತ್ತು ಲೋಲುಪತೆ .
ನಮ್ಮ ಸರ್ಕಾರದ ಆಡಳಿತಾಂಗ ಎಷ್ಟು ನೈತಿಕ ಅಧಃಪಾತಾಳವನ್ನು ತಲುಪಿದೆಯೆಂದರೆ , ಯಾರೆಂದರೆ ಯಾರಿಗೂ ಅವರೂ ಸೇರಿದಂತೆ , ಎಲ್ಲರೂ ಜೀವಿಸುತ್ತಿರುವ ಸಾಮಾಜಿಕ ವಲಯದ ಬಗ್ಗೆ ಕಿಂಚಿತ್ತಾದರೂ ಕಾಳಜಿ ಇಲ್ಲದ ಸ್ಥಿತಿಯನ್ನು ಮುಟ್ಟಿರುವುದು .ಪ್ರತಿಯೊಬ್ಬ ಅಧಿಕಾರಿಯೂ ಅವರವರ ಸಂಬಳ ,ಭತ್ಯೆ , ಗಿಂಬಳ ,ವರ್ಗಾವರ್ಗಿಗಳ ಚಿಂತೆಯಲ್ಲಿಯೇ ಮುಳುಗಿ , ಸಮಾಜಿಕ ಜೀವನವೇ ಮರೆತು ಹೋಗಿರುವ ಸ್ಥಿತಿಯಲ್ಲಿರುವುದು . ರಾಜ್ಯಪಾಲರ ಅವಧಿಯೆಂಬುದು , ಮತ್ತೂ ಕಡಿವಾಣವಿಲ್ಲದ ಸ್ಥಿತಿಯಾಗಿ ಅಧಿಕಾರ ಶಾಹಿಯ ಸುಗ್ಗಿಯ ಸಮಯವಾಗಿತ್ತು . ಮುಂಗಾರಿನ ಮಳೆಗೆ ಈ ರಾಜ್ಯದ ರೈತರಿಗೆ ಏನು ಬೇಕು ? ಎಂಬ ವಿಷಯ ಯಾರ ತಲೆಗೂ ಹೋಗಲೇ ಇಲ್ಲ .

ಅಧಿಕಾರಕ್ಕೆ ಬಂದ ಭಾರತೀಯ ಜನತಾ ಪಕ್ಷ ,ಅದರ ಅಮಲಿನಲ್ಲಿ ಮಂತ್ರಿ ಪದವಿಗೆ ; ನಂತರ ಖಾತೆಗಳಿಗೆ , ಅಧಿಕಾರ ಸಿಕ್ಕ ಘಳಿಗೆಯಿಂದ ಒದ್ದಾಡಿದ್ದರ ನೂರರಲ್ಲಿ ಹತ್ತು ಭಾಗದಷ್ಟು ಪ್ರಚಲಿತ ಸಮಸ್ಯೆಗಳಿಗೆ ಗಮನವನ್ನು ಕೊಟ್ಟು ಒದ್ದಾಡಿದ್ದರೆ ನಡೆದುಹೋದ ಅನಾಹುತದ ಬಹುಪಾಲು ಸಾಧ್ಯತೆಯನ್ನು ತಪ್ಪಿಸಬಹುದಾಗಿತ್ತು.

ಕಾಂಗ್ರೆಸ್ ಪಕ್ಷದವರಂತೂ ರಾಜ್ಯದ ಇಂತಹ ಸಂಕಟ ಸಮಯದಲ್ಲಿ ತಮ್ಮದೇ ಸರ್ಕಾರವಿರುವ ಕೇಂದ್ರದಿಂದ ಯಾವ ರೀತಿಯ ಸಹಕಾರವನ್ನು ಪಡೆಯಲು ಸಾಧ್ಯ ? ಎಂದು ಕಿಂಚಿತ್ತಾದರೂ ಚಿಂತಿಸದೆ , ಹನ್ನೆರಡು ದಿನಗಳ ಹಿಂದೆ ಅಧಿಕಾರಕ್ಕೆ ಬಂದ ಸರಕಾರದ ಮೇಲೆ ಎಲ್ಲ ತಪ್ಪುಗಳನ್ನೂ ರವಾನಿಸಲು ತುದಿಗಾಲ ಮೇಲೆ ನಿಂತು , ತನ್ನ ಹತಾಸೆಯನ್ನು ಪ್ರದರ್ಶಿಸಿದ್ದಲ್ಲದೆ; ರಾಕ್ಷಸ ಆನಂದವನ್ನು ಅನುಭವಿಸಿತು .

ಕರ್ನಾಟಕದ ಜೆಡಿಎಸ್ ಅಂತೂ ಯಾರೂ ಕೇಳುವುದಕ್ಕಿಂತ ಮೊದಲೆ ತನ್ನ ಹೆಗಲು ತಡವರಿಸಿಕೊಳ್ಳುತ್ತಾ , ಮತ್ತದೇ ತನ್ನ ಹಳೆಯ ಗಿಮಿಕ್ ಗಳಿಗೇ ಮರೆ ಹೋಗಿ ಜನತೆಯೆದುರು ಇನ್ನಷ್ಟು ನಗ್ನವಾಯಿತು .

ಇನ್ನು ದೃಶ್ಯ ಮಾಧ್ಯಮಗಳಿಗೂ ಸಾಮಾಜಿಕ ಕಳಕಳಿಗೂ ಎಣ್ಣೇ ಶಿಗೇಕಾಯಿಯೊಷ್ಟೇ ಸಂಬಂಧ , ಮಾರಮ್ಮನ ಜಾತ್ರೆಯ ಕುಣಿತಗಳಂತಹ ಕುಣಿತಗಳಿಂದ ಜನತೆಯನ್ನು ಪ್ರಚೋದಿಸಿ ಬೆಂಕಿ ಹಚ್ಚುವುದರಲ್ಲಿ ಅವು ಯಾವಾಗಲೂ ಹಿಂದೆ ಬಿದ್ದದ್ದೇ ಇಲ್ಲ . ಇನ್ನು ಇಂತಹ ಸುಗ್ಗಿಯನ್ನು ಬಿಟ್ಟಾವೆಯೆ ? ಬಿಟ್ಟರೆ ಅವುಗಳ ಧಣಿಗಳಿಗೆ ಹಣದ ಹೊಳೆ ಹರಿಯುವುದಾದರೂ ಹೇಗೆ ?

ಇದೆಲ್ಲದರ ನಂತರವೂ ಗೋಲೀಬಾರಿಗೆ ಆದೇಶ ನೀಡಬೇಕಾದ ಜಿಲ್ಲಾಧಿಕಾರಿಯಾಗಲೀ , ತಹಸೀಲ್ದಾರರಾಗಲೀ ಆದೇಶ ನೀಡಿರಲೇ ಇಲ್ಲ , ಎಂದು ವರದಿಯಾಗಿದೆ . ಈವತ್ತಿಗೂ ಅದರ ಕಾರಣ ಕರ್ತರ ಬಗ್ಗೆ ಯಾವುದೇ ಮಾಹಿತಿ ಇಲ್ಲ . ಇದು ಜನ ತಂತ್ರವೇ ? ಇಂತಹ ವಿಷಮಯ ವಾತಾವರಣದಲ್ಲಿ ದೂರುವುದು ಯಾರಲ್ಲಿ ?