ಎಳೆ ಗೋಡಂಬಿ ಪಲ್ಯ

ನಾವು ಸ್ವಲ್ಪ ಮುಂದೆ ಬಂದಾಗಿದೆ. ಇದನ್ನು ನಿಮಗೆ ನಾನು ಯುಗಾದಿಯ ಆಸುಪಾಸಿನಲ್ಲಿ ಹೇಳಬೇಕಿತ್ತು. ಇರಲಿ ಮುಂದಿನ ವರ್ಷ ನೆನಪಿನಿಂದ ಮಾಡಿ ತಿನ್ನಿ. :) ಯುಗಾದಿ ಇನ್ನೇನು ಕೆಲವು ದಿನಗಳಿವೆ ಅನ್ನುವಾಗ ಗೋಡಂಬಿ ಮರಗಳನ್ನು ಸಲಹುವ ದಕ್ಷಿಣ ಕನ್ನಡದ ಬಾಯಮ್ಮರು (ಕ್ರಿಸ್ತಮ ಅಕ್ಕಂದಿರು : ಬಾಯಿ ಅಂದರೆ ತಂಗಿ/ಅಕ್ಕ ಎಂದರ್ಥ) ಗೋಡಂಬಿಯನ್ನು ಮರದಿಂದ ಕೀಳುವುದೇ ಇಲ್ಲ. ಬಾಯಿ ಚಪಲದ ಕೊಂಕಣಿಗಳು ಯುಗಾದಿ ಹಬ್ಬಕ್ಕೆ ಎಷ್ಟು ಬೆಲೆ ತೆತ್ತಾದರೂ ಎಳೆ ಗೋಡಂಬಿ ಪಲ್ಯವನ್ನು (ಬಿಬ್ಬೆ ಉಪ್ಕರಿ: ಬಿಬ್ಬೋ ಅಂದರೆ ಹಸಿ ಗೋಡಂಬಿ) ಮಾಡಿ ತಿನ್ನುವರು. ಹಾಗಾಗಿ ಕ್ರಿಸ್ತಮ ಬಾಯಮ್ಮರಿಗೂ ಯುಗಾದಿ ಹಬ್ಬವೇ. ಚಿತ್ರದಲ್ಲಿ ತೋರಿಸಿದ ಗಾತ್ರವಿರುವಾಗ ಗೋಡಂಬಿಗಳನ್ನು ಕಿತ್ತು ಬಿಡಿಸಿದರೆ ಎಳೆ ಗೋಡಂಬಿ ದೊರಕುತ್ತದೆ. ಅದಕ್ಕೊಂದು ಕಂದು ಬಣ್ಣದ ಸಿಪ್ಪೆ ಮೈಗಂಟಿ ಕೊಂಡಿರುತ್ತದೆ. ಇದನ್ನು ನೂರು ಇನ್ನೂರು ಎಂದು ಎಣಿಸಿ ಮಾರಲಾಗುತ್ತದೆ. ನೂರು ಹಸಿ ಗೋಡಂಬಿಗೆ ೧೨೦ ರೂಪಾಯಿವರೆಗೂ ಬೆಲೆಯಾಗುವುದುಂಟು. ಎಳೆ ಗೋಡಂಬಿ ಪಲ್ಯವನ್ನು ಮಾಡುವ ವಿಧಾನ. ಎಳೆ ಗೋಡಂಬಿಯನ್ನು (ಬಿಬ್ಬೋ: ಕೊಂಕಣಿ) ಅಥವಾ ಹಸಿ ಗೇರುಬೀಜವನ್ನು ಹಿಂದಿನ ರಾತ್ರಿಯೇ ನೀರಿನಲ್ಲಿ ನೆನೆಸಿಡಿ. ಮರು ದಿನ ಬೆಳಗ್ಗೆ ಸುಲಲಿತವಾಗಿ ಸಿಪ್ಪೆ ಸುಲಿಯಲು ಬರುವುದು. ಅಂತೆಯೇ ಸಿಪ್ಪೆ ಸುಲಿದು ಈ ದ್ವಿದಳದ ಎರಡೂ ದಳಗಳನ್ನು ಬಿಡಿಸಿ. ಬೇಕಾದ ಸಾಮಾಗ್ರಿ: ಹಸಿ ಗೋಡಂಬಿ: ೧೦೦ ಗೋಡಂಬಿ ಅಂದರೆ ಇನ್ನೂರು ದಳಗಳು ಒಗ್ಗರಣೆಗೆ ತೆಂಗಿನೆಣ್ಣೆ. ಕರಿ ಬೇವು ಸೊಪ್ಪು ಒಂದು ಎಸಳು (ಸುಮಾರು ಹತ್ತು ಎಲೆಗಳು) ಸಾಸಿವೆ: ಒಂದಿಷ್ಟು ಹಸಿ ಮೆಣಸು:೪-೬ (ಚಾಕುವಿನಿಂದ ಮೆಣಸಿನ ಹೊಟ್ಟೆ ಸೀಳಿಡಿ) ಹಿಂಗು ಕದಡಿದ ನೀರು: ಒಂದು ಗುಟುಕು ತೆಂಗಿನ ಕಾಯಿ ತುರಿ: ಒಂದು ಸೌಟು ರುಚಿಗೆ ತಕ್ಕಷ್ಟು ಉಪ್ಪು :) ನೀರು ಪ್ರಿಯರೆ, ಬಾಣಲೆಯನ್ನು ಬೆಂಕಿಯ ಮೇಲಿಟ್ಟು ಒಗ್ಗರಣೆಗೆ ತೆಂಗಿನೆಣ್ಣೆ ಸುರಿಯಿರಿ. ಸಾಸಿವೆ ಕಾಳು ಹಾಕಿ ಚಟಪಟಿಸಲು ಕರಿಬೇವು ಸೊಪ್ಪು ಬಾಣಲೆಗೆ ಎಸೆಯಿರಿ. ಅದೂ ಚರ್ರೆನ್ನಲು ಹಸಿ ಮೆಣಸುಗಳನ್ನು ಹಾಕಿ ಕದಡಿಸಿ. ಮೆಣಸುಗಳು ಬಾಡಿದ ಕೂಡಲೇ ಸುಲಿದಿಟ್ಟ ಹಸಿ ಗೋಡಂಬಿಯ ದಳಗಳನ್ನು ಬಾಣಲೆಗೆ ವರ್ಗಾಯಿಸಿ. ಹಿಂಗು ಕದಡಿದ ನೀರನ್ನು ಚಿಮುಕಿಸಿ ಸಟ್ಟುಗದಿಂದ ಮಗುಚಿ. ಅರೆ ಪಾವು ನೀರನ್ನು ಸುರಿದು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಕಲಕಿ. ಸಣ್ಣ ಉರಿಯಲ್ಲಿ ಮುಚ್ಚಿಡಿ. ನೀರು ಇಂಗಿದ ಬಳಿಕ ಬೆಂಕಿಯಿಂದ ಇಳಿಸಿ, ಕಾಯಿ ತುರಿ ಸಿಂಪಡಿಸಿ ಕಲಸಿರಿ. ಪೂರಿಗಳನ್ನೂ ಕರಿದು ಎಳೆ ಗೋಡಂಬಿಯ ಪಲ್ಯವನ್ನು ತುಂಡು ಪೂರಿಯಲ್ಲಿ ಸುತ್ತಿ ಬಾಯಿಗಿಟ್ಟರೆ ಅಹೋ! ಏನು ವೈಭವವದು!