ಸಂತ ಏಕನಾಥರೋ ಅಥವಾ ನಾಮದೇವರೋ ಬರೆದಿರುವ ಮರಾಠೀಕೃತಿಯೊಂದರ ಅನುವಾದವಿದ್ದರೂ ಇರಬಹುದೀಕೃತಿ, ಪುರಂದರದಾಸರು ಬರೆದಿರಲಿಕ್ಕಿಲ್ಲ ಎಂದು ಹಾವನೂರು ಶ್ರೀನಿವಾಸರು ಬರೆದಿದ್ದನ್ನು ಎಲ್ಲೋ ಓದಿದ ನೆನಪು.

ಎನಗಿಂತ ಕಿರಿಯರಿಲ್ಲ

ಹಂಸಾನಂದಿಯವರೆ, ಈ ಪದ್ಯ ಎಷ್ಟು ಅರ್ಥವಾಯಿತೋ ಬಿಟ್ಟಿತೋ ಆದರೆ ಕೆಲವು ಹೊಸಪದಗಳನ್ನು ತಿಳಿದುಕೊಳ್ಳುವಂತಾಯಿತು. ಮಹಾತ್ಮರು ಊ-ಕಾಲಘಟ್ಟದಲ್ಲಿ, ಊ-ಉತ್ಸಾಹದಲ್ಲಿ ಇದನ್ನು ಬರೆದಿದ್ದರೋ ತಿಳಿಯುವುದು ಕಷ್ಟ. ನಮ್ಮ ಮಿಶ್ರಿಕೋಟಿಗಳು ಆಗಾಗ ಹೇಳುತ್ತಿರುತ್ತಾರೆ ಎಲ್ಲದಕ್ಕೂ ಅರ್ಥ ಹುಡುಕುವುದಕ್ಕೆ ಹೋಗಬಾರದು, ಕೆಲವೊಮ್ಮೆ ಬರೆದವರಿಗೇ ತಿಳಿದಿರುವುದಿಲ್ಲ ಅಂತ ಇರಲಿ ಪದ್ಯದ ಅರ್ಥಕ್ಕೆ ಮುಂಚೆ, ಈ ಪದಗಳನ್ನು ನೋಡಿ.

೧. ಚೊಂಚ - ಡೊಂಕು ಕೈಯುಳ್ಳವ, ಮೊಂಡ ಕೈಯವ (ಕಸ್ತೂರೀ ಕೋಶದಿಂದ), ಕೈಯಿಲ್ಲದವನು.
೨. ಟೊಣಪ - ನಾ. ಕಾಡುಮನುಷ್ಯ, ಅಡಮುಟ್ಟ, ಮಂದಮತಿ, ದಡಿಯ, ದಾಂಡಿಗ.
೩. ಟೊಣಪೆ - ನಾ. ದೊಣ್ಣೆ, ದಪ್ಪವಾದ ಬಡಿಗೆ. ೨ ಮತ್ತು ೩ ರ ಬೇರೆತನ ಗಮನಿಸಿ.
೪. ಟೊಣೆ - ಧಾ. ನುಂಗು, ಉಗುಳು, ಪೆಟ್ಟು, ಹಾಕು, ಸೀಳು, ಮೋಸ ಮಾಡು, ವಂಚಿಸು, ಅಗೆಯು, ತಪ್ಪಿಸಿಕೊಳ್ಳು,
ಪ್ರ. ಕ್ಷಣ ಹದುಳವಿರದೆ ಬಾಯ ಟೊಣೆದೇ ಹೋಯಿತ್ತೆನ್ನ ಭಕ್ತಿ(ಬ.ವ.)

ಎಲ್ಲವೂ ಕಸ್ತೂರೀ ಕೋಶದಿಂದ. ನಾವು ಚಿಕ್ಕವರಿದ್ದಾಗ ತುಂಬಾ ದಪ್ಪಗಿರುವವರನ್ನು ಅದೇನ್ "ಟೊಣೆಯ ಅಪ್ಪ ಅವನು" ಅಂತ ಹೇಳುತ್ತಿದ್ದೆವು.
೫. ತೊಣೆ ಎಂಬ ಬಳಕೆಗಳೂ ಇದೆ. ಬೇರೆ ದ್ರಾವಿಡ ಭಾಷೆಗಳ ಹೋಲಿಕೆಯಿಂದ ತೊಣೆಪೆ ಅಂದರೆ ಹೂಮಾಲೆ, ಹೂಗೊಂಚಲು, ಹಣ್ಣುಗೊಂಚಲು ಎಂದು ಅರ್ಥೈಸಬಹುದು.
೬. ಕನ್ನಡದಲ್ಲಿ ತೊಣೆ - ಧಾ.ಸೇರು, ಹೋಲಿಕೆ, ಎಣೆ, ಸರಿ, ಸಮೀಪಿಸು, ನಾ.ಸರಿಸಮಾನತೆ, ಹೋಲಿಕೆ, ಜೋಡು, ಒರೆ, ದೊರೆ, ತೂಗಾಡು. ಅಂದ ಹಾಗೆ ನಾನು ಇದೇ ಹಾಡನ್ನು ಕನ್ನಡಆಡಿಯೋ.ಕಾಂನಿಂದ ಕೇಳಿದೆ. ನನಗೆ ಅದು ಕಣಪೆ ಅಂತ ಕೇಳಿಸುತ್ತಾ ಇತ್ತು. ಸರಿ ಏನಾದರೂ ಆಗಲಿ ಅಂತ ಅದನ್ನೂ ಹುಡುಕಿದಾಗ ಸಿಕ್ಕಿದ್ದು, ಕಣಪೆ = ಕಹಿಯಾದದ್ದು, ಔಷಧಿ ಅಂತ ತಿಳಿದು ಬಂತು. ಪದ್ಯದ ಅರ್ಥ ಅಥವಾ ವಿವರಣೆ ಎನ್ನುವುದಕ್ಕಿಂತ ಒಂದು ವಿಚಾರ ಹೊಳೆಯಿತು. ಈ "ಕಣಪೆ" ಎಂಬುದನ್ನು ಇಟ್ಟುಕೊಂಡು ಪದ್ಯದ ಅರ್ಥವನ್ನು ಹೀಗೆ ಹೇಳಬಹುದೇ ? ನೀವುಗಳು ಶಂಕರಾಚಾರ್ಯರ, "ಭಜ ಗೋವಿಂದಂ, ಭಜ ಗೋವಿಂದಂ, ಗೋವಿಂದಂ ಭಜ ಮೂಢಮತೇ, ಸಂಪ್ರಾಪ್ತೆ ಸನ್ನಿಹಿತೆ ಕಾಲೆ ನಹಿ ನಹಿ ರಕ್ಷತಿ ಡುಕ್ರುಂಕರಣೆ" ಕೇಳಿರಬಹುದು". ಇಲ್ಲಿ ಡುಕ್ರುಂಕರಣೆ ಎಂಬುದು ಸಂಸ್ಕೃತದಲ್ಲಿ ಒಂದು ವ್ಯಾಕರಣ ನಿಯಮ, "ಕಡೇಗಾಲ ಸಮೀಪಿಸುತ್ತಿದ್ದಾಗ ಮಂಕೆ, ಗೋವಿಂದನನ್ನು ಭಜಿಸು ಅದನ್ನು ಬಿಟ್ಟು ವ್ಯಾಕರಣ ನಿಯಮಗಳನ್ನು ಯಾಕೆ ಓದುತ್ತಾ ಇದ್ದೀಯಾ" ಅಂತ ಅರ್ಥ. ಶಂಕರಾಚಾರ್ಯರು ವೇದಾಂತಿಗಳು. ಭಕ್ತಿ ಮಾರ್ಗಕ್ಕೆ ಶಂಕರಾಚಾರ್ಯರ ಕೊಡುಗೆ ಕಮ್ಮಿ ಎಂದು ಕೆಲವರು ಹೇಳುತ್ತಾರೆ. ಶಿವಾನಂದಲಹರೀ ಕೂಡ ವೇದಾಂತಮಯ ಎಂಬ ಮಾತಿದೆ. ಆದರೆ ದಾಸರು ಭಕ್ತಿ ಪರಂಪರೆಯವರು. ಒಂದೇ ಸಾಲಿನ ವೇದಾಂತದ ಸಾರವನ್ನು, ಜನರ ಮನತಾಗುವಂತೆ, ದಾಸರ ಕಾಲದ ಸಮಾಜದ ರೀತಿರಿವಾಜುಗಳಿಗೆ(ಹೊನ್ನು, ಎಮ್ಮೆ ನೀಡುವುದು, ಊರುಗಳನ್ನು ನೀಡುವುದು) ಸರಿದೂಗುವಂತೆ ಸರಳ ನುಡಿಯಲ್ಲಿ, ಏನೇ ತೊಂದರೆಯಿದ್ದರೂ(ಒಡ್ಡರು, ಕುಂಟರು, ಕುರುಡರು, ಚೊಂಚರು, ಹಸಿವಿಲ್ಲದೆ ಬಳಲುತ್ತಿರುವವರು(ಇದು ಒಂದು ರೋಗ) ) ವಿಠಲರಾಯನಲ್ಲಿ ಮೊರೆಹೋಗಿ, ಅವನು ಸದ್ಗತಿಯನ್ನು ಈಯುತ್ತಾನೆ ಎಂದು ಹೇಳಲು ಜತುನಗೈದಿರಬಹುದೇ? ತುಂಬಾ ತುಂಬಾ ಕಷ್ಟ ಕಣ್ರೀ. "ಹಲ್ಲಿದ್ದವರಿಗೆ ಕಡಲೆಯಿಲ್ಲ, ಕಡಲೆಯಿದ್ದವರಿಗೆ ಹಲ್ಲಿಲ್ಲ", ಸಮಾನತೆ ಬೇಕೆಂದರೆ ವಿಠಲರಾಯನಲ್ಲಿ ಮೊರೆಹೋಗಿ.

ಡಾ|| ಅರಳುಮಲ್ಲಿಗೆ ಪಾರ್ಥಸಾರಥಿಯವರು ಈ ಪದ್ಯವನ್ನು ವ್ಯಾಖ್ಯಾನಿಸಿದ್ದಾರೆ. ಅದು ಕ್ಯಾಸೆಟ್ ಸಹ ಆಗಿದೆ.

ವೆಂ.