ನಾಯಕ ಮತ್ತು ಖಳನಾಯಕ

ನನಗೆ ತುಂಬಾ ದಿನಗಳಿಂದ ಈ ನಾಟಕ, ಸಿನಿಮ, ಕಾವ್ಯ, ಕಾದಂಬರಿಯ ರಚನೆಯ ಒಳಹಿನ ಬಗ್ಗೆ ಕುತೂಹಲವಿತ್ತು. ಅದು ಹೇಗೆ ಅಷ್ಟು ಚನ್ನಾಗಿ ಕತೆಕಟ್ಟಿ, ಆ ಕತೆಯನ್ನು ವರ್ಣನೆ ಸನ್ನಿವೇಶಗಳಿಂದ ತುಂಬುವರು ಎಂಬ ಆಸಕ್ತಿಯ ಯೋಚನೆ ನನ್ನ ತಲೆ ಕೊರೆಯುತ್ತಿತ್ತು. ಅದಕ್ಕೆ ಸಂಬಂಧವಾಗಿ ನಾನು ಅನೇಕ ಸರತಿ ಹಲವು ಬಗೆಯ ಯೋಚನೆಗಳನ್ನು ನಡೆಸಿದ್ದೆ, ಏನೇನೋ ಹೊಳೆದಿದ್ದವು.

ಹೀಗೆ ಯೋಚಿಸಿಕೊಂಡು ನಾನು ಕೆಳಗಣ ಲಾಜಿಕ್ಕನ್ನು ಹಲ ಕತೆಗಳಿಗೆ ಬಳಸಿದೆ. ನನಗೇ ಸೋಜಿಗವಾಗುವ ಹಾಗೆ ಒಳ್ಳೆಯದು ಎಂದು ತಮಗೆ ಬೇಕಾದುದನ್ನೆಲ್ಲ ಹೇಳಿರುವುದು ಕಂಡುಬಂತು.

ನಮ್ಮಲ್ಲಿ ಬಹುಜನ ಆಕರ್‍ಷಕವಾದ ಕತೆಗಳಲ್ಲಿ ಸಾಮಾನ್ಯ ಒಬ್ಬ ನಾಯಕ ಮತ್ತು ಒಬ್ಬ ಖಳನಾಯಕನು, ಇಲ್ವೇ ಒಂದು ಕೂಳಗುಂಪು ಇದ್ದೇ ಇರುತ್ತದೆ. ಅದರಲ್ಲಿ ನಾಯಕ ಒಳ್ಳೆಯವನು ಎಂದು ತೋರಿಸಲು ಸಮಾಜದಲ್ಲಿ ಒಳ್ಳೆಯದು ಎಂದು ಗುರುತಿಸಲ್ಪಡುವ ಕೆಲಸಗಳನ್ನು ಅವನಿಂದ ನಡೆಸಲಾಗುವುದು. ಹಾಗೇ ಖಳನಾಯಕನನ್ನು ಕೆಟ್ಟವನು ಎಂದು ತೋರಲು ಅವನಿಂದ ಸಮಾಜದಲ್ಲಿ ಹೆಚ್ಚಿನ ಮಂದಿಯಿಂದ ಕೆಟ್ಟದ್ದು ಎಂದು ಹೇಳಲ್ಪಡುವ ಕೆಲಸಗಳನ್ನು ಮಾಡಿಸಲಾಗುವುದು. ಕೊನೆಗೆ ಒಳ್ಳೆಯವನಾದ ನಾಯಕ, ಕೆಟ್ಟವನಾದ ಖಳನಾಯಕನನ್ನು ಸೋಲಿಸಿ, ಸಾಯಿಸಿ, ಒಳ್ಳೆಯದಕ್ಕೇ ಜಯವೆಂದು ’ಒಳ್ಳೆಯದು’ ಯಾವುದೆಂದರೆ ನಾಯಕ ಆ ಕೃತಿಯಲ್ಲಿ ಮಾಡಿದ್ದು ಎಂದು ತೋರಿಸಲಾಗುವು. ಈ ಒಳ್ಳೆಯದು ಎಂಬುದನ್ನು ಮೊದಲೇ ಹೆಚ್ಚಿನವರು ಅನುಮೋದಿಸಿರುವುದರಿಂದ, ಅದನ್ನು ಅವರಿಗೆ ಆಪ್ಯಾಯಮಾನವಾಗುವುದು.

ಮಹಾಭಾರತದಲ್ಲಿ ನಾಯಕರಾದ ಪಾಂಡವರು, ಕೃಷ್ಣರ ನಾಯಕರ ’ಒಳ್ಳೆಯ’ ಸದ್ಗುಣಗಳನ್ನು ಕೌರವರ ಕ್ರೂರತನದಿಂದ ಮೆರಗುಗೊಳಿಸುವುದು. ದುಶ್ಯಾಸ ದ್ರೌಪದಿಯ ಸೀರೆ ಎಳೆದುದು, ದುರ್‍ಯೋಧನ ಆಕೆಗೆ ತನ್ನ ತೊಡೆ ತೋರಿಸುವುದು, ಮುಂತಾದವು ಕೊನೆಗೆ ಅವರನ್ನು ಪಾಂಡವರು ಕೊಂದುದಕ್ಕೆ ಸಮರ್‍ಥನೆಯಾಗುವುದು. ನಾಯಕರ ಪಾತ್ರಗಳ ಸದ್ಗುಣ ಸನ್ನಿವೇಶಗಳಿಗಿಂತ ಖಳನಾಯಕರ ದುರ್‍ಗುಣ ಸನ್ನಿವೇಶಗಳು ಹೆಚ್ಚಾಗಿ ಮತ್ತು ಬಹುಅಬ್ಬರವಾಗಿ ಇರುತ್ತದೆ.

ಗಜನಿ ಸಿನಿಮದಲ್ಲೂ ಖಳನಾಯಕನನ್ನು ಕಿಂಚಿತ್ತೂ ಮನುಶ್ಯತ್ವವೇ ಇಲ್ಲದೇ ಪರಮ ಕ್ರೂರಿಯನ್ನಾಗಿ ತೋರಿಸಿ, ಅದರ ಮುಖೇನ ನಾಯಕನು ಅವನನ್ನು ಸೇಡಿಗೆ ಕೊಲ್ಲುವುದು ಪರಮ ಸಾಧುಕಾರ್ಯವೆಂದೂ, ಸರಿಯೆಂದೂ ನಮಗೆ ಅನ್ನಿಸುವುದು.

ಇಂತಹ ಯಾವ ಕೃತಿಯಲ್ಲೂ ಖಳನಾಯಕನ ಅಬ್ಬರ ಕ್ರೂರವಿಲ್ಲದೇ ನಾಯಕನ ಯಾವ ಸದ್ಗುಣಕ್ಕೂ ಮೆರೆಗಿಲ್ಲ.

ಇದೇ ಲಾಜಿಕ್ಕನ್ನು ಬಳಸಿ ನಮ್ಮ ಸಮಾಜದಲ್ಲಿ ಕೆಲವರು ಬೇಕೆಂದೇ ತಮಗೆ ಬೇಕಾದ ’ಒಳ್ಳೆಯದು, ಸದ್ಗುಣ’ಗಳನ್ನು ಪ್ರಚಾರ ಮಾಡಲು ಅವರೇ ಕೆಲವು ಖಳನಾಯಕರನ್ನು ಬಿಟ್ಟಿರುತ್ತಾರೆ, ಹುಟ್ಟಿಸುತ್ತಾರೆ, ಇಲ್ಲವೇ ಒಬ್ಬನನ್ನು ಹಿಡಿದು ಅವನಿಗೆ ಖಳನ ಪಟ್ಟ ಕೊಡುತ್ತಾರೆ. ಈ ’ಖಳ’ ಎಂಬುದಿಲ್ಲದೇ ಪ್ರಚಾರ ಮಾಡಬೇಕಾದ ’ಸದ್ಗುಣ, ಧರ್ಮ, ನೀತಿ’ಗೆ ಉತ್ತೇಜನ, ಮೆರಗು, ಅಬ್ಬರವಿಲ್ಲ.

ಇದು ಒಂದು ಬಗೆಯಲ್ಲಿ ಕಪ್ಪು ಪರದೆಯ ಮೇಲೆ ಒಂದು ಬಿಳಿಚುಕ್ಕಿಯಿಟ್ಟು, ಬಿಳಿಚುಕ್ಕಿಯನ್ನು ಮೆರೆಸುವಂತೆ. ಆ ಬಿಳಿಚುಕ್ಕಿಯ ಮೆರಗಿಗಾಗೇ ಹಿಂದಣ ಮೊದಲು ಕಪ್ಪುಪರದೆಯನ್ನು ರಚಿಸಲಾಗಿ, ಬಳಿಕ ಅದಲ್ಲಿ ಬಿಳಿಚುಕ್ಕಿಯನ್ನು ತಂದು, ಬಿಳಿಚುಕ್ಕಿಯನ್ನು ಹೊಳೆಸಿದಂತೆ.

=========================================================================
ಏನೋ.. ನನಗೇ ಕೆಲವು ಸರತಿ ನನ್ನ ಯೋಚನೆಗಳೇ ಅರ್ಥವಾಗಲ್ಲ .. ಇನ್ನ ಇದನ್ನು ನಾನು ಬರೆದುದನ್ನು ಓದಿದವರಿಗೆ ಅದೆಷ್ಟು ತಿಳಿಯುವುದೋ.! ಒಳ್ಳೆಯದಿದು ಎಂದು ಜನರನ್ನು ಯಾಮಾರಿಸುವುದು ಸುಲಭ ಬಿಡಿ, ದಡ್ಡ ಮಂದಿ ನಾವು :)

• mahesha's blog
• Login or register to post comments
• 401 ಹಿಟ್ಸ್
• ಈ ಪುಟವನ್ನು ಇ-ಮೇಯ್ಲ್ ಮಾಡಿ
• Printer-friendly version
•