ನಾವು ಆಡು ಮಾತಲ್ಲಿ ಬಳಸುವ "ಅವುದು, ಮಾಡಬವುದು, ಮಾಡವ್ನೆ, ಮಾಡವ್ರೆ, ಮಾಡಿವ್ರಿ, ಮಾಡವ್ಳೆ, ಮಾಡಯ್ತೆ" ಇದರ ಬಗ್ಗೆ ಉನ್ನಿಸ್ತಾ ಇದ್ದೇನು.

ಹೇಗೆ ಬಡಗಲಲ್ಲಿ ಪ => ಹ ಆಯಿತೋ, ನಮ್ಮ ಕಡೆ ಪ=>ವ ಆಗಿದೆ. ಅಂತ ನನ್ನ ಅನಿಸಿಕೆ

ಅಪ್ಪುದು => ಅಹುದು => ಹೌದು
ಅಪ್ಪುದು => ಅವುದು

ಮಾಡಬರ್ಪುದು => ಮಾಡಬಪ್ಪುದು
ಬಪ್ಪುದು => ಬಹುದು
ಬಪ್ಪುದು => ಬವುದು ( ಮಾಡಬವುದು )

ಮನೆಗೆ ಪೋಗು => ಮನೆಗೆ ಹೋಗು
ಮನೆಗೆ ಪೋಗು => ಮನಗೆ ವೋಗು

ಇನ್ನೊಂದು ನಮ್ಮಲ್ಲಿ ಇದೆ => ಅದೆ/ಅಯತೆ/ಐತೆ, ಇವೆ = ಅವೆ. ಹಾಗೆ ಇದ್ದಾನೆ = ಅದಾನೆ. ಇದ್ದೀನಿ => ಅದೀನಿ, ಹೀಗೆ ಇ ಬದಲು ಅ ಬಂದಯತೆ.
ಹೀಗೆ
ಅದೆ/ಅಯತೆ/ಐತೆ, ಅವೆ, ಅವನೆ, ಅವಳೆ, ಅವರೆ, ಇವು ಇದೆ, ಇವೆ, ಇಹನು, ಇಹಳು, ಇಹರು ಗಳಿಗೆ ಸಮ.

'ಇಹನೆ' ಒರೆಯಲ್ಲಿ, ಇ ಬದಲು ಅ, ಮತ್ತು ಹ ಬದಲು ವ ಬಂದರೆ ಅವನೆ ಆಗುವುದು.

ಮಾಡಿ + ಇಹನೆ = ಮಾಡಿಹನೆ
ಮಾಡಿ + ಅವನೆ = ಮಾಡವನೆ

ಮಾಡಿ + ಇಹರೆ = ಮಾಡಿಹರೆ
ಮಾಡಿ + ಅವರೆ = ಮಾಡವರೆ.

ಮಾಡಿ + ಇವೆ = ಮಾಡಿವೆ
ಮಾಡಿ + ಅವೆ = ಮಾಡವೆ.

ಇಂತಹ ಪ,ಬ,ಮ ಗಳ ಬದಲು, ವ ಬರುವುದನ್ನು ಕೇಶೀ ರಾಜನೂ ಹೇಳಿದ್ದಾನೆ.
ಮಳೆ + ಪಳ್ಳಿ = ಮಳೆವಳ್ಳಿ
ಮುಂದು + ಪರಿ = ಮುಂದುವರಿ
ಬಲೆ + ಪಣ್ಣು = ಬಲೆವಣ್ಣು
ಮೂರ್‍ + ಪತ್ತು = ಮೂರ್ವತ್ತು => ಮುವ್ವತ್ತು
ನಲ್ + ಪಗಲು = ನಲ್ವಗಲು

ಆದುದರಿಂದ,
ಅವುದು, ಮಾಡಬವುದು, ಮಾಡವನೆ, ಮಾಡವರೆ, ಮಾಡವೆ, ಮಾಡಯತೆ. ಇವೆಲ್ಲ ಸರಿಯೇ. ಪಕ್ಕ ಕನ್ನಡವೇ. ಏಕೆಂದರೆ ಇವು ನಿಕ್ಕುವ ನಮ್ಮ ಒಂದು ಕಟ್ಟಳೆಯನ್ನು ಪಾಲಿಸುತ್ತದೆ.

===========================================================
ಮಾಡಕ್ಕೆ/ಮಾಡಕ್ಕಿಲ್ಲ

ಮಾಡು + ಅಕ್ಕೆ = ಮಾಡಕ್ಕೆ
ಮಾಡಕ್ಕಿ + ಇಲ್ಲ = ಮಾಡಕ್ಕಿಲ್ಲ.

"ಮಾಡು"(verb root) ಇದನ್ನು ನಾವು ನೇರ noun ಆಗೇ ಬಳಸಬವುದು.
ಮಾದರಿ.
೧)ಬಾಳು( to live/life) ೨) ಹಾಡು( to sing/song) ಮುಂ......

ಹಾಗೆ ಎಲ್ಲ verb root ಗಳಿಗೆ 'ಅಕ್ಕೆ' ಸೇರಿಸದರೆ, ಅದು ಓಸುಗರ/reason ಹೇಳುವುದು

ಮಾಡಕ್ಕೆ => 'ಮಾಡುವುದು ಓಸುಗರ"
ಕುಡಿಯಕ್ಕೆ => 'ಕುಡಿಯುವುದಕ್ಕೆ ಓಸುಗರ"

ಇವು ಕೂಡ ಒಂದು ಕಟ್ಟಳೆಯಂತೆ ಸರೀತವೆ.
===========================================================

ವ್ಯಾಕರಣ ಅಂದರೆ ನಮ್ಮ ನುಡಿಯನ್ನು ಹೀಗೇ ಎಂದು ಹೇಳಲು ನಾವು ಕಂಡುಕೊಂಡ ಕಟ್ಟಳೆಗಳು. ಆದುದರಿಂದ ನಮ್ಮ ಕಡೆ ಬಲು ಹೆಚ್ಚು ಮಂದಿ ಆಡು ಈ ಬಗೆಗಳನ್ನು ಕನ್ನಡದ ವ್ಯಾಕರಣದ ಒಂದು ಪಾಲೆಂದೇ ಎಣಿಸಬೇಕು.

ಇಂತ ಇನ್ನು ಹಲವು ಗಮನಿಕೆಗಳು ಅವೆ. ಮುಂದೆ ಹಾಕ್ತೀನಿ.