ಇನ್ನು ಕೆಲವು ದಿನಗಳಲ್ಲಿ ನನಗೂ, ಹರಿಯಂತೆ ಇಪ್ಪತ್ತಯ್ದು ಆಗುವುದು..

ಹರಿ ಹೇಳಿಕೊಂಡಿರುವ ಎಲ್ಲ ಬೇಸರಗಳ ಜೊತೆ ಹಲವು ಹೇಳಲಾಗದ ನಲಿವುಗಳೂ ಉಂಟು..

ನನಗೆ ಇಪ್ಪತ್ತಾದಾಗ ಬಲು ಬೇಸರವಾಗಿದ್ದು.. ಟೀನ್ ಏಜ್ ಹೋಯ್ತಲ್ಲ.. ಇನ್ನು ಮನೆಯವರೆಲ್ಲ ’ಹುಡುಗಾಟಿಕೆ ಸಾಕು’ ಒಂದು ಕತ್ತೆ ವಯಸ್ಸಾಯ್ತು ಎಂದು ಕಟ್ಟುನಿಟ್ಟು ಮಾಡ್ತಾರೆ ಅಂತ. ಇಪ್ಪತ್ತಾದ ಮೇಲೇ ಗೆಳೆಯರು, ದಿಟವಾದ ಗೆಳಯರು ಸಿಕ್ಕಿದ್ದು.

ಈ ಇಪ್ಪತ್ತಯ್ದನ್ನು ಮುಟ್ಟುವ ಮುನ್ನ, ಉಳಿದಿರುವ ಗೆಳೆಯರೇ ಇನ್ನು ಮಿಕ್ಕ ಬಾಳಿಗೆ. ಈಗ ಹೊಸ ಗೆಳೆಯರನ್ನು ಮಾಡಿಕೊಂಡು, ಹತ್ತಿರವಾಗಿಸಿಕೊಳ್ಳೋದು ಬಲು ಕಶ್ಟವೇ. ನಮ್ಮ ಕಾಲೇಜಿನ ದಿನಗಳಲ್ಲಿ, ಕೆಲಸಕ್ಕೆ ಸೇರಿದ ಹೊಸತರಲ್ಲಿ ಹೊಸಬರ ಜೊತೆ ಇದ್ದ ಸಲಿಗೆಯ ಮಾತು ಈಗ ಮೆಲ್ಲಗೆ ಮಾಯವಾಗ್ತಾ ಇದೆ ಅನ್ನಿಸ್ತದೆ.

ಹಲವು ಗೆಳೆಯರು ಹೆಂಗೆಳತಿಯರನ್ನು ಪಡೆದು ತಮ್ಮ ಜೀವನ ಸಾರ್ಥಕ ಮಾಡಿಕೊಂಡರು. ಈಗ ತಿಂಗಳಿಗೊಮ್ಮೆ ಕೂಡ ಅವರ ಜೊತೆ ಮಾತಾಡೋದು ದೊಡ್ಡ ಸಾಹಸ. ಕೆಲವರು ಗೆಳತಿರನ್ನು ಕಳೆದುಕೊಂಡು ನೊಂದ-ಹೃದಯಿಗಳಾಗಿದ್ದಾರೆ;ಅವರ ರಿಪೀರಿ ಮಾಡವ ಹೊಣೆಹೊತ್ತ ಗೆಳಯರೂ ಇದ್ದಾರೆ. ಕೆಲವರು ಮದುವೆಯಾಗೂ ಇದ್ದಾರೆ. ಮಿಕ್ಕ ನಮ್ಮಂತ ಬಡಪಾಯಿಗಳು ಮಾತ್ರ ದಿನಾ ಪೋನಿನಲ್ಲಿ ಮಾತಾಡಿಕೊಂಡು, ವೀಕೆಂಡು ಮಾಲುಗಳಲ್ಲಿ ಅಲೆದಾಡಿಕೊಂಡು ಇದ್ದೀವಿ.

ನಮ್ಮಗಳ ಮನೆಗಳಲ್ಲಾಗಲೇ ಮದುವೆಯ ಮಾತುಗಳ ಗುಲ್ಲು ಎದ್ದಿದೆ. ಬೆಂಗಳೂರು ಬಲು ಕೆಟ್ಟ ಊರು. ಯಾವುದೋ ಭಾಷೆಜಾತಿಕುಲದ ಹುಡುಗಿಯ ಹಿಂದೆ ನಮ್ಮ ಹುಡುಗರು ಬಿದ್ದು ಹಾಳಾಗುವ ಮೊದಲು, ಅವರಿಗೊಂದು ನಮ್ಮ ಜಾತಿ ಒಳ್ಳೆ ಮನೆಯ ಹುಡುಗಿಯನ್ನು ಗಂಟು ಹಾಕಬೇಕೆಂದು ಅಮ್ಮ-ಅಪ್ಪಂದಿರಿಗೆ ಚಿಂತೆ ಎದ್ದಿದೆ. ಒಟ್ಟಿನಲ್ಲಿ ನಮ್ಮ ಸ್ವಾತಂತ್ರ್‍ಯ ಹರಣಕ್ಕೆ ಹೊಂಚು.

ಇನ್ನು ಮುಂದಿನ ವಿದ್ಯಾಭ್ಯಾಸ, ಎಮ್. ಟೆಕ್. .. ಮುಂತಾದವು ಈಗ ಮನಸ್ಸಿನಲ್ಲಿ ಇದ್ರೂ, ಅದು ಒಂದು ತರ ಕಷಾಯ. ಕುಡಿದರೆ ಒಳ್ಳೇದು ಆದ್ರೆ ರುಚಿಸಲ್ಲ.

ಒಟ್ಟಿನಲ್ಲಿ.. ಮುಂದೆ ಏನು ಎಂಬ ದೊಡ್ಡ ಪ್ರಶ್ನೇ, ದಿನೇ ದಿನೇ ದೊಡ್ಡದಾಗ್ತಾ ಇದೆ. ಅದಕ್ಕೆ ಉತ್ತರ ಅಂತ ಹಲವರು ಹೊರದೇಶಕ್ಕೆ ಹಾರುವ ತಯಾರಿ ಮಾಡಿದ್ದಾರೆ, ಇನ್ನು ಕೆಲವರು ಕೆಲಸ ಬದಲಾಯಿಸ್ತಾ ಇದ್ದಾರೆ. ಇನ್ನು ಕೆಲವರು ಬೀಚುಗಳು, ದೇವಳಗಳು ಹೀಗೆ ಪ್ರವಾಸ ಮಾಡುತ್ತಾ ಉತ್ತರ ಹುಡುಕ್ತಾ ಇದ್ದಾರೆ.

ನನ್ನ ಇಪ್ಪತ್ತಯ್ದನೇ ಹುಟ್ಟುಹಬ್ಬಕ್ಕೆ ನಾವು ಗೆಳೆಯರೆಲ್ಲ ಸೇರೋಣ, ಅಂತ ಈಗಲೇ ಮಿನ್ನೋಲೆಗಳನ್ನು, ಪೋನುಗಳನ್ನು ಹಚ್ಚಬೇಕು.. ಎಲ್ಲರು ಬಿಜಿ.. ೧೦ ಮಂದಿಗೆ ತಿಳಿಸಿದರೆ ೪ ಜನ ಬರ್ತಾರೆ.

ಹಾಗೆ ಇಪ್ಪತ್ತಯ್ದು ತುಂಬಿದವರಿಗೆ ಒಳ್ಳೆಯ ಹಾರೈಕೆ.

ಆದ್ರೆ ತಲೆ-ಬುದ್ದಿ-ಹೃದಯ ಜೋಪಾನ