ಈ ವಾದದಲ್ಲಿ ಅಷ್ಟೇನೂ ಹುರುಳಿಲ್ಲ. ಕರಾವಳಿಯಲ್ಲಿದ್ದ ಅರಸರು ಯಾರು? ಕದಂಬರು ಇದ್ದರೂ, ಬನವಾಸಿ ಕದಂಬರ ಕಾಲದಲ್ಲಿ ಅಂತಹ ಬರವಣಿಗೆ ಏನೂ ಸಿಕ್ಕಿಲ್ಲವಲ್ಲ? ಮತ್ತೆ ಬಂದ ಚಾಲುಕ್ಯ ರಾಷ್ಟ್ರಕೂಟರ ನಾಡು ಕರಾವಳಿಗೆ ಹತ್ತಿರವಿಲ್ಲ.  ಕವಿರಾಜಮಾರ್ಗ ರಚಿತವಾಗಿರುವುದು ಕರ್ನಾಟಕಾಂಧ್ರ ಗಡಿಯ ಮಳಖೇಡದಲ್ಲಿ (ಅಥವಾ ಈಗಿನ ಮಹಾರಾಷ್ಟ್ರದ ಲಾತೂರಿನಲ್ಲಿರಬಹುದು). ಪಂಪ ಇದ್ದದ್ದು (ಈಗಿನ) ಆಂಧ್ರದ ಮಹಬೂಬನಗರದ ಬಳಿಯ ವೆಂಗಿಯಲ್ಲಿ. ರನ್ನನಿದ್ದದ್ದು ಮುಧೋಳದಲ್ಲಿ. ಚಾಲುಕ್ಯ ರಾಷ್ಟ್ರಕೂಟರ ರಾಜ್ಯಗಳ ರಾಜಧಾನಿಗಳೂ ಕೃಷ್ಣೆ ಗೋದಾವರಿಯರ ಬಯಲಲ್ಲೇ. ಇದೇ ಕಾಲದ ಹೊಯ್ಸಳರೂ ಸಮುದ್ರ ತಡಿಯವರಲ್ಲ ( ರಾಮಚಂದ್ರ ಚರಿತ ಪುರಾಣ)

ಹವ್ಯಕ ಕನ್ನಡ ಹಳೆಗನ್ನಡದ ಗುಣಗಳನ್ನು ಉಳಿಸಿಕೊಂಡಿರುವುದು ನಿಜ. ಆದರೆ ಇಲ್ಲಿ ಹೇಳಿರುವ ಕಾರಣ ಮಾತ್ರ ಸರಿ ಇಲ್ಲ.

ಹೞಗನ್ನಡದ ಹರವು ಕಾವೇರಿಯಿಂದಮಾ ಗೋದಾವರಿವರೆಗಮಿರ್ದತ್ತು. ಬಱಿಯ ಕರಾವಳಿಯಲ್ಲ. ಕವಿರಾಜಮಾರ್ಗಕಾರ, ಪಂಪ, ರನ್ನ, ಪೊನ್ನ, ಜನ್ನ, ನಾಗಚಂದ್ರ ಕರಾವಳಿಯವರಲ್ಲ. ಕವಿರಾಜಮಾರ್ಗಕಾರ ಪಟ್ಟದಕಲ್ಲು, ಪುಲಿಗೆಱೆ, ಕೊಪ್ಪಳ ಮತ್ತು ಒಂಕುಂದ(ಈಗಿನ ಒಕ್ಕುಂದ) ನಡುವಿನ ಕನ್ನಡ ಬೞಸುತ್ತಿದ್ದೇನೆ ಎನ್ನುತ್ತಾನೆ. ಇವಾವುವು ಕರಾವಳಿಯ ಪ್ರದೇಶಗಳಲ್ಲ. ರನ್ನ ಬಾಗಲಕೋಟೆಯ ಮುಧೋಳದವನು. ಪಂಪನ ಕನ್ನಡ ಅವನೇ ಹೇೞುವಂತೆ ಪುಲಿಗೆಱೆಯ ತಿರುಳ್ಗನ್ನಡ (ಈಗಿನ ಗದಗ ಜಿಲ್ಲೆಯ ಲಕ್ಷ್ಮೇಶ್ವರ ಈ ಪುಲಿಗೆಱೆ) ಜನ್ನ ಹೊಯ್ಸಳರ ಆಸ್ಥಾನ ಕವಿ (ಹಾಸನ ಜಿಲ್ಲೆ) ನಾಗಚಂದ್ರ ಬಿಜಾಪುರದವನು. ಜನ್ನನೂ ಪಂಪನೂ ಸಂಬಂಧಿಗಳು. ಇವರಾರೂ ಕರಾವಳಿಯವರಲ್ಲ.