ಬಿಟ್ಟು ಹೋದೆ, ಸರಿ!
ಅದೇ ನೋವಿನ ಗಾಯ
ಇನ್ನೂ ಆರದೆ........ತೆರೆದೇ ಇದೆ, ಉರಿದೇ ಇದೆ...

ಅದು ಮೆದುವಾಗಿ ಮಾಯುವುದೋ
ಅದೇ ಹದ್ದಾಗಿ ಹಾಯುವುದೋ
ಇನ್ನೂ ಆ ತುಮುಲ...ಕೆರಳೇ ಇದೆ, ನರಳೇ ಇದೆ...

ಈ ನಡುವೆ ಈ ಬದುಕ
ಒಣನದಿ ದಿಕ್ಕಿಲ್ಲದೇ ಉಕ್ಕಿ
ಇನ್ನೂ ಕೊರೆದು..... ಹರಿದೇ ಇದೆ, ಸುರಿದೇ ಇದೆ....

ಇದರೊಳಗೆ ಹೇಗೋ ಈ ಎದೆ
ನಿನ್ನ ಮರೆತಿಹೆನೆಂದು ಹುಸಿನಂಬಿ
ಇನ್ನೂ ಮಿಡಿದು......ಬಡಿದೇ ಇದೆ, ತುಡಿದೇ ಇದೆ.....

ನೆನ್ನೆ ನಿನ್ನ ಕರೆ ಬಂತು
ಹೊಸ ನಿನ್ನಾ ಸಂಗಾತಿಯ
ಕುರಿತು ಹೇಳಿ ತೀರಿತು, ಹಾರಿತು.

ನಿನ್ನ ದನಿಯಲಿ ಒಲವಿತ್ತೇ?!
ಎಶ್ಟು ಹೆದರಿಕೆ ಮುಜುಗರ
’ನನ್ನ ಏನೂ ಮಾಡಬೇಡ’ ಎಂಬ ದಿಗಿಲು....

’ಹುಂ’ ಅಂದುದ ಬಿಟ್ಟು ಮತ್ತೊಂದು
ಸದ್ದು ಉಲಿದುದ್ದುಂಟೇ ನಾನು?
ಏನು ಹೇಳಿಲಿ, ಏನಾದರೂ ಹೇಳಬೇಕಿತ್ತೇನು?!!

ಏನೂ ಹೇಳೆನು, ಹೇಳುವುದೆಲ್ಲ
ಹೇಳಾಯಿತು, ಕೇಳಾಯಿತು ಎಂದರೂ
ಏನೋ ತೀರದೆ........ ಉಳಿದೇ ಇದೆ. ಅಳಿದೇ ಇದೆ....