ಏನೋಪ್ಪ.. ನಾನೂ ಇಸ್ಟು ದಿನ ಕನ್ನಡಾನ್ನೇ ಮಾತಾಡ್ತೀವಿ. ಯೋಳ್ತೀವಿ, ಕೇಳ್ತೀವಿ ಅಂತ ಅಂದ್‌ಕೊಂಡ್ವು..
ಅಂಗೆ ನಮಗೆ ನೀವು ನಮ್ಮ ತಾಯ್ನುಡಿ ಅಂತ ಯೋಳುಕೊಡು ನುಡಿ ತಲೆಗೆ ಇಳಿಯಕ್ಕಿಲ್ಲ.. ವಸಿ ಸಲೀಸಾಗಿ ಯೋಳಿ ಅಂತ ಬೇಡ್ತಿದ್ವು...

ಆದರೆ ವಿಸಯ ಏನು ಅಂದ್ರೆ ನಾವ್ ಆಡೋದು ಕನ್ನಡ ಅನ್ನೋದೇ ಅಲ್ಲವಂತೆ . ಇಲ್ವೇ ಕನ್ನಡ ಅನ್ನೋದನ್ನ ವಸದಾಗಿ ಕಲಿತಿರೋರಂಗೆ ತಪ್ತಪ್ ಮಾತಾಡ್ತೀವಂತೆ.. ನಮ್ದು ಕನ್ನಡವೇ ಅಲ್ಲವಂತೆ. ಇನ್ ಅದು ತಮಿಳಾ ಅದೂ ಅಲ್ಲ.. ಮತ್ತೇನೂ?

ಅಂಗಾರೆ ನಮ್ದು ಕನ್ನಡವೇ ಅಲ್ಲ ಅಂದ್‌ಮ್ಯಾಕೆ ನಮ್ ಮಕ್ಕಳೂ ಯಾಕೇ ಇವ್ರು ಯೋಳೋ ಕನ್ನಡವನ್ನೇ, ಕನ್ನಡದಾಗೇ ಕಲೀಬೇಕು ಅಂತ ಒತ್ತಾಯ ಮಾಡ್‌ಬೇಕು. ನಾವಾಡೋ ನುಡಿಗೆ ಒಂದ್ ವಸ ಯೆಸ್ರಿಟ್ಟು ಇವರೂ ಈ ನುಡಿಯವ್ರು.. ಅಂತ ಅದನ್ನೇ ಕಲಿಸಿದ್ರೆ ಆಯ್ತಲ್ಲ... ಆಗ ನಮಗೂ ನಮ್ ತಾಯ್ನುಡಿಯಲ್ಲೇ ಕಲಿಬೋದಲ್ಲ...

ಏನಾರ ಯೆಸರಿಡಿ.. ನಮ್ಗೆ ಯೆಸರಲ್ಲ ಮುಕ್ಯ.. ನಾವ್ ಯಾವ್ದನ್ನ ಮಾತಾಡ್ವೋ, ಯೆಂಗ್ ಮಾತಾಡ್ತೀವೋ ಅಂಗೇ ಮಾತಾಡ್‌ಕೊಂಡ್ ಇರ್ತೀವಿ. ನಮಗೆ ಇಜ್ನಾನ, ಗಣಿತ, ಎಲ್ಲಾ ನಮ್ ನುಡಿಯಾಗೇ ಯೋಳಕೊಡಿ.. ಇಲ್ಲ ನಮ್ ಪಾಡಿಗೆ ಇಂಗ್ಲೀಸಲ್ಲಿ ಕಲಿಯಕ್ಕೆ ಕಲ್ ಆಕ್ದೇ ಬುಟ್‌ಬುಡಿ.

ನಮ್ಗೆ ನೀವ್ ಯೋಳೋ ಕನ್ನಡ ಬೇಕಾಗಿಲ್ಲ. ನಮ್ ನಾಲಗೆ ವೊರಳಲ್ಲ ಅದನ್ನ ಯೋಳಕ್ಕೆ. ನಾವ್ ಇಂಗ್ಲೀಸ್ ಕಲಿತೀವಿ. ಇಂಗ್ಲೀಷನ್ನಲ್ಲ..!! ಇಂಗ್ಲೀಸಲ್ಲಿ ’ಖಾರ್‍’ ಅಂತ ಇಂಗ್ಲೀಸ್ ಮಂದಿ ಅಂದ್ರೂ ನಾವ್ ’ಕಾರ್‍’ ಅಂತ ಅನ್‌ಬೋದು.. ನಾಲಗೆ ವೊರಳಲ್ಲ ಅಂದ್ರೆ ಯಾವ್ ಪರಂಗಿ ಬಂದು ಬಯ್ಯಲ್ಲ!