ಕಳೆದ ನಾಲ್ಕೈದು ತಿಂಗಳುಗಳಲ್ಲಿ ಇಂತಹದೇ ಇನ್ನೂ ಮೂರ್ನಾಲ್ಕು ಘಟನೆಗಳಾಗಿವೆ, ಅವೆಲ್ಲವನ್ನೂ ಸತತವಾಗಿ ಟಿವಿಯಲ್ಲೂ ದೇಶದಾದ್ಯಂತ ತೋರಿಸಲಾಗಿದೆ. ಹಾಗಿದ್ದರೂ ಅಂತಹ ತೆರೆದ ಬಾವಿಗಳನ್ನು, ಮ್ಯಾನ್ ಹೋಲ್ ಗಳನ್ನು ನೋಡಿದವರೆಲ್ಲರೂ ಸುಮ್ಮನಿದ್ದುಬಿಡುವುದೇಕೆ? ಪ್ರತಿನಿತ್ಯ ಸಾಗುವ ದಾರಿಯಲ್ಲಿ ಇಂತಹವನ್ನು ಕಂಡಾಗ ಅವುಗಳ ಮೇಲೊಂದು ಮರದ ಕೊಂಬೆಯನ್ನೋ, ಅಥವಾ ಸುತ್ತಲೂ ಒಂದೆರಡು ಕಲ್ಲುಗಳನ್ನೋ ಇಟ್ಟು ಬಿಡೋಣ ಅಂತ ಅದ್ಯಾಕೆ ಯಾರಿಗೂ ಅನಿಸುವುದೇ ಇಲ್ಲ? ಊರಿನ ಮೂಲೆ-ಮೂಲೆಯನ್ನೂ ನೋಡಿಕೊಳ್ಳಲು ನಿಯೋಜಿತರಾಗಿರುವ ಸರಕಾರಿ ಸಿಬಂದಿಗೆ ಇವೆಲ್ಲ ಕಾಣಿಸುವುದೇ ಇಲ್ಲವೆ ಅಥವಾ ಪಡೆಯುವ ಸಂಬಳಕ್ಕೆ ಅವರು ಮಾಡಬೇಕಾದ ಕೆಲಸಗಳಲ್ಲಿ ಇವು ಸೇರಿಲ್ಲವೆ? ನಮ್ಮ ಶಿಕ್ಷಣವೆಂದರೆ ಬರೇ ಪುಸ್ತಕದ ಬದನೇಕಾಯಿ ಎನ್ನುವುದು ಇದಕ್ಕೇ ಇರಬಹುದು