ನಾನೂ ಒಬ್ಬ Software ಕೆಲಸಗಾರನೇ. ಅದ್ರಲ್ಲೂ ಒಂದು ದೊಡ್ಡ ಹೆಸರುವಾಸಿಯಾದ ಅಮೆರಿಕದ ಸಂಚಾರಿ ದೂರವಾಣಿ ಉಪಕರಣ ಕಂಪೆನಿಯಲ್ಲೇ ಕೆಲಸ.

ಆದ್ರೆ ಈ ’ಮಾತಾಡ್ ಮಾತಾಡು ಮಲ್ಲಿಗೆ’ ಸಿನಿಮದ ಪರಿಣಾಮ ಇರಬೇಕು. ನನ್ನ ತಂತ್ರಾಂಶೇತರ ಮಿತ್ರರು, ಯಾಕೋ ನನ್ನ ಕೆಲಸದ ಮೇಲೆ, ನನ್ನ ಕಂಪೆನಿ ಮೇಲೆ ಕಡುಗೋಪದ ಸುಡುವುರಿಯನ್ನು ಬೀರಹತ್ತಿದ್ದಾರೆ. ನನಗಂತೂ ಇವರ ಮಾತು ಕೇಳಿ ಮರುಮಾತು ಹೇಳಕ್ಕೆ ಅಂಜಿಕೆ ಆಗಿ ಹೋಗಿದೆ.

ಕೆಲವು ಅವರ ಸಾಮಾನ್ಯವಾದ ಅಂತಹ ಸಂಭಾಷಾಣಾವಾಕ್ಯಾಂಶಗಳ ಮುಖ್ಯಾಂಶಗಳು.

೧) ಮುಖ್ಯವಾಗಿ ಈ ತಂತ್ರಾಂಶೋದ್ಯೋಗಿಗಳ ಕಾರಣದಿಂದೇ ನಮ್ಮ ದೇಶಕ್ಕೆ ಈ ಅಮೆರಿಕಾಕಂಪೆನಿಗಳು ವಕ್ಕರಿಸಿಕೊಂಡಿವೆ. ಈ ಪರದೇಶಿ ಪರಂಗಿಗಳ ಗುಲಾಮರಿಂದೇ ನಮ್ಮ ಕೃಷಿಕರ ಪವಿತ್ರೋತ್ತಮಭೂ ಅತಿವಿಶೇಷಾರ್ಥಿಕವಲಯಸುಸ್ಥಾಪನೆಗೆ ಈಡಾಗಿ ಹಾಳಾಗಿ, ನಮ್ಮ ರೈತರು ವೀಥೀನಾಥರಾಗುತ್ತಿದ್ದಾರೆ .

೨) ಈ ತಂತ್ರಾಂಶೋದ್ಯೋಗಿಗಳು ಮಾಡುವ ಯಾವ ಉತ್ಪತ್ತಿಯೂ ನಮ್ಮ ದೇಶದ ಸಾಮಾನ್ಯಸಾಮಾನ್ಯ ಜನಕ್ಕೆ ಯಾವ ಪ್ರಯೋಜನೋಪಯೋಗಕ್ಕೆ ಇಲ್ಲ. ಅದು ಬರೀ ಅಮೆರಿಕೆಯಂತ ಶ್ರೀಮಂತ ಧನಿಕ ದೇಶಗಳ ಮೋಜಿಗೆ ಇರುವ ಕ್ರೀಡಾಸಾಮಗ್ರಿ.

೩) ಇವರು ತಮ್ಮನ್ನು ತಾವು ಮಾರಿಕೊಂಡಿದ್ದಾರೆ. ಧನದುರಾಶೆ ಇವರಿಗೆ. ಅದಕ್ಕೆ ಅಷ್ಟೊಂದು ಸಂಬಳ ತಗೆದುಕೊಂಡು ಸಮಾಜಕ್ಕೆ ಏನು ಮಾಡಲ್ಲ. ಇವರ ಕಂಪೆನಿಗಳಿಗೆ ನಮ್ಮ ಸರಕಾರ ಕರವಿನಾಯಿತಿ ಬೇರೆ ಕೊಟ್ಟು ಕೊಬ್ಬಿಸಿದೆ.

೪) ಇವರು ಇಲ್ಲಿ ಓದಿ ಕಲಿತು, ಅಮೆರಿಕಕ್ಕೆ ಪಲಾಯನ ಮಾಡಿದ/ವ ದೇಶದ್ರೋಹಿಗಳು

೫) ಇವರಿಂದೇ ನಮ್ಮ ಸ್ವಚ್ಛವಾದ ಅಚ್ಚ-ಕನ್ನಡದಲ್ಲಿ ತುಚ್ಛವಾದ ಆಂಗ್ಲಪದಗಳು ಭರಿತವಾಗಿ ಬರ್ಬರವಾಗಿ ನಮ್ಮ ಮಾತೃಭಾಷೆಯ ಕೊಲೆಯಾಗುತ್ತಿದೆ. ಇವರ ಆಂಗ್ಲೀಯ ವ್ಯಾಮೋಹಕ್ಕೆ ನಮ್ಮ ಭಾಷೆ, ಸಂಸ್ಕೃತಿ, ನಮ್ಮ ಭೂಜಲಾನಿಲಪ್ರಾಣಿಪಕ್ಷಿಜನಮಾನಸದ ಎಲ್ಲದವೂ ಅವನತಿಯ ದುಷ್ಪಥದಲ್ಲಿ ಸಾಗಿದೆ.

೬) ಇವರಿಂದ, ಇವರಿಗಾಗಿ ಬೃಹದ್ವೃಹತ್ ವಾಣಿಜ್ಯಸಂಕೀರ್ಣಗಳು ಬಂದು, ನಮ್ಮ ರಸ್ತೆಪಾರ್ಶ್ವದ ವ್ಯಾಪಾರಿಗಳಿಗೆ ನಷ್ಟವಾಗಿ, ಅವರ ಜೀವನೋಪಾಯಕ್ಕೆ ಸಂಕಷ್ಟವಾಗಿದೆ.

೭) ಇವರ ಯಂತ್ರರಥಗಳಿಂದ ಬಂದ ಕಡುಕೃಷ್ಣಧೂಮ್ರಾನಿಲದಿಂದ ನಮ್ಮ ನೈರ್ಗಿಕ ವಾತಾವರಣವು ಕಲುಷಿತವಾಗಿ ಮಾಲಿನ್ಯವಾಗುತ್ತಿದೆ.

೮) ಇವರ ದೆಸೆಯಿಂದ ವಿದ್ಯುದುಪಯೋಗ ಅತ್ಯತಿಯಾಗಿ, ವಿದ್ಯುದುತ್ಪಾದನಾಗಾರಕ್ಕೆಂದು ಅಣುಸ್ಥಾವರಗಳು, ಉಷ್ಣೋತ್ಪಾದಿತವಿದ್ಯುದಾಗರದಿಂದ ನಮ್ಮ ಇಡೀ ಭೂಖಂಡವೇ ಪ್ರಳಯಮುಖವಾಗಿದೆ.

.
.
.
.
.

ಇನ್ನು ಹಲವು ಆಪಾದನೋಪೇತತಂತ್ರಾಂಶಿಗಳ ಭಜನಾವಳಿ ಇದೆ, ಅವೆಲ್ಲ ಬೇಡ ಸಾಕು.
.
.
.
.
.
.
.
.

ಹೀಗೆಲ್ಲ ಅಂದ್ರು ನನ್ನ, ನನ್ನ ಕೆಲವನ್ನ :( !! ಎಷ್ಟು ಬೇಜಾರಾಯ್ತು ಗೊತ್ತು ಮನಸ್ಸಿಗೆ, ಇಷ್ಟೊಂದು ಅನ್ನಿಸಿಕೊಂಡೂ ಈ ದೇಶದಲ್ಲಿ ಇರಬಾರದು

ಏನಾರ ಹೇಳೋರು ಹೇಳಿ!