ದೇವರೆಂಬ ಕಲ್ಪನೆಯಿಂದ ಬಿಡುಗಡೆ ಹೊಂದಿದೆ: ಸಾಮಾನ್ಯ ಮನುಷ್ಯನ‌ ಬದುಕಿನ ಪುಟಗಳಿಂದ…1

ಪ್ರಿಯ ಓದುಗರೇ,

ನಾನು ನನ್ನ ಹಳೆಯ ಬದುಕಿನ ಪುಟಗಳನ್ನು ೪೯ ವಸಂತಗಳ ಬಳಿಕ ನೋಡಿದಾಗ ನನ್ನ ಬದುಕಿನ ಕೆಲವು ಘಟನೆಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುವ ಬಯಕೆ ಚಿಗುರಿತು. ನನ್ನ ಅನುಭವಗಳು ನಿಮ್ಮದೂ ಆಗಿರಬಹುದು ಅಥವಾ ಭಿನ್ನವಾಗಿರಬಹುದು. ಓದಿ… ನಿಮ್ಮ ಮನದಲ್ಲಿ ಪುಟಿದೇಳುವ ಭಾವನೆಗಳನ್ನು ವ್ಯಕ್ತಪಡಿಸಿ….

೧ ಆಸ್ತಿಕನಿಂದ ನಾಸ್ತಿಕನೆಡೆಗೆ

ನಾನು ಚಿಕ್ಕಂದಿನಲ್ಲಿ ಬೆಳೆದದ್ದು ಧಾರ್ಮಿಕ ವಾತಾವರಣದಲ್ಲಿ. ಚಿಕ್ಕಂದಿನಲ್ಲಿ ಅಜ್ಜಿಯ ಮನೆಗೆ ಹೋದಾಗಲೆಲ್ಲಾ ದೇವಸ್ಥಾನಗಳ ದರ್ಶನ. ದೇವರ ಬಗ್ಗೆ ಕೂತೂಹಲ. ಚಿಕ್ಕಮ್ಮನ ಸಂಗ್ರಹದಲ್ಲಿದ್ದ ಪುಸ್ತಕಗಳ ಪಠಣ. ವಿವೇಕಾನಂದರ ಭಕ್ತಿಯೋಗ, ರಾಜಯೋಗ, ಇತ್ಯಾದಿ ಪುಸ್ತಕಗಳನ್ನು ಆಸಕ್ತಿಯಿಂದ ಓದಿದ್ದೆ. ಬಹುಶ: ನನ್ನ ಅಜ್ಜಿ ಊರು ಕೇರಳದಲ್ಲಿದ್ದು ನನಗೆ ಮಲಯಾಳಂ ಬರದಿರುವುದು, ಅಲ್ಲಿ ಗೆಳೆಯರಾರೂ ಇಲ್ಲದಿರುವುದು ಪುಸ್ತಕ ಓದಿಗೆ ಆಸಕ್ತಿ ಮೂಡಿಸಿತೇನೋ? ಗೀತೆ, ಬೈಬಲ್ ಗಳನ್ನೂ ಓದಿದೆ. ದೇವರ ಬಗ್ಗೆ ಮತ್ತಷ್ಟು ಕೂತೂಹಲ. ನನ್ನ ಕಾಲೇಜ್ ಲೈಬ್ರರಿಯಲ್ಲಿ ಜಗತ್ತಿನ ಹಲವಾರು ಧರ್ಮಗಳನ್ನು ಪರಿಚಯಿಸುವ ಪುಸ್ತಕ ಓದಿದೆ. ದೇವಸ್ಥಾನಕ್ಕೆ ಹೋದಾಗಲೆಲ್ಲಾ ದೇವರಲ್ಲಿ ಏನು ಬೇಡುವುದು? ನನಗೆ ಬುದ್ಧಿ, ಧನ ಕೊಡು ಎಂದರೆ ನಾನೊಬ್ಬ ಸ್ವಾರ್ಥಿಯಾಗುತ್ತೇನೆ. ನಾನು ಎಲ್ಲರಿಗೂ ಬುದ್ಧಿ, ಧನ ಕೊಡು ಎಂದು ಬೇಡುತ್ತಿದ್ದೆ. ಆಗ ನನಗೂ ಸಿಗುತ್ತಲ್ಲವೇ ಎಂದಿರಬಹುದು.

ಪಿಯುಸಿ ಓದಬೇಕಾದರೆ ನಾನು ಪಾಠ ಓದಿದ್ದು ಕಡಿಮೆ. ಆರ್ಯಸಮಾಜ, ಬ್ರಹ್ಮಕುಮಾರಿ, ರಾಮಕೃಷ್ಣ ಆಶ್ರಮದಲ್ಲಿ ಪ್ರವಚನಗಳನ್ನು ಕೇಳಲು ಹೋಗುತ್ತಿದ್ದೆ. ಪ್ರಥಮ ಡಿಗ್ರಿ ಓದುತ್ತಿದ್ದಾಗ ರಾಮಕೃಷ್ಣ ಆಶ್ರಮದಲ್ಲಿ ಪ್ರವಚನಕ್ಕೆ ಹೋಗಲು ಯಾವ ಹುಡುಗರು ಸಿದ್ಧರಿರಲಿಲ್ಲ. ಆಗ ನಾನೇ ಹೋಗಿದ್ದೆ. ಆದರೆ ಆಗ ಆಸಕ್ತಿ ಇಲ್ಲದವರೆಲ್ಲಾ ಈಗ ಪ್ರಚಂಡ ಆಸ್ತಿಕರಾಗಿ ದೇವರ ಪೂಜೆ ಮಾಡಿ ತಮ್ಮ ಜೀವನ ಸಾರ್ಥಕಗೊಳಿಸುತ್ತಿದ್ದಾರೆ.

ನಾನು ಡಿಗ್ರಿಯ ಕೊನೆಯ ವರ್ಷದಲ್ಲಿ ನಾಸ್ತಿಕನಾದವನು ಇಂದಿಗೂ ಇನ್ನೂ ಗಟ್ಟಿ ನಿಲುವಿನ ನಾಸ್ತಿಕನಾಗಿದ್ದೇನೆ. ಜಗತ್ತಿನ ಬಡತನ, ಕೆಟ್ಟತನವನ್ನು ಹೋಗಲಾಡಿಸಲು ಆಗದ ಸರ್ವಶಕ್ತನಲ್ಲದ ಆ ದೇವರು ನನ್ನ ಎದುರು ಬಂದರೆ ಕಪಾಳಕ್ಕೆ ಬಿಗಿರಯುತ್ತೇನೆ ಎಂಬ ವಾಕ್ಯವನ್ನು ಒಳಗೊಂಡ ನನ್ನ ಲೇಖನವನ್ನು ಕಾಲೇಜಿನ ವಾರ್ಷಿಕ ಸಂಚಿಕೆಯಲ್ಲಿ ಪ್ರಕಟಿಸಲು ವಿರೋಧ ವ್ಯಕ್ತಗೊಂಡಾಗ ನಾನು ಪ್ರತಿಭಟಿಸುವ ಬೆದರಿಕಯೊಡ್ಡಿ ಪ್ರಕಟಿಸುವಂತೆ ಮಾಡಿದ್ದೆ.

ನನ್ನ ಯೌವ್ವನದ ದಿನಗಳನ್ನು ದೇವರ ಹುಡುಕಾಟದಲ್ಲಿ ಕಳೆದ ನಾನು, ೨೦ರ ವಯಸ್ಸಿನಲ್ಲಿ ದೇವರು ಎಂಬುದು ಮನುಷ್ಯನು ತನ್ನ ಕಲ್ಪನೆಯಲ್ಲಿ ಹುಟ್ಟುಹಾಕಿದ ಅದ್ಭುತ ಸಂಶೋಧನೆ ಎಂಬ ತೀರ್ಮಾನಕ್ಕೆ ಬಂದೆ. ವಿವಿಧ ಧರ್ಮಗಳ ದೇವರ ಬಟ್ಟೆ, ವಾಹನಗಳು ಆಯಾ ಪ್ರದೇಶಕ್ಕೆ ಅನುಗುಣವಾಗಿ ಮನುಷ್ಯನ ಕಲ್ಪನೆಯ ಮಿತಿಯಲ್ಲಿರುವುದನ್ನು ಗಮನಿಸಿದೆ. ರೋಮ್ ನಿಂದ ಭಾರತದವರೆಗೆ ದೇವರುಗಳ ವಾಹನ (ಪ್ರಾಣಿ) ಆಯಾ ದೇಶದಲ್ಲಿ ಲಭ್ಯವಿರುವುದೇ ಆಗಿದೆ. ವಿದೇಶಿ ವಾಹನಗಳನ್ನು ಯಾವ ದೇವರೂ ಉಪಯೋಗಿಸುತ್ತಿರಲಿಲ್ಲ. ಈಗ ಜಾಗತೀಕರಣದ ಫಲವಾಗಿ ಹೊಸ ದೇವರುಗಳು ಹುಟ್ಟಿದ್ದರೆ, ವಿದೇಶಿ ಪ್ರಾಣಿಗಳನ್ನು ವಾಹನವಾಗಿ ಉಪಯೋಗಿಸಬಹುದೇನೋ? ಭಾರತದ ದೇವರು ಕುದುರೆ ಮೇಲೂ, ರೋಮ್ ದೇವರು ಇಲಿಯ ಮೇಲೆ ಪ್ರಯಾಣಿಸುತ್ತಿದ್ದರೆ ನೋಡಲು (ಪೂಜಿಸಲು?) ಇನ್ನೂ ಸುಂದರವಲ್ಲವೇ?

ಮುಂದುವರಿಯುತ್ತದೆ…… ನನಸಾಗದ ಸೈಕಲ್ ಪ್ರಯಾಣ, ಪತ್ರವುಂಟುಮಾಡಿದ ಅವಾಂತರ, ಜಾತಕಗಳನ್ನು ಸುಟ್ಟು ನೀರು ಬಿಸಿ ಮಾಡಿ ಕುಡಿದದ್ದು... ಇತ್ಯಾದಿ.