ಸ್ವಾಮೀ,

ಇಲ್ಲಿಯವರೆಗೆ ಯಾರಾದರೂ ಕನ್ನಡದವರು ಮಾತಾಡುವಾಗ ಬೆಳ್ಳಿವಾರ ಎಂಬ ಪ್ರಯೋಗ ಮಾಡಿದ್ದಿದೆಯೇ ? ಶುಕ್ರನಿಗೆ ಬೆಳ್ಳಿ, ಬೆಳ್ಳಿ ಚುಕ್ಕೆ ಎಂಬ ಹೆಸರಿದೆ ನಿಜ. ಆದರೆ, ವಾರಗಳ ಹೆಸರಿಗೆ ಬರುವಾಗ ಅದು ಎಲ್ಲೂ ಉಪಯೋಗವಾದಂತಿಲ್ಲ.

ಇನ್ನೂ ಆಯ್ತವಾರ ( ಆದಿತ್ಯ ವಾರದ ತದ್ಭವ), ಬೇಸ್ತವಾರ (ಬೃಹಸ್ಪತಿವಾರದ ತದ್ಭವ) ಬಹಳ ಮಟ್ಟಿಗೆ ಉಪಯೋಗದಲ್ಲಿದೆ. ಹೌದು ಸ್ವಾಮೀ, ಹಾಸನದ ಬಳಿಯ ಹಳ್ಳಿಗರೂ ಇದನ್ನು ಉಪಯೋಗಿಸುತ್ತಾರೆ - ಇನ್ನೂ ಸುಲಭವಾದ ಒತ್ತಕ್ಷರವಿಲ್ಲದ ಗುರುವಾರ, ಭಾನುವಾರ ಅಥವಾ ರವಿವಾರ ಎಂಬ ಪದಗಳನ್ನು ಬಿಟ್ಟು!

ನಾನಂತೂ ನೇಸರವಾರ , ಬೆಳ್ಳಿವಾರ ಈ ಪ್ರಯೋಗಗಳನ್ನು ಕೇಳೇ ಇಲ್ಲ. ತಮಿಳಲ್ಲಿ, ಇದರ ದಾಯಾದಿ ಪದಗಳಾದ ಞಾಯಿಟ್ಟೃಕ್ಕಿಳಮೈ, ವೆಳ್ಳಿಕ್ಕಿಳಮೈ ಪದಗಳು ಉಪಯೋಗದಲ್ಲಿವೆ. ( ಇಲ್ಲಿ ಎರಡನೆಯ ಳ ಎಂಬುದು ರಳ ಅಕ್ಷರ - ನನಗೆ ಯುನಿಕೋಡ್ ನಲ್ಲಿ ಅದನ್ನು ಹೇಗೆ ಬರೆಯಬೇಕೆಂದು ತಿಳಿದಿಲ್ಲ)

ಎಲ್ಲದರಲ್ಲೂ ಆರ್ಯ-ದ್ರಾವಿಡ ವಿಂಗಡಣೆ ಯಾಕೆ ತರ್ತೀರಪ್ಪಾ? ವಾರಗಳ ಏರ್ಪಾಟು ನಮಗೆ ಬಂದದ್ದೇ ಹೊರದೇಶದಿಂದ - ಗ್ರೀಸ್- ರೋಮನ್ ರಾಜ್ಯಗಳಿಂದ. ಸುಮಾರಾಗಿ ಕ್ರಿ.ಪೂ.೨೦೦ಕ್ಕೆ ಮೊದಲು ಭಾರತದಲ್ಲಿ ಎಲ್ಲೂ ವಾರಗಳ ಗಣನೆ ಇದ್ದಿಲ್ಲ.

ಪ್ರಪಂಚದಲ್ಲಿ ಎರಡೇ ಬಗೆಯ ವಾರಗಳ ಗಣನೆ ಇರೋದು - ಒಂದು - ಒಂದನೇ ದಿನ, ಎರಡನೇ ದಿನ ,,,, ಏಳನೇದಿನ ಎನ್ನೋ ಹೀಬ್ರೂ ಮೂಲದ ಗಣನೆ, ಇನ್ನೊಂದು ಆಕಾಶಕಾಯಗಳ ಮೇಲೆ ಇಟ್ಟಿರುವ ಹೆಸರುಗಳು. ಅದಕ್ಕೇ ಇಂಗ್ಲಿಷ್ ನಲ್ಲಿ Sun day ಆದದ್ದು ನಮಗೆ ರವಿ ವಾರ ಆಗತ್ತೆ ನೋಡಿ.

ಯಾಕೇ ಏಳೇ ದಿನಗಳಿವೆ, ಭಾನುವಾರ ಆದಮೇಲೆ ಸೋಮವಾರವೇ ಯಾಕೆ ಬರಬೇಕು? ಇದೆಲ್ಲಕ್ಕೂ ಉತ್ತರಗಳಿವೆ. ಈಗ ಬರೆಯಲು ನಡುರಾತ್ರಿ ಆಗಿದೆ. ಹಾಗಾಗಿ ಇದು ಮತ್ತೊಮ್ಮೆ ಬರೆಯಲು ಇಟ್ಟುಕೊಳ್ಳುತ್ತೇನೆ.

-ಹಂಸಾನಂದಿ