ಇಂದು ಓದಿದ ವಚನ: ಚಂದಿಮರಸ: ಅದೂ ಅಲ್ಲ ಇದೂ ಅಲ್ಲ ಮತ್ತೇನು?

ನಿಮ್ಮ ಹಾಗೆಯೇ ನಾನೂ ಕೂಡ ಗುರುವನ್ನು ಆರಿಸಿಕೊಳ್ಳುವುದು ಹೇಗೆ, ಸರಿಯಾದ ಗುರುವನ್ನು ಆರಿಸಿಕೊಳ್ಳುವುದಕ್ಕೆ ದಾರಿ, ವಿಧಾನ ಯಾವುದು ಎಂದು ಎಷ್ಟೋ ಕಾಲ ತಳಮಳಪಟ್ಟು ಎಷ್ಟೋ ’ಗುರು’ಗಳನ್ನು ಕೇಳಿದ್ದೆ. ಆದರೆ ಈ ಬಗ್ಗೆ ಹೊಸ ಬೆಳಕು ನೀಡಿದ ಈ ಮಾತುಗಳನ್ನು ಆಸಕ್ತರ ಗಮನಕ್ಕೆ ತರಲು ಬಯಸುತ್ತೇನೆ. "ನೀವು ಗುರುವನ್ನು ಅರಸುವುದಿಲ್ಲ. ಗುರುವನ್ನು ಅರಸಲಾರಿರಿ. ನಿಮ್ಮಲ್ಲಿ ಒಂದು ಹಂಬಲ ಸೃಷ್ಟಿಸಿಕೊಳ್ಳುತ್ತೀರಿ, ಅರಿಯುವ ಆಳವಾದ ಹಂಬಲವನ್ನು ಸೃಷ್ಟಿಸಿಕೊಳ್ಳುತ್ತೀರಿ, ಆಗ ಗುರು ಸಂಭವಿಸುತ್ತಾನೆ. ಒಳ್ಳೆಯ ಗುರುವನ್ನು ಆರಿಸಿಕೊಳ್ಳಲು ಹೋಗಬೇಡಿ. ನೀವು ಆಯ್ಕೆಮಾಡಿಕೊಳ್ಳಲಾರಿರಿ. ಆಳವಾದ ಹಂಬಲವನ್ನು ಸೃಷ್ಟಿಸಿಕೊಳ್ಳಿ. ನೀವು ಗುರು ಎಂದು ಕರೆಯುವಂಥದ್ದು ಸಂಭವಿಸುತ್ತದೆ. ಗುರು ಅನ್ನುವುದು ವ್ಯಕ್ತಿಯಲ್ಲ. ಗುರು ಅನ್ನುವುದು ನಿರ್ದಿಷ್ಟವಾದ ’ಅವಕಾಶ’, ನಿರ್ದಿಷ್ಟವಾದ ಚೈತನ್ಯ. ಅದು ನಿಮಗೆ ’ಆಗ’ಬಹುದು, ಅಷ್ಟೆ. ಗುರುವೆಂದರೆ ನೀವು ಭೇಟಿಯಾಗುವ, ಕೈಕುಲುಕುವ, ನಮಸ್ಕಾರಮಾಡುವ, ಇದನ್ನೋ ಅದನ್ನೋ ನೀಡಿ ಎಂದು ನೀವು ಬೇಡಿಕೊಳ್ಳುವ ವ್ಯಕ್ತಿಯಲ್ಲ. ನೀವು ಗುರು ಎಂದು ಕರೆಯುವ ಆ ’ಅವಕಾಶ’, ಆ ಚೈತನ್ಯ ನಿಮಗೆ ’ಆಗುತ್ತದೆ’ ನಿಮ್ಮನ್ನು ಮುಳುಗಿಸಿಬಿಡುತ್ತದೆ, ನೀವು ಇರುವ ರೀತಿಯನ್ನು ನಾಶಮಾಡಿ ನೀವು ಅಪರಿಮಿತರಾಗುವಂತೆ ಮಾಡುತ್ತದೆ. ಸೃಷ್ಟಿಕರ್ತನು ನೀವು ಏನಾಗಬೇಕೆಂದು ಬಯಸಿದ್ದನೋ ಅದು ಆಗುತ್ತೀರಿ." ಈ ಮಾತುಗಳನ್ನು ಓದಿದ ಹಿನ್ನೆಲೆಯಲ್ಲಿಯೇ ಚಂದಿಮರಸನ ವಚನದ ಬಗ್ಗೆ ಆ ಮಾತುಗಳು ಬಂದವು. ನಾಗಭೂಷಣ