ಮೊದಲು ಸ್ವಾಮಿಯವರಿಗೆ ಅಭಿನಂದನೆಗಳು. ಅನುವಾದವೆಂದೊಡನೆ ನನಗೆ ಫಕ್ಕನೆ ನೆನಪಾದದ್ದು ನಿರಂಜನರ ಸಂಪಾದಕತ್ವದಲ್ಲಿ ಪ್ರಕಟವಾದ ವಿಶ್ವಕಥಾಕೋಶ. ನಾನು ಹೈಸ್ಕೂಲಿನಲ್ಲಿದ್ದಾಗ ಈ ಮಾಲಿಕೆಯ ಎಲ್ಲಾ ಪುಸ್ತಕಗಳನ್ನೂ ತಪ್ಪದೇ ಓದಿದ್ದೆ. ಇಂತಹ ಅಮೂಲ್ಯ ಕೃತಿಗಳನ್ನು ಪ್ರಕಟಿಸುವ ಕೆಲಸ ಅಗತ್ಯವಾಗಿ ಆಗಬೇಕಿದೆ. ಹಾಗೆಂದ ಮಾತ್ರಕ್ಕೆ ಕಥೆ ಕವನಗಳನ್ನು ಮಾತ್ರ ಅನುವಾದಿಸಬೇಕೆಂದು ಹೇಳುತ್ತಿಲ್ಲ. 'ಕನ್ನಡ'ದ ಮೂಲಕ ಜಗತ್ತಿನ ಅತ್ಯುತ್ತಮ ಕೃತಿಗಳನ್ನು ಗ್ರಹಿಸುವ ಕೆಲಸ ಆಗಬೇಕಿದೆ. ಇಂಗ್ಲಿಷ್ ಭಾಷೆಯಲ್ಲಿಂದು ಲಭ್ಯವಿರುವ ಕೃತಿಗಳ ವೈವಿಧ್ಯ, ವ್ಯಾಪ್ತಿ, ಮೌಲ್ಯಗಳನ್ನು ಗಮನಿಸಿದರೆ ನಮಗೆ, ಕನ್ನಡಿಗರಿಗೆ, ಇಂತಹ ಕೃತಿಗಳು ನಮ್ಮದೇ ಭಾಷೆಯಲ್ಲಿ ನಮ್ಮದೇ ಅನುಭವಗಳ ಮೂಲಕ ಗ್ರಹಿಸುವ ಅಗತ್ಯ ಎಷ್ಟಿದೆಯೆಂದು ತಿಳಿಯುತ್ತದೆ. ಏಕೆಂದರೆ, ಇಂಗ್ಲಿಷನಲ್ಲಿರುವ ಬಹುತೇಕ ಕೃತಿಗಳೂ ಬೇರೆ ಭಾಷೆಗಳಿಂದ ಅನುವಾದಗೊಂಡಿರುತ್ತವೆ. ಇನ್ನೊಂದು ಮುಖ್ಯ ವಿಚಾರ - ನಮಗೆ ಇತರೆ ಭಾರತೀಯ ಭಾಷೆಗಳಲ್ಲಿರುವ ಕೃತಿಗಳೂ ಸಿಗಬೇಕು. ಹಾಗೆಯೇ ಕನ್ನಡದ ಮಹತ್ವದ ಕೃತಿಗಳನ್ನು ಜಗತ್ತಿಗೆ ಪರಿಚಯಿಸುವ ಕೆಲಸ ಆಗಬೇಕು.

ಇವಿಷ್ಟು ನನ್ನ ಸಧ್ಯದ ಅನ್ನಿಸಿಕೆಗಳು. ಸ್ವಾಮಿಯವರನ್ನು ಹಾಗು ಅಕಾಡೆಮಿಯ ಎಲ್ಲಾ ಸದಸ್ಯರನ್ನು ಮತ್ತೊಮ್ಮೆ ಅಭಿನಂದಿಸುತ್ತಾ ನಿಮ್ಮೆಲ್ಲರಿಂದ ಒಳ್ಳೆಯ ಯೋಜನೆಗಳು ರೂಪುಗೊಂಡು ಅನುಷ್ಟಾನಕ್ಕೆ ಬರಲೆಂದು, ಕನ್ನಡಿಗರೆಲ್ಲರ ಬೆಂಬಲ, ಸಹಕಾರ ನಿಮ್ಮೊಂದಿಗಿರುತ್ತದೆಂದು ಆಶಿಸುತ್ತೇನೆ.

- ಪ್ರಶಾಂತ

ಹಲವು ವರ್ಷಗಳಿಂದ ಅನುವಾದ ಮಾಡಿಕೊಂಡೇ ಬಂದಿರುವ ನನಗೆ ಅನುವಾದ ಅಕಾಡೆಮಿ ಒಳ್ಳಯ ಯೋಜನೆಯಾಗಿ ಕಾಣುತ್ತಿದೆ. ಆದರೆ ಎಲ್ಲ ಅಕಾಡೆಮಿಗಳಂತೆ ಇದೂ ಸರ್ಕಾರದ ಒಂದು ಹಳೆ ಬಾವುಟ ಆಗದಿರಲಿ ಎಂದು ಆಶಿಸುವೆ.
ನಾನು ಪ್ರವಾಸ ಹೊರಡುವ ಗಡಿಬಿಡಿಯಲ್ಲಿರುವೆ. ಹೀಗಾಗಿ ನನ್ನ ಆಭಿಪ್ರಾಯ ಹಾಗೂ ಸಲಹೆಗಳನ್ನು ಅಕ್ಟೋಬರ್‌ ಮೂರನೇ ವಾರ ನೀಡುವೆ. ಸಮಕಾಲೀನ ಅಂದರೆ ಕಳೆದ ಒಂದು ದಶಕದ ಉತ್ತಮ ಕೃತಿಗಳನ್ನು ಅನುವಾದ ಮಾಡುವ ಬಗ್ಗೆ ತಾವು ಗಮನ ನೀಡಬಹುದೆ? ಯಾಕೆಂದರೆ ಇತ್ತೀಚೆಗೆ ಅನುವಾದ ಎಂದರೆ ಹಳೆಯ ಜನಪ್ರಿಯ ಪುಸ್ತಕವನ್ನು ಅನುವಾದಿಸುವುದೇ ಆಗಿದೆ.

ನನ್ನ ಅಭಿಪ್ರಾಯವನ್ನು ಎಲ್ಲರಿಂದ ಮೊದಲೇ ನಾನು ಇಲ್ಲಿ ದಾಖಲಿಸಿದ್ದೇನೆ. ಇನ್ನೇನಾದರೂ ನೆನಪಾದರೆ ಬರೆಯುತ್ತೇನೆ. ಉಳಿದಂತೆ ಈಗಾಗಲೇ ಹಲವರು ಬರೆದಿರುವ ಎಲ್ಲ ಅಭಿಪ್ರಾಯಗಳಿಗೆ ನನ್ನ ಸಹಮತವಿದೆ.

ಸಿಗೋಣ,
ಪವನಜ
-----------
Think globally, Act locally