ನೆನ್ನೆ ನಾವು ಕೆಲವು ನೆಂಟರಿಷ್ಟರು ತಲಕಾವೇರಿಗೆ ಹೋಗಿದ್ದೆವು. ಎಲ್ಲಾದರು ಸಿಗ್ನಲ್ ಸಿಕ್ಕಿದರೆ ಸ್ಕೋರು ಕೇಳೋಣ ಅಂದರೆ, ಹಾಳಾದ್ದು ರಿಲಯನ್ಸ್ ಎಲ್ಲಿಯೂ ನೆಟ್ವರ್ಕೇ ಇಲ್ಲ.

ಸರಿ ಅಂತ ಕೊನೆಗೆ ೪:೦೦ ಘಂಟೆಗೆ ಸ್ಕೋರು ವಿಚಾರಿಸಿದಾಗ, ಅಲ್ಲಿ ರಾಬಿನ್ ಉತ್ತಪ್ಪ ಭರ್ಜರಿ ಆಟವಾಡಿ ಔಟಾಗಿದ್ದಾರೆ ಎಂದು ತಿಳಿಯಿತು. ಇಲ್ಲಿ ರಣಜಿ ಅರಿಕೆಗಳನ್ನು ಕೇಳಿದಾಗ, ಕರ್ನಾಟಕದವರು ಸೋತ ವಿಚಾರ ತಿಳಿಯಿತು. ಏನು ಮಾಡುವುದು ಮೊದಲ ಇನ್ನಿಂಗ್ಸಿನಲ್ಲಿ ನೆಲಕಚ್ಚಿ ಆಡುವ ಧೈರ್ಯ ಮಾಡಿದ್ದರೆ, ಇನ್ನೂ ಉತ್ತಮ ಹೋರಾಟ ನಿರೀಕ್ಷಿಸಬಹುದಿತ್ತು. ಅಥವಾ ನೀವಂದು ಹೇಳಿದಂತೆ, ನಾಲ್ಕು ವೇಗದ ಬೌಲರುಗಳನ್ನು ಇಟ್ಟುಕೊಂಡು, ಬೌಲಿಂಗ್ ಆಯ್ಕೆ ಮಾಡದಿದ್ದುದು "ಎರರ್ ಇನ್ ಜಡ್ಜ್ಮೆಂಟ್"ಏ ಸೋಲಿಗೆ ಕಾರಣವಿರಬೇಕು.

ಹಾಗೆಯೇ, ನೀವೆಂದಂತೆ,

ಎನ್ನುವ ಮಾತಿಗೆ ನಾನೂ ದನಿಗೂಡಿಸುತ್ತೇನೆ. ಈ ಬಾರಿ ಕೆಲಮಟ್ಟಿಗಾದರೂ ಕೆಚ್ಚೆದೆಯ ಆಟವನ್ನಾಡುವ ಧೈರ್ಯ ತೋರಿದರು ನಮ್ಮವರು. ಆದರೂ ನನಗೆ ಸೆಮಿಫೈನಲ್ ಹಿಂದಿನ ಪಂದ್ಯದಲ್ಲಿ ಫಾಲೋ ಆನ್ ಹೇರದಿದ್ದುದು ತುಂಬಾ ಕೋಪ ಮತ್ತು ಬೇಸರವನ್ನುಂಟು ಮಾಡಿತು.

ಇನ್ನೇನಿದ್ದರೂ, ಮುಂಬೈ ಮತ್ತು ಬಂಗಾಳದ ನಡುವೆ ರಣಜಿಯ ಫೈನಲ್. ನೋಡೋಣ, ಅದೂ ಕೂಡ ಕುತೂಹಲಕಾರಿಯಾಗಿದೆ.

ಹೌದು, ರಣಜಿಯಲ್ಲಿ ಒಂದು ದಿನದ ಪಂದ್ಯಾವಳಿಗಳನ್ನು ಆಡಿಸುತ್ತಿದ್ದಾರೆ, ಅಲ್ಲವೇ ?

ರಣಜಿ ಏಕದಿನ ಟ್ರೋಫಿಗಾಗಿ ದಕ್ಷಿಣ ವಲಯದ ಲೀಗ್ ಪಂದ್ಯಗಳು ಫೆಬ್ರವರಿ ೧೦ ರಿಂದ ಅನಂತಪುರದಲ್ಲಿ ನಡೆಯಲಿವೆ. ಎಲ್ಲಾ ೧೫ ಪಂದ್ಯಗಳೂ ಅನಂತಪುರದಲ್ಲೇ ನಡೆಯಲಿವೆ. ಕರ್ನಾಟಕದ ಪಂದ್ಯಗಳು ಈ ಕೆಳಗೆ ತಿಳಿಸಿರುವ ದಿನಾಂಕಗಳಂದು ನಡೆಯಲಿವೆ.

ಫೆಬ್ರವರಿ ೧೦ - ಕೇರಳದ ವಿರುದ್ಧ

ಫೆಬ್ರವರಿ ೧೧ - ಗೋವಾದ ವಿರುದ್ಧ

ಫೆಬ್ರವರಿ ೧೩ - ತೆಮಿಳುನಾಡಿನ ವಿರುದ್ಧ

ಫೆಬ್ರವರಿ ೧೪ - ಆಂಧ್ರ ಪ್ರದೇಶದ ವಿರುದ್ಧ

ಫೆಬ್ರವರಿ ೧೬ - ಹೈದರಾಬಾದ್ ವಿರುದ್ಧ

ಯೆರೆ ಗೌಡ ಆಡುವುದಿದ್ದಲ್ಲಿ ಅವರು ಹೇಗೆ ಆಡುತ್ತಾರೆ ಎಂಬುದನ್ನು ನೋಡಬೇಕು. ವೇಗವಾಗಿ ಓಟಗಳನ್ನು ಗಳಿಸುವುದು ಅವರ ಆಟವಲ್ಲ. ಹಿಂದೆ ರೈಲ್ವೇಸ್ ಪರವಾಗಿ ಆಡುತ್ತಿರುವಾಗ ಹೆಚ್ಚಿನ ಏಕದಿನ ಪಂದ್ಯಗಳಿಂದ ಅವರನ್ನು ಹೊರಗಿಡಲಾಗುತ್ತಿತ್ತು. ಕಳೆದ ಋತುವಿನಲ್ಲಿ ರೈಲ್ವೇಸ್ ಫೈನಲ್ ತಲುಪಿ ಸೋತಿತ್ತು. ೮ ಪಂದ್ಯಗಳಲ್ಲಿ ಗೌಡರನ್ನು ಕೇವಲ ೩ ಪಂದ್ಯಗಳಲ್ಲಿ ಆಡಿಸಲಾಗಿತ್ತು.

ಕರ್ನಾಟಕದ ಪರವಾಗಿ ಕಳೆದ ಋತುವಿನಲ್ಲಿ ಚಂದ್ರಶೇಖರ್ ರಘು ೨ ಶತಕಗಳೊಂದಿಗೆ ೫೭.೦೦ರ ಸರಾಸರಿಯಲ್ಲಿ ೩೪೨ ಓಟಗಳನ್ನು ಕಲೆ ಹಾಕಿದ್ದರಲ್ಲದೇ ಬೌಲಿಂಗ್ ನಲ್ಲಿ ೨೭.೧೬ ಸರಾಸರಿಯಲ್ಲಿ ೬ ಹುದ್ದರಿಗಳನ್ನು ಕೆಡವಿ 'ಟಾಪ್ ಪರ್-ಫಾರ್ಮರ್' ಆಗಿದ್ದರು. ಇದೇ ಪ್ರದರ್ಶನದ ಆಧಾರದಲ್ಲಿ ಚ್ಯಾಲೆಂಜರ್ ಟ್ರೋಫಿಗೆ ಆಯ್ಕೆಯಾಗಿದ್ದ ರಘುನನ್ನು ಒಂದೇ ಪಂದ್ಯದಲ್ಲಿ ಆಡಿಸದೇ ಇದ್ದದ್ದು ಅವರ ಬ್ಯಾಡ್ ಲಕ್.

ಉಳಿದ ಆಟಗಾರರ ಪೈಕಿ ಬ್ಯಾಟಿಂಗ್ ನಲ್ಲಿ ತಿಲಕ್ ನಾಯ್ಡು ೪೨.೩೩ ರ ಸರಾಸರಿಯಲ್ಲಿ ೧೨೭, ರಾಬಿನ್ ಉತ್ತಪ್ಪ ೩೮.೧೬ ಸರಾಸರಿಯಲ್ಲಿ ೨೨೯, ಅಖಿಲ್ ೩೦.೬೬ ಸರಾಸರಿಯಲ್ಲಿ ೧೮೪ ಓಟಗಳನ್ನು ಗಳಿಸಿದ್ದರು.

ಬೌಲಿಂಗ್ ನಲ್ಲಿ ವಿನಯ್ ಕುಮಾರ್ ೧೭.೩೩ ಸರಾಸರಿಯಲ್ಲಿ ೧೨ ಹುದ್ದರಿಗಳನ್ನು, ಸುನಿಲ್  ಜೋಶಿ ೧೮.೭೨ ಸರಾಸರಿಯಲ್ಲಿ ೧೧, ಅಯ್ಯಪ್ಪ ೨೨.೪೫ ಸರಾಸರಿಯಲ್ಲಿ ೧೧ ಮತ್ತು ಅಖಿಲ್ ೧೯.೦೦ ಸರಾಸರಿಯಲ್ಲಿ ೮ ಹುದ್ದರಿಗಳನ್ನು ಕೆಡವಿದ್ದರು.

ಗಮನಿಸಬೇಕಾದ ವಿಷಯವೆಂದರೆ ಸ್ಟುವರ್ಟ್ ಬಿನ್ನಿಯನ್ನು ಕರ್ನಾಟಕ ಆಡಿದ ಎಲ್ಲಾ ೭ ಪಂದ್ಯಗಳಲ್ಲೂ ಆಡಿಸಲಾಯಿತು. ೨೮.೫೦ ಸರಾಸರಿಯಲ್ಲಿ ೧೧೪ ಓಟಗಳು ಮತ್ತು ೪೨.೬೬ ಸರಾಸರಿಯಲ್ಲಿ ೩ ಹುದ್ದರಿಗಳು ಆತನ ಸಾಧನೆ. ಅಂತೆಯೇ ಉದಿತ್ ಪಟೇಲ್ ಆಡಿದ ೨ ಪಂದ್ಯಗಳಲ್ಲಿ ೭ ಓವರ್ ಎಸೆದು ಯಾವುದೇ ಮೇಡನ್ ಗಳಿಲ್ಲದೆ ೪೯ ಓಟಗಳನ್ನು ನೀಡಿ ಯಾವುದೇ ಹುದ್ದರಿ ಕೆಡವಲಿಲ್ಲ. ಈ ಸಲವೂ ಈ ಇಬ್ಬರನ್ನು ಆಡಿಸಲಾಗುತ್ತದೆಯೋ? ವೆಂಕಿ ಮತ್ತು ರಘುರಾಮ್ ಭಟ್ ಹಾಗಾಗಲು ಆಸ್ಪದ ನೀಡಲಾರರು.

ತಂಡಕ್ಕೆ ಶುಭ ಹಾರೈಕೆಗಳು.

ರಣಜಿ ಏಕದಿನ ಟ್ರೋಫಿಗಾಗಿ ಸಿಕಂದರಾಬಾದ್ ನಲ್ಲಿ ನಡೆದ ತನ್ನ ೩ನೇ ಲೀಗ್ ಪಂದ್ಯದಲ್ಲಿ ಕರ್ನಾಟಕ ತಮಿಳುನಾಡನ್ನು ೫ ಹುದ್ದರಿಗಳಿಂದ ಮಣಿಸಿ ಸತತ ೩ನೇ ವಿಜಯವನ್ನು ದಾಖಲಿಸಿ, ೧೪ ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಇನ್ನುಳಿದ ೨ ಪಂದ್ಯಗಳಲ್ಲಿ ಒಂದನ್ನು ಗೆದ್ದರೂ ಸಾಕು, ಕರ್ನಾಟಕ ನಾಕ್ ಔಟ್ ಹಂತ ಪ್ರವೇಶಿಸಿದಂತೆ. ತಮಿಳುನಾಡಿನ ವಿರುದ್ಧದ ಪಂದ್ಯದ ಸಂಕ್ಷಿಪ್ತ ಸ್ಕೋರ್ ವಿವರ:

ತಮಿಳುನಾಡು ೪೮.೨ ಓವರ್ ಗಳಲ್ಲಿ ಎಲ್ಲಾ ಹುದ್ದರಿಗಳ ನಷ್ಟಕ್ಕೆ ೧೯೪ ಓಟಗಳು (ವಿನಯ್ ಕುಮಾರ್ ೩೩ಕ್ಕೆ ೩ ಹುದ್ದರಿಗಳು, ಅಖಿಲ್ ೨೩ಕ್ಕೆ ೧ ಹುದ್ದರಿ, ಸುನಿಲ್ ಜೋಶಿ ೪೭ಕ್ಕೆ ೧ ಹುದ್ದರಿ ಮತ್ತು ಭರತ್ ಚಿಪ್ಲಿ ೧೨ಕ್ಕೆ ೧ ಹುದ್ದರಿ).

ಕರ್ನಾಟಕ ೪೪ ಓವರ್ ಗಳಲ್ಲಿ ೫ ಹುದ್ದರಿಗಳ ನಷ್ಟಕ್ಕೆ ೧೯೫ ಓಟಗಳು (ಭರತ್ ಚಿಪ್ಲಿ ೨೭, ಗೌರವ್ ಧೀಮನ್ ೯, ರೋಲಂಡ್ ಬ್ಯಾರಿಂಗ್ಟನ್ ೪, ಚಂದ್ರಶೇಖರ್ ರಘು ೬೪ ಅಜೇಯ, ದೀಪಕ್ ಚೌಗುಲೆ ೩೪, ತಿಲಕ್ ನಾಯ್ಡು ೨೮ ಮತ್ತು ಯೆರೆ ಗೌಡ ೧೪ ಅಜೇಯ)

ಕರ್ನಾಟಕಕ್ಕೆ ೫ ಹುದ್ದರಿಗಳಿಂದ ಜಯ.

ಮುಂದಿನ ಪಂದ್ಯ ನಾಳೆ (ಫೆಬ್ರವರಿ ೧೪) ಆಂಧ್ರಪ್ರದೇಶದ ವಿರುದ್ಧ.

ರಣಜಿ ಏಕದಿನ ಟ್ರೋಫಿಗಾಗಿ ನಡೆಯುತ್ತಿರುವ ದಕ್ಷಿಣ ವಲಯ ಲೀಗ್ ಪಂದ್ಯಗಳಲ್ಲಿ ಕರ್ನಾಟಕ ಇಂದು ಹೈದರಾಬಾದ್ ತಂಡವನ್ನು ಸೋಲಿಸಿ ತನ್ನ ಸತತ ೫ನೇ ಗೆಲುವನ್ನು ದಾಖಲಿಸಿ ದಕ್ಷಿಣ ವಲಯದಲ್ಲಿ ಅಗ್ರಸ್ಥಾನಿಯಾಗಿ ಮುಂದಿನ ಹಂತಕ್ಕೆ (ನಾಕ್ ಔಟ್) ತೇರ್ಗಡೆ ಹೊಂದಿದೆ. ದ್ವಿತೀಯ ಸ್ಥಾನಿಯಾಗಿ ತಮಿಳುನಾಡು ತೇರ್ಗಡೆ ಹೊಂದಿದೆ. ಹೈದರಾಬಾದ್ ವಿರುದ್ಧದ ಪಂದ್ಯದ ಸಂಕ್ಷಿಪ್ತ ಸ್ಕೋರು ವಿವರ:

ಹೈದರಾಬಾದ್ ೫೦ ಓವರುಗಳಲ್ಲಿ ಎಲ್ಲಾ ಹುದ್ದರಿಗಳನ್ನು ಕಳಕೊಂಡು ೧೮೯ (ವಿನಯ್ ಕುಮಾರ್ ೩೯ಕ್ಕೆ ೧ ಹುದ್ದರಿ, ಧನಂಜಯ ೫೩ಕ್ಕೆ ೨ ಹುದ್ದರಿಗಳು, ರಾಜು ಭಟ್ಕಳ್ ೨೦ಕ್ಕೆ ಯಾವುದೇ ಹುದ್ದರಿಯಿಲ್ಲ, ಸುನಿಲ್ ಜೋಶಿ ೧೮ಕ್ಕೆ ೨ ಹುದ್ದರಿಗಳು, ಚಂದ್ರಶೇಖರ್ ರಘು ೩೨ಕ್ಕೆ ೨ ಹುದ್ದರಿಗಳು ಮತ್ತು ಭರತ್ ಚಿಪ್ಲಿ ೧೭ಕ್ಕೆ ೧ ಹುದ್ದರಿ).

ಕರ್ನಾಟಕ ೪೬.೫ ಓವರುಗಳಲ್ಲಿ ೪ ಹುದ್ದರಿಗಳ ನಷ್ಟಕ್ಕೆ ೧೯೦ ಓಟಗಳು (ಭರತ್ ಚಿಪ್ಲಿ ೪೫, ಕೆ.ಬಿ.ಪವನ್ ೨, ರೋಲಂಡ್ ಬ್ಯಾರಿಂಗ್ಟನ್ ೩೬, ಚಂದ್ರಶೇಖರ್ ರಘು ೪೫, ದೀಪಕ್ ಚೌಗುಲೆ ೪೪ ಅಜೇಯ ಮತ್ತು ದೇವರಾಜ್ ಪಾಟೀಲ್ ೧೧ ಅಜೇಯ)

ಕರ್ನಾಟಕಕ್ಕೆ ೬ ಹುದ್ದರಿಗಳಿಂದ ಜಯ.

ನಾಕ್ ಔಟ್ ಹಂತದ ಮೊದಲ ಪಂದ್ಯದ ದಿನಾಂಕ ಮತ್ತು ಎದುರಾಳಿ ಇನ್ನೂ ನಿರ್ಧಾರವಾಗಿಲ್ಲ. ನೋಡೋಣ ರಾಜ್ಯ ತಂಡದ ವಿಜಯದ ಓಟ ಎಲ್ಲಿಯವರೆಗೆ ಮುನ್ನಡೆಯುತ್ತದೆ ಎಂದು.....