ಸಂಜೆ, ಭಗವದ್ಗೀತೆಯ ಬಗ್ಗೆ ಶತಾವಧಾನಿ ಡಾ.ಆರ್. ಗಣೇಶರ ಒಂದು ಉಪನ್ಯಾಸ ಇದೆ ಎಂಬುದು ತಿಳಿದಿತ್ತಷ್ಟೇ. ಕಛೇರಿಯ ನಂತರ ಸಂಜೆ ನೇರವಾಗಿ ಮನೆಗೆ ತೆರಳುವ ಬದಲು, ಗೋಖಲೆ ಸಾರ್ವಜನಿಕ ವಿಚಾರ ಸಂಕೀರ್ಣದೆಡೆಗೆ ಗಾಡಿ ತಿರುಗಿಸಿದೆ. ಹೋಗಿ ನೋಡಿದರೆ ಇದ್ದವರಲ್ಲಿ ೯೯% ಬರೀ ವಯಸ್ಸಾದವರೇ. ಕಡೆ ಕಡೆಯಲ್ಲಿ, ನಾನೂ ಸೇರಿದಂತೆ ೪ ಮಂದಿ ಯುವಕರು ಇದ್ದೆವೋ ಏನೋ ?

* ನೆನ್ನೆ ಭಗವದ್ಗೀತೆಯಲ್ಲಿನ ಕರ್ಮಯೋಗದ ಬಗೆಗೆ ಉಪನ್ಯಾಸವಿತ್ತು. ಜ್ಞಾನಮಾರ್ಗದ ಮತ್ತು ಕರ್ಮಮಾರ್ಗದ ವಿಷಯವಾಗಿ ಕೆಲವು ವಿಚಾರವಿನಿಮಯವಾಯಿತು. ಶಂಕರಾಚಾರ್ಯರ ಹಾಗೆಯೇ ಡಿವಿಜಿಯವರ ಮಂಕುತಿಮ್ಮನ ಕಗ್ಗದಿಂದ ಕೆಲವು ಪದ್ಯಗಳು ಅಲ್ಲಲ್ಲಿ ಪ್ರಸ್ತಾಪವಾಗುತ್ತಿತ್ತು.
* "ಈ ವಯಸ್ಸಿನಲ್ಲಿ ಸಂಸ್ಕೃತದ ಮೇಲೆ ಅಭಿಮಾನ ಬಂದು, ಸಂಸ್ಕೃತ ಕಲೀತೀನಿ ಅಂತ ಹೋದ್ರೆ ಆಗಲ್ಲ, ಬದಲಾಗಿ ಸಂಸ್ಕೃತದ ಪ್ರಚಾರ ಮಾಡುತ್ತಿರವ ಸಂಸ್ಥೆಗಳಿಗೆ ಸಹಾಯ ಮಾಡಿ, ಹಾಗೆಯೇ ಸಂಸ್ಕೃತದ ಬಗ್ಗೆ ತಪ್ಪು ಹೇಳುವವರನ್ನು ತಪ್ಪು ಎಂದು ಹೇಳಿ" ಅಂತ ಒಂದು ಕಡೆ ಹೇಳಿದರು.
* ಉಪನ್ಯಾಸದಲ್ಲಿ "ಸ್ವಧರ್ಮೇ ನಿಧನಂ ಶ್ರೇಯಂ" ವಾಕ್ಯ ಪ್ರಸ್ತಾಪವಾಯಿತು.
* ಕೊನೆಯಲ್ಲಿ ಡಿವಿಜಿಯವರ ಒಂದು ವಿವಾದಾತ್ಮಕ ಕತೆಯಲ್ಲಿ ಬರುವ "ಮಡಿವಾಳ ಮಾಚಯ್ಯನ ಮಗ ಸಂಗೀತ ಕಲಿಯುವ ವಿಷಯ" ಬಂದು, ಅವರವರ ಅಂತರಂಗದ ನೀತಿಗೆ ಬದ್ಧರಾಗಿರಬೇಕು ಎಂದು ಹೇಳಿದರು.

ಉಪನ್ಯಾಸದ ಕೊನೆಯಲ್ಲಿ, ಡಿವಿಜಿಯವರ "ಅಂತಃಪುರ ಗೀತೆಗಳು" ಹಾಗು ಶತಾವಧಾನಿ ಡಾ. ಗಣೇಶರೇ ೨ ವರ್ಷದ ಹಿಂದೆ ನಡೆಸಿಕೊಟ್ಟಿದ್ದ "ಕಾಳಿದಾಸನ ಮೇಘದೂತದ" ಸಿಡಿಗಳನ್ನು ಕೊಂಡು ಮನೆಗೆ ನಡೆಯುತ್ತಿದ್ದಾಗ, ಈ ದಿನ ಜ್ಞಾನಯೋಗದ ಬಗ್ಗೆ ಲೆಕ್ಚರ್ ಇದು ಎಂಬುದು ತಿಳಿಯಿತು.