ಮೊನ್ನೆ, ಬನವಾಸಿಯಲ್ಲಿ ಒಬ್ಬರು ಮಾತನಾಡುತ್ತಿದ್ದ ಬಗೆ ಕೇಳಿ, "ಕನ್ನಡ ಎಷ್ಟು ಸಿಂಪಲ್" ಅಂತ ಅನ್ನಿಸಿತು. ನೋಡಿ ಆ ಮಾತು.

ಬನವಾಸಿಯ ಬಸ್ಸಿನಲ್ಲಿ ಕೇಳಿಬಂದ ಮಾತು - ರಾತ್ರೆಲ್ಲ ಕರೆ ಮಾಡೀನಿ, ನಿನ್ ಮೊಬೈಲ್ ಅದೇನಾಗೇತೋ, ತಾಕ್ಲೇ ಇಲ್ಲ.
ಬೆಂಗಳೂರಿನಲ್ಲಿ ಹೀಗೆ ಹೇಳ್ತಿದ್ನೋ ಏನೋ - ರಾತ್ರಿಯೆಲ್ಲ ಫುಲ್ ಕಾಲ್ ಮಾಡಿದ್ದೀನಿ. ನಿನ್ ಮೊಬೈಲ್ಗೆ ಅದೇನಾಗಿತ್ತೋ, ಕನೆಕ್ಟೇ ಆಗ್ಲಿಲ್ಲ.

ಬನವಾಸಿಯುವನ ಮಾತು ಕೇಳಿದಾಗಲೇ ನನಗೆ ಹೊಳೆದದ್ದು, "connect"ಗೆ ಕನ್ನಡದಲ್ಲಿ ಈಗಾಗಲೇ ಜನರು ಸರಳವಾಗಿ "ತಾಕು" ಬಳಸ್ತಾ ಇದ್ದಾರೆ ಅಂತ!!!!!!!!!!!!!!!!!

*****

ಕನ್ನಡದಲ್ಲಿ ಸದ್ಯಕ್ಕೆ, "ತಾಕು" ಎಂದರೆ touch ಆಗುವ ಕ್ರಿಯೆ ಅರ್ಥದಲ್ಲಿ ಮಾತ್ರವೇ ಇದೆ. ನಾವು ನೀವು ಏನೇ ಕನ್ನಡ-ಸಂಸ್ಕೃತ ಅಂತ ಹೊಡೆದಾಡಲಿ, ದೇಸಿಗರು ಮಾತ್ರ, ಅದನ್ನು ಆಗಲೇ ಮುಂದೆ ತೊಗೊಂಡು ಹೊರಟೇ ಹೋಗಿದ್ದಾರೆ.

ಕನೆಕ್ಟ್ ಆಗು - ತಾಕು
ಕನೆಕ್ಟ್ ಆಗ್ತಾ ಇದೆ - ತಾಕ್ತಾ ಇದೆ
ಕನೆಕ್ಟ್ ಆಗಿದ್ದೀಯಾ - ತಾಕಿದ್ದೀಯಾ
ಕನೆಕ್ಟ್ ಆಗಿದೆ - ತಾಕಿದೆ
ಕನೆಕ್ಟ್ ಆಗಿಲ್ಲ - ತಾಕಿಲ್ಲ
ಕನೆಕ್ಟ್ ಆಗ್ಲಿಲ್ಲ - ತಾಕ್ಲಿಲ್ಲ

"ದೇಸಿಯೊಳ್ ಪುಗುವುದು , ಪೊಕ್ಕು ಮಾರ್ಗದೊಳೆ ತಳ್ವುದು" - ಎಂಬ ಮಾತನ್ನು ನಾವು ನಿಜ ಮಾಡೋಣ.

*****

ಮರೆತಿದ್ದೆ, ಆದಿಕವಿ ಪಂಪನ ಈ ಪ್ರಸಿದ್ಧವಾದ

"ತೆಂಕಣ ಗಾಳಿ ಸೋಂಕಿದೊಡಂ, ಒಳ್ನುಡಿ ಕೇಳ್ದೊಡಮ್, ಇಂಪನಾಳ್ದ ಗೇಯಂಗೆ ಕಿವಿಗೊಟ್ಟಡಮ್, ಬಿರಿದ ಮಲ್ಲಿಗೆ ಕಂಡೊಡಮ್, ಆದ ಕೆಂದಲಂಪಂಗೆ ಎಡೆಗೊಂಡಡಂ, ಮಧುಮಹೋತ್ಸವಮಾದೊಡಮ್, ಏನನೆಂಬನ್, "ಆರಂಕುಶವಿಟ್ಟೊಡಂ ನೆನೆವುದೆನ್ನ ಮನಮ್ ಬನವಾಸಿ ದೇಶಮಂ"

ಹಾಡಿನಲ್ಲಿರುವ, "ಒಳ್ನುಡಿ ಕೇಳ್ದೊಡಮ್, ನೆನವುದೆನ್ನ ಮನಮ್ ಬನವಾಸಿ ದೇಶಮಂ" ನನ್ನ ಅನುಭವಕ್ಕೆ ಬಂತು. ಇನ್ನುಮುಂದೆ connect ಪದ ಕೇಳಿದಾಗಲೆಲ್ಲ "ಬನವಾಸಿ" ನೆನಪಾಗುತ್ತದೆ Laughing out loud ಹೆನ್ನನ್ನಿ ಕಣಯ್ಯಾ, ನಿನಗೆ, ಪಂಪ.