ಯಾರೀ ರತ್ನಾ, ಯಾವುದಾ ಅಕ್ಕರೆಯೊಲವಿನ ಮಾತು ಎಂದು ಯೋಚಿಸುತ್ತಿದ್ದೀರಾ. ತುಸು ತಡೆಯಿರಿ. ಗಾಂಧಿನಗರ ತನ್ನ ತಪ್ಪುಗಳಿಂದ ಕಿಂಚಿತ್ತಾದರೂ ಎಚ್ಚೆತ್ತಿಕೊಂಡಂತೆ ಕಾಣುತ್ತದೆ. ಎರಡು ವಾರಗಳ ಹಿಂದೆ ಬಿಡುಗಡೆಯಾದ "ಕಲ್ಲರಳಿ ಹೂವಾಗಿ" ನೋಡಿ ಆಚೆ ಬಂದಿರೆಂದರೆ ನಿಮ್ಮ ನೆನಪಿನಲ್ಲುಳಿಯುವ ಹಾಡಿನ ಸಾಲಿದು.

ಅತಿ ಕೆಟ್ಟ ಹಾಡುಗಳಿಂದಾಗಿ ಇತ್ತೀಚೆಗೆ ಕನ್ನಡದ ಒಂದು ಐತಿಹಾಸಿಕ ಚಿತ್ರ ತೋಪಾಗಿತ್ತು. ಆ ತಪ್ಪುಗಳನ್ನು ಸ್ವಲ್ಪಮಟ್ಟಿಗಾದರು ಸರಿಪಡಿಸಿಕೊಂಡಿದ್ದಾರೆ ನಮ್ಮ ಸಿನೆಮಾ ಮಂದಿ.

ಕಲ್ಲರಳಿ ಹೂವಾಗಿ ಚಿತ್ರವನ್ನು, ಚಿತ್ರದುರ್ಗದಲ್ಲಿ ಅಲ್ಲಿನ ಕೊನೆಯ ಪಾಳೇಗಾರ ಮದಕರಿನಾಯಕ ಮತ್ತು ಮೈಸೂರಿನಲ್ಲಿ ಹೈದರಲಿ ಆಡಳಿತ ನಡೆಸುತ್ತಿದ್ದ ಸಮಯದಲ್ಲಿ ನಡೆದಿರುವಂತೆ ಚಿತ್ರಸಲಾಗಿದೆ. ಅಂದ ಹಾಗೆ, ಈ ಚಿತ್ರವನ್ನು "ಅಯ್ಯೋ, ಇದೊಂದು ಹಿಂದು, ಮುಸ್ಲಿಮ್ ನಡುವಣ ಪ್ರೇಮ ಕಥೆ, ಇಂಥ ಎಷ್ಟೋ ಚಿತ್ರಗಳು ಈಗಾಗಲೇ ಬೇಕಾದಷ್ಟು ಬಂದು ಹೋಗಿವೆ", ಎಂಬ ನಿರ್ಣಯಕ್ಕೆ ಬಂದಿರಾದರೆ ಖಂಡಿತ ನಿಮಗಿಂತ ಮೂರ್ಖರಾರು ಇರುವುದಿಲ್ಲ. ಇನ್ನಿತರ ಹಿಂದು-ಮುಸ್ಲಿಂ ಪ್ರೇಮಕಥೆಗಳಲ್ಲಿ ಕಂಡುಬರುವ ಧರ್ಮದ ವಿಷಯವಾಗಿನ ಸಂಘರ್ಷ ಇಲ್ಲಿ ಎಲ್ಲಿಯೂ ಬರುವುದಿಲ್ಲ. ಇಡೀ ಚಿತ್ರದಲ್ಲಿ "ಒಂದು ರಾಜವಂಶದ ಕನ್ಯೆ" ವಿರೋಧಿ "ರಾಜ್ಯಾಡಿಳಿತವಿರುವೆಡೆ" ಸಿಕ್ಕಿಹಾಕಿಕೊಂಡಾಗ ಆಕೆಯಲ್ಲಿ ಉಂಟಾಗುವ ತಳಮಳಗಳನ್ನು ಮತ್ತು ಅನುಭವಿಸುವ ಸಂಕಟಗಳನ್ನು ಒಪ್ಪವಾಗಿ ಚಿತ್ರಿಸಲಾಗಿದೆ. ಈ ವಿಷಯದಲ್ಲಿ ನಿರ್ದೇಶಕರಾದ ಟಿ.ಎಸ್.ನಾಗಾಭರಣರಿಗೆ ಒಳ್ಳೆಯ(ಪೂರ್ಣ ಅಂಕಗಳನ್ನು ನೀಡುವುದಕ್ಕೆ ಆಗಲಿಲ್ಲ) ಅಂಕಗಳನ್ನು ನೀಡಬಹುದು.

ಚಿತ್ರದ ಕಥೆ ಆರಂಭವಾಗುವುದು,

ಓಡು ಬಾ, ಓಡು ಬಾರೋ, ತಿಂಗಳ ಮಾವ. ನಮ್ಮೂರಂದಾವಾ ನೋಡು ಬಾ, ನೋಡು ಬಾರೋ..

ಎಂದು ತನ್ನಪಾಡಿಗೆ ತಾನು ಹಾಡುತ್ತಾ ಬರುತ್ತಿರುವಾಗ, ನಮ್ಮ ಓಲೆಗಾರನಿಗೆ ಅರ್ಧಶವವಾಗಿ ಮಲಗಿರುವ ಆಗಿನ ಮೈಸೂರು ರಾಜವಂಶದ ಓರ್ವ ಕನ್ಯೆ ಸಿಗುತ್ತಾಳೆ. ಸುಮ್ಮನೆ ಆಕೆಯನ್ನು ತಮ್ಮ ಮನೆಯ ಆರೈಕೆಯ ಸುಪರ್ಧಿಗೆ ಒಪ್ಪಿಸಿಬಿಟ್ಟು ಸುಮ್ಮನಾಗಿಬಿಟ್ಟಿದಿದ್ದರೆ, ಸರಿಹೋಗುತ್ತಿತ್ತು. ಆದರೆ ಪಾಪ, ನಮ್ಮ ಹುಡುಗ ಯಾವ್ಯಾವುದೋ ಸುಳಿಯಲ್ಲಿ ಸಿಲುಕುತ್ತಾನೆ.

ಚಿತ್ರ ಚೆನ್ನಾಗಿದೆ ಅಂತ ಒಪ್ಪಿದರೂ, ಹೆವ್ವಿ ಶೆಖೆ(Heavvvvy ಶೆಖೆ ಅಂದರೆ - ತುಂಬಾ ಬೋರಿಂಗ್ ಅಂತೆ) ತರಿಸುವಂತ ಎರಡು ಸನ್ನಿವೇಶಗಳಿವೆ. ಅದರಲ್ಲೂ ಕೊನೆಯ ಸೀನ್‌ಅಂತೂ(ಸಂಭಾಷಣೆಗೆ ಒತ್ತುಕೊಟ್ಟಿದ್ದರಿಂದ ಹೀಗಾಗಿರಬಹುದು) ತುಂಬಾ ಹೆವಿಯಾಗಿದೆ.

ಸರಿ ಸಿನಿಮಾ ಚೆನ್ನಾಗಿದೆಯೋ, ಇಲ್ಲವೋ ಹೇಳಿಬಿಡಿ ಅಂತ ನೀವು ಕೇಳಿದರೆ, ಚಿತ್ರದ ಒಂದು ಹಾಡಿನಲ್ಲೇ ನಿಮ್ಮ ಬೇಕಿರುವ ಉತ್ತರ ಇದೆಯೆಂದು ಹೇಳುವೆ.
ಬೇಕುS ಬೇಡS ನಡುವೆ ನೋಡಾS, ಕಲ್ಲರಳಿ ಹೂವಾಗಿSS. ನಾನಂತೂ ಬೇಕು ಬೇಡದ ನಡುವಿನಿಂದ ಹೊರಬಂದು ಚಿತ್ರವನ್ನು ಇಷ್ಟಪಟ್ಟು ನೋಡಿದೆ. ನಿರಾಸೆಯಾಗಲಿಲ್ಲ.

ಅಂದ ಹಾಗೆ ಈ ಚಿತ್ರದಲ್ಲಿ ಜಯಂತಿ ಸತ್ತ ಬಂಡೆ ಕಾಣುತ್ತದೆ. . ಹಾಗೆಯೇ ಕಲ್ಲರಲಿ ಹೂವಾಗಿ ಚಿತ್ರದ ಹಾಡುಗಳು ತುಂಬಾ ಚೆನ್ನಾಗಿ ಮೂಡಿ ಬಂದಿವೆ. ಅದರಲ್ಲೂ ಸಂಪಿಗೆಯ ಹಾಡು, ಕೆಲ ಕ್ಷಣಗಳ ಮಟ್ಟಿಗಾದರೂ ನಮ್ಮ ಚಿಕ್ಕ ಚೊಕ್ಕ ಚಿತ್ರದುರ್ಗವನ್ನು ನೆನಪಿಸುತ್ತವೆ. ಕೇಳಿ ನೋಡಿ. ಹಾಡುಗಳು ಇಷ್ಟವಾದರೆ ಸಿ.ಡಿ.ಯನ್ನೋ, ಕ್ಹಾಸೆಟ್ಟನ್ನೋ ಕೊಂಡುಕೊಳ್ಳಿ.