ಈ ಬಾರಿ ರಣಜಿ ಅತ್ಯಂತ ಕುತೂಹಲಕಾರಿಯಾಗಿ ಮುಂದುವರಿಯುತ್ತಿದೆ. ಅದರಲ್ಲೂ ಕರ್ನಾಟಕವಂತೂ ಸ್ಥಿರವಾದ ಪ್ರದರ್ಶನ ನೀಡುತ್ತಿದೆ ಎನ್ನುವಾಗಲೇ ಕೆಲವು ವೇಳೆ ಎಡವುತ್ತಾ ಮುನ್ನಡೆದಿದೆ.

ಅಂದ ಹಾಗೆ ನಿಮಗೆ ತಿಳಿದಿರಬಹುದು. ರಣಜಿಯಲ್ಲಿ ಒಂದು ಪಂದ್ಯ ಗೆದ್ದರೆ ೪ ಅಂಕಗಳು ನೀಡಲಾಗುತ್ತದೆ. ಹಾಗೆಯೇ, ಪಂದ್ಯ ಡ್ರಾ ಆದಾಗ ಇನ್ನಿಂಗ್ಸ್ ಮುನ್ನಡೆ ಪಡೆದಿದ್ದ ತಂಡಕ್ಕೆ ೨ ಅಂಕಗಳನ್ನು ನೀಡಲಾಗುತ್ತದೆ.

೨೦೦೬-೦೭ರ ಋತುವಿನ ಮೊದಲ ಪಂದ್ಯ ಸೋತಾಗ ನನಗೆ ತುಂಬಾ ಬೇಸರವಾಗಿತ್ತು, ಹಾಗೆಯೇ ಕೋಪವೂ ಬಂದಿತ್ತು ಎನ್ನಿ . ಆದರೆ ಆ ಪಂದ್ಯದ ನಂತರ ಸುಧಾರಿಸಿದ ನಮ್ಮವರು, ಎರಡು ಪಂದ್ಯಗಳನ್ನು ಗೆದ್ದು ಪೂರ್ಣ ಎಂಟು ಪಾಂಟುಗಳನ್ನು ಸಂಪಾದಿಸಿದರು.

ಮುಂದಿನ ಪಂದ್ಯದಲ್ಲಿ ಇನ್ನಿಂಗ್ಸ್ ಮುನ್ನಡೆಯಿಂದ ೨ ಪಾಯಿಂಟ್ ಪಡೆದರು. ತುಂಬಾ ಕುತೂಹಲ ಸೃಷ್ಟಿಸಿದ್ದ ಆಂಧ್ರದ ವಿರುದ್ಧದ ನಾಲ್ಕನೆಯ ಪಂದ್ಯದಲ್ಲಿ ನಮ್ಮವರು ಸ್ವಲ್ಪ ಎಡವಿದರು. ಎದುರಾಳಿಗಳಿಗೆ ೨ ಪಾಯಿಂಟ್ ಬಿಟ್ಟುಕೊಟ್ಟರು.

ಅದೆಲ್ಲ ಇರಲಿ, ಈಗ ಬಂದಿರುವ ಸುದ್ಧಿಯೆಂದರೆ, ಕರ್ನಾಟಕದವರು ತಮಿಳುನಾಡು ವಿರುದ್ಧದ ರಣಜಿ ಪಂದ್ಯದಲ್ಲಿ ೨೦೯ ರನ್ನುಗಳ ಮೊದಲ ಇನ್ನಿಂಗ್ಸ್‌ನಲ್ಲಿ ಮುನ್ನಡೆ ಪಡೆದಿದ್ದಾರೆ. ಸಂತೋಷಕರವಾದ ವಿಷಯ. ಇಂದು ಪಂದ್ಯದ ಮೂರನೆಯ ದಿನ.

ಅಂಕಪಟ್ಟಿಯಲ್ಲಿ ಕರ್ನಾಟಕ ಸದ್ಯಕ್ಕೆ ಮೂರನೆಯ ಸ್ಧಾನದಲ್ಲಿದೆ. ಅಂಕಪಟ್ಟಿಯನ್ನು ನೋಡಲು ಇಲ್ಲಿ ಎಡತಾಕಿ. ಈ ಬಾರಿ ಕರ್ನಾಟಕಕ್ಕೆ ಪ್ರಬಲ ಪೈಪೋಟಿ ನೀಡುತ್ತಿರುವವರೆಂದರೆ ಆಂಧ್ರ ಮತ್ತು ಬರೋಡ.

ಬನ್ನಿ, ಎಲ್ಲರೂ ಸೇರಿ ಕರ್ನಾಟಕ ರಣಜಿ ತಂಡಕ್ಕೆ ಶುಭವನ್ನು ಹಾರೈಸೋಣ.