ಬಹಳ ಹಿಂದೆ, ನನ್ನ ಅಕ್ಕನ ಕ್ಲಾಸಿನಲ್ಲಿ, ಮೇಷ್ಟರು ಅವಳ ಗೆಳತಿಗೆ, ಕಾಗುಣಿತ ಹೇಳಮ್ಮ ಅಂತ ಆಜ್ಞೆಯಿತ್ತರಂತೆ. ಆ ಹುಡುಗಿ ಕ, ಕಾ, ಕಿ, ಕೀ, ಕು.....ಅಂದದ್ದೇ ತಡ, ಸಾಕು ಸಾಕು ನಿಲ್ಸು, ಯಾರಮ್ಮ ನಿನಗೆ ಕಾಗುಣಿತ ಹೇಳಿಕೊಟ್ಟಿದ್ದು? ಅಂತ ಕೇಳಿದ್ದರಂತೆ.

ಕರ್ನಾಟಕದಲ್ಲಿ ಬಹುಶಃ ಒಂದೊಂದು ಪ್ರದೇಶದಲ್ಲಿ ಒಂದೊಂದು ರೀತಿಯಲ್ಲಿ ಅಕ್ಷರಾಭ್ಯಾಸ ಮಾಡಿಸುತ್ತಾರೆ ಎಂದು ಕಾಣುತ್ತದೆ. ಇದರಲ್ಲಿ ಒಂದು ಸರಿ ಮತ್ತೊಂದು ತಪ್ಪು ಎನ್ನಲಾಗುವುದಿಲ್ಲ.

ಕನ್ನಡದ ಏತ್ವಗಳು ಎಂಬ ಚರ್ಚೆಯಲ್ಲಿ ಶ್ರೀಕಾಂತ ಮಿಶ್ರಿಕೋಟಿಯವರ ಟಿಪ್ಪಣಿಯನ್ನು ಓದಿದ ಮೇಲೆ ಮೇಲಿನ ಘಟನೆ ನೆನಪಿಗೆ ಬಂತು.

ಹೌದು, ನಾನು ಹೇಗೆ ಕಾಗುಣಿತ ಕಲಿತಿದ್ದೆ ಎಂದು ಜ್ಞಾಪಕ ಮಾಡಿಕೊಳ್ಳಲು ಯತ್ನಿಸಿದಾಗ ನಮ್ಮಮ್ಮ ಹೇಳಿಕೊಡುತ್ತಿದ್ದ ಕಾಗುಣಿತ ನೆನಪಿಗೆ ಬಂತು. ನೋಡಿ, ನಮ್ಮಮ್ಮ ನನಗೆ ಹೇಳಿಕೊಟ್ಟ ಕಾಗುಣಿತ ಈ ರೀತಿಯಿದೆ.

ಕ ತಲ್‌ಕಟ್ಟು ಕ (ತಲೆಕೆಡದಿದ್ದರೆ ಸಾಕು ).
ಕ ತಲ್‌ಕಟ್ಟಿನ್‌ದೀರ್ಘಾ ಕಾ
ಕ ಗುಡ್ಸು ಕಿ
ಕ ಗುಡ್ಸಿನ್‌ದೀರ್ಘಾ ಕೀ
ಕ ಕ್ಕೊಂಬು ಕು
ಕ ಕ್ಕೊಂಬಿನ್‌ದೀರ್ಘಾ ಕೂ
ಕ ಕ್ಕೊಟೃಸುಳಿ ಕೃ
ಕ ಕ್ಕೊಟೃಸುಳಿನ್‌ದೀರ್ಘಾ ಕೄ
ಕ ಕ್ಕೇತ್ವ ಕೆ
ಕ ಕ್ಕೇತ್ವನ್‌ದೀರ್ಘಾ ಕೇ
ಕ ಕ್ಕೈತ್ವ ಕೈ
ಕ ಕ್ಕೋತ್ವ ಕೊ
ಕ ಕ್ಕೋತ್ವನ್‌ದೀರ್ಘಾ ಕೋ
ಕ ಕ್ಕೌತ್ವ ಕೌ
ಕ ಕ್ಕೊಂದ್‌ಸೊನ್ನೆ ಕಂ
ಕ ಕ್ಕೆರೆಡ್‌ಸೊನ್ನೆ ಕಃ

ಅಂದ ಹಾಗೆ, ನೀವುಗಳು ಹೇಗೆ ಕನ್ನಡ ಕಾಗುಣಿತ ಕಲಿತಿರಿ ? ನಿಮ್ಗಳಿಗೂ ಕೂಡ ನಿಮ್ಮಮ್ಮ ಹೀಗೆಯೇ ಕನ್ನಡ ಹೇಳಿ ಕೊಟ್ಟಿದ್ದರೆ ?