ಗೆಳೆಯರೆ, ಇತ್ತೀಚೆಗೆ ನಾನು ಸರ್ವಜ್ಞನ ವಚನಗಳನ್ನು ಓದ್ತಾ ಇದ್ದೀನಿ. ಅದರಿಂದ ಏನೇನೆಲ್ಲಾ ಅನಾಹುತ ಆಗಿದೆ/ಆಗ್ತಾ ಇದೆ/ಆಗುವುದರಲ್ಲಿದೆ ಅಂತ ಸಂಪದಿಗರಿಗೆ ಈಗಾಗಲೇ ತಿಳಿದಿರಬೇಕಷ್ಟೇ . ಸರ್ವಜ್ಞನ ವಚನಗಳು ಹೇಗೆ ಅಂದರೆ, ಕೆಲವೊಂದು ಸುಮ್ಮನೆ ಓದಿಸಿಕೊಂಡು ಹೋಗುತ್ತದೆ, ಕೆಲವು ಸಿಕ್ಕಾಪಟ್ಟೆ ಬೋರ್ ಹಿಡಿಸುತ್ತೆ, ಕೆಲವೊಂದು ಆಲೋಚನೆಗೆ ಗುರಿಮಾಡುತ್ತದೆ. ಆದರೆ ಸದರಿ ಬ್ಲಾಗಿನಲ್ಲಿ ಇರುವುದು ಸಿಕ್ಕಾಪಟ್ಟೆ ಮಜಾ ಕೊಡುವಂತಹ ವಚನಗಳು. ಇತ್ತೀಚೆಗೆ ಸಂಪದದಲ್ಲಿ ಇವುಗಳ ಪ್ರಸ್ತಾಪ ತುಂಬ ಬೇಕೇ ಬೇಕಾಗಿತ್ತು ಎಂದೆನಿಸಿ ಈ ಪುಟಾಣಿ ಬ್ಲಾಗ್

ಮೂರ್ಖಂಗೆ ಬುದ್ಧಿಯದು ನೂರ್ಕಾಲ ಹೇಳಿದರೆ
ಗೋರ್ಕಲ್ಲ ಮೇಲೆ ಮಳೆಹುಯಿದರಾಕಲ್ಲು
ಹೀರ್ಕೊಂಬುದುಂಟೇ ಸರ್ವಜ್ಞ

ನೆಲವನ್ನು ಮುಗಿಲನ್ನು ಹೊಲಿವರುಂಟೆಂದಿಹರೆ
ಹೊಲಿವರು ಹೊಲಿವರೆನಬೇಕು ಮೂರ್ಖನಲಿ
ಕಲಹವದು ಬೇಡ ಸರ್ವಜ್ಞ

ಒಲೆಗುಂಡನೊಬ್ಬನೆ ಮೆಲಬಹುದು ಎಂದರೆ
ಮೆಲಬಹುದು ಎಂಬುವನೆ ಜಾಣ ಮೂರ್ಖನ
ಗೆಲಲಾಗದಯ್ಯ ಸರ್ವಜ್ಞ - ಇದಂತೂ ಸೂಪರ್

ಬೆಟ್ಟವನು ಕೊಂಡೊಬ್ಬನಿಟ್ಟಿಹನು ಎಂದರೆ
ಇಟ್ಟಿಹನೆಂದು ಎನಬೇಕು ಮೂರ್ಖನ
ಬಟ್ಟೆ ಬೇಡೆಂದ ಸರ್ವಜ್ಞ

ಒಂದನ್ನು ಎರಡೆಂಬ ಹಂದಿಹೆಬ್ಬುಲಿಯೆಂಬ
ನಿಂದ ದೇಗುಲವು ಇದು ಎಂಬ ಮೂರ್ಖ ತಾ
ನೆಂದಂತೆ ಎನ್ನಿ ಸರ್ವಜ್ಞ

ಕೊಕೊ(ಕೊನೆಯ ಕೊಸರು) - ಕೆಲವೊಂದು ಸರ್ವಜ್ಞನ ವಚನಗಳು ವಾದ-ವಿವಾದಕ್ಕೆಂದೇ ಹೇಳಿಮಾಡಿಸಿದಂತಹವುಗಳಾಗಿವೆ :ಕಣ್ಣು ಹೊಡೆಯುತ್ತಾ: