ಅಂತೂ ಇಂತೂ ನಾನೂ ಕೂಡ ಕಳೆದ ಶುಕ್ರವಾರ ಆವರಣವನ್ನು ಓದಿದ್ದಾಯಿತು. ಅಂದ ಹಾಗೆ ನಾನು ಕೊಂಡುಕೊಂಡ ಪುಸ್ತಕ ಆವರಣದ ನಾಲ್ಕನೆಯ ಮುದ್ರಣದ್ದು. ಗೆಳೆಯ ಶ್ಯಾಮ್ ಕಿಶೋರ್ ಪ್ರಸ್ತಾಪಿಸಿದ ಹಾಗೆ ಯಾವುದೇ ಪುಸ್ತಕ ಓದುವದಕ್ಕೆ ಹಿಂಜರಿಕೆಯ ಅಗತ್ಯವಿಲ್ಲವಷ್ಟೇ, ಆದರೆ ಆಯಾ ಕೃತಿ ವೈವಕ್ತಿಕವಾಗಿ ಇಷ್ಟವಾಗುವುದು ಬಿಡುವುದು ಅವರವರ ಮಾನಸಿಕ ಸಿದ್ಧತೆ ಮತ್ತು ಪ್ರಬುದ್ಧತೆಗಳನ್ನು ಅವಲಂಬಿಸಿರುತ್ತದೆ. ಆವರಣದ ವಿಷಯದಲ್ಲಿ ಇದು ಹೆಚ್ಚು ಅನ್ವಯವಾಗುತ್ತದೆ.

ನಾನು ಇಲ್ಲಿಯವರೆಗೆ ಭೈರಪ್ಪನವರ ಸುಮಾರು ೯ ಕಾದಂಬರಿಗಳನ್ನು ಓದಿದ್ದೇನೆ. ಗೃಹಭಂಗ, ಸಾರ್ಥ, ಧರ್ಮಶ್ರೀ, ಮತದಾನ, ವಂಶವೃಕ್ಷ, ತಬ್ಬಲಿಯು ನೀನಾದೆ ಮಗನೆ, ಪರ್ವ, ಅನ್ವೇಷಣ ಮತ್ತು ಆವರಣ.

ಆವರಣ ಓದುವಾಗ, ಇಸ್ಲಾಂ ಧರ್ಮೀಯರ ಆಚರಣೆಗಳ ಬಗ್ಗೆ ಮತ್ತು ಇಸ್ಲಾಮಿಕ್ ರಾಜಮನೆತನಗಳು (ಮುಖ್ಯವಾಗಿ ಮೊಘಲ್ ಸಾಮ್ರಾಜ್ಯದ ಕೆಲವು ಚಕ್ರವರ್ತಿಗಳು) ಹಿಂದುಗಳನ್ನು ನಡೆಸಿಕೊಳ್ಳುತ್ತಿದ್ದ ಬಗ್ಗೆ ನೇರ ನಿಷ್ಠುರವಾದ ಪ್ರಸ್ತಾಪಗಳಿರುವದರಿಂದ ಕೆಲವೆಡೆ ಕಸಿವಿಸಿವುಂಟಾಗುವದು ನಿಜ. ಆದರೆ ಭೈರಪ್ಪನವರು ಪ್ರಸ್ತಾಪಿಸಿರುವ ಹಾಗೆ, ಕಾದಂಬರಿಯ ಆಶಯ ಸತ್ಯದ ತಳಹದಿಯ ಮೇಲೆ ಈಗಿನವರ ಸ್ನೇಹ ಬಾಂಧವ್ಯಗಳು ಸ್ಥಾಪಿತವಾಗಬೇಕೆಂಬುದು. ಇದೇ ರೀತಿಯ ಮಾತು ಕೆಲವು ವರ್ಷಗಳ ಹಿಂದೆ ಪಾಕಿಸ್ತಾನದ ಮಹಿಳಾ ಮಂತ್ರಿಯೊಬ್ಬರೂ ಹೇಳಿದ್ದರು. ಭಾರತ ಮತ್ತು ಪಾಕಿಸ್ತಾನ ನಡುವಣ ನಡೆದ ಯುದ್ಧಗಳ ನಿಜವಾದ ಕಾರಣವನ್ನು ಪಾಕಿಸ್ತಾನೀಯರು ಅರ್ಥಮಾಡಿಕೊಳ್ಳದೆ ಕೇವಲ ಪಾಕಿಸ್ತಾನ ಸರ್ಕಾರದ ಇತಿಹಾಸದ ಪುಸ್ತಕಗಳನ್ನು ಓದುವದು, ತುಂಬಾ ಅಪಾಯಕಾರಿ ಎಂದು ಆ ಮಹಿಳೆ ಹೇಳಿದ್ದರು. ಆ ಮಹಿಳೆ ಯಾರು, ಯಾವಾಗ ಹೇಳಿದ್ದರು ಎಂಬುದು ನನ್ನ ನೆನಪಿನಲ್ಲಿ ಇಲ್ಲ.

ಹಿಂದಿನವರು ಮಾಡಿದ ತಪ್ಪುಗಳಿಗೆ ಈಗಿನವರು ಜವಾಬ್ದಾರರಲ್ಲ ಎಂದು ಭೈರಪ್ಪನವರು ಸ್ಪಷ್ಟಪಡಿಸಿದ್ದರೂ, ಜಪಾನೀಯರು ಕ್ಷಮೆ ಕೇಳಿದ ಪ್ರಸ್ತಾಪ ಸಮಂಜಸವೇ ? ಇದು ಸಾರ್ವಜನಿಕವಾಗಿ ಚರ್ಚೆಗೆ ಬರಬಹುದು. ಈಗಾಗಲೇ ಭೈರಪ್ಪನವರು ಆವರಣವನ್ನು ಕುರಿತಾದ ಸಾಕಷ್ಟು ಚರ್ಚೆಗಳಲ್ಲಿ ಭಾಗವಹಿಸುತ್ತಿದ್ದಾರೆ. ನನ್ನ ಮತ್ತೊಂದು ಅನುಭವವೆಂದರೆ, ಈ ಹಿಂದು-ಇಸ್ಲಾಂ ನೆಲೆಯಲ್ಲಿ ಕಾದಂಬರಿಯ ಇನ್ನಿತರ ಕುತೂಹಲಕರ ವಿಷಯಗಳು ಮರೆಯಾಗಬಹುದು, ಉದಾ - ಆಧುನಿಕ ಶಿಕ್ಷಣವನ್ನು ಪಡೆದ ಯಾರಾದರೂ ಅನುಕಂಪದ ಹೊರತಾದ ಮಹಿಳಾವಾದಿಗಳಾಗಿರುತ್ತಾರೆ ಎಂಬುದು. ಈ ಮಾತಿಗೆ ತಕ್ಕ ತೂಕದ(??) ಪಾತ್ರವನ್ನೂ ಸೃಷ್ಟಿಮಾಡಿದ್ದಾರೆ ಭೈರಪ್ಪನವರು. ಹಾಂ! ಆವರಣದಲ್ಲಿ ಪ್ರಬುದ್ಧ ಪಾತ್ರಗಳಿರುವ ಹಾಗೆಯೇ, ಶಕ್ತಿಹೀನ ಪಾತ್ರಗಳೂ ಇವೆ. ಆವರಣದ ಪೂರ್ಣ ಅನುಭವ ಪಡೆಯಲು ಕಾದಂಬರಿಯನ್ನು ಕೊಂಡು ಓದಿ.

ಕಾದಂಬರಿಗಳನ್ನು ಹೋಲಿಸಿ ನೋಡುವದು ಅಷ್ಟು ತರವಲ್ಲವಾದರೂ, ಒಬ್ಬ ಓದುಗನಾಗಿ ನನಗೆ ಕೆಲವೆಡೆ ಆವರಣ ಸ್ವಲ್ಪ ಬೇಸರ ತರಿಸಿದ್ದು ಸುಳ್ಳಲ್ಲ. ಬಹುಶಃ ವೈದಿಕ ಧರ್ಮದ ಕುರಿತಾದ ಚರ್ಚೆಗಳು ಸಾರ್ಥದಲ್ಲಿದ್ದದ್ದು ಆ ಕಾದಂಬರಿ ಹೆಚ್ಚು ಇಷ್ಟವಾಗಲು ಒಂದು ಕಾರಣವಾಗಿದ್ದಿರಬಹುದು. ಮತ್ತು ಸಾರ್ಥದ ಹಿನ್ನೆಲೆಯಿಂದ ಆವರಣವನ್ನು ಓದಲು ಪ್ರಾರಂಭಿಸಿದ್ದು ಮತ್ತೊಂದು ಕಾರಣವಿದ್ದಿರಬಹುದು. ಕಾದಂಬರಿಯನ್ನು ಸಾರ್ಥದ ಹಿನ್ನೆಲೆಯಿಲ್ಲದೆ ಓದಿದರೆ ಬೇರೆ ಬೇರೆ ಅನಿಸಿಕೆಗಳು ಹೊರಹೊಮ್ಮಬಹುದು.

ಆವರಣದ ಕುರಿತಾಗಿ ಇಂಗ್ಲೀಷಿನಲ್ಲಿ ನೀಲಗ್ರೀವ ಅವರ ಬ್ಲಾಗ್ ಹಾಗು ಕನ್ನಡದಲ್ಲಿ ಬೇಳೂರ್ ಸುದರ್ಶನ ಅವರ ಬ್ಲಾಗ್ ಚೆನ್ನಾಗಿದೆ. ಓದಿ ನೋಡಿ. ಇನ್ನೂ ಯಾವುದಾದರು ರಿವ್ಯೂಗಳಿದ್ದರೆ ಅವುಗಳ ಬಗ್ಗೆ ಬೆಳಕು ಚೆಲ್ಲಿ. ಈ ಆವರಣ ಕಾದಂಬರಿ ಬಿಡುಗಡೆಯಾದ ಸಂದರ್ಭದಲ್ಲಿ, ಒಬ್ಬ ಓದುಗನಾಗಿ, ನನಗೆ ಮತ್ತೊಂದು ವಿಷಯದ ಪ್ರಸ್ತಾಪ ತುಂಬಾ ಉಚಿತವೆನಿಸಿತು. ಕೆಲವೇ ದಿನಗಳ ಹಿಂದೆ ವೈಭವ ಅವರು ಸಾಹಿತಿಗಳ ವೈಚಾರಿಕ ಜಗಳ ಎಂಬುದಾಗಿ ಬ್ಲಾಗಿದ್ದರು. ಆ ಬ್ಲಾಗ್ ಓದಿ ನೋಡಿ. ಆವರಣ ಕಾದಂಬರಿಯನ್ನು, ಒಬ್ಬ ಓದುಗ, ಸಾಹಿತಿಗಳ ವೈಚಾರಿಕ ಜಗಳ ಎಂದು ಭಾವಿಸುವುದಾದರೆ, ಅದಕ್ಕೆ ಓದುಗನೇ ಜವಾಬ್ದಾರನಾಗಬೇಕಾಗುತ್ತದೆ