ನಿಜ್ವಾಗ್ಲೂ ಗೆಳೆಯರೆ, ಇದರ ಬಗ್ಗೆ ಬರೆಯಲೇಬೇಕು. ಈಗಾಗಲೇ ಇದರ ಬಗ್ಗೆ ಸಂಪದದಲ್ಲೇ ಇಬ್ಬರು ಬ್ಲಾಗಿದ್ದರೂ, (೧.kannadiga_1956 ಬ್ಲಾಗು, ೨. mrkryan ಬ್ಲಾಗು, ) ನನಗೆ ಸಮಾಧಾನವಾಗುತ್ತಿಲ್ಲ. ಇದರ ಬಗ್ಗೆ ಏನಾದರು ಹೊಸದಾಗಿ ಬರೆಯಲೇಬೇಕು ಎಂದನಿಸುತ್ತಿದೆ.

ನಾನು ಕೆಲವೇ ಕೆಲವು ಮಾತುಗಳನ್ನು ಬರೆಯುತ್ತೇನೆ.

೧. ಚಿತ್ರದ ಆರಂಭ - ಚಿತ್ರದ ಕಥೆ ಮೊದಲ ದೃಶ್ಯದಲ್ಲೇ ಪ್ರಾರಂಭವಾಗುತ್ತದೆ. ಎಷ್ಟೋ ಸಿನಿಮಾಗಳಲ್ಲಿ ಇಂಟರ್ವಲ್ ಇನ್ನೇನು ಪ್ರಾರಂಭವಾಗಬೇಕು ಆಗ ನಿಜವಾದ ಕಥೆ ಆರಂಭವಾಗುತ್ತದೆ (ಕೆಲವದರಲ್ಲಿ ಕಥೆಯೇ ಇರುವುದಿಲ್ಲ ), ಆದರೆ ಈ ಚಿತ್ರದಲ್ಲಿ ಎಲ್ಲವೂ ಸೀದಾಸಾದಾ.

೨.ಚಿತ್ರದ ಹಾಡುಗಳು

೨.೧ - ಚಿತ್ರದ ಹಾಡುಗಳು ತುಂಬಾ ಇಂಪಾಗಿದೆ. ಆದರೆ ಉಚ್ಛಾರಣೆ ಕೆಲವೆಡೆ ಅಭಾಸಗಳನ್ನುಂಟು ಮಾಡುವಂತಿದೆ. ಹಾಡುಗಳ ವೈಶಿಷ್ಟ್ಯವೆಂದರೆ ಭಾವನೆಗಳಿಗೆ ಒಪ್ಪವಾಗಿ ಕಳೆ ಕಟ್ಟಿಕೊಟ್ಟಿದೆ. ಕೆಲವು ಕಡೆ ವಯೋಲೀನ್ ಟ್ಯೂನುಗಳಿರುವುದರಿಂದ ನನಗೆ ವೈಯಕ್ತಕವಾಗಿ ಮತ್ತಷ್ಟು ಇಷ್ಟವಾಯಿತು. ನೆನಪಿರಲಿ ಚಿತ್ರದ ಹಾಡುಗಳೂ ಕೂಡ ಇಂಥ ಮೋಡಿ ಮಾಡುವಲ್ಲಿ ಯಶಸ್ವಿಯಾಗಿತ್ತು. ಅಂದ ಹಾಗೆ ನಾನು ನೆನಪಿರಲಿ ಚಿತ್ರ ನೋಡಿದ್ದು ಸುಮಾರು ಬಿಡುಗಡೆಯಾದ ೧೨೫ ದಿನಗಳಾದ ಮೇಲೆ. ಅಷ್ಟು ದಿನವೂ ಅದರ ಹಾಡುಗಳನ್ನು ಕೇಳದ ದಿನವಿರಲಿಲ್ಲ. ಮುಂಗಾರು ಮಳೆಯೂ ಅಷ್ಟೇ, ದಿನವೂ ಕೇಳುತ್ತಲೇ ಇದ್ದೇನೆ. ನೀವುಗಳು ಯಾರಾದರು ಇನ್ನೂ ಕೇಳಿಲ್ಲವಾದರೆ, ಈಗಲೇ ಕೇಳಿ.

೨.೨ - ಈ ಚಿತ್ರದ ಆಡಿಯೋ ಸಿ.ಡಿಯಲ್ಲಿ ಸುಮಾರು ಏಳು ಹಾಡುಗಳು ಇದ್ದರೂ, ಚಿತ್ರದಲ್ಲಿ, ಕೇವಲ ನಾಲ್ಕು ಹಾಡುಗಳು ಮಾತ್ರವೇ ಪೂರ್ಣವಾಗಿ ಇದೆ. ಉಳಿದ ಹಾಡುಗಳ ಒಂದೆರೆಡು ಸಾಲುಗಳು ಮಾತ್ರವೇ ಪ್ರಸಾರವಾಗುತ್ತದೆ. ಚಿತ್ರದ ಹಾಡುಗಳನ್ನು ಆಡಿಯೋ ಸಿ.ಡಿ, ಅಥವಾ ಕ್ಯಾಸೆಟ್ಟುಗಳಲ್ಲಿಯೇ ಕೇಳಬೇಕು. ಚಿತ್ರದ ಹಾಡುಗಳನ್ನು ಕನ್ನಡ ಆಡಿಯೋ.ಕಾಂನಲ್ಲಿಯೂ ಕೇಳಬಹುದು. ಆದರೆ ನನ್ನ ವಿನಂತಿಯೇನೆಂದರೆ ನೀವು ಆಡಿಯೋ ಸಿ.ಡಿಯನ್ನು ಕೊಂಡುಕೊಳ್ಳಿ ಸುಮಾರು ೩೫-೫೦ರೂ. ದುಡ್ಡಿಗೆ ಖಂಡಿತವಾಗಿಯೂ ಮೋಸ ಆಗುವುದಿಲ್ಲ.

ಬಹುಶಃ ಇದು ಕನ್ನಡದಲ್ಲಿ ಟ್ರೆಂಡ್ ಸೆಟ್ಟರ್ ಆಗಿ ಮುಂದುವರಿಯಬಹುದು. ಅಂದರೆ ಮೂಲಚಿತ್ರದಲ್ಲಿ ಅದರ ಎರಡು ಸಾಲುಗಳನ್ನು ಮಾತ್ರವೇ ಕೇಳಿಸಿ, ಪೂರ್ತಿ ಹಾಡುಗಳನ್ನು ಆಡಿಯೋ ಸಿ.ಡಿ. ಕೇಸೆಟ್ಟುಗಳ ಮೂಲಕ ಜನರಿಗೆ ಸೇರುವಂತೆ ಮಾಡುವುದು. ನೋಡುಗರಿಗೆ ೨.೫ ಘಂಟೆ ಕೂತಿರುವುದೂ ತಪ್ಪುತ್ತದೆ. ಹಾಡು ಕೆಟ್ಟದಾಗಿದ್ದರೆ ಜನಗಳು ಬಯ್ಯುವುದೂ ತಪ್ಪುತ್ತೆ.

೩. ಈ ಚಿತ್ರವನ್ನು ಹುಡುಗರು ನೋಡಲೇಬೇಕು. ಇಷ್ಟು ವರ್ಷ ಹುಡುಗಿಯರು ತಮ್ಮ ಭಾವನೆಗಳ ವ್ಯೂಹದಿಂದ ಹೊರಬರಲೆತ್ನಿಸಿ ಹುಡುಗರನ್ನು ಗೋಳಿಡಿಸುತ್ತಿದ್ದರು. ಆದರೆ ಈ ಚಿತ್ರದಲ್ಲಿ ...ನೋ ಕಾಮೆಂಟ್ಸ್. ಕಾಲೇಜು ಓದುತ್ತಿರುವ ನಿಮ್ಮ ಮಕ್ಕಳನ್ನು, ತಮ್ಮಂದಿರನ್ನು, ತಂಗಿಯರನ್ನು, ಅಥವಾ ಯಾರನ್ನೇ ಆದರೂ ಕರೆದುಕೊಂಡು ಹೋಗಿ.

೪. ಮುಖ್ಯವಾಗಿ ನಟ ಗಣೇಶ, ಇದರಲ್ಲಿ ಇವನನ್ನು ಯಾರಿಗೂ ಹೋಲಿಕೆ ಮಾಡಲಾಗಲಿಲ್ಲ. ಸಾಮಾನ್ಯವಾಗಿ, ಯಾರಾದರೂ ಒಬ್ಬರ ಹೊಸಬರು ಚಿತ್ರದಲ್ಲಿ ಮಾಡಿದಾಗ, "ಅವನು ಈ ಆಂಗಲ್ನಲ್ಲಿ ಅವನ್ ತರಹ ಕಾಣ್ತಾನೆ, ಅವನ ಡೈಲಾಗ್ ಇವನ್ ತರಹ ಇದೆ ಎನ್ನುವ ಮಾತುಗಳು ಬರುತ್ತವೆ. ಆದರೆ ಗಣೇಶನ ಮಾತುಗಳನ್ನೇ ಆಗಲೀ, ಭಾವನೆಗಳನ್ನು ವ್ಯಕ್ತಪಡಿಸುವ ರೀತಿಯನ್ನಾಗಲೀ ಯಾರಿಗೂ ಹೋಲಿಸಲಾಗುವುದಿಲ್ಲ. ಬಹುಶಃ ಈ ರೀತಿಯ ಭಾವನಾತ್ಮಕ ಸನ್ನಿವೇಶಗಳನ್ನು ಹುಡುಗರು(ನೆನಪಿರಲಿ ಹುಡುಗರು, ಮಧ್ಯವಯಸ್ಕರು ಮತ್ತು ಮುದುಕರು ಹುಡುಗರ ಪಾತ್ರ ಹಾಕುವುದಲ್ಲ) ಮಾಡಿಲ್ಲದಿರುವುದೋ ಏನೋ. ಅಲ್ಲದೇ ಈ ಚಿತ್ತದಲ್ಲಿ ಇವನಲ್ಲದೆ ಬೇರೆಯವನು ಮಾಡಿದ್ದರೆ ಹೇಗಿರುತ್ತತ್ತು ಎಂಬ ಪ್ರಶ್ನೆಗೆ ಉತ್ತರ ಸಿಗುವುದಿಲ್ಲ. ಕಲ್ಲರಳಿ ಹೂವಾಗಿ ಚಿತ್ರದ ವಿಜಯ ರಾಘವೇಂದ್ರನಲ್ಲಿ ರಾಜ್ಕುಮಾರನನ್ನು ಕಂಡವರು ತುಂಬಾ ಮಂದಿ. :ಚಪ್ಪಾಳೆ:

೫. ಟಿಕೇಟುಗಳ ಬಗ್ಗೆ - ಈಗೀಗ ಫಿಲ್ಮಗಳು ಬ್ಲಾಕಿನಲ್ಲಿ ಎಷ್ಟಕ್ಕೆ ಮಾರಾಟವಾಗುತ್ತದೆ ಎನ್ನುವುದನ್ನವಲಂಬಿಸಿ ಚಿತ್ರದ ಗುಣಮಟ್ಟ ಅಳಿಯುವ ಪ್ರವೃತ್ತಿ ಜಾಸ್ತಿಯಾಗುತ್ತಿರುವುದರಿಂದ, ಕೊನೆಯ ಮಾಹಿತಿ. ೬:೩೦ಕ್ಕಿದ್ದ ಷೋಗೆ ನಾವುಗಳು ೫:೧೫ ಗೆ ಥಿಯೇಟರ್ರಿಗೆ ಹೋದರೂ ನಮಗೆ ಟಿಕೇಟು ಸಿಗಲಿಲ್ಲ,
೫.೧. ಬಾಲ್ಕನಿ ಟಿಕೇಟುಗಳು ಬ್ಲಾಕಿನಲ್ಲಿಯೂ ಸಿಗಲಿಲ್ಲ.
೫.೨. ಎರಡನೆ ದರ್ಜೆಯ ಟಿಕೇಟುಗಳ ಬೆಲೆ ೨.೫ ಪಟ್ಚು ಹೆಚ್ಚಿತ್ತು. ಕೊನಗೆ ನಾವು(ಅಣ್ಣಂದಿರು, ಅತ್ತಿಗೆಯಂದಿರು ಎಲ್ಲರೂ) ೯:೩೦ರ ಷೋವನ್ನು ಬಾಲ್ಕನಿಯಲ್ಲಿ, ನೋಡಿ, ಆನಂದಿಸಿ, ಭಾವಪರವಶರಾಗಿ ರಾತ್ರಿ ೧೨:೧೫ ಸಮಯಕ್ಕೆ ಮನೆ ಸೇರಿದೆವು.

ಕಿವಿಮಾತು

೧. ಮೊದಲು ಚಿತ್ರದ ಹಾಡುಗಳನ್ನು ಕೇಳಿ ನಂತರ ಸಿನಿಮಾ ನೋಡಿ. ಯಾವ ಸನ್ನಿವೇಶದಲ್ಲಿ ಯಾವ ಹಾಡು ಅಂತ ನೀವೇ ಊಹಿಸಬೇಕಾಗುತ್ತದೆ. ಮೊದಲೇ ಹೇಳಿದ ಹಾಗೆ ಚಿತ್ರದಲ್ಲಿ ಎಲ್ಲಾ ಹಾಡುಗಳ ಎಲ್ಲಾ ಸಾಲುಗಳು ಇಲ್ಲ.
೨. ಈ ಗಣೇಶ ಹೊಗಳಿಕೆಗಳ ಅಲೆಯಲ್ಲಿ ಕೊಚ್ಚಿಹೋಗದಿರಲಿ. ಯಾರ ದೃಷ್ಟಿಯೂ ಇವನ ಮೇಲೆ ಬೀಳದಿರಲಿ.
೩. ಒಟ್ಟಿನಲ್ಲಿ ಯದ್ವಾ-ತದ್ವಾ(ಈಗ ಕಾಮಿಡಿ ಟೈಮಾಗಿಟ್ಟಿದ್ದಾನೆ ) ಗಣೇಶ ತನ್ನತನವನ್ನು ಕಾಪಾಡಿಕೊಳ್ಳಲಿ ಎಂದು ಎಲ್ಲರೂ ಹಾರೈಸೋಣ.