ಬಿಡಲಾರೆ ನಾ ಸಿಗರೇಟು,
ಹುಡುಗಿ ನಿನ್ನಂತೆಯೇ ಅದು ಥೇಟು,
ಬಿಡಬಲ್ಲೆನೇ ನಾ ನಿನ್ನ ಚಿನ್ನ ಹಾಗೇ ಸಿಗರೇಟನ್ನ...

ಸಿಗರೇಟು ಹೊಗೆಯಾಗಿ ತುಳುಕಿ ಬಳುಕಿ ಗಾಳಿಯಲ್ಲಿ ಲೀನ.
ನೀನೋ ಘಮ್ಮಂತೆ ............................ವಸಂತಗಾನ.

ಈ ಹಾಡು ಎಲ್ಲೋ ಕೇಳಿದ ಹಾಗಿದೆಯೇ. ಯಾರು ಬರೆದದ್ದು, ಯಾರು ಯಾವಾಗ ಹಾಡಿದ್ದು ಎಂದು ನನಗೆ ತಿಳಿದಲ್ಲ. ಆದರೆ ಬಹಳ ಖುಷಿಕೊಡುತ್ತದೆ. ಸರಿ ಈಗೇಕೆ ಸಿಗರೇಟು ದ್ವೇಷಿಯೊಬ್ಬನ ಕೈಯಿಂದ ಸಿಗರೇಟಿನ ಬಗ್ಗೆ ಬ್ಲಾಗು ಎನ್ನುತ್ತಿದ್ದೀರಾ. ಇಲ್ಲಿ ಕೇಳಿ, ನೆನ್ನೆ ಸಿಗರೇಟಿನ ಬಗ್ಗೆ ಒಂದು ಸ್ವಾರಸ್ಯಕರ ವಿಷಯ ತಿಳಿಯಿತು ಅದೂ ಒಬ್ಬ ಆಟೋ ಚಾಲಕನಿಂದ.

ಸೂಚನೆ : ನಾನು ಪಕ್ಕಾ ಸಿಗರೇಟು ದ್ವೇಷಿ. ಸಿಕ್ಕಾಪಟ್ಟೆ ಅಸಹನೆ ನನಗೆ ಈ ಸಿಗರೇಟಿನ ಮೇಲೆ. ಅದನ್ನು ದೇಶದಿಂದ ಹೊರಗಿಡಬೇಕು ಎಂಬ ಕೂಗಿಗೆ ನಾನೂ ಸಹ ಜೊತೆಗೂಡಿಸುತ್ತೇನೆ. ಸಿಗರೆೇಟು ಸೇದುವವರು ಕೆಲವೊಮ್ಮೆ ಗೆಳೆಯರೇ ಆದರೂ ಈ ಸಿಗರೇಟಿನ ಕಾರಣದಿಂದ ನನಗೆ ಅವರ ಮೇಲೆ ಸಿಟ್ಟು.

ನೆನ್ನೆಯ ದಿವಸ, ಮಂಗಳವಾರ, ಬೆಂಗಳೂರಿನಲ್ಲಿ ಸಿಕ್ಕಾಪಟ್ಟೆ ಮಳೆ. ಬಸವನಗುಡಿ, ಶಾಂತಿನಗರ, ಜಯನಗರ, ಬನಶಂಕರಿ, ಮಲ್ಲೇಶ್ವರ, ಶ್ರೀನಗರ, ಹೀಗೆ ಎಲ್ಲೆಲ್ಲೂ ಮಳೆ. ನಾನು ಕೆಲಸದ ನಂತರ ಮನೆ ಸೇರಿದ ಮೇಲೆ, ರಾತ್ರಿ ೧೧:೦೦ ಯಾರೋ ಪುಣ್ಯಾತ್ಮರ ಮನೆಗೆ ನನ್ನ ಒಬ್ಬ ಅಣ್ಣನ ಜೊತೆ ಅನಿವಾರ್ಯವಾಗಿ ಹೋಗಬೇಕಾಯಿತು. ಮಳೆಯಾಗುತ್ತಿದ್ದರಿಂದ ನಮ್ಮ ಬೈಕಿನಲ್ಲಿ ಹೋಗಲಾಗುತ್ತಿರಲಿಲ್ಲ. ಆದಕಾರಣ, ಆಟೋ ಹುಡುಕುತ್ತಾ ಹೊರಟೆವು. ಪುಣ್ಯಕ್ಕೆ ನಮಗೊಬ್ಬ ಆ ರಾತ್ರಿಯ ಮಳೆ, ಚಳಿಯಲ್ಲೂ ಸಹ ಹೆಂಡ, ಬೀಡಿ, ಸಿಗರೇಟಿನ ಮೊರೆ ಹೋಗಿರದಿದ್ದ ಆಟೋ ಚಾಲಕನೊಬ್ಬ ಸಿಕ್ಕಿದ. (ಆಟೋದವರೂ ಸಹ ಸೃಜನಶೀಲರಲ್ಲವೇ). ಸರಿ ಹತ್ತಿ ಕುಳಿತೆವು. ಸ್ವಲ್ಪ ಸಮಯದ ನಂತರ ಒಂದು ವಿಚಿತ್ರ ಗಮನಿಸಿದೆವು. ಆ ಆಟೋಗೆ, swiper ಇರಲಿಲ್ಲ. ಆದರೂ ಆ ಮಳೆಯಲ್ಲೂ ಸಹ ಹೊರಗಿನ ದೃಶ್ಯಗಳು ಆಟೋ ಗಾಜಿನ ಮೂಲಕ ಸ್ಪಷ್ಟವಾಗಿ ಕಾಣುತ್ತಿದ್ದವು.

ಊಹಿಸಿ, ಆಟೋ ಓಡುತ್ತಿದೆ, ಮಳೆ ಬರುತ್ತಿದೆ, ಆಟೋ ಗಾಜಿಗೆ swiper ಇಲ್ಲ, ಆದರೂ ಹೊರಗಿನ ದೃಶ್ಯಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ . ಇದು ಹೇಗೆ ಸಾಧ್ಯ. ಸರಿಯೆಂದು ಚಾಲಕನನ್ನೇ ಕೇಳಿದೆವು. ಆತ ನೀಡಿದ ಉತ್ತರ ಬಹಳ ಸ್ವಾರಸ್ಯಕರವಾಗಿದೆ. ಆತ ಹೇಳಿದ, "ಸಿಗರೇಟು ತೊಗೊಂಡು, ಆಟೋ ಗಾಜಿಗೆ ಉಜ್ಜಿಟ್ಟಿದ್ದರೆ ಎಷ್ಟೇ ನೀರು ಬಿದ್ದರೂ ನಿಲ್ಲಲ್ಲ ಸಾರ್, ತಕ್ಷಣ ಹೊರಟುಹೆೋಗುತ್ತೆ."

ನಾವು ಮತ್ತೆ ಈ ಗಾಜಿನ ಬಗ್ಗೆ ಮಾತು ಮುಂದುವರಿಸಲಿಲ್ಲ. ಆದರೆ ಈ ವಿಷಯ ಕೇಳಿ ನನಗಂತೂ ದಂಗುಬಡಿದಂತಾಯಿತು. ಆತ ಹೇಳಿದ್ದು ಎಷ್ಟು ನಿಜವೋ, ಸುಳ್ಳೋ ಗೊತ್ತಿಲ್ಲ. ಆದರೆ ಆಟೋ ಮಧ್ಯದ ಗಾಜಿನಿಂದ ಹೊರಗಿನ ದೃಶ್ಯಗಳನ್ನು ಮಾತ್ರ ಸ್ಪಷ್ಟವಾಗಿ ನೋಡಬಹುದಿತ್ತು. ಅದೇ ಮಧ್ಯದ ಗಾಜಿನ, ಆಜುೂೂೂಬಾಜಿನಲ್ಲಿದ್ದ ಗಾಜುಗಳಿಂದ ಒಂದು ಚೂರು ನೋಡಲಾಗುತ್ತಿರಲಿಲ್ಲ. ಬಹುಶಃ ಆ ಗಾಜುಗಳಿಗೆ ಸಿಗರೇಟು ಉಜ್ಜಿರಲಿಲ್ಲ ಅನಿಸುತ್ತೆ.

ಈ ವಿಷಯ ನಿಮಗೆ ತಿಳಿದಿತ್ತೆ. ಯಾರಿಗೂ ಹೇಳಬೇಡಿ ಮತ್ತೆ, ಸಿಗರೇಟು ವ್ಯಾಪಾರಿಗಳು ಸುಗ್ಗಿಯಾಚರಿಸಿಯಾರು.

ಇಲ್ಲಿ ಹೀಗಾದರೆ ಅಲ್ಲಿ ದೂರದಲ್ಲಿ ಒಬ್ಬ ಬರ್ಮುಡಾ ಮತ್ತು ಬನಿಯನ್ ಹಾಕ್ಕೊಂಡು, ಮೈ ಕೈಗೆ ಚೈನು ಹಾಕಿಕೊಂಡು, ಕತ್ತಲಲ್ಲೂ ಕೂಲಿಂಗ್ ಗಾಜು (ಅಲ್ಲಲ್ಲ ಗ್ಲಾಸು) ಹಾಕಿಕೊಂಡು, ಕಾರಿನಲ್ಲಿ ಸಿಗರೇಟು ಸೇದುತ್ತಿದ್ದ, ಆ ಕ್ಷಣದಲ್ಲಿ, ಆ ಕಾರಿನವನಿಗಿಂತ ಈ ಆಟೋ ಚಾಲಕನು ನನಗೆ ಸಾವಿರ ಪಾಲು ಉತ್ತಮನಾಗಿ ಕಂಡನು.